ལོ་རིམ་བཞི་པའི་སློབ་གཉེར་བ། དཀོན་མཆོག་བསམ་གཏན།
ལྭ་བ་དམར་སྨུག་ཅིག་གི་ཐུ་འོག་ནས།།
དར་བའི་ལང་ཚོ་ཟད་ལ་རན་ཁའི་བར།།
གྲོད་པའི་ཨི་ཁུང་དཀོར་གྱིས་གསོབ་བརྒྱངས་ལས།།
རེ་བའི་ཨ་ལོང་དེ་ཡང་རྒྱང་དུ་ལྷག །
བགྲང་བྱའི་ལྷུ་ལག་བརྩེགས་པའི་ཕྲེང་ཐག་ནས།།
ཐོས་བསམ་ལས་ལ་བརྩོན་པའི་ཁུར་ཆེན་ཞིག །
མ་ནུས་ཨུ་ཚུགས་བྱེད་པའི་འབྲས་བུ་ལ།།
འཛིན་གྲྭའི་གདང་བུ་འཛེགས་པའི་མིང་བྱང་ཞིག །
མགོ་བོའི་ཀླད་ནས་མཐིལ་གྱི་རུས་རྟིང་བར།།
ཡིད་སེམས་རྒོད་པོས་འདང་ཞིག་རྒྱག་ཉིན་མོར།།
འགྱེལ་མ་ལངས་ཀྱི་ལུས་གཟུགས་གོག་པོ་ལ།།
འབྲལ་འདོད་ཡེ་ནས་མེད་པའི་འདུན་པ་ཞིག །
བསམ་གཞིག་ནང་ལ་བསྐོར་བའི་སྣང་བརྙན་ནི།།
ཡོད་ཚད་རང་ལ་དགོས་པའི་ཧམ་སེམས་ལས།།
མེད་ན་འགྲིག་གོ་སྙམ་པའི་ཆོག་ཤེས་ཤིག།
ང་ཡི་སེམས་ལ་གཏན་ནས་མེད་ཚོད་ཅིག །
ཕྱི་གཟུགས་གྲྭ་རྐྱང་ཡིན་པའི་སྣང་བ་ལས།།
ནང་སེམས་གྱོང་པོ་འདི་ཡི་གཤིས་ཁམས་ལ།།
ཆོས་པའི་གྲིབ་གཟུགས་ཙམ་ཡང་མེད་ལུགས་དེས།།
སྙིང་ཆུང་གོང་བུ་གཏོར་བའི་ཐོ་བ་ཞིག །
མ་འབད་ངང་གིས་འབྱུང་བའི་ལྷན་སྐྱེས་ནི།།
དེང་གི་ཁ་པར་ཁྲ་ཁྲ་ཟིང་ཟིང་ལ།།
ཡག་བཙོག་སྡུག་བཙོག་སོ་སོར་མ་འདྲེས་པར།།
ང་ཡི་ཀླད་གཏིང་འདི་རུ་གསལ་གསལ་ཞིག །
རྒྱ་བོད་མཁས་པའི་གཞུང་ལུགས་མང་མང་ཞིག །
ཐོས་པའི་ཁལ་སྒྱེ་ལོ་ཟླ་རིང་མོ་ལ།།
གོམ་ཁའི་སྣེ་མོ་དེ་ཕྱོགས་བསྙེགས་ན་ཡང་།།
གྲུབ་མཐའི་འཛིན་མཚམས་དེ་ཡང་འཕྱང་མོ་ཉུག །
མི་སྐྱོན་མཐོང་བའི་དྲག་པོའི་རྣམ་འགྱུར་དེ།།
ཕྱིར་ཕུད་གཏོང་བའི་བློ་སྟོབས་མི་འདུག་ཀྱང་།།
རང་མཚང་ནང་ལ་བསྐུངས་པའི་རུལ་དྲི་དེ།།
རྒྱ་གྲོང་འཁྲིས་ལ་གཤོམ་འདོད་དེ་བས་མེད།།
ཕྱིར་ལྡོག་ནང་ལ་ཉུལ་བའི་གད་སྙིགས་དེས།།
སུ་ཡི་སྣ་ལ་འཚུབ་ཆ་མ་བསླངས་ཀྱང་།།
མི་བུའི་རྣམ་ཤེས་ཐོགས་པའི་ཟུར་མཐའ་ནས།།
ཚོར་བ་སྐྱུར་མོ་ཞིག་གི་ཧར་སྒྲ་ཡིན།།
