ལོ་རིམ་བརྒྱད་པའི་སློབ་གཉེར་བ། པདྨ་དབང་འདུས།
བླ་མ་དང་གཉིས་སུ་མེད་པའི་དཔལ་ཀུན་ཏུ་བཟང་པོ་ལ་ཕྱག་འཚལ་ལོ།།
བདག་གི་རྒྱུད་བྱིན་གྱིས་རློབ་པར་མཛད་དུ་གསོལ།
སྤྱིར་རྫོགས་པ་ཆེན་པོའི་གཞི་འདོད་ལུགས་བདུན་ངོས་བཟུང་བ།
དེ་ཡང་གང་ཟག་རྣམ་པ་གཉིས་ཀྱི་དབང་དུ་བྱས་ཏེ་ཕྱོགས་རེ་བར་ཞེན་པས་གཞི་བདུན་དུ་འདོད་པ་སྟེ། གཞི་ལྷུན་གྲུབ་ཏུ་འདོད་པ། གཞི་མ་ངེས་པར་འདོད་པ། གཞི་ངེས་པ་དོན་གྱི་དངོས་གཞི་བར་འདོད་པ། གཞི་ཅིར་ཡང་བསྒྱུར་དུ་བཏུབ་པར་འདོད་པ། གཞི་ཅིར་ཡང་ཁས་བླང་དུ་བཏུབ་པར་འདོད་པ། གཞི་སྣ་ཚོགས་སུ་འདོད་པ། གཞི་ཀ་དག་ཏུ་འདོད་པའོ།།
ཡོན་ཏན་རིན་པོ་ཆེ་མཛོད་ལས།1 རེ་ཞིག་གཞི་ཡི་བཞུགས་ཚུལ་གྲུབ་པའི་མཐའ། །ཀ་དག་ལྷུན་གྲུབ་མ་ངེས་ངེས་པ་དོན། །ཅིར་ཡང་བཏུབ་དང་ཅིར་ཡང་ཁས་བླང་བཏུབ། །སྣ་ཚོགས་འདོད་པའི་གཞི་བདུན་ཐམས་ཅད་ཀྱང་། །ངོ་བོ་ཀ་དག་གཅིག་པུའི་ཕྱོགས་རེ་ལ། །སོ་སོར་བཏགས་པའི་རང་གཞུང་འཛིན་པ་གཞན།། ཁོང་ལོང་བདུན་གྱིས་གླང་པོའི་སྐྱེ་མཆེད་དང་། །ངང་པའི་ཁ་དོག་བརྗོད་པ་ཇི་བཞིན་ནོ། །ཞེས་དང་། སྒྲ་ཐལ་འགྱུར་རྩ་བའི་རྒྱུད་ལས།2 བབས་ལས་གྲུབ་པའི་གནས་ལུགས་ནི། །གནས་པ་བདུན་གྱི་ཚུལ་ལས་ཀྱང་། །སྣ་ཚོགས་ངོས་ནས་ལྷུན་གྲུབ་ལ། །འགྱུ་ཚད་ཆ་ནས་ངེས་མེད་པ། །མི་འགྱུར་བ་ལས་ངེས་པ་ཅན། །སྣང་བའི་རྩལ་ནི་ཅིར་ཡང་བསྒྱུར། །ཐམས་ཅད་འབྱུང་ཕྱིར་ཁས་ལེན་བཅས། །འཁྲུལ་པ་དག་ཕྱིར་ཀ་དག་ལ། །སྣང་ཚུལ་ཐ་དད་ཁྲ་བོར་འདོད། །ཅེས་དང། ཀློང་དྲུག་པ་ལས།3 ཐོག་མ་བབས་ཀྱིས་གྲུབ་པའི་གཞི། །ཡོད་པ་གཅིག་ལས་མེད་པ་ལ། །འཁྲུལ་པར་སྣང་བའི་ཕྱོགས་དག་ནས། །རྟོགས་པ་རྣམས་ཀྱིས་གཏན་ཕབ་ན། །རིམ་པ་བདུན་གྱི་ཚུལ་དུ་སྣང་། །རིམ་པ་བདུན་གྱི་སྣང་བ་ཡང་། །ངོ་བོ་གཅིག་གིས་སྣང་ཚུལ་ལས། །གཅིག་མ་ཤེས་པས་དེ་ལྟར་སྣང་།། འོན་ཀྱང་དེ་དོན་འདི་ལྟར་ཏེ། །ལྷུན་གྲུབ་ཉིད་དུ་གནས་པ་ལ། །སྣ་ཚོགས་བསྡུས་པ་སྙིང་པོར་སྣང་། །ངེས་པ་མེད་པར་གནས་པ་ལ།། འགྱུར་བྱེད་ཡིད་བཅས་རྣམ་པར་སྣང་། །ངེས་པར་རང་ངོ་གནས་པ་ལ། །དྲན་བྱེད་འཕོ་བ་མེད་པར་སྣང་། །བསྒྱུར་དུ་བཏུབ་པར་སྣང་བ་ལ། །འབད་དེ་བློ་ཡི་རྣམ་པར་སྣང་། །སྤྱི་ཡི་ངོ་བོར་གནས་པ་ལ། །གང་སྣང་རང་གི་ངོ་བོར་སྣང་། །ཁྲ་བོ་དག་ཏུ་གནས་པ་ལ། །སྣ་ཚོགས་སོ་སོའི་ཚུལ་དུ་སྣང་། །ཀ་ནས་དག་པར་འདོད་པ་ལ། །དྲི་མ་ཡེ་ནས་མེད་པར་སྣང་། །འདི་ཀུན་བློ་ཡི་རིམ་པ་ལས། །རང་ངོ་ཀ་ནས་དག་པའོ། །ཞེས་གསུངས་པ་ལྟར་དེ་བདུན་དུ་མ་འདུས་པའི་གཞི་གཞན་པ་ཞིག་རྫོགས་པ་ཆེན་པོའི་ལུགས་ལ་ཡོད་པར་མི་འདོད་དེ། ༸ཆོས་རྗེ་ཡིད་བཞིན་ནོར་བུ་འཇིགས་མེད་ཕུན་ཚོགས་མཆོག་གི་རྫོགས་ཆེན་གྱི་གཞི་ལ་དཔྱད་པ་ལས།4 དེ་ལ་རྫོགས་ཆེན་གྱི་གཞི་ངོས་འཛིན་སྐབས། གྲུབ་མཐའ་རྗེས་འཛིན་གྱི་གཞི་དྲུག་སྐྱོན་ཅན། ལམ་རྗེས་འཛིན་པའི་ཀ་དག་སྐྱོན་མེད་དུ་བཀྲལ་བ་རྒྱུད་དང་མན་ངག་རྣམས་སུ་གསལ་བ་དེ་བདུན་དུ་མ་འདུས་པའི་གཞི་མེད་པར་ཁས་ལེན་དགོས་སོ། །ཞེས་གསུངས་པ་བཞིན་ནོ།།
ཐེག་མཆོག་མཛོད་ལས།5 མཐར་འཛིན་གྱི་གཞི་བདུན་སྐྱོན་ཅན་དུ་བསྟན་པ་ནི། ལོང་བ་བདུན་གྱིས་གླང་པོ་ཆེ་བརྗོད་པ་ལྟར་རིག་པའི་ཕྱོགས་རེ་རྟོགས་པའི་ཆ་ལ་ཞེན་པའི་ཁས་ལེན་གཏིང་ཚུགས་པ་རེ་བཅས་ནས་འདོད་པས་དེ་དགག་པ་ལ་སོགས་ཀྱིས་གཞི་བདུན་དུ་འདོད་པ་བཀག་ནས། ཀ་དག་ལྷུན་གྲུབ་དབྱེར་མེད་ཀྱི་གཞི་རང་གཞུང་དུ་འགོད་པ་སོགས་གསུངས་པས་གཞི་བརྒྱད་དུ་འདོད་དགོས་སོ་ཞེ་ན། གཞི་བརྒྱད་དུ་ཡོད་པའི་སྐྱོན་རྣམ་པ་ཀུན་ཏུ་མེད་དེ། བདུན་པོ་དེ་རུ་མ་འདུས་པའི་ཀ་དག་ལྷུན་གྲུབ་དབྱེར་མེད་ཀྱི་གཞི་ཡན་གར་བ་ཞིག་མེད་པས་སོ།། དེ་ཉིད་ལས།6 གཞི་བརྒྱད་དུ་ཐལ་ཅེས་པའི་ལན་ནི་ཀ་དག་དང་ལྷུན་གྲུབ་དབྱེར་མེད་དུ་འདོད་ཀྱི། དེ་ནི་གཞི་བདུན་དུ་འདུ་བས་དེ་ལས་ལོགས་པ་མི་འདོད་པའི་ཕྱིར། གཞི་བརྒྱད་དུ་ཐལ་བའི་སྐྱོན་མེད་དོ། །ཞེས་གསུངས་པ་ལྟར་རོ། །མདོར་ན་གང་ཟག་གྲུབ་མཐའ་རྗེས་སུ་འཛིན་པའི་དབང་དུ་བཏང་ནས་གཞི་དྲུག་སྐྱོན་ཅན་དང་། གང་ཟག་ལམ་རྗེས་འཛིན་གྱི་དབང་དུ་བྱས་ཏེ་སྐྱོན་མེད་ཀ་དག་གི་གཞི་རང་གཞུང་དུ་འདོད་པ་བཅས་བདུན་ལས་ལོགས་ན་མེད་པར་འདོད་པའོ།།
ཡེ་གཞི་ཀ་དག་ལྷུན་གྲུབ་དབྱེར་མེད་ཀྱི་འདུག་ཚུལ་བརྗོད་པ།
དེ་ནི་སེམས་ཅན་དང་སངས་རྒྱས་མ་བྱུང་བའི་ཡེ་ཐོག་དང་པོར་རིག་པ་རང་བྱུང་གི་ཡེ་ཤེས་དེ་ཉིད་གཞི་ཀ་དག་གི་ཀློང་ལས་མ་གཡོས་པར་མ་འཁྲུལ་པའི་སངས་རྒྱས། མི་གཡོ་བའི་ཏིང་འཛིན། མི་འགྱུར་བའི་ཡེ་ཤེས་ཆེན་པོར་བཞུགས་པ་སྟེ། བཀྲ་ཤིས་མཛེས་ལྡན་རིན་པོ་ཆེའི་རྒྱུད་ལས།7རྟོགས་ཏེ་སངས་རྒྱས་མ་བྱུང་༔ མ་རྟོགས་ཏེ་སེམས་ཅན་མ་བྱུང་བའི་སྔོན་རོལ་ན༔ རིག་པ་རང་བྱུང་གི་ཡེ་ཤེས་ཉིད་གཞི་ལས་མ་གཡོས་ཏེ༔ མ་འཁྲུལ་པའི་སངས་རྒྱས་ཆེན་པོར་བཞུགས་སོ༔ མི་གཡོ་བའི་ཏིང་འཛིན་ཆེན་པོར་བཞུགས་སོ༔ མི་འགྱུར་བའི་ཡེ་ཤེས་ཆེན་པོར་བཞུགས་སོ༔ ཞེས་དང་། བཀྲ་ཤིས་མཛེས་ལྡན་ཆེན་པོའི་རྒྱུད་ལས།8 རྟོགས་པའི་སངས་རྒྱས་མ་བྱུང་། མ་རྟོགས་པའི་སེམས་ཅན་མ་བྱུང་བའི་སྔོན་རོལ་ན། རིག་པ་རང་བྱུང་གི་ཡེ་ཤེས་ཉིད་གཞི་ལས་མ་གཡོས་ཏེ། རྐྱེན་མེད་པའི་སྣང་བ་གསུམ་དང་ཐབས་གཅིག་ཏུ་བཞུགས་སོ། །ཞེས་དང་།
སྤྲོས་བྲལ་དོན་གསལ་གྱི་རྒྱུད་ལས།9 དང་པོ་གཞི་ཡི་གནས་ལུགས་བསྟན་པ་ནི། །འཁོར་འདས་རྟོགས་འཁྲུལ་མེད་པའི་གོང་རོལ་ན། །རྒྱུ་རྐྱེན་གཉིས་ལས་འདས་པས་རང་བྱུང་སྟེ།། བདེ་གཤེགས་ཐུགས་རྗེ་དག་ལས་མ་བྱུང་དང་། །སེམས་ཅན་རྣམས་ཀྱི་ལས་ཀྱིས་མ་བསྐྱེད་དང་། །ཕྱི་རོལ་འབྱུང་བ་ལྔ་ཡིས་མ་བསྐྱེད་དང་། །ནང་གི་རྣམ་རྟོག་དག་ལས་མ་གྲུབ་དང་། །གང་ཟག་ལམ་པའི་བློ་ཡིས་མ་བཅོས་པའོ། །མིང་དང་མཚན་མ་གང་ཡང་བརྟགས་པ་མེད། །ཤེས་མེད་རྟོགས་མེད་མ་རིག་འཁྲུལ་པ་མེད།། འཁྲུལ་དང་བག་ཆགས་རྟོག་པ་སྣ་ཚོགས་དང་། །ཡེ་ཤེས་རྩལ་སྣང་འབྲས་བུའི་ཆོས་རྣམས་ནི། །རང་བྱུང་གནས་ལུགས་གཞི་ལ་དབྱེ་བ་མེད། །ཐོག་མཐའི་དུས་དང་སྔ་ཕྱི་གྲུབ་པ་མེད། །བཟང་ངན་བླང་དོར་བསྒྲུབ་བྱ་གང་ཡང་མེད། །སོ་མ་རང་ལུགས་མ་བྱུང་མ་སྐྱེས་སོ། །ཞེས་པ་དང་།
ཚིག་དོན་མཛོད་ལས།10 རིག་པ་རང་བྱུང་གི་ཡེ་ཤེས། ཡེ་སྟོང་ཐོག་མའི་ཆོས་སྐུ། དབྱིངས་དོན་དམ་པའི་བདེན་པ། ཆོས་ཉིད་འོད་གསལ་བའི་གནས་ལུགས་ཏེ། འཁོར་འདས་བདེ་སྡུག ཡོད་མེད། ཡིན་མིན། གྲོལ་འཁྲུལ། རིག་མ་རིག་ལ་སོགས་པ་གང་དུའང་མ་གྲུབ་སྟེ། ཞེས་དང་། སྒྲོན་མ་བརྩེགས་པའི་རྒྱུད་ལས།11 གནས་ལུགས་གཤིས་ཀྱི་འདུག་ཚུལ་ནི། །ཡོད་མེད་སྟོང་དང་མི་སྟོང་དང་། །མཚོན་བྱེད་ཚིག་གིས་མཚོན་ལས་འདས།། སྐྱེ་འགག་གཉིས་མེད་ཐ་སྙད་གྲོལ། །སངས་མེད་རྒྱས་མེད་སྐུ་དངོས་མེད། །བྱང་ཆུབ་སེམས་མེད་རིགས་ལྔ་མེད། །བདེ་སྡུག་འཁོར་དང་མྱང་འདས་མེད། །རིག་འགྱུ་སེམས་མེད་དྲན་རྟོགས་མེད། ང་གཞན་ཕྱོགས་མེད་དགྲ་གཉེན་མེད། །ཡུལ་སེམས་བཟང་ངན་སྤོང་ལེན་མེད། །ཡིན་མིན་དབྱེ་གསལ་ཕྱོགས་མཚམས་མེད། །ཤེས་འཁྲུལ་སྒོ་གཉིས་རང་བཞིན་མེད། །གཞི་ཡི་རང་བཞིན་ཡོད་མེད་མཉམ། །ཞེས་སོ།།
དེ་ལྟ་བུའི་གཤིས་ཀྱི་གནས་ལུགས་ལ་འཁྲུལ་པ་ཡོད་དམ་མེད། ཡོད་ན་གྲོལ་བ་གཏན་ནས་མི་སྲིད་པའི་སྐྱོན་ཡོད་པར་འགྱུར་ཏེ། དཔེར་ན་སོལ་བ་ནག་པོ་ཇི་ཙམ་བཀྲུས་ཀྱང་དཀར་པོར་མི་འགྱུར་བ་བཞིན་ནོ། །མེད་ན་སེམས་ཅན་ཐམས་ཅད་ཡེ་ནས་གྲོལ་བར་རིགས་ཏེ། གཞི་ལ་འཁྲུལ་པ་གདོད་ནས་མེད་པས་སོ་ཞེ་ན། གཤིས་གཞི་ལ་མ་དག་འཁྲུལ་པས་ཡེ་ནས་གོས་མ་མྱོང་བས་དང་པོའི་སྐྱོན་མེད་ལ། རང་བཞིན་རྣམ་དག་གམ་གནས་ཚུལ་གྱི་ངོས་ནས་ཡིན་ན་སེམས་ཡེ་ནས་དག་པ་ཡིན་པས་སེམས་ཅན་ཐམས་ཅད་གྲོལ་བར་རིགས་ཀྱང་། སྣང་ཚུལ་ལ་གློ་བུར་གྱི་དྲི་མས་བསླད་ནས་གནས་ལུགས་མཐོང་བ་མེད་པས་གྲོལ་བ་ག་ལ་ཡིན། དཔེར་ན་ཉི་མའི་རང་བཞིན་ཡེ་ནས་འོད་གསལ་བ་ཡིན་ཀྱང་གློ་བུར་སྤྲིན་གྱིས་སྒྲིབ་དུས་མི་སྣང་བ་བཞིན་ཡིན་པས་གཉིས་པའི་སྐྱོན་ཡང་མེད་དོ།།
དེས་ན་གཞི་ནི་ཡེ་ནས་དག་པ་ཁོ་ན་སྟེ། ནམ་མཁའ་འཁོར་ལོ་འབར་བའི་རྒྱུད་ལས།12 སེམས་ཀྱི་གཞི་ལ་འཁྲུལ་པ་མེད། །རྩལ་ལ་འཁྲུལ་སྣང་ལྟར་སྣང་ཡང་། །སེམས་ཀྱི་གཞི་ལ་གོས་པ་མེད། །དཔེར་ན་མེ་ཤེལ་དག་པའི་ནང་། །དཀར་དམར་སྨན་དུག་བཟང་ངན་གང་སྣང་ཡང་། །ཤེལ་གྱི་གཞི་ལ་གང་ཡང་གྲུབ་པ་མེད། །སྨན་དུག་སྣང་ལ་གྲུབ་པ་མེད། །སྨན་མི་སྒྲུབ་ལ་དུག་མི་སྤོང་། །ཤེལ་གོང་ནང་དུ་གཉིས་ཀ་དག །དེ་བཞིན་སེམས་ཀྱི་གཞི་མ་ཡང་། །འཁྲུལ་སྣང་ཅིར་ཡང་སྣང་མེད་ཀྱང་། །བཟང་པོ་མི་སྒྲུབ་ངན་མི་སྤོང་། །སེམས་ཉིད་ཀ་དག་ནང་དུ་འཁྲུལ་པ་དག ། འཁྲུལ་སྣང་རང་བཞིན་མེད་དེ་སེམས་སུ་དག །ཅེས་སོ། །དེ་ཡང་ངོ་བོ་སྟོང་པ་རང་བཞིན་གསལ་བ་ཐུགས་རྗེ་ཀུན་ཁྱབ་ཀྱི་བདག་ཉིད་སེམས་ཅན་དང་སངས་རྒྱས་ཀྱི་འཆར་གཞི་རུ་གནས་པ་སྟེ། ཐེག་མཆོག་མཛོད་ལས།13 དེ་ལྟར་མཐའ་བྲལ་རང་བྱུང་གི་ཡེ་ཤེས་ངོ་བོ་སྟོང་པས་གང་དུའང་མ་གྲུབ། རང་བཞིན་གསལ་བར་སྣང་ཚུལ་མ་འགགས། ཐུགས་རྗེ་གོ་མ་འགགས་པས་གང་ལྟར་ཡང་འཆར་བའི་གཞི་བྱེད་པ་ནི། གཞི་དངོས་པོ་གཤིས་ཀྱི་གནས་ལུགས་ཡིན་ནོ། །ཞེས་གསུངས་པ་ལྟར་རོ།།
ཀ་དག་གི་ཀློང་ལས་གཞི་སྣང་འཆར་ཚུལ་བསྟན་པ།
ནང་དབྱིངས་ཀ་དག་གི་ཀློང་ལས་གཞོན་ནུ་བུམ་སྐུའི་རྒྱ་ཁ་རལ་ཏེ་ལྷུན་གྲུབ་སྒོ་བརྒྱད་ཀྱི་སྣང་བ་ཤར་བ་སྟེ། གཡུ་ཁོག་བླ་མ་བྱ་བྲལ་གྱི་གཞི་ལས་གཞི་སྣང་འཆར་ཚུལ་གྱི་སྐོར་ལས།14 གཞི་ལྷུན་གྲུབ་རིན་པོ་ཆེའི་སྦུབས་ན་འཁོར་འདས་གཉིས་ཀྱི་སྣང་བ་འཆར་རུང་གི་གདངས་མ་འགགས་པར་ཡོད། གཞི་སྣང་ལམ་ལྷུན་གྲུབ་རིན་པོ་ཆེའི་སྦུབས་ནི་འཁོར་འདས་སུ་སྣང་བའི་འཁྲུལ་གཞི་དང་གྲོལ་གཞི་གཉིས་ཀ་ཡིན། གཞི་ལ་དག་མ་དག་གཉིས་ཀ་མི་སྲིད་ཀྱང་གཞི་སྣང་ལྷུན་གྲུབ་ལ་འཁོར་འདས་གཉིས་སུ་འཆར་བའི་སྒོ་ཡོད་པ་ལ་ལྷུན་གྲུབ་སྒོ་བརྒྱད་ཀྱི་སྣང་བ་ཞེས་བྱ་སྟེ། ཐུགས་རྗེ་ལྟར་ཤར་བ་མེད་ན་གདུལ་བྱ་འདུལ་བྱེད་དུ་མི་འབྲེལ། འོད་ལྟར་ཤར་བ་མེད་ན་རིག་པ་ནང་དུ་ཆད། འབྱུང་བ་ཕྱིར་རྒྱ་ཆད་པས་སྣོད་བཅུད་ཀྱི་སྣང་བའང་མི་འབྱུང་ལ། གཉིས་མེད་ལྟར་ཤར་བ་མེད་ན་སེམས་ཅན་གྱི་སྒོ་གསུམ་དང་སངས་རྒྱས་ཀྱི་སྐུ་གསུང་ཐུགས་སུ་འབྲེལ་མི་ཤེས་པས་སེམས་ཅན་སངས་རྒྱས་སུ་མི་འགྱུར། སྐུ་ལྟར་ཤར་བ་མེད་ན་འགྲོ་བའི་ལུས་དང་རྒྱལ་བའི་སྐུར་སྣང་བའང་མི་རིགས། ཡེ་ཤེས་ལྟར་ཤར་བ་མེད་ན་ཤེས་བྱ་རང་མཚན་པར་གྱུར་པས་གཞི་ལམ་འབྲེལ་མཚམས་མི་སྦྱོར། མཐའ་གྲོལ་ལྟར་ཤར་བ་མེད་ན་འབྲས་བུ་རྒྱུར་ལྡོག་པས་ངེས་པའི་ས་ཟིན་མི་ཐོབ། མ་དག་འཁོར་བའི་སྒོ་མེད་ན་སེམས་ཅན་དུ་འཁྲུལ་མི་ཤེས་པས་འཁོར་འདས་ཀྱི་བསྟི་གནས་སུ་མི་རུང་། དག་པ་ཡེ་ཤེས་ཀྱི་སྒོ་མེད་ན་རིག་ངོ་ལ་སངས་རྒྱས་ཀྱི་ཡོན་ཏན་མི་འབྱུང་ངོ་། །ཞེས་དང་།
ཚིག་དོན་མཛོད་ལས།15 ནང་དབྱིངས་ཀ་དག་གི་ཡེ་གཞི་གཞོན་ནུ་བུམ་པ་སྐུའི་རྒྱ་ཁ་རལ་ཏེ་ཡེ་ཤེས་ཀྱི་རླུང་གཡོས་པས་རིག་པ་གཞི་ནས་འཕགས་པའི་རང་སྣང་ལྷུན་གྲུབ་ཀྱི་སྒོ་བརྒྱད་ཤར་དུས་སྟེང་དུ་ཀ་དག་ཆོས་སྐུའི་སྣང་བ་ནམ་མཁའ་སྤྲིན་མེད་ལྟ་བུ། ཐད་ཀར་ལོངས་སྐུ་འོད་གསལ་གྱི་ཞིང་སྣང་ནམ་མཁའི་དབྱིངས་ཁྱབ་པ། དེའི་རྩལ་ལས་འོག་ན་གཞི་སྣང་ཆེན་པོ་དང་དེའི་རྩལ་ལས་འོག་ན་ལོངས་སྐུའི་སྣང་བ་དང་། ཕྱོགས་མཚམས་ན་རང་བཞིན་སྤྲུལ་སྐུའི་ཞིང་སྣང་དང་། མར་འོག་ན་འཁོར་བའི་སྒོ་ལས་འགྲོ་དྲུག་རང་སྣང་གི་ཞིང་ཁམས་ཚད་མེད་པ་སྟེ། དེ་ཐམས་ཅད་ལྷུན་གྲུབ་སྒོ་བརྒྱད་ཀྱི་སྣང་བ་ལས་རང་ཤར་བས་འཁོར་འདས་ཀྱི་སྣང་བ་ཆེན་པོ་དུས་གཅིག་ལ་ཤར་བ་ཞེས་བྱ་སྟེ། ཞེས་དང་།
ཐེག་མཆོག་མཛོད་ལས།16 ཐོག་མའི་དབྱིངས་གཞོན་ནུ་བུམ་པ་སྐུའི་ནང་ན་ངོ་བོ་སྐུར་གནས་པ། རང་བཞིན་གསུང་དུ་གནས་པ། ཐུགས་རྗེ་ཐུགས་སུ་གནས་པ་དེའང་སྲོག་རླུང་ཡན་ལག་བཞི་ལྡན་ཡེ་ཤེས་ཀྱི་རླུང་ལྔའི་སྙིང་པོ་རིག་པར་གནས་པའི་གདངས་ཕྱིར་ཤར་བས། གཞོན་ནུ་བུམ་པ་སྐུའི་རྒྱ་རལ་ཏེ། ལྷུན་གྲུབ་ཀྱི་གདངས་ལས་འོོད་ལྔའི་སྣང་བ་མེ་རེ་རེ་ཤར་བ་དང་མཉམ་དུ། ཐུགས་རྗེ་རིག་པའི་གདངས་རྣམ་པ་ལ་དཔྱོད་པའི་ཤེས་པ་ཤར་བ་དེ་ཡང་། ཞེས་དང་། དེའི་ཚེ་ཀ་དག་གི་སྣང་བ་ནམ་མཁའ་སྤྲིན་མེད་པ་ལྟ་བུའི་ངང་ལས། ལྷུན་གྲུབ་ཀྱི་འཆར་ཚུལ་བརྒྱད་རང་སྣང་དུ་ཤར་ཏེ། ཐུགས་རྗེ་ལྟར་འཆར་བའི་གོ་མ་འགགས་པས་སེམས་ཅན་ལ་སྙིང་རྗེ་འབྱུང་བ། འོད་ལྟར་འཆར་བའི་གོ་མ་འགགས་པས་ཡེ་ཤེས་ལྔའི་རང་འོད་འཇའ་ཚོན་ལྟ་བུས་སྣང་བ་ཁེངས་པ། ཡེ་ཤེས་ལྟར་འཆར་བའི་གོ་མ་འགགས་པས་མི་རྟོག་པའི་ངང་ལ་གནས་པ། སྐུ་ལྟར་འཆར་བའི་གོ་མ་འགགས་པས་ཞི་ཁྲོ་འོད་གསལ་གྱི་སྐུས་ནམ་མཁའ་ཁེངས་པ། གཉིས་མེད་ལྟར་འཆར་བའི་གོ་མ་འགགས་པས་གཅིག་དང་དུ་མར་མི་དཔྱོད་པ། མཐའ་གྲོལ་ལྟར་འཆར་བའི་གོ་མ་འགགས་པས་ལྷུན་གྲུབ་རང་དོན་གསལ་བ། དག་པ་ཡེ་ཤེས་ལྟར་འཆར་བའི་གོ་མ་འགགས་པས་ངོ་བོ་ཀ་དག་གི་སྣང་བ་ནམ་མཁའ་སྤྲིན་མེད་པ་ལྟ་བུའི་སྣང་བ་གོང་ན་མཐོང་བ། མ་དག་པ་འཁོར་བའི་སྒོ་ལྟར་འཆར་བའི་གོ་མ་འགགས་པས་འོག་ན་རིགས་དྲུག་གི་སྣང་ཆ་སྣང་བ་སྟེ། ཞེས་གསུངས་པ་ལྟར་མདོར་ན་ནང་དབྱིངས་ཀ་དག་གཞོན་ནུ་བུམ་པ་སྐུའི་རྒྱ་ཁ་རལ་ནས་ལྷུན་གྲུབ་ཀྱི་སྣང་བ་ཕྱི་གསལ་དུ་ཤར་བའོ།།
གཞི་སྣང་རང་སྣང་དུ་ངོ་ཤེས་པས་ཀུན་ཏུ་བཟང་པོའི་གྲོལ་ཚུལ་བཤད་པ།
གཞི་ལས་གཞི་སྣང་འཕགས་ཏེ་ཕྱི་གསལ་དུ་འཆར་བ་ན་ཀུན་ཏུ་བཟང་པོས་གཞི་སྣང་ལ་རང་སྣང་དུ་ངོ་ཤེས་པས་སྐད་ཅིག་གཅིག་ལ་བྱེ་བྲག་ཕྱེད་ནས་སྐད་ཅིག་གཅིག་ལ་རྫོགས་པའི་སངས་རྒྱས་སུ་གྲོལ་བ་སྟེ། ཡོན་ཏན་རིན་པོ་ཆེ་མཛོད་ལས། 17དེ་ཚེ་གཞི་སྣང་མཐོང་བའི་སྐད་ཅིག་མར། །དང་པོའི་སངས་རྒྱས་ཀུན་ཏུ་བཟང་པོ་དེས། །སྣང་བ་འཁྲུལ་པར་མ་མཆེད་རང་སྣང་དུ། །རིག་པས་ལུང་མ་བསྟན་གྱི་གཞི་ལས་འཕགས། །གཞི་ཉིད་འབྲས་བུར་སྨིན་པའི་ཤེས་རབ་ཀྱིས། །སྐད་ཅིག་གཅིག་ལ་བྱེ་བྲག་རབ་ཏུ་ཕྱེད། །ཕྱེད་ཐོག་ཤེས་རབ་ཉིད་ཀྱང་སྐུར་སྨིན་པ།། གཞན་བྱུང་རྐྱེན་ལ་མ་ལྟོས་རང་སར་གནས། །སྐུ་དང་ཡེ་ཤེས་རྒྱ་མཚོའི་བདག་ཉིད་དུ། །སྐད་ཅིག་གཅིག་ལ་མངོན་པར་སངས་རྒྱས་སོ། །ཞེས་དང་།
གཉིས་ཀའི་ཡང་ཡིག་གི་རྣམ་བཤད་ཉི་མའི་སྣང་བ་ལས།18 གདོད་མའི་གཞི་དེ་ཉིད་ཀྱི་ངང་ལས་ལྷུན་གྲུབ་འོད་ལྔའི་སྣང་བ་རིག་པ་ཡེ་ཤེས་ཀྱི་རླུང་གིས་ཕྱིར་ཤར་དུས་འོད་ལྔ་ལྷུན་གྲུབ་ཀྱི་གདངས་འཇའ་ཚོན་ལྟར་ཤར་བ་ན། ལོངས་སྐུ་ཞི་ཁྲོའི་དཀྱིལ་འཁོར་བསམ་གྱིས་མི་ཁྱབ་པ་དང་། རང་བཞིན་སྤྲུལ་པའི་ཞིང་ལྔ་དང་། འགྲོ་བ་དྲུག་གི་འཇིག་རྟེན་ན། ཐུབ་པ་དྲུག་གི་སྤྲུལ་པ་གྲངས་མེད་པ་གཟུགས་བརྙན་ལྟར་རང་སྣང་རང་ཤར་དུ་སྣང་སྟེ། དེའི་ཚེ་ཀུན་ཏུ་བཟང་པོ་ཐུགས་རྗེའི་རྩལ་རིག་པར་འཕྲོས་ལ་རྟོག་པར་མ་འགྱུས་པ་དེས་གཞི་སྣང་ཤར་བ་རང་རིག་རང་ངོ་ཤེས་པའི་སྐད་ཅིག་ལ་རྣམ་པར་གྲོལ་བ་དབྱིངས་དང་ཡེ་ཤེས་འདུ་འབྲལ་མེད་པ་ནང་གསལ་ཆོས་ཉིད་ཀྱི་དགོངས་པར་བཞུགས། ཞེས་དང་། ཆོས་དྲུག་གི་ནི་དབྱིངས་སྣང་ཤར་དུས་རྒྱུའི་རྐྱེན་ལྷན་ཅིག་སྐྱེས་པའི་རིག་པ། ཡུལ་གྱི་རྐྱེན་འོད་དང་སྐུར་སྣང་བ་མཚུངས་པ་དེ་མ་ཐག་པའི་རྐྱེན་སྣང་རིག་དུས་མཚུངས་པ་གསུམ་གྱི་ཚེ་སྐད་ཅིག་གཅིག་གིས་རང་སྣང་བྱེ་བྲག་ཕྱེད་ནས། ཕྱེད་ཐོག་ཏུ་གཞི་ཡེ་སངས་རྒྱས་པ་ལ་རྟོགས་པའི་ཡང་སངས་རྒྱས་པ་སྟེ། ཞེས་དང་།
གཉིས་ཀའི་ཡང་ཡིག་ནམ་མཁའ་ཀློང་ཆེན་ལས། 19དེ་ལྟའི་དབྱིངས་ལས་རང་རིག་རྣམ་གྲོལ་ཞིང་། །སྐད་ཅིག་བྱེ་བྲག་ཕྱེད་པས་སངས་རྒྱས་ཏེ། །གདོད་མའི་མགོན་པོ་ཡོན་ཏན་ཕ་རོལ་ཕྱིན། །ནང་གི་ཇི་བཞིན་གཟིགས་པ་རྣམ་དག་པས། །དང་པོ་སངས་རྒྱས་ཆོས་ཚོགས་རྣམ་པར་བཞག །ཅེས་དང་། ཐོད་རྒལ་ཡང་ཡིག་ནམ་མཁའ་ཀློང་གསལ་ལས།20 དེ་ཚེ་རང་སྣང་རང་རིག་པས། །སྐད་ཅིག་གཅིག་གིས་བྱེ་བྲག་ཕྱེད། །སྐད་ཅིག་གཅིག་གིས་རྫོགས་སངས་རྒྱས། །ཀུན་ཏུ་བཟང་པོ་གྲོལ་ཚུལ་ལོ། །ཞེས་དང་། ཐེག་མཆོག་མཛོད་ལས།21 ཐོག་མའི་དབྱིངས་ལས་ནང་གདངས་ཕྱིར་ཤར་ཏེ། ཐུགས་རྗེ་རིག་པ་རང་མ་རིག་པའི་ཆར་སྐྱེས་ཙམ་དེ་གཞི་སྣང་ལ་ཁ་ཕར་བལྟས་པས། རང་གི་སྣང་བ་ཡིན་པར་ཚུར་རིག་པའི་སྐད་ཅིག་ལ། མ་རིག་པ་རང་དག་ནས་གཞི་སྣང་ལྷུན་གྲུབ་ཀྱི་འཆར་ཚུལ་ནང་ཐིམ་ཀ་དག་གི་ས་ལ་རང་སར་གནས་སོ། །དེ་ཡང་སྐད་ཅིག་ལ་རང་སྣང་དུ་བྱེ་བྲག་ཕྱེད་པས། སྐད་ཅིག་ལ་སངས་རྒྱས་ཏེ། ཞེས་དང་། སྒྲ་ཐལ་འགྱུར་ཆེན་པོ་རྩ་བའི་རྒྱུད་ལས།22 དེ་ལྟར་འཁོར་འདས་ཐོག་མཐའ་ལས།། སངས་རྒྱས་འཁྲུལ་པར་མ་གྱུར་པས། །གཞི་ནས་འཕགས་པའི་དབང་པོ་ཡིས། །རང་སྣང་རང་བཞིན་མེད་པར་ཤེས། །རྟོག་སྤྱོད་ཡིད་རྣམས་ཕྱིར་མ་ཤོར། །འགྱུར་བ་རང་ཐག་ཆོད་པའོ། །ཞེས་གསུངས་པ་བཞིན་ནོ།།
གཞི་སྣང་ལ་རང་སྣང་དུ་མ་རྟོགས་པས་སེམས་ཅན་གྱི་འཁྲུལ་ཚུལ་དགོད་པ།
གཞི་སྣང་རང་སྣང་དུ་མ་ཤེས་པས་འཁྲུལ་པ་བྱུང་བ་སྟེ། བཀྲ་ཤིས་མཛེས་ལྡན་རིན་པོ་ཆེའི་རྒྱུད་ལས།23 འཁྲུལ་གཞི་སྣ་ཚོགས་མང་བཤད་ཀྱང་༔ ལྷུན་གྲུབ་དང་ནི་ཐུགས་རྗེའོ༔ ཡེ་ཤེས་ཉིད་ལས་མ་རིག་འཁྲུལ༔ ཀྱེ་མ་ང་ལ་འཁྲུལ་མེད་ཀྱང་༔ ང་ཡི་རྩལ་ལས་འཁྲུལ་པ་བྱུང་༔ ངོ་བོ་རང་བཞིན་ཐུགས་རྗེ་གསུམ༔ དངོས་སུ་ཡོད་ཀྱང་མི་རིག་པས༔ རྒྱུ་རྐྱེན་འབྲས་བུ་ཅན་དུ་བྱུང་༔ ཡུལ་སྣང་ཆོས་ཉིད་ཡིན་པ་རུ༔ རང་ངོ་མ་ཤེས་རང་རྒྱུད་འཁྲུལ༔ རྒྱུ་གཅིག་བྱེད་མེད་རྩ་བ་སྟེ༔ རང་ངོ་ཡིན་པར་མ་ཤེས་པས༔ འདི་ནི་འཁོར་བའི་རྩ་བའོ༔ ཞེས་དང་།
ཡོན་ཏན་རིན་པོ་ཆེ་མཛོད་ལས།24 ཐོག་མའི་གཞི་ལ་འཁྲུལ་པ་མ་མཆིས་ཀྱང་། །གཞི་སྣང་ཤར་བའི་རྣམ་པ་མ་རིག་པའི། །གློ་བུར་རྐྱེན་ནི་བདག་ཉིད་གཅིག་པ་སྟེ། །དེ་ཉིད་ཐུར་སོང་ལྷན་ཅིག་སྐྱེས་པ་ལ། །མིང་དོན་བདག་རྟོག་ཀུན་ཏུ་བརྟགས་པ་ཡི། །མ་རིག་གསུམ་ལས་འཁྲུལ་པའི་རྐྱེན་བཞི་མཆེད། །གཞི་ཉིད་ཁྱིམ་ལྟར་གནས་པ་རྒྱུ་ཡི་རྐྱེན། །དེ་ལ་རྟོག་དཔྱོད་ཤར་བ་བདག་པོའི་རྐྱེན། །དེ་ལས་ཡུལ་དང་ཡུལ་ཅན་དམིགས་པའི་རྐྱེན།། གསུམ་པོ་དུས་མཚུངས་དེ་མ་ཐག་པའི་རྐྱེན། །ཚོགས་ལས་རིམ་བཞིན་འཁྲུལ་པ་སྟོབས་གྱུར་ནས། །ཉོན་མོངས་ཚོགས་འཕེལ་འཁོར་བའི་གནས་རིགས་གྲུབ། །ཅེས་དང་། ཐེག་མཆོག་མཛོད་ལས།25 ཐོག་མའི་གཞི་ལ་འཁྲུལ་པ་མེད་ཀྱང་། གཞི་སྣང་དུ་ཤར་དུས་རང་ངོ་མ་ཤེས་པའི་ཤེས་པ་ལུང་མ་བསྟན་མ་རིག་པའི་རྩ་བ་ཅན་དེས། གཞི་སྣང་ལ་རིས་སུ་བཅད་པས་སེམས་ཅན་དུ་འཁྲུལ་ཏེ། ཞེས་དང། ཐོད་རྒལ་ཡང་ཡིག་ནམ་མཁའ་ཀློང་གསལ་ལས།26 མ་རིག་སེམས་ཅན་འཁྲུལ་ཚུལ་ནི། །གཞི་སྣང་ཤར་ཚེ་རང་སྣང་དུ། །རང་ལས་ཤར་བ་མ་རིག་པས། །ལྷན་ཅིག་སྐྱེས་པའི་མ་རིག་བྱུང་། །འོད་ལྔས་ཡུལ་ལུས་འཁྲུལ་གཞིར་བྱས། །ཐུགས་རྗེས་སེམས་ཀྱི་འཁྲུལ་གཞི་ཤར། །ངོ་བོ་མ་རིག་འཁྲུལ་གཞི་བྱུང་། །དེ་ཚེ་འོད་ལྔའི་སྣང་བ་ལ། །གཞན་འཛིན་རྟོག་པར་འགྱུས་པ་ནི། །ཀུན་ཏུ་བརྟགས་པའི་མ་རིག་གོ །རྐྱེན་བཞིའི་དམིགས་པ་མ་དག་པས། །གཟུགས་མེད་གཟུགས་དང་འདོད་ཁམས་ཀྱི། །སྲིད་པར་འཁྲུལ་སྣང་སྣ་ཚོགས་མྱོང་། །ཞེས་དང་།
རིན་ཆེན་སྒྲོན་མ་རྩ་བའི་རྒྱུད་ལས།27 གནས་ལུགས་མཉམ་པའི་ངང་ལས་འཁྲུལ་ཚུལ་ནི། །སྟོང་པའི་ངང་ལས་འགྱུ་བ་རླུང་གཡོས་པས། །དེ་ལས་རིག་པ་རང་སར་ཤར་བ་ལ། །ཡིན་ནམ་མ་ཡིན་སྙམ་པའི་ཡིད་དུ་མྱོང་། །སྙམ་བྱེད་འདོད་པས་སེམས་སུ་གསལ་བར་འགྱུས། །གསལ་བ་ཁ་དོག་ལྔ་རུ་སྣང་བ་ལ། །འོད་ཀྱི་དངོས་པོ་དེ་ཡི་རྐྱེན་བྱས་ནས། །མེད་ལས་ཡོད་བྱུང་རིགས་དྲུག་སེམས་ཅན་རྣམས། །སྙིང་པོ་མིང་མེད་རང་ངོ་མ་ཤེས་འཁྲུལ། །དཔེར་ན་དམུས་ལོང་མདུན་ན་གཟུགས་སྣང་འདྲ།། ཞེས་པ་དང་། བཀྲ་ཤིས་མཛེས་ལྡན་ཆེན་པོའི་རྒྱུད་ལས།28 ཀྱེ་མ་ང་ལ་འཁྲུལ་པ་མེད་ཀྱང་། ངའི་རྩལ་ལས་འཁྲུལ་པ་བྱུང་སྟེ། གཞི་མི་འགྱུར་བ་ལས། རང་བཞིན་མ་འགགས་པར་ཤར་ནས། ཐུགས་རྗེ་མ་ངེས་པ་ལས་མ་རིག་པ་རང་བྱུང་སྟེ། དཔེར་ན་ནམ་མཁའ་ལ་སྤྲིན་ཡང་དག་པར་ཡོད་པ་མ་ཡིན་ཏེ། གློ་བུར་དུ་སྤྲིན་བྱུང་བ་དང་འདྲ་བར། གཞི་ལ་མ་རིག་པ་ཡོད་པར་ཅང་མ་ཡིན་ཏེ། ཐུགས་རྗེ་ལྟར་ཤར་བ་ལས་མ་རིག་པ་བྱུང་སྟེ། ཞེས་དང་།
སྒྲ་ཐལ་འགྱུར་ཆེན་པོ་རྩ་བའི་རྒྱུད་ལས།29 ཆོས་ཉིད་རང་གདངས་སྣང་བ་ལ། །རྟོག་འཛིན་སྣང་བས་ཡིད་ཕྲོགས་ཏེ། །འཁྲུལ་ཆའི་ཡུལ་ནི་ཕྲ་མོ་ལས། །སྒྲིབ་ཅིང་རང་སྣང་མ་དག་འགྱུར། །ཞེས་དང་། བཀྲ་ཤིས་མཛེས་ལྡན་གྱི་རྩ་འགྲེལ་ལས།30 དེ་ལ་མ་རིག་པ་ནི་སྤྲིན་དང་ཁ་རླངས་ལྟ་བུར་གློ་བུར་དུ་བྱུང་བས༔ ལྷུན་གྲུབ་ལ་རྟོག་དཔྱོད་བཏང་བས་འཁྲུལ་པ་ཆེན་པོར་བྱུང་ངོ་༔ ཞེས་དང་། ཁམས་གསུམ་གྱི་སེམས་ཅན་ཐམས་ཅད་ནི༔ གཞི་ཅིར་ཡང་མ་ཡིན་པ་ལ་ཅིར་ཡང་འཁྲུལ་ལོ༔ གཞི་ལྷུན་གྲུབ་རིག་པའི་རང་མདངས་ལྔ་པོ་དེ་ནི༔ ངོ་བོ་སྟོང་ལ་རང་བཞིན་ནི་གསལ་བ༔ ཐུགས་རྗེ་སེམས་ཅན་ལ་སྣང་ནུས་པའོ༔ དེ་ལ་འཛིན་བྱེད་ཀྱི་ཤེས་པ་མ་རིག་པའི་ཆ་ལས་བྱུང་བ་བྲེང་ཙམ་གཅིག་འགྱུས་པ་ལས༔ ཤེས་པ་སྤུན་པ་ཕ་གི་ལས་ང་བྱུང་ངམ༔ ང་ལས་ཕ་གི་བྱུང་ངམ་སྙམ་པའི་ཤེས་པ་བྱུང་བ་ཙམ་གྱིས་འཁྲུལ་ལོ༔ ཞེས་གསུངས་པ་ལྟར་རོ།།
དེ་ལྟར་རང་ཚིག་གིས་མ་བསླད་པར་རྒྱུད་ལུང་མན་ངག་གི་རྡོ་རྗེའི་ཚིག་རྣམས་བསྡུ་རུབ་ཀྱིས་རྫོགས་ཆེན་གྱི་གཞི་ཡི་སྐོར་ཅུང་ཟད་སྨྲས་པ་ལ་བརྟེན་ནས་གསང་སྒྲོག་གི་ཉེས་པ་རེ་བྱུང་ཡོད་ན་རྩ་གསུམ་གྱི་ལྷ་ལ་བཤགས་ཤིང་བཟོད་པར་གསོལ། འདིར་འབད་པ་ལས་བྱུང་བའི་དགེ་ཚོགས་ཀྱི་ཆ་མཆིས་ན་མ་རྒན་སེམས་ཅན་ཐམས་ཅད་ལ་བསྔོའོ།།
- འཇིགས་གླིང་གསུང་འབུམ་ཀ་པ། དཔེ་རིང་། ཤོག་གྲངས། ༡༣༢
- རྙིང་རྒྱུད་ན་པ། འབྲུག་གི་པར་མ། དཔེ་རིང་། ཤོག་གྲངས། ༡༥༢
- རྙིང་རྒྱུད་ན་པ། འབྲུག་གི་པར་མ། དཔེ་རིང་། ཤོག་གྲངས། ༤༣༧
- གསུང་འབུམ་ག་པ། ཁ་བ་དཀར་པོའི་པར་མ། དེབ་གཟུགས། ཤོག་གྲངས། ༡༥
- ཐེ་ཝན་པར་མ། དེབ་གཟུགས། ཤོག་གྲངས། ༣༡༤
- ཐེ་ཝན་པར་མ། དེབ་གཟུགས། ཤོག་གྲངས། ༣༢༡
- པད་གླིང་གཏེར་ཆོས། འབྲུག་གི་པར་མ། དཔེ་རིང་། ཤོག་གྲངས། ༥༡
- རྙིང་རྒྱུད་ན་པ། འབྲུག་གི་པར་མ། དཔེ་རིང་། ཤོག་གྲངས། ༡༧༤
- རྙིང་རྒྱུད་པ། འབྲུག་གི་པར་མ། དཔེ་རིང་། ཤོག་གྲངས། ༡༣
- ཐེ་ཝན་པར་མ། དེབ་གཟུགས། ཤོག་གྲངས། ༡༣
- རྙིང་རྒྱུད་ཐ་པ། འབྲུག་གི་པར་མ། དཔེ་རིང་། ཤོག་གྲངས། ༡༨༧
- རྙིང་རྒྱུད་ཐ་པ། འབྲུག་གི་པར་མ། དཔེ་རིང་། ཤོག་གྲངས། ༡༤
- ཐེ་ཝན་པར་མ། དེབ་གཟུགས། ཤོག་གྲངས། ༣༢༦
- གསུང་འབུམ་ཁ་པ། སི་ཁྲོན་དཔེ་སྐྲུན་ཁང་གི་པར་མ། དེབ་གཟུགས། ཤོག་གྲངས། ༣༢༤
- ཐེ་ཝན་པར་མ། དེབ་གཟུགས། ཤོག་གྲངས། ༢༡
- ཐེ་ཝན་པར་མ། དེབ་གཟུགས། ཤོག་གྲངས། ༣༣༥
- འཇིགས་གླིང་གསུང་འབུམ་ཀ་པ། དཔེ་རིང་། ཤོག་གྲངས། ༡༣༤
- རྣམ་གླིང་པར་མ། དེབ་གཟུགས། ཤོག་གྲངས། ༤༢
- ཐེ་ཝན་པར་མ། དེབ་གཟུགས། ཤོག་གྲངས། ༡༡
- ཐེ་ཝན་པར་མ། དེབ་གཟུགས། ཤོག་གྲངས། ༢
- ཐེ་ཝན་པར་མ། དེབ་གཟུགས། ཤོག་གྲངས། ༣༥༤
- རྙིང་རྒྱུད་ན་པ། འབྲུག་གི་པར་མ། དཔེ་རིང་། ༨༩
- པད་གླིང་གཏེར་ཆོས། འབྲུག་གི་པར་མ། དཔེ་རིང་། ཤོག་གྲངས། ༥༢
- འཇིགས་གླིང་གསུང་འབུམ་ཀ་པ། དཔེ་རིང་། ཤོག་གྲངས། ༡༣༥
- ཐེ་ཝན་པར་མ། དེབ་གཟུགས། ཤོག་གྲངས། ༣༦༠
- ཐེ་ཝན་པར་མ། དེབ་གཟུགས། ཤོག་གྲངས། ༢
- རྙིང་རྒྱུད་ཐ་པ། འབྲུག་གི་པར་མ། དཔེ་རིང་། ཤོག་གྲངས། ༧༢
- རྙིང་རྒྱུད་ན་པ། འབྲུག་གི་པར་མ། དཔེ་རིང་། ཤོག་གྲངས། ༡༧༧
- རྙིང་རྒྱུད་ན་པ། འབྲུག་གི་པར་མ། དཔེ་རིང་། ༩༠
- པད་གླིང་གཏེར་ཆོས། འབྲུག་གི་པར་མ། དཔེ་རིང་། ཤོག་གྲངས། ༦༤
