ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་བྲམ་ཟེ་དབུལ་པོ་ཞིང་ལས་ཀྱིས་འཚོ་བའི་བཟའ་མི་གཉིས་ཡོད་པ་དེས་སངས་རྒྱས་འཁོར་བཅས་གྲོང་ཁྱེར་དུ་གཤེགས་པ་མཐོང་ནས་དད་པའི་སེམས་སྐྱེས་ཏེ། ཁ་ཟས་བཟང་པོ་དག་བཤམས་ནས་ཞིང་གི་སྟེང་དུ་འདུག་བཞིན་དུ་བཤོས་ཕུལ་ཅིང་། བཅོམ་ལྡན་འདས་ཀྱིས་ཀྱང་དེ་གཉིས་འདུལ་བའི་དུས་ལ་བབས་པར་དགོངས་ནས། དེར་གཤེགས་ཏེ་བཤོས་གསོལ་ནས་དེ་གཉིས་ཀྱི་རྐྱེན་དང་འཚམས་པའི་ཆོས་བསྟན་ནས་གཤེགས་སོ། །དེ་ནས་རིང་པོར་མ་ལོན་པར་བྲམ་ཟེ་བཟའ་མི་གཉིས་ཀྱིས་སྨོན་ལམ་བཏབ་པ། ཀྱེ་མ་དགེ་བའི་རྩ་བ་འདིས་བདག་ཅག་གཉིས་ཀྱི་དབུལ་བའི་རྒྱུན་ཆད་པར་གྱུར་ཅིག བདག་ཅག་གཉིས་ཀྱི་ཞིང་འདི་ལས་ནས་ཀྱི་མྱུ་གུ་སྐྱེས་པ་ཐམས་ཅད་ཀྱང་གསེར་གྱི་མྱུ་གུར་སྣང་ལ། དེ་དག་ཀྱང་དེ་ཁོ་ན་བཞིན་ཏུ་གྱུར་ཅིག གཞན་དུ་མ་གྱུར་ཅིག་ཅེས་བྱས་པས། དེའི་མོད་ལ་མྱུ་གུ་རྣམས་གསེར་དུ་གྱུར་པས། བདག་གཉིས་ཀྱི་སྨོན་ལམ་ནི་གྲུབ་ན། རྒྱལ་པོ་ལ་མ་གསོལ་བར་བདག་ཅག་གཉིས་ཀྱིས་ལོངས་སྤྱོད་པར་མི་ནུས་སོ་སྙམ་དུ་བསམས་ནས་རྒྱལ་པོ་གསལ་རྒྱལ་ལ་ཞུས་ཤིང་ཐོག་སྐལ་བཅད་དེ་ཕུལ་བས། རྒྱལ་པོས་ཀྱང་གསེར་དེ་མཐོང་ནས་ངོ་མཚར་ཏེ། བྲམ་ཟེ་ཁྱོད་ཀྱིས་ལས་ཅི་ཞིག་བྱས་ནས་དེས་དཔལ་འདི་ལྟ་བུ་ཐོབ་པར་གྱུར། བྲམ་ཟེས་གསོལ་བ། ལྷ་བདག་གིས་དགེ་སྦྱོང་གཽ་ཏ་མ་ལ་བཤོས་གསོལ་ཏོ། །རྒྱལ་པོས་སྨྲས་པ། བྲམ་ཟེ་ཁྱོད་ཀྱིས་ནི་ཞིང་བཟང་པོ་ལ་ས་བོན་བཏབ་ཀྱིས་སོང་ལ་འཇིགས་ཤིང་བག་ཚ་བ་མེད་པར་སྤྱོད་ཅིག སྦྱིན་པ་དག་ཀྱང་བྱིན་ཅིག བསོད་ནམས་དག་ཀྱང་གྱིས་ཤིག་ཅེས་སྨྲས་སོ། །དེ་ནས་བྲམ་ཟེ་དེ་རབ་ཏུ་དགའ་ནས། བདག་གིས་བཅོམ་ལྡན་འདས་ལ་བཀའ་དྲིན་བསབ་བོ་སྙམ་ནས་ཁྱིམ་གྱི་འབྱོར་པ་རྒྱ་ཆེན་པོ་བཤམས་ནས། སངས་རྒྱས་འཁོར་དང་བཅས་པ་ཟླ་བ་གསུམ་གྱི་བར་དུ་སྤྱན་དྲངས་ཏེ། ཡོ་བྱད་ཐམས་ཅད་སྦྱར་ཅིང་མཇུག་ཏུ་ན་བཟའ་རས་ཟུང་རེ་ཕུལ་ནས་ཆོས་ཉན་པའི་ཕྱིར་སྤྱན་སྔར་འདུག་གོ །དེ་ལ་བཅོམ་ལྡན་འདས་ཀྱིས་ཁམས་དབང་བསམ་པ་དང་མཐུན་པར་ཆོས་བསྟན་པས། བྲམ་ཟེ་འཁོར་དང་བཅས་པ་སྟན་དེ་ལ་འཁོད་བཞིན་དུ་རྒྱུན་ཞུགས་ཀྱི་འབྲས་བུ་མངོན་དུ་བྱས་ཏེ་བདེན་པ་མཐོང་ངོ་། །དེ་ནས་བྲམ་ཟེ་དེས་སྦྱིན་པ་དག་བྱིན་ཅིང་བསོད་ནམས་དག་ཀྱང་བྱས་ཏེ་ཁྱིམ་བཏང་ནས། བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་བས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པས། བཀའ་བསྩལ་བ། དགེ་སློང་དག་འདས་པའི་ལས་ཀྱི་ཤས་ཀྱང་ཡོད་ལ། ད་ལྟར་གྱི་ལས་ཀྱི་ཤས་ཀྱང་ཡོད་དེ། འདས་པའི་ལས་ནི་སངས་རྒྱས་འོད་སྲུང་གི་བསྟན་པ་ལ་བྲམ་ཟེ་འདི་དགེ་སློང་དུ་གྱུར་ཏེ་ཚེ་གཅིག་ཏུ་ཚངས་པར་སྤྱོད་པ་སྤྱད་ནས་འཆི་ཁར་སྨོན་ལམ་བཏབ་བོ། །ད་ལྟར་གྱི་ལས་ནི། འདིས་ཞལ་ཟས་ཕུལ་ཏེ་མྱུ་གུ་གསེར་དུ་འགྱུར་བར་སྨོན་ལམ་བཏབ་པས་དེ་ལྟར་གྱུར་པ་ཡིན་ནོ་གསུངས། འདིས་ནི་ཞིང་དག་པ་ལ་མཆོད་པའི་བསོད་ནམས་དང་མཐོང་ཆོས་མྱོང་འགྱུར་གྱི་ལས་ཀྱི་འབྲས་བུའང་བསྟན་པ་ཡིན་ནོ།།
