ལོ་རིམ་བརྒྱད་པའི་སློབ་གཉེར་བ། འཇམ་དབྱངས་བསྟན་འཛིན།
ཚང་ཚིང་ནགས་ཀླུང་ཕྱུག་མོ་གཡུ་མདོག་རྒྱས།།
ཁུ་བྱུག་གྲེ་འགྱུར་སྟོང་གིས་རྒྱུད་མང་དཀྲོལ།།
སྤང་ན་མེ་ཏོག་འདབ་བརྒྱ་ངང་གིས་བཞད།།
སྦྲང་ཆུང་སྤྲོ་བའི་གར་སྟབས་འདི་རུ་བསྒྱུར།།
གཞུང་ལུགས་སྒོ་མོ་འབྱེད་པའི་སློབ་གླིང་ན།།
རྩོད་པའི་དབྱར་སྐྱེས་རྔ་སྒྲ་བར་མེད་ལྡིར།།
སྒྲ་རིག་ནམ་འཕང་གཅོད་པའི་ལྷ་ལམ་ངོགས།།
སྙན་འཇེབས་ཚིག་རྒྱན་ཟེགས་མའི་འོད་སྟོང་འཕྲོ།།
ཚེ་སྔོན་ལས་ཀྱི་བག་ཆགས་བཟང་པོ་དང་།།
ད་ལྟར་ཐོས་བསམ་སྒོམ་པའི་ཤེས་རབ་རྣམས།།
ཐར་པའི་རྒྱུ་རུ་བདག་ལ་མ་སྨིན་ཡང་།།
སློབ་བུའི་ལམ་ཕྲན་འདི་ལ་སྤྲོ་བས་འཇུག །
མཚམས་རེར་སྐྱེད་ཚལ་ཡངས་པོའི་ཕང་པ་རུ།།
ཆོས་གྲགས་རིགས་པའི་བྲོ་གར་མེད་ན་ཡང་།།
རྡོག་པས་གསར་སྐྱེས་རྩི་ཏོག་མགོ་བོ་མནན།།
ལག་གཉིས་ཐལ་སྒྲ་བར་སྣང་སྟོང་པར་བསྒྲགས།།
ལོག་སྨྲའི་རྒོལ་ངན་མདུན་ན་འགྱིང་བ་མེད།།
གཅོད་བྱེད་རིག་པའི་རྣོ་ངར་དེ་བས་མེད།།
རང་སེམས་ལོག་རྟོག་ཚང་ཚིང་སྟུག་པོ་འདི།།
འཇོམས་བྱེད་ཤེས་རབ་མེ་ཆེན་གསོ་ལ་བརྩོན།།
དཀར་འཇམ་ཤོག་བུའི་ངོ་གདོང་དྭངས་མ་རུ།།
ཚངས་སྲས་བུ་མོའི་མགྲིན་གླུའི་རྒྱན་ཆ་མེད།།
དཎྜིའི་ངག་རིག་གདངས་དབྱངས་དེ་བས་མེད།།
དགའ་བའི་གནས་ལ་སྤྲོ་བས་འཇུག་ཙམ་ཡིན།།
མདོ་བསྟན་ལུང་གིས་བརྒྱན་པའི་རྩོད་ཉམས་མེད།།
ཡང་དག་དོན་ཟབ་སྒྲུབ་པའི་རིགས་ལམ་མེད།།
ཁ་བདེ་ལྕེ་བདེ་བྱེད་པའི་རྣམ་འགྱུར་དག །
དགོས་མེད་ཆོས་བརྒྱད་བདུད་ཀྱི་བར་ཆད་ཉིད།།
སུག་བྲིས་འཁྱག་འཁྱོག་ཅིག་གི་བཞུད་ཤུལ་ན།།
མངོན་བརྗོད་ཚིག་གི་མཛེས་རྒྱན་མ་མཆིས་ཤིང་།།
རིག་བྱེད་སྒོ་མོའི་འབབ་སྟེགས་མི་ཤེས་ཀྱང་།།
དྲན་ཚུལ་ཐད་ཀར་བརྗོད་པའི་གྲོང་ཚིག་ཡིན།།
གཞུང་ལུགས་ཐུགས་སུ་ཆུད་པའི་འཆད་རྩོད་དང་།།
བརྡ་དག་སྡེབ་སྦྱོར་ལེགས་པའི་སྙན་ཚིག་དག །
བློ་དམན་བདག་གི་ཡིད་དུ་མ་མཆིས་ཀྱང་།།
སློབ་གླིང་འདི་རུ་བསྡད་པའི་འབྲས་རྟགས་ཙམ།།
བདག་གི་རྟོག་སྣང་བརྗོད་པའི་གཏམ་ཚོགས་འདིར།།
ཡིད་འཕྲོག་ཚིག་སྦྱོར་སྙན་མོའི་རྒྱན་ཆ་མེད།།
དཔྱོད་ལྡན་རིགས་ཀྱིས་མཐོང་ན་བཞད་གད་གནས།།
ཡིན་ཡང་རང་མཚང་ཀུན་ལ་སྟོན་འདོད་ཙམ།།
