ལོ་རིམ་བདུན་པའི་སློབ་གཉེར་བ། ལྷག་པ་ཚེ་རིང་།
ཨ་མ་ལགས། ངས་ཁྱེད་རང་དྲན་གྱིན་ཡོད། ཁྱེད་ཀྱི་བརྩེ་སེམས་དང་བྱམས་སྐྱོང་བཀའ་དྲིན་རྣམས་ངས་ནམ་ཡང་ཡིད་ལ་འཁོར་ཞིང་ཡང་ཡང་དྲན་གྱིན་ཡོད། ཨ་མ་ལགས། གུས་པས་ཉིན་ལྟར་ཁྱེད་རང་འདི་ལྟར་དྲན་བཞིན་ཡོད་དེ། ང་ཐོག་མར་འཇིག་རྟེན་འདིར་གོམ་ཁ་འཇོག་པ་དང་ལྷན་དུ་ཁྱེད་ཀྱི་བརྩེ་སེམས་ཀྱང་ངའི་གོམ་འགྲོས་དང་མཉམ་དུ་འགྲོགས། ང་ལ་དམིགས་ཡུལ་དང་འདུ་ཤེས་གང་ཡང་མེད་པར་གོག་འགྲོས་དང་གོམ་པ་འཁྱར་འཁྱོར་ཞིག་གིས་གང་སར་ལྡོམ་ཡང་དེ་དང་དེའི་སྐབས་དག་ཏུ་ཁྱེད་ཀྱིས་བྱམས་བརྩེ་དང་སྤྲོ་འཛུམ་ངང་ཕྱག་ཟུང་སྲིང་བཞིན་ངའི་རྗེས་སུ་སྙེག མ་ཟད་ཨ་མ་ཁྱེད་ཀྱིས་འཁྱག་ལྟོགས་དང་ཚ་གྲང་གི་ངལ་བ་དང་དུ་བླངས་ཤིང་། ལུས་སེམས་ཀྱི་སྡུག་བསྔལ་ཁོང་དུ་སྦས་ཏེ་འཛུམ་དམུལ་དམུལ་གྱི་སྒོ་ནས་མཛའ་སེམས་དང་བྱམས་སྐྱོང་ཚད་མེད་གནང་བའི་བཀའ་དྲིན་དྲོན་མོའི་འོག་ཚ་སོབ་སོབ་ངང་འཚར་ལོངས་བྱུང་ཞིང་། ལྟོས་མེད་ཀྱིས་རྐང་པའི་འདེགས་འཇོག་དང་གོམ་ཁ་ཆེ་རུ་སྤོ་ནུས་པ་ནས་བཟུང་ཁ་ཕྱོགས་མ་ངེས་པའི་ཡུལ་གྲུ་དུ་མ་ཞིག་ལ་འཁྱམས་ཉུལ་བྱས། སྐབས་དེ་དག་ཏུ་ཡང་ཨ་མ་ཁྱེད་ཀྱི་མཛའ་བརྩེའི་སྤྱན་ཟུང་གིས་ངའི་རྒྱབ་གཟུགས་ལ་བལྟས་ཤིང་སྨོན་འདེབས་དང་། གདུང་འབོད། རེ་སྒུག་རྐྱང་རྐྱང་བྱས།
འོན་ཀྱང་། ང་ནི་དེ་ལས་ལྡོག་སྟེ་ཨ་མ་ཁྱེད་ཀྱི་བརྩེ་སེམས་དང་བཀའ་དྲིན་དག་སྐད་ཅིག་ཙམ་ཡང་མ་བསམས་པར། རང་ཉིད་ཀྱི་བདེ་སྐྱིད་འབའ་ཞིག་གི་དོན་དུ་ཁྱི་འཁྱམ་བཞིན་གང་སར་ཉུལ། དེ་ལྟར་བགྲང་བྱ་མང་པོ་ཞིག་སོང་བའི་ཐོབ་འབྲས་ནི་ཨ་མ་ཁྱེད་ཀྱིས་ང་ལ་དུངས་པའི་མིག་ཆུ་དང་སེམས་ཁྲལ་ལས་བྱུང་བའི་ཐོད་པའི་གཉེར་རིས་དང་། དུང་མདོག་ལྟར་དཀར་བའི་སྐྲ་ལོ་དེ་དག་ཁྱེར་ཏེ་འཇིག་རྟེན་འདི་ལ་གྱེས་ཕྱག་འཚལ་བཞིན་གཞན་དུ་ཕྱིན་སོང་བ་དེ་རེད། སྐབས་དེ་དུས་ང་ལ་ལྷག་ཡོད་པ་ནི་འགྱོད་སེམས་དང་དྲན་གདུང་གི་མིག་ཆུས་རང་ཉིད་ལ་འཁང་ར་བྱ་རྒྱུ་དེ་དག་རེད། ཨ་མ། ཁྱེད་ཉིད་ཕེབས་སྐྱེལ་ཡང་དེ་རྣམས་ཀྱིས་བྱས། མཚམས་འདི་ནས་ང་ལ་ཤེས་བྱ་གསར་པ་ཞིག་རྙེད་ཡོད་པ་ནི། འཇིག་རྟེན་ཆེན་པོ་འདི་ན་ང་རང་གཅིག་པོ་ལས་མགོན་སྐྱབས་དང་དཔུང་གཉེན་གང་ཡང་མེད་པར་ཁེར་རྐྱང་དུ་ལྷག་ཡོད་པ་དེ་རེད། ཨ་མ་ལགས། རྟེན་འབྲེལ་དང་ལས་སྨོན་གྱི་དབང་གིས་ང་ཁྱེད་དང་འཕྲད་པ་ནས་བཟུང་ཚེ་སྲོག་གི་རྒྱུ་བ་མ་ཆད་བར་ངས་ཁྱེད་ལ་སེམས་ཁྲལ་དང་སྡུག་བསྔལ་ཁོ་ན་ལས་ཁྱེད་ལ་ཕན་པའི་བྱ་བཞག་བཟང་པོ་ཞིག་དང་། ཁྱེད་ཀྱིས་ཐུགས་ལ་བརྣགས་པའི་རེ་འདུན་དེ་དག་གང་ཡང་འབུལ་ཐུབ་མ་སོང་བས་སྙིང་དབུས་ནས་དགོངས་དག་ཞུ། དགོངས་དག
