འགྱུར་མེད།
ཨབ་དྷུལ།
ལྕགས་སྒམ་ལྗང་ནག་གྲུ་བཞི་མ་དེའི་ནང་ཅི་ཞིག་ཡོད་པ་ནི། གྲྭ་ཆུང་ཚོས་མ་བལྟས་ནའང་གསལ་ལྷང་ངེར་མཐོང་ཐུབ། ཨབ་དྷུལ་གྱིས་ལྕགས་སྒམ་ས་ལ་མ་ཕོག་སྔོན་ནས་གྲྭ་ཆུང་ཁ་ཤས་ཀྱིས་དེ་ག་ནས་ཁོ་ལ་བསྒུགས་ཡོད། “ཨབ་དྷུལ་མགྱོགས་ཙམ་བྱོས་དང་། ངའི་རྒན་ལགས་ཀྱིས་ང་ལ་བསྒུགས་ཡོད།” དེ་ནི་ཟུར་ལོགས་ན་བྲེལ་སྣང་གིས་ཁེངས་པའི་གྲྭ་ཆུང་ཞིག་གིས་ལབ་པ་རེད། ཡིན་ནའང་ཨབ་དྷུལ་ལ་བྲེལ་སྣང་ཅུང་ཟད་ཀྱང་མི་འདུག་སྟེ། དལ་ལྷོད་ལྷོད་ངང་ལྕགས་སྒམ་ས་ལ་ཕོག་པ་དང་དེ་ནས་ལྕགས་སྒམ་ཁ་ཕྱེ་སྟེ་ཁ་ལེབ་དང་ནང་གི་བརྩེགས་མ་རྣམས་སྐས་འཛེགས་ཀྱི་རིམ་པ་བཞིན་རེ་རེ་ནས་བསྒྲིགས། ལྕགས་སྒམ་ནང་གི་མངར་ཟས་དང་ལག་གི་སྒྱེའུ་ཡི་ནང་གི་སྐམ་ཟས་ཤོག་ཐུམ་རྣམས་གྲ་དག་པོས་བཤམས་འོང་དུས། ངོ་མ་བལྟས་བལྟས་རིག་རིག་ལ་མངར་ཟས་ཚོང་ཁང་ཆུང་ཆུང་ཞིག་ཆགས་པ་རེད། གཞི་ནས་ཨབ་དྷུལ་གྱིས་གྲྭ་ཆུང་ཚོར་ཁ་ཡ་བྱེད་འགོ་བཙུགས་པ་སྟེ། “ཁྱོད་ལ་ག་རེ་དགོས། འདི་ཨེ། སྒོར་མོ་བཅུ་ཁུར་ཤོག” “ཁྱོད་ལ་་་”……
ཨབ་དྷུལ་གྱི་མངར་ཟས་ཚོང་ཁང་ཆུང་ཆུང་འདི་ལ་མི་ལོ་ཉི་ཤུ་ལྷག་གི་ལོ་རྒྱུས་ཡོད། ད་ལྟ་དགོན་པའི་མཁན་པོ་ཡིན་པའི་གྲྭ་པ་བགྲེས་པོ་ཚོའང་དུས་སྐབས་ཤིག་གི་ནང་ལྕགས་སྒོར་ལྔ་ལོར་ཞིག་ལག་ལ་རག་མ་ཐག་མཆོད་རྟེན་གྱི་ཐུར་ལམ་ནས་མར་རྟ་རྒྱུག་རྒྱུག་བརྒྱུགས་ཏེ་ཨབ་དྷུལ་གྱི་རྩ་ནས་མངར་ཟས་ཀྱི་བྲོ་བ་མྱངས་མྱོང་ལ། གྲྭ་པ་ཆེ་བ་སུ་ཞིག་གིས་མངར་ཟས་ཉོས་ཏེ་སྟེར་མི་ཡོང་ངམ་སྙམ་པའི་བསམ་བློས་ཨབ་དྷུལ་གྱི་ཉེ་འཁོར་ནས་ཀ་རེ་ཀོ་རེ་བྱས་ནས་ཐེངས་མང་པོར་བསྡད་མྱོང་། ཨབ་དྷུལ་གྱིས་མི་ལོ་ཉི་ཤུ་ལྷག་ལ་གནས་འདི་ནས་མངར་ཟས་བཙོངས་པའི་རྒྱུད་རིམ་ཁྲོད། བོད་སྐད་དག་མ་དིག་ཅིག འབྲུག་སྐད་འཆལ་མ་འཆོལ་ཞིག བལ་སྐད་རྒྱ་གར་གྱི་སྒྲ་གདངས་འདྲེས་པ་བཅས་རྒྱག་ཐུབ།
ཨབ་དྷུལ་ནི་རྒྱ་གར་ཁ་ཆེ་བ་ཞིག་ཡིན། ཁོ་རང་ནམ་ཞིག་ལ་འབྲས་ལྗོངས་ནང་སླེབས་པ་ཆ་མི་འཚལ་ནའང་། ཁོའི་སྡོད་གནས་ལལ་བྷ་འཛར་ཉེ་ལོགས་ན་ཡོད་སྐད། སྡོད་གནས་དང་མངར་ཟས་འཚོང་ས་མཆོད་རྟེན་དགོན་པ་གཉིས་བར་རྐང་ཐང་མར་ཆུ་ཚོད་ཕྱེད་ལྷག་གི་ལམ་ཡོད་ནའང་། ཆར་འབབ་དུས་མ་གཏོགས་ཨབ་དྷུལ་རླངས་འཁོར་ནང་སླེབས་པ་ཉུང་ཉུང་ཡིན། ཆར་འབབ་དུས་ནི་ཁོའི་མངར་ཟས་འཚོང་སའང་རྡོ་རྟ་ལྟ་བུའི་སྒང་ལོགས་ན་མིན་པར་དགོན་པའི་རླངས་འཁོར་འཇོག་ཁང་གི་གཡབས་འོག་ནས་མངར་ཟས་འཚོང་བ་ཡིན། ཆར་འབབ་དུས་ཨབ་དྷུལ་གང་དུ་ཡོད་པ་དང་། རེས་གཟའ་གང་ལ་ཨབ་དྷུལ་གུང་སེང་ཡིན་པ་བཅས་ནི་གྲྭ་ཆུང་ཚོའི་སེམས་ན་ཁྲིགས་ཁྲིགས་རེད།
ཨབ་དྷུལ་ཁ་ཆེ་ཡིན་ནའང་ཟླ་རེའི་ཚེས་བཅུ་ཉེར་ལྔ། ས་ག་ཟླ་བ། ཆོས་འཁོར་དུས་ཆེན་རྣམས་ག་དུས་ཡིན་མིན་ཁོ་ལ་རྒྱུས་ལོན་ཏག་ཏག་ཡོད། འཁར་རྔ་རྡུང་དུས་མ་གཏོགས་ཧ་མི་གོ་བའི་གྲྭ་པ་རད་པ་ཚོས་ཉིན་དེའི་ཞོགས་པར་ཨབ་དྷུལ་མཐོང་ན་གཏན་གཏན་དུས་ཆེན་ཞིག་ཡིན་པར་ཚོད་དཔག་བྱེད་ཐུབ། དུས་ཆེན་ཉིན་ནི་མངར་ཟས་ཚོང་ཁང་ཆུང་ཆུང་དེ་ལའང་ཅུང་གྲ་རྒྱས་པའི་རྣམ་པ་ཞིག་ཡོད་པ་སྟེ། ཉིན་དེར་ཁོ་རང་ནམ་རྒྱུན་དང་མི་འདྲ་བར་རླངས་འཁོར་ཞིག་གླས་ནས་ཡོང་། རྒྱུ་མཚན་ནི་ཉིན་དེར་ཆོས་མཇལ་བ་ཚོས་ཁོའི་རྩ་ནས་ཚོགས་རྫས་ཉོ་བ་ཡིན་ལ། ད་དུང་དཀོན་གཉེར་གྱིས་མངགས་པའི་ཚོགས་རྫས་རྣམས་ཀྱང་ཁུར་ཡོད་པས་ཡིན། མངར་ཟས་བཙོངས་ནས་མི་ལོ་མང་པོ་ཞིག་ཕྱིན་པའི་རྗེས་སུ་ཨབ་དྷུལ་གྱིས་དགོན་པའི་དཀོན་གཉེར་གྱི་རྩར་སོང་སྟེ་མངར་ཟས་ཙག་ཙིག་རིགས་རྣམས་ཁོས་མཁོ་སྤྲོད་བྱ་ཆོག་པའི་རེ་བ་བཏོན། དཀོན་གཉེར་འཛུམ་མུལ་ཅན་དེས་ཀྱང་ཨབ་དྷུལ་དགོན་པའི་མི་རྙིང་པ་ཞིག་ལ་བརྩིས་ཏེ་དེ་ལྟར་ཁས་བླངས་པ་ནས་བཟུང་། ཚོགས་རྫས་དང་བསྐང་རྫས་རིགས་གང་མང་ཞིག་ཁོའི་མངར་ཟས་ཚོང་ཁང་ཆུང་ཆུང་དེ་ནས་མཁོ་སྤྲོད་བྱེད་ཀྱི་ཡོད།
ཨབ་དྷུལ་གྱི་མངར་ཟས་འཚོང་ས་ནས་འབྲུག་པའི་ཨ་ཅག་ཚོ་ཡོད་དུས་ངེས་པར་དུ་གཡོལ་དགོས། དེ་མིན་གྲྭ་པ་ཆེ་བ་ཚོས་ངོ་ཚ་ཉོ་ཉེན་ཡོད་དེ། ཁོའི་མངར་ཟས་ནར་ནར་རིལ་མོ་ཡིན་ལ་ནང་ན་འོ་སྤྲི་ལྟ་བུའི་མངར་མོ་ཡོད་པ་དེ་ལ་གྲྭ་ཆུང་ཚོས་”ལོང་’’1ཞེས་འབོད་པ་དང་། མངར་ཟས་གྲུ་གསུམ་བྱེ་མ་ཀ་རས་གཡོགས་ཡོད་པ་དེ་ལ་”ཐུ་”2ཞེས་འབོད་ཀྱི་ཡོད། གྲྭ་ཆུང་ཚོས་སྒོར་ལྔ་བསྟན་ཏེ། “ང་ལ་ཐུ་ཞིག་སྤྲོད་དང་།” ལབ་དུས་ཨབ་དྷུལ་གྱིས་ཀྱང་མངར་ཟས་གྲུ་གསུམ་དེ་སྤྲོད་རྐྱང་བྱེད་ལ། གྲྭ་ཆུང་ཞིག་གིས་སྒོར་དྲུག་བསྟན་ཏེ། “ང་ལ་ལོང་ཞིག་སྤྲོད་དང་།” ལབ་དུས་ཀྱང་ཨབ་དྷུལ་གྱིས་མངར་ཟས་ནར་ནར་རིལ་མོ་དེ་སྦྱིན་རྐྱང་བྱེད་པ་ཡིན། འབྲུག་ཤར་ཕྱོགས་སྐད་གོ་མཁན་མི་གསར་པ་ཞིག་ཡིིན་ན་གནས་ཚུལ་དེ་མཐོང་དུས་ཧང་སང་ཧོན་འཐོར་བའམ། ཡང་ན་གྲོད་ཁོག་ན་ན་བར་དུ་གད་མོ་འཆོར་ཡང་སྲིད། གང་ལྟར་གྲྭ་ཆུང་ཚོ་དང་ཨབ་དྷུལ་བར་དུ་ཕན་ཚུན་གོ་བརྡ་སྤྲོད་པའི་བརྡ་དང་ཐ་སྙད་དེ་འདྲ་བྱུང་ནས་མི་ལོ་ཉི་ཤུ་ལྷག་སོང་ཟིན་པས། ཁོང་ཚོའི་བར་དུ་ཕན་ཚུན་སྟབས་མ་བདེ་སྣང་དེ་འདྲ་གང་ཡང་མེད།
ལལ་བྷ་འཛར་ནས་དྷེའུ་ར་ལི་བར་དུ་གཞུང་ལམ་ཟུར་གྱི་རྐང་ལམ་ཆུང་ཆུང་དེ་བརྒྱུད་དེ་སྐར་མ་བཅོ་ལྔ་ཙམ་ཡོང་དགོས་ལ། དྷེའུ་ར་ལི་ནས་མཆོད་རྟེན་དགོན་པར་འགྲོ་བའི་ལམ་ནི། ནགས་ལྗོངས་དབུས་ནས་ཁ་བཏགས་ནར་མོ་གྱ་གྱུ་རུ་བརྐྱངས་པ་ལྟ་བུའི་གཞུང་ལམ་ཡོད། དེར་ཡང་རྐང་ཐང་མར་བགྲོད་ན་སྐར་མ་བཅོ་ལྔ་ཙམ་འགོར་ངེས། ལམ་འདི་གཉིས་སྟེང་རྐང་ཐང་མར་བགྲོད་མཁན་མང་ཤོས་ནི་ཨབ་དྷུལ་རེད། དགོན་པའི་གྲྭ་པ་ཚོ་སྒང་ཏོག་ཁྲོམ་དང་དྷེའུ་ར་ལི་ལ་འགྲོ་དུས་སུ་མི་ཚོགས་ཀྱི་དཀྱིལ་ནས་ཨབ་དྷུལ་ནི་ལམ་སང་ངོ་ཤེས་འོང་སྟེ། དང་ཤོས་ཁོའི་མགོ་སྟེང་ཁུར་བའི་ལྕགས་སྒམ་ལྗང་ནག་དེས་མི་དེ་ཨབ་དྷུལ་ཡིན་པ་ངོ་སྤྲད་འོང་། གྲྭ་པ་ཚོས་རླངས་འཁོར་སྒེའུ་ཁུང་ནས། “ཨབ་དྷུལ། ཨབ་དྷུལ།” ཞེས་འབོད་དུས་ཁོས་ཀྱང་ལན་གྱི་ཚུལ་དུ་ལག་པ་ཡུག་ཡུག་བྱེད་པ་ཡིན། ཨབ་དྷུལ་གྱི་ཆ་ལུགས་ལ་འགྱུར་བ་ཐེབས་པ་ཆེས་དཀོན་ཏེ། སྨ་ར་སྔོ་དཀར་སིབ་སིབ་ཀྱིས་ཁྱབ་པའི་སྐམ་ཤ་ཆེ་བའི་ངོ་གདོང་ནར་མོ་དེའི་སྨིན་མཚམས་དང་དཔྲལ་ངོས་དག་ནི་གཉེར་མའི་མདུད་ལོག་གིས་བཅིངས་ཡོད། སྟོད་ལྭ་དང་དོར་མ་དཀར་འཇོལ་ལེར་གྱོན་པ་དེས་ཁོ་རང་ཁ་ཆེ་བ་ཞིག་ལོས་ཡིན་སྙམ་པའི་ཚུགས་ཀ་བསྟན་འོང་ལ། ནགས་ལྗོངས་དབུས་ཀྱི་གཞུང་ལམ་སྟེང་བསྒྱུར་པའི་ལྗིད་ཏིག་ཏིག་གི་གོམ་འགྲོས་དེས། རྒྱང་རིང་ནས་ཀྱང་ཁོ་རང་ཨབ་དྷུལ་ཡིན་པར་ར་སྤྲོད་བྱེད།
ལྗིད་ཏིག་ཏིག་གི་གོམ་འགྲོས་ཀྱིས་བཀྱགས་པའི་ཨབ་དྷུལ་དང་ཁོའི་མངར་ཟས་ཚོང་ཁང་ཆུང་ཆུང་སྟེ་མགོ་སྟེང་ཁུར་བའི་ལྕགས་སྒམ་ལྗང་ནག་བཅས་ནི། ལལ་བྷ་འཛར་ནས་དྷེའུ་ར་ལི། དྷེའུ་ར་ལི་ནས་མཆོད་རྟེན་དགོན་པར་འགྲོ་བའི་གཞུང་ལམ་ཀྱག་ཀྱོག་དེའི་ནང་རྟག་བརྟན་གྱི་གཟུགས་བརྙན་ཞིག་ཏུ་གྲུབ་ཡོད།
མངར་ཟས་ཚོང་ཁང་ཆུང་ཆུང་། ཨབ་དྷུལ། ད་དུང་གྲྭ་ཆུང་ཚོ།…..
སཽ་མི།
རླུང་བུ་སིར་སིར་ལྡང་འོང་དུས་དེ་ལ་ངོ་གདོང་འཛེད་པ་ནི་ངོ་མ་སྐྱིད་སྣང་ཞིག་རེད། སྐྱིད་སྣང་དེ་ནི་མང་ཤོས་རྐང་གསུམ་འཁོར་ལོའི་ནང་ནས་མྱོང་ཐུབ། ད་གིན་བཤད་གྲྭའི་སྒོ་ཆེན་རྩ་ན་བསྒུགས་བསྒུགས་པའི་མཐར་ཀུ་ཤལ་ན་གྷར་ལ་འགྲོ་བའི་རྐང་གསུམ་འཁོར་ལོ་ཞིག་ལ་ཕྲད། དེ་ནས་ཡང་། “སུམ་ཅུ།” “བཞི་བཅུ།” “སུམ་ཅུ།” “བཞི་བཅུ།” ནམ་རྒྱུན་དང་འདྲ་བར་དུས་ཚོད་སྐར་མ་ལྔ་ཙམ་ལ་ཁ་ལོ་བ་དང་ལྷན་”སུམ་ཅུ་བཞི་བཅུའི་”འཐབ་མོ་བཀྱེས་མཐར་ང་ཚོ་མི་བཞི་བཞོན་ཏེ་སྒོར་མོ་བཞི་བཅུ་ལ་འགྲོ་རྒྱུར་ཁ་འཆམས། དང་ཐོག་ཁ་ལོ་བའི་རྣམ་འགྱུར་དང་སྒེའུ་ཁུང་གི་ལྕགས་ནར་སྟེང་རྐུབ་ཕྱེད་ཕྱི་ལ་བཞག་ནས་འགྲོ་དགོས་པར་ཁོང་ཁྲོ་ཅུང་ལངས་ནའང་། ལམ་གྱི་རླུང་བུ་བསིལ་མོ་དེས་ངོ་གདོང་ལ་བྱབས་འོང་དུས་སྐྱིད་སྣང་མ་འདྲ་བ་ཞིག་ཀྱང་འདུག་པས་ཅུང་ཟད་ལྷོད་ལ་བབ།
“ཕ་གི་དེ་སཽ་མི་མ་རེད་པས།”
“འོ་རེད་རེད།”
“ལྟོས་དང་ཁོས་མཁན་པོ་ཡེ་ཤེས་རྡོ་རྗེས་གསར་དུ་ཉོས་ནས་སྤྲད་པའི་རྐང་འཁོར་དེར་བཞོན་འདུག”
“ཀྱེ་སཽ་མི། སཽ་མི་ཇག་པ། སཽ་མི་རྐུན་མ།”
ང་ཚོས་རྐང་གསུམ་འཁོར་ལོའི་ནང་ནས་ལྕགས་རྟ་བཞོན་ནས་འགྲོ་བཞིན་པའི་སཽ་མི་ལ་དེ་ལྟར་འུར་བརྒྱབ། སཽ་མིས་ཀྱང་། “ཁྱེད་ཚོ་རྐུན་མ། ཁྱེད་ཚོ་ཇག་པ། ཁྱེད་ཚོ་མ་རབས།” ལབ་ཀྱིན་ང་ཚོ་དང་འགྲན་ཏེ་འོངས། ཞིང་སྣེའི་ཟམ་པ་བར་སཽ་མིའི་ལྕགས་རྟ་དང་ང་ཚོའི་རྐང་གསུམ་འཁོར་ལོ་ཆ་ལ་ཡིན་ནའང་། ཟམ་པ་བརྒལ་རྗེས་ཀྱི་གྱེན་ལམ་དེ་ནས་ཁ་ལོ་བས་སྣུམ་སྒྲིམ་ཤུགས་ཆེ་རུ་བཏང་བས་རྐང་གསུམ་འཁོར་ལོ་འུར་སྒྲ་དང་བཅས་ཏེ་མདུན་དུ་སྐྱོད། དེ་དུས་སཽ་མི་གཞི་ནས་རྗེས་ལ་ལྷག་པ་རེད། ངས་རྗེས་ན་ལྷག་པའི་སཽ་མི་ལ་ཕྱིར་ལྟ་ཞིག་བྱས་ཏེ་ལག་པ་ཡུག་ཡུག་དང་ལྷན་དུ། “སཽ་མི། བྷའི་བྷའི།” ལབ་དུས་ཁོས་ཀྱང་ལག་པ་ཡུག་ཡུག་བྱེད།
སཽ་མི་ནི་རྣམ་གྲོལ་གླིང་གི་མི་རྙིང་ཤོས་གྲས་ཀྱི་གཅིག་ཡིན། ཕྱག་མཛོད་ཀུན་བཟང་ཞེས་པའི་མི་རླབས་ཆེན་དེ་དང་མཉམ་དུ་འདྲུད་འཐེན་རླངས་འཁོར་ལ་བཞོན་ཏེ་ནགས་ལྗོངས་མཐུག་ས་དག་ནས་མེ་ཤིང་ཇག་རྒྱག་ཏུ་སོང་བའི་ལོ་རྒྱུས་དེ་ནི་ཁོས་མི་གཞན་ལ་ངོམ་རྒྱུའི་སྐད་ཆ་ཡོད་ན་མེད་ན་དེ་ཡིན། དུས་ཡུན་རིང་པོ་ཞིག་ལ་སཽ་མིས་བཤད་གྲྭའི་ཐབ་ཚང་ནས་ལས་ཀ་ཙག་ཙིག་རིགས་ལས་ཡོད་ནའང་། ད་ཆ་མཁན་སློབ་ཐབ་ཚང་ནང་ཇ་བཟོ་རྒྱུ་ནི་སཽ་མིའི་ལས་ཀ་གཙོ་བོ་དེ་ཆགས་ཡོད། ཇ་བཟོ་བའི་རྒྱུད་རིམ་ཁྲོད་”མཁན་སློབ་ཤ་དར་ཁྲག་དར་”ཚོའི་རྩ་ནས་སཽ་མིས་ཉོག་བཤད་མང་པོར་ཉན་དགོས་ཏེ། ཡ་མའི་ནད་ཡོད་མཁན་ཚོས།
“བྱེ་མ་ཀ་ར་མང་དྲགས་འདུག” “ཇ་སྐོལ་དག་མི་འདུག”
“ཁྱོད་ཀྱི་ཇ་བཏུངས་པ་དང་སྣ་ནས་སྣ་ཆུ་བཞུར་བ་དུས་མཉམ་རེད།” ཅེས་དང་།
ཡ་མ་མེད་མཁན་ཚོས།
“ཇ་བྲོ་བ་ཁྱོན་ནས་མེད་པ་དེ་འདྲ་ག་རེ་རེད།”
“དེ་ལས་ཆུ་ཚ་པོ་བཏུངས་ན་དགའ་ས་རེད།”
ཅེས་སཽ་མི་ལ་རྒྱུན་དུ་དེ་ལྟར་ཁ་རྩེ་བ་ཡིན།
བཤད་གྲྭའི་ཐབ་ཚང་ནང་”གཉེར་པ་བྲེལ་བ་ཚ་པོ་”སླེབས་ཚད་གང་པོས་ཀྱང་སཽ་མི་བྲན་དུ་བཀོལ་རྐྱང་བྱེད། “གཉེར་པ་བྲེལ་བ་ཚ་པོ་”ལབ་པ་དེར་སྒྲ་བཤད་མེད་པའང་ག་ལ་ཡིན་ཏེ། འཕྲུལ་ཆས་ལག་ལ་སླེབས་མ་མྱོང་བའི་མི་ལྷོད་ཤ་དོད་པོ་གང་འདྲ་ཞིག་ཡིན་ནའང་རླངས་འཁོར་གྱི་ལྡེ་མིག་ཅིག་སྐེད་པ་ལ་གདགས་རྒྱུ་ཡོད་ཙ་ན་རང་བཞིན་གྱིས་བྲེལ་བ་ཚ་པོ་ཆགས་འགྲོ་བ་མ་ཡིན་ནམ། གང་ལྟར་”མཁན་སློབ་ཤ་དར་ཁྲག་དར་”ཚོ་དང་”གཉེར་པ་བྲེལ་བ་ཚ་པོ་”དག་གི་ཉོག་བཤད་ཡོད་ཚད་ནི་སཽ་མིའི་རྣ་རྒྱབ་ཀྱི་རླུང་བུ་རེད་ལབ་ན་མི་ཆོག་པ་མེད། དེ་མིན་རྙོག་གྲ་རེ་རེ་ལ་ཁ་གཏད་དེ་དོན་རྐྱེན་སློང་དགོས་ན་སཽ་མི་ཡང་སྔ་ས་ནས་རྣམ་གྲོལ་གླིང་གི་”ལྕགས་རིའི་ཕྱི་རོལ་པའི”་གྲས་སུ་ཚུད་ཡོད་པ་ལ་ཐེ་ཚོམ་མི་དགོས། སཽ་མི་ནི་མི་ཚོར་སྣང་མེད་མཁན་གྱི་གྲས་རེད་ལབ་ན་དེ་ཡང་བཤད་ས་ཞེ་དྲག་མེད། ནང་མིའི་གནས་སྟངས་ཀྱིས་མཚམས་རེར་སེམས་མ་བདེ་བ་བཟོས་འོང་དུས་ཁོས་གྲྭ་པ་ངོ་ཤེས་ཚོར་སྒོར་མོ་བཅུ་རེ་བླངས་ཏེ། ཀོ་པག་ནས་གཅིག་པུར་ཆང་འཐུང་རྒྱག་པའང་ཉུང་ཉུང་ག་ལ་ཡིན།
མཁན་པོ་ཡེ་ཤེས་རྡོ་རྗེ་གྲྭ་པ་གསར་པ་ཡིན་དུས་ནས་སཽ་མིས་བཤད་གྲྭའི་ཐབ་ཚང་ནང་ལས་ཀ་གཉེར་གྱི་ཡོད། དེ་དུས་མཁན་པོ་དང་སཽ་མི་གཉིས་ཕན་ཚུན་ངོ་ཤེས་པ་ཙམ་ལས་དམིགས་བསལ་གྱི་འབྲེལ་ལམ་གང་ཡང་མེད་ནའང་། མཁན་པོ་བཤད་གྲྭ་ནས་སློབ་མཐར་ཕྱིན་ཏེ་ལོ་མང་པོའི་རྗེས་སུ་ཡང་བསྐྱར་བཤད་གྲྭ་ལ་འབྱོར་དུས་སཽ་མི་ནི་མཁན་པོའི་གྲོགས་པོ་འཆམ་ཤོས་དེ་ཡིན་པ་རེད། འབྲེལ་ལམ་དེ་ལྟར་བྱུང་བ་ལའང་རྒྱུ་རྐྱེན་ངེས་ཅན་ཞིག་ཡོད་པ་སྟེ། མཁན་པོའི་འཛིན་གྲྭ་གཅིག་པའི་གྲོགས་པོས་གཙོས་གྲོགས་པོ་རྙིང་པ་མང་ཆེ་བ་མཐོང་ས་ན་མེད་ལ། ད་དུང་ལས་རོགས་མང་ཆེ་བ་ནི་མི་གསར་པ་རྐྱང་རྐྱང་ཡིན། དེ་བས་མཁན་པོས་སཽ་མི་ནི་རང་གི་གྲོགས་པོ་རྙིང་པ་ཞིག་ལ་རྩི་བ་ཡིན་ལ། དམིགས་འབེན་དང་ང་རྒྱལ་གང་གིས་ཀྱང་ཕོངས་པའི་སཽ་མི་ལྟ་བུའི་མི་དཀྱུས་མ་དག་ནི་མཉམ་འགྲོ་མཉམ་གཤིབ་བྱེད་སྟབས་བདེ་ཤོས་ཤིག་ཀྱང་ཡིན་པས་རེད།
གཟའ་སྤེན་པའི་སྔ་དྲོ་ང་རང་གྲྭ་ཚང་ཟ་ཁང་ནས་ཞོགས་ཟས་ཟོས་ཏེ་རྩོམ་སྒྲིག་ཁང་ལ་འགྲོ་དུས་དགེ་སྐོས་ལས་ཁུངས་རྙིང་པའི་འགག་ནས་སཽ་མི་དང་ཕྲད། ངས། “ཡ་སཽ་མི། ག་བ་འགྲོ་རྒྱུ་ཡིན།” ལབ་མ་ཐག ཁོས་འཛུམ་ཙམ་འཛུམ་ཙམ་མགོ་འཕུར་ཙམ་བྱེད་ཀྱིན། “ཝའེ། སྒོར་མོ་བཅུ་སྤྲོད་དང་།” ལབ་ནས་ལག་པ་མདུན་ལ་བཟེད་འོང་། ངས་སྟོད་ཐུང་ཁུག་མ་ནས་སྒོར་མོ་ལྔ་བརྒྱ་ལོར་ཞིག་བསྟན་ཏེ་ཁོའི་ལག་ལ་འཇོག་གྲབས་བྱས། ཁོ་ངའི་མཐའ་འཁོར་དུ་ས་ལྡིང་གནམ་ལྡིང་བྱེད་ཀྱིན། “ཀྱག་ཀྱག་མ་བྱེད་དང་། སྒོར་མོ་བཅུ་གཅིག་པུ།” ལབ་ནས་འགྲམ་ལ་བཅར་འོང་། ངས་ལྔ་བརྒྱ་ལོར་ཁུག་མའི་ནང་རང་སོར་བཅུག་རྗེས། “ཁྱོད་ལ་སྤྲོད་པ་ལས་ཅནྡ་ར་ལ་སྤྲད་ན་ཡག” ལབ་སྟེ་ཁོ་ལ་བལྟས་ནས་བསྡད།
“ཁོ་C.I.D ༼གསང་ཉུལ་བ།༽རེད།”
“ཁོ་ག་རེ་ཡིན་ནའང་སྒོར་མོ་གཉིས་ལས་མང་བ་སློང་གི་མི་འདུག”
“དེ་ཁོས་སྤྱང་པོ་འཁྲབས་པ་རེད། ང་ཁོ་ནང་བཞིན་མ་རེད། དགོན་པ་ལ་ལས་ཀ་ལས་ཀྱི་ཡོད།”
“གང་ལྟར་དེང་སང་གྲྭ་པ་ཚོས་ཁྱོད་རང་ལས་ཀྱང་ཅནྡ་ར་ལ་སྒོར་མོ་མང་བ་སྤྲོད་ཀྱི་འདུག”
“གྲྭ་པ་གསར་པ་ཚོས་ངའི་སྐོར་ལ་གང་ཡང་ཧ་གོ་ཡི་མ་རེད།”
“ཁྱོད་ཀྱི་སྐོར་ཧ་གོ་ནས་གང་བྱེད། ཧང་སང་ཡ་གང་ཡང་ཡོད་མ་རེད།”
“སོང་། སོང་། ཁྱོད་མ་རབས།”……
དེ་ནས་བཟུང་སཽ་མིི་ངེད་གཉིས་ཀྱི་བར་དུ། “ཁྱོད་རྐུན་མ་དང་ཁྱོད་མ་རབས། ཁྱོད་ཇག་པ།” ཅེས་པའི་ཐ་སྙད་དེ་ཚོ་དར་བ་རེད།
སཽ་མི་ནི་རྒྱ་གར་ཧིན་དྷུ་བ་ཞིག་ཡིན་ནའང་གླང་ཤ་དང་འཕྲད་དུས་བོད་པ་ཞིག་དང་གཅིག་པ་གཅིག་རྐྱང་རེད། གྲྭ་པ་ཚོས། “སཽ་མི། ཁྱོད་ཧིན་དྷུ་མ་རེད་དམ། ཁྱོད་ཀྱིས་གླང་ཤ་ཟོས་ན་འགྲིག་གམ།” ལབ་དུས་ཁོས། “ང་ཧིན་དྷུ་ཡིན་ཡིན་པ་རེད། ངས་སོ་སོའི་ནང་ནས་གླང་ཤ་ཟ་ཡི་མ་རེད།” ཅེས་དག་ཕུད་བྱེད་དུས་གྲྭ་པ་ཚོས་ཀྱང་ཟུར་ཟའི་རྣམ་འགྱུར་ཞིག་སྟོན་གྱིན། “ཨ་ལེ། ཡ་ཡ། ཁྱོད་རང་ཧིན་དྷུ་བ་ངོ་མ་རེད་འདུག” ཅེས་བརྗོད་དུས་ཁོ་རང་ཡང་དབང་མེད་དུ་གད་མོ་འཆོར་འགྲོ།
ཉིན་རྒྱུན་གྱི་ཞོགས་པ་ཆུ་ཚོད་དྲུག་པའི་སྟོད་སྨད་ཙམ་དང་། དགོང་དྲོ་ཆུ་ཚོད་ལྔ་པ་ཡས་མས་ཙམ་ནི་སཽ་མི་ནང་ནས་དགོན་པ་དང་དགོན་པ་ནས་ནང་ལ་འགྲོ་བའི་དུས་ཚོད་ཡིན། སཽ་མིའི་ནང་དང་དགོན་པའི་བར་གྱི་གཞུང་ལམ་ནི་ལྕགས་རྟར་བཞོན་ནས་སོང་ན་སྐར་མ་བཅུའི་ལམ་རེད། དགོན་པ་དང་ནང་བར་གྱི་གཞུང་ལམ་སྒང་སཽ་མིས་ནམ་ཡང་སྒེར་གྱི་ལྕགས་རྟ་དེ་བཀོལ་ཞིང་། སཽ་མིས་གཞུང་ལམ་དེའི་སྟེང་ནས་མི་ལོ་ཉི་ཤུ་ལྷག་ལ་ལྕགས་རྟར་བཞོན་ཡོད་ལ། ལྕགས་རྟར་བཞོན་ནས་སོང་སོང་བའི་མཐར་སླེབ་ས་ནི་ཡང་ན་དགོན་པ་དང་ཡང་ན་སྒེར་གྱི་ནང་ཡིན་པ་རེད། གོ་ཐོས་ལ་སཽ་མི་མཻ་སོར་དང་བྷེང་ལོར་ལ་ཐེངས་མ་གཅིག་ལའང་སླེབས་མྱོང་མེད་སྐད།
ཞིང་ཐང་དང་ནགས་ལྗོངས་དཀྱིལ་གྱི་གཞུང་ལམ་གྱ་གྱུ་དེའི་སྒང་ནས་སཽ་མིས་ལྕགས་རྟ་ལ་བཞོན་ཏེ་འགྲོ་དུས་ཁོའི་གདོང་ལ་ངོ་མ་སྐྱིད་སྣང་ཞིག་ཤར་ཡོད། ལྕགས་རྟ་མཐོན་པོ་དེའི་སྒང་ནས་མགོ་དཀྲིས་དེ་རླུང་བུས་སྒུལ་ཙམ་སྒུལ་ཙམ་བྱེད་ལ། སྟོད་གོས་སྔོ་ཁྲ་དེ་དང་ཤམ་ལུགས་སུ་གྱོན་པའི་སྨད་གཡོགས་གཉིས་ཀྱང་རླུང་བུས་ལྷབ་ལྷབ་ཏུ་རྒྱབ་ལ་གཡུགས་འོང་། སྨད་གཡོགས་འོག་གི་རྐང་པ་རིང་པོ་དེས་རྐང་ཡོབ་ལྷོད་ལྷོད་ངང་སྐོར་གྱིན་མདུན་ནས་མདུན་དུ་སྐྱོད་པར་བྱེད། ཞིང་ཐང་དབུས་ཀྱི་གཞུང་ལམ་སྒང་ནས།…….
སུ་པཱན་ན།
“ཏིང་།” “ཏིང་།” “ཏིང་།”
ཆུ་ཚོད་གསུམ་པའི་ཚོགས་ཐུན་གྲོལ་བརྡ་བཏང་སོང་། ངས་ཡིན་རྒྱུ་མ་རེད་སྙམ་སྟེ་ཁ་པར་ལ་ལྟ་དུས་ཆུ་ཚོད་གཉིས་དང་སྐར་མ་ལྔ་བཅུ་ཡས་མས་ལ་ཉི་མ་ཚེ་རིང་གི་ཁ་པར་ཐེངས་བཞི་ལྔ་ཞིག་སླེབས་འདུག དུས་ཚོད་མི་འཁྱོལ་སྐབས་ཞོ་བཏུངས་ནས་གཉིད་ཁུག་རྒྱུ་ནི་ཐབས་ཤེས་ཡག་ཤོས་དེ་རེད། ལྟོས་དང་། གཉིད་ཁུག་ཐེངས་གཅིག་གིས་ཆུ་ཚོད་གསུམ་ནི་ངོ་མ་སྐར་མ་ལྔ་ལ་རྫོགས་སོང་བ་མ་ཡིན་ནམ།
“ཝེ་ཉི་མ་ཚེ་རིང་། ཁྱོད་ག་པར་ཡོད།”
“བྷོན་ཊ་3ཟ་ས་ལ་ཡོད། མགྱོགས་པོ་ཤོག་དང་། ང་བསྒུགས་བསྡད་ཡོད།”
“ཡ་ཡ། ང་ལམ་སང་སླེབ་ཡོང་།”
བྷོན་ཊ་ཟ་ས་ནས་གྲྭ་པ་མང་ཆེ་བས་དེང་སང་པཊྨའི་བྷོན་ཊ་ལ་འཚང་ག་རྒྱག་གི་ཡོད། ཡིན་ནའང་ང་རང་ནི་ནམ་རྒྱུན་སུ་པཱན་ནའི་བྷོན་ཊ་ཟ་བར་མོས་མཁན་ཞིག་ཡིན། སུ་པཱན་ནའི་རྩ་ནས་ཀྱང་མཚམས་རེར་གྲྭ་ཆུང་ཚོས་འཚང་ག་རྒྱག་པའི་སྐབས་ལ་ཁེལ་ནའང་ཁོས་ང་རང་ངོ་ཤེས་རྙིང་པ་ཞིག་ལ་བརྩིས་ཏེ་མི་གཉིས་གསུམ་གྱི་རྗེས་ནས་སྒོར་མོ་ལྔའི་བྷོན་ཊ་འབྲས་ཆན་བསྲེས་མའི་ཤོག་ཐུམ་ཞིག་ངའི་ལག་ལ་འཇོག་རྐྱང་བྱེད་པ་ཡིན། དེ་བས་ཉི་མ་ཚེ་རིང་ངེད་གཉིས་ཀྱིས་ཁོའི་རྩ་ནས་སྒོར་མོ་བཅུའི་བྷོན་ཊ་བླངས་ཏེ་ཉེ་ལོགས་ཀྱི་ཤིང་སྡོང་རྩ་ནས་བྷོན་ཊ་ཟ་ཞོར་ལྟད་མོར་གཡེངས་ནས་བསྡད།
བྷོན་ཊ་ཟ་ས་ནི་དགོན་པའི་ལྕགས་རིའི་ནང་གི་ས་ཆ་འཁྲུག་ཤོས་ཨང་ཀི་བཞི་པའི་ནང་བརྩི་ཆོག མི་འགྱུར་རྡོ་རྗེའི་མཆོད་རྟེན་དང་བཤད་གྲྭའི་འོ་མ་ཚོང་ཁང་གི་མདུན་ལོགས། ད་དུང་གྲྭ་ཚང་འཆམ་ར་གསུམ་ཕུད་ཤུལ་ན་ས་ཆ་འདི་ཡང་ལྟད་མོ་ཆེ་ས་ཞིག་ཡིན། གླིང་སྐོར་འགྲོ་སའི་ལམ་ཆུང་དེ་ནི་བྷོན་ཊ་དང་ཁ་ཟས་ཙག་ཙིག་རིགས་འཚོང་མཁན་ཚོའི་འདུག་སྟེགས་ལྟ་བུ་ཆགས་ཡོད། མི་རེའི་མདུན་ནས་སྲན་ཚོད་རྔོས་མ། བག་ལེབ། ཤིང་ཏོག་ཙག་ཙིག་རིགས་བཤམས་པའི་མཐའ་སྐོར་ནས་སློབ་གྲྭའི་གྲྭ་ཆུང་། བཤད་གྲྭའི་གྲྭ་པ། འབུམ་ལྔ་འཚོག་མཁན། ད་དུང་མི་འགྱུར་རྡོ་རྗེའི་མཆོད་རྟེན་སྐོར་མཁན་གྱི་ཨ་ཅག་རྒྱགས་པ་དེ་ཚོའང་རིག་ཐུབ། ས་དེ་ནས་ལྟད་མོ་ཆེ་ཤོས་ནི། མི་འགྱུར་རྡོ་རྗེའི་མཆོད་རྟེན་སྐོར་མཁན་གྱི་ཨ་ཅག་རྒྱགས་པ་ཚོའི་ཡོང་སྟངས་དེ་རེད། སྐོར་ལམ་ནང་གི་གཞུང་ལམ་ཕྲ་མོ་དེའི་སྒང་ནས་ར་སྦག་སྦག་4ཆུང་ཆུང་རེ་ལ་ཨ་ཅག་རྒྱགས་པ་གཉིས་རེ་བྱས་ནས་བཞོན་ཏེ་འོང་ལ། གུ་ཐུང་ཤ་འབྱར་མ་དེ་དབྲོལ་ལ་ཁད་པའི་བརླ་ཤ་དང་འཕོངས་ཚོས། ད་དུང་ནུ་མ་བཅས་ནི་ར་སྦག་སྦག་ཆུང་ཆུང་དེའི་སྒང་ནས་ལྡེམ་ལྡེམ་ངང་འཛག་ལ་ཁད་པའི་སྣང་བ་ཞིག་སྟེར།
“འོ་ཙི།” “ཁ་ཚ་བ་ལ།” “རང་ཀྱེ། རང་ཀྱེ།” “མ་བྱེད་ཀྱེ།” “འགྲོ་ཀྱེ།”
ཨ་ཅག་རྒྱགས་པ་ཚོའི་བྲེལ་བ་ཚ་པོའི་རྣམ་འགྱུར་དང་ཆུ་མོ་ཤང་ཤང་ལ་བཞུར་བ་ལྟ་བུའི་རྒྱ་གར་སྐད་བྱང་ཆ་དོད་པོ་དེས། སྐོར་ལམ་ཟུར་གྱི་བྷོན་ཊ་ཟ་ས་ནི་ཡུད་ཙམ་གྱི་རིང་དྷི་ལི་མན་འཇུ་ཊིལ་ལ་ཡིན་པའི་སྣང་བ་སྟེར་འོང་། ཨ་ཅག་རྒྱགས་པ་ཚོ་བུད་ཤུལ་ན་བྷོན་ཊ་ཟ་ས་ཡང་རོལ་དབྱངས་འཇགས་པའི་བྲོ་ཁང་ལྟར་རེ་ཞིག་ལ་ཁུ་སིམ་མེར་འགྱུར་འགྲོ། ཨ་ཅག་རྒྱགས་པ་ཚོ་སོང་བའི་རྗེས་ན་ཉི་མ་ཚེ་རིང་ངེད་གཉིས་ཀྱང་བྲེལ་སྣང་མེད་པའི་གོམ་སྟབས་ཁྲོད་ནས་འུར་རྒྱག་ཞོར་འཛིན་གྲྭར་སོང་བ་ཡིན།
སུ་པཱན་ན་ནི་ཞིང་པ་ཉམ་ཆུང་ཞིག་ཡིན། གྱོན་གོས་དཀར་པོ་དཀྱུས་མ་དེ། སེར་གས་ཞིག་རལ་དུ་བཏང་བའི་རྐང་པའི་རྟིང་པ། སྐྲ་ལོ་སྔོ་སྐར་སབ་སིབ་འདྲེས་པའི་སྨིན་མའི་སྒང་གི་སྐྲངས་འབུར་རྡོག་རྡོག་བཅས་ཀྱིས་ཁོ་རང་ཞིང་པ་མི་སེར་དཀྱུས་མ་ཞིག་ཡིན་པར་ར་སྤྲོད་ཅིང་། སྨིན་མའི་སྒང་གི་ཤ་ལྷག་རྡོག་རྡོག་དེ་བྷོན་ཊ་དང་འདྲ་པོ་ཡོད་པས་ཡིན་ནམ་ཡང་ན་ཁོས་བྷོན་ཊ་འཚོང་བས་ཡིན། གྲྭ་པ་ཚོའི་ཁྲོད་དུ་ཁོ་ལ་”བྷོན་ཊ་བྷ་བུ་”ལབ་མཁན་ཡང་མང་པོ་ཡོད།
སུ་པཱན་ནའི་འཚོ་བ་གཉེར་སྟངས་ནི་ཧ་ཅང་དཀྱུས་མ་ཞིག་ནས་འགོ་བཙུགས་པ་སྟེ། དང་ཐོག་ཁོས་ཁ་ཟས་ཙག་ཙིག་རིགས་བཀལ་བའི་རྐང་འཁོར་ཞིག་དྲུད་དེ་འོངས། རྐང་འཁོར་སྒང་ནས་ལྕགས་སྐྱོར་གྲུ་བཞི་དེའི་ནང་བྷོན་ཊ། འབྲས་ཆན། སྲན་མ་བག་ལེབ། ཚོད་མ་ཁུ་བ་བཅས་བཅུག་སྟེ་དགོན་པའི་ཉེ་འཁོར་གྱི་མི་ཚོགས་གར་འདུས་ཀྱི་ས་ནས་མཐོང་ཞིང་། རྗེས་ནས་གྲྭ་ཆུང་ཚོ་འདུས་ས་སྟེ་གྲྭ་ཚང་རྒྱལ་སྒོའི་སྦུག་དེ་ལོ་ཁ་ཤས་ཀྱི་རིང་ལ་ཁོའི་ཟས་རིགས་ཙག་ཙིག་འཚོང་སར་གྱུར། སྐབས་དེ་དུས་གྲྭ་ཚང་རྒྱལ་སྒོའི་སྦུག་ནས་ཁ་ཟས་ཙག་ཙིག་རིགས་མཁོ་འདོན་བྱེད་མཁན་ནི་གློ་བ་ཁ་ཚ་འཚོང་མཁན་གྱི་གཞིས་ཆགས་གསར་པའི་ཕོ་གསར་དེ་དང་སུ་པཱན་ན་གཉིས་མ་གཏོགས་མེད་པས། སུ་པཱན་ནའི་ཚོང་ལས་ཙག་ཙིག་དེ་ལའང་ཡར་བསྐྱེད་གང་འཚམས་བྱུང་ཡོད་དེ། ཐོག་དང་པོའི་རྐང་འཁོར་སྒང་གི་ཁ་ཟས་ཉུང་ཉུང་དེ་རྗེས་ནས་སུ་པཱན་ནའི་བུ་རེད་ཟེར་བ་དེའི་རྐང་གསུམ་འཁོར་ལོའི་ནང་བྷོན་ཊ་ཤོག་ཐུམ་གཉིས་ལྷག འབྲས་ཆན་ཤོག་ཐུམ་གསུམ་ཙམ། སྤོད་ཡ་ཁ་ཚ་དང་ཚོད་མ་ཁུ་བ་སྣོད་ཆེ་ཆུང་གསུམ་ཙམ་དབོར་ཏེ་འཚོང་བ་ཡིན།
དུས་ཚོད་བགྲོད་པ་དང་བསྟུན་ནས་སུ་པཱན་ནའི་ཉེ་འཁོར་ནས་ཀྱང་ཁ་ཟས་ཙག་ཙིག་རིགས་མཁོ་འདོན་བྱེད་མཁན་མང་དུ་ཕྱིན་ཡོད་ནའང་། གྲྭ་པ་མང་ཆེ་བས་རྒྱ་གར་གཞན་པ་ལས་ཀྱང་སུ་པཱན་ནའི་བྷོན་ཊ་དང་འབྲས་ཆན་ལ་དགའ་པོ་བྱེད་པ་ཡིན། དེ་ལ་རྒྱུ་མཚན་མེད་པ་མ་ཡིན་ཏེ། སུ་པཱན་ན་དང་གང་འཚམས་འདྲིས་པོ་ཆགས་པའི་གྲྭ་པ་མང་ཆེ་བས་ཁོའི་རྩ་ནས་བྷོན་ཊ་དང་འབྲས་ཆན་བུ་ལོན་བླངས་ནས་ཟ་ཆོག བུ་ལོན་ཡོད་པའི་གྲྭ་པ་ཚོས་ཁོ་ལ་སྒོར་མོ་ཏག་ཏག་རྩིས་བརྒྱབ་ཡོད་མེད་སྣ་ཚོགས་ཡིན་ཡང་། སུ་པཱན་ནས་རང་གི་བུ་ལོན་ཡོད་ས་ནི་དུས་ཡུན་རིང་ཐུང་ལ་མ་ལྟོས་པར་ཏག་ཏག་ངོས་འཛིན་ཐུབ་པ་ཡིན། ཐེངས་ཤིག་སྒོར་མོ་ཉིས་བརྒྱ་ལྷག་བུ་ལོན་ཆད་པའི་བསྟན་འཛིན་རད་པ་ཟེར་མཁན་དེ་ནང་ལ་ཕྱིན་ནས་ལོ་གསུམ་གྱི་རྗེས་ནས་དགོན་པར་འབྱོར་དུས་ཀྱང་སུ་པཱན་ནས་ཏག་ཏག་ཁོ་ལ་མཛུ་གུ་བཙུགས་ཡོད་སྐད། གྲྭ་པ་ཚོ་སྣང་བ་འགྲོ་སའི་ཁོའི་བྱེད་སྟངས་གཞན་པ་ཞིག་ནི། དགོང་མོ་ནང་ལ་ལོག་འགྲོ་རན་པ་ན་བྷོན་ཊ་དང་འབྲས་ཆན། སྤོད་ཡ་ཁ་ཚ་དང་ཚོད་མ་ཁུ་བ་ལྷག་ཚད་གྲྭ་ཆུང་ཚོར་རིན་མེད་དུ་བགོ་བཤའ་རྒྱག་པ་དེ་རེད། དེ་བས་གྲྭ་ཆུང་ཚོའི་ཁྲོད་དུ་སུ་པཱན་ན་ངོ་མི་ཤེས་མཁན་ཉུང་ཉུང་ཡིན་ལབ་ན་ཆོག
སུ་པཱན་ནས་ཟེར་ན་བདུན་རེའི་རེས་གཟའ་སྤེན་པ་དང་ཉི་མ། ད་དུང་ཐབ་ཚང་ནས་བག་ཐུག་སྤྲོད་པའི་ཉིན་ནི་ཁོས་ནམ་རྒྱུན་མཁོ་འདོན་བྱེད་ཀྱིན་པའི་ཟས་རིགས་ཙག་ཙིག་དེས་འདང་གི་མི་འདུག་ཟེར། སྐད་ཆ་འདི་ནི་རེས་གཟའ་སྤེན་པའི་ཉིན་རྒྱབ་སྟེ་ང་རང་ཁོ་དང་ལབ་གླེང་བྱེད་ཞོར་གྲྭ་ཆུང་ཚོས་སྤོ་ལོ་རྩེ་བ་ལ་གཡེང་སྐབས་བཤད་པ་རེད། ད་དུང་ཁོས། “དེང་སང་དགོན་པའི་ནང་ཡོད་མཁན་མང་ཆེ་བ་གྲྭ་པ་གསར་པ་རྐྱང་རྐྱང་རེད། གྲགས་པ་བླ་མ་དང་ཨ་མར་བླ་མ་ལྟ་བུའི་མི་རེ་གཉིས་མ་གཏོགས་གྲྭ་པ་རྙིང་པ་མང་ཆེ་བ་མཐོང་སར་མི་འདུག གོ་ཐོས་ལ་གྲྭ་པ་རྙིང་པ་མང་ཆེ་བ་ཕྱི་རྒྱལ་ལ་ཡོད་རེད་ཟེར། དེ་འདྲ་ངོ་མ་རེད་དམ། ཁོང་ཚོས་ཕྱི་རྒྱལ་ནས་ལས་ཀ་ག་རེ་བྱེད་ཀྱི་ཡོད་དམ།” ཞེས་ངོ་ལ་ཕངས་སྣང་གི་རྣམ་འགྱུར་ཞིག་མངོན་གྱིན་དེ་ལྟར་དྲིས་འོང་།
ངས། “ང་ལ་རྒྱུས་ལོན་དེ་ཙམ་མེད། ཕྱི་རྒྱལ་ལ་ཡོད་པའི་གྲྭ་པ་མང་ཆེ་བས་ཆོས་དང་འབྲེལ་བའི་ལས་ཀ་བྱེད་ཀྱི་ཡོད་རེད།” ཅེས་ལན་སྟབས་བདེ་པོ་ཞིག་བྱིན། སྐད་ཆ་བཤད་འདོད་མེད་པའི་ངའི་རྣམ་འགྱུར་མཐོང་བས་ཁོ་རང་རེ་ཞིག་ཁུ་སིམ་མེར་གྱུར། ཅུང་ཙམ་རྗེས་ནས་ཁོས་སྤོ་ལོར་མགོ་འཐོམས་པའི་གྲྭ་ཆུང་ཚོར་ལྟ་ཙམ་བྱས་ཏེ།
“གྲྭ་ཆུང་འདི་ཚོའི་ནང་དུས་ཚོད་ལ་ཟ་མ་མི་ཟ་མཁན་མང་པོ་འདུག ཁོང་ཚོ་རྩེད་མོར་མགོ་འཐོམས་པའི་སྐབས་དང་། དགོན་པའི་ནང་བག་ཐུག་ཡིན་པའི་ཉིན་དེ་ཚོར་སྒོར་མོ་བཅུ་གྲངས་ཙམ་ཁྱེར་འོངས་པ་དེས་ཉིན་ལྟོ་དང་དགོང་ཟས་གཉིས་ཀ་འདི་ནས་གོ་ཆོད་པ་བྱེད་ཀྱི་འདུག ངོ་མ་གྲྭ་ཆུང་ཁ་ཤས་སྙིང་རྗེ་དགོས་ས་དེ་འདྲའང་འདུག ཁྱོད་ཀྱིས་ཁོང་ཚོར་དོ་སྣང་བྱས་ཡོད་དམ།” ཟེར་ཏེ་ངའི་ངོ་གདོང་ལ་བལྟས་ནས་ཅི་ཞིག་བཤད་པར་བསྒུགས་འདུག
“རེད། རེད། ཁྱོད་ཀྱིས་བཤད་པ་དེ་ཚོ་དངོས་ཡོད་རེད། ཡིན་ནའང་དགོན་པའི་ངོས་ནས་ལྟ་རྟོག་མེད་པ་དེ་འདྲ་ག་ལ་ཡིན། ལྟོས་དང་། དགོན་པ་འདིར་གྲྭ་ཆུང་སྟོང་ཕྲག་སྒང་ལ་ཡོད་དུས། གནས་ཚུལ་ཆུང་ཆུང་དེ་འདྲ་ནི་ག་བ་ཡིན་ནའང་ཡོང་ངེས་ཅན་མ་རེད་དམ།” ལབ་པར་ཁོས་ཀྱང་མོས་མཐུན་ཡོད་པའི་བརྡ་ལ་མགོ་བོ་ལྡེམ་ལྡེམ་བྱས་ཏེ་ཡང་བསྐྱར་གྲྭ་ཆུང་ཚོར་བལྟས་འདུག
སྐོར་ལམ་ནང་ནས་སྤོ་བོ་རྨོ་མོ་རེ་གཉིས་ཀྱིས་མ་ཎི་འཁོར་ལོ་དིར་སྒྲ་དང་བཅས་བསྐོར་ཏེ་འགྲོ་ལ། ཉི་འོད་རྒྱ་ཁབ་བཞིན་མགོ་ལ་ཟུག་འོང་ཞིང་ཚ་ངབ་ནང་མཚམས་རེར་དབུགས་ཀྱང་གཏོང་ལེན་བྱེད་དཀའ་ནའང་། རྩེད་ཐང་སྒང་གི་གྲྭ་ཆུང་ཚོ་ནི་སྤོ་ལོའི་རྗེས་ནས་འདུར་བ་ལས་གཞན་པའི་དོ་སྣང་གང་ཡང་མི་འདུག སྤོ་ལོའི་དྲ་སྒོ་སྲུང་མཁན་དེ་གཅིག་པུ་ཉི་འོད་ཀྱིས་གཙེས་ཡོད་པ་འདྲ་སྟེ་མཚམས་རེར་མགོ་ལ་བཀབ་པའི་གཟན་དེ་ཡང་ཡང་བཟོ་བཅོས་རྒྱག་ཅིང་། སྐབས་རེར་ངོ་གདོང་གི་རྔུལ་ནག་སྐེད་པར་བརྫེས་པའི་ཤམ་ཐབས་ཀྱིས་ཡང་ནས་བསྐྱར་དུ་འབྱིད་ཀྱིན་འདུག སྡོང་ལོ་ཧྲག་ཧྲག་ཏུ་སྒུལ་འོང་བའི་ལྷོ་རླུང་བསིལ་མོ་དེ་ངོ་གདོང་དང་མཆན་ཁུང་ལ་ཧབ་ཧབ་ཀྱིས་རེག་ནས་འགྲོ་དུས། སྐྱིད་སྣང་དེ་ནི་འགྲེལ་བཤད་མི་ཕོག་པ་ཞིག་དང་། ཉི་འོད་འོག་གི་རྩེ་ཐང་དེའི་སྒང་ནས་གྲྭ་ཆུང་ཚོས་སྤོ་ལོར་གཡེངས་པའི་སྤྲོ་སྣང་དེ་ཡང་། སྤྲོ་སྣང་གཞན་པ་གང་གིས་ཀྱང་འགྲན་མི་བཟོད་པ་ཞིག་རེད།
ཆར་ཟིམ་ཟིམ་འབབ་པའི་ཞོགས་པ་འདི་ནི་རེས་གཟའ་ཉི་མའི་ཞོགས་པ་མ་ཡིན་ནམ། འཛིན་གྲྭ་མེད་པའི་ཉི་མ་ནི་མཁའ་དབུགས་ཀྱང་ལྷོད་ཤ་དོད་པའི་སྣང་བ་སྟེར། མདང་ནུབ་མཚན་མོ་ཆུ་ཚོད་གསུམ་པ་བར་རྐང་རྩེད་སྤོ་ལོ་འགྲན་སྡུར་ལ་བལྟས་ཏེ་འགོར་སོང་བས་དེ་རིང་ཞོགས་པ་ཆུ་ཚོད་དགུ་དང་ཕྱེད་ཀ་བར་གཉིད་འདུག ལྟོགས་ལྷང་ལྷང་གི་སྣང་བ་དེས་ཞོགས་ཟས་བཟའ་བར་བསྐུལ་བས་ངོ་གདོང་འཁྲུད་ལོང་ཡང་མེད་པར་ཐད་ཀར་གྲྭ་ཚང་ཟ་ཁང་ལ་བརྒྱུགས། ལམ་འགྲོ་མེད་པ་ཞིག་ལ་གྲྭ་ཚང་ཟ་ཁང་གི་ཞོགས་ཟས་རྫོགས་ཟིན་འདུག་པས་མ་ལ་ཡ་ཟ་ཁང་ལ་འགྲོ་བསམས་ནའང་སྟོད་ཐུང་ཁུག་མའི་ནང་ལྟ་དུས་སྒོར་མོ་ཉི་ཤུ་མ་གཏོགས་མི་འདུག དེ་བས་ཉབ་བེ་ཉོབ་བེའི་གོམ་འགྲོས་དེ་བྷོན་ཊ་ཟ་ས་ལ་མི་སྒྱུར་ཀ་མེད་མ་ཡིན་ནམ།
བྷོན་ཊ་ཟ་ས་ནས་མི་ཚོགས་མང་པོ་འདུག་ལ། ཁ་ཟས་ཙག་ཙིག་རིགས་འཚོང་མཁན་ཚོ་ཡང་རང་རང་ས་ནས་བྲེལ་འདུག ལྷག་པར་དུ་གྲྭ་ཆུང་ཚོས་སུ་པཱན་ནའི་བྷོན་ཊ་བསྲེས་མའི་འབྲས་ཆན་ལ་འཚང་ག་རྒྱག་བཞིན་པའི་སྒང་ཡིན་ནའང་ང་རང་ཅི་བསམ་འདི་བསམ་མེད་པར་སུ་པཱན་ནའི་རྩ་ལ་ཐད་ཀར་བརྒྱུགས།
གོམས་གཤིས་ཤིག་གིས་དབང་བསྒྱུར་པས་ཡིན་ནམ། ཡང་ན་སུ་པཱན་ནས་གྲྭ་ཆུང་ཚོར་སེམས་ཁུར་བྱེད་པས་ཡིན་ནམ། ཡང་ན་ཁོ་རང་དགོན་པའི་མི་རྙིང་པ་ཞིག་ལ་བརྩིས་ནས་ཡིན། བྷོན་ཊ་ཟ་ས་ལ་འབྱོར་ཐེངས་རེར་ང་རང་སུ་པཱན་ནའི་རྩར་དབང་མེད་དུ་འབྱོར་འགྲོ།……..
3/9/2015 ཉིན་རྫོགས་པར་བྲིས།
