ལོ་རིམ་བརྒྱད་པའི་སློབ་གཉེར་བ། འཆི་མེད་ནོར་བུ།
བརྗིད་ཆགས་གངས་རིའི་དབུ་རྩེ་མཁའ་ལ་བསྙེགས།།
ཆུ་འཛིན་སྨུག་པོའི་ཡོལ་བས་གཡས་ནས་བསྐྱོགས།།
གངས་ཆབ་དྭངས་མའི་ལྷོད་འབབ་འཁྲིས་ནས་ལྷུང་།།
མཐོ་སྒང་གླིང་གི་མཛེས་མཆོར་ཡིད་ལ་མཛའ།།
མཚར་སྡུག་བྲག་རི་ལྷུན་པོས་མཐའ་ནས་བསྐོར།།
རྨད་བྱུང་གཡའ་རི་ནེའུ་གསེང་མདུན་ན་མཛེས།།
ཡིད་འོང་དཔྱིད་ཀྱི་དཔལ་ཡོན་ལོགས་སུ་སྤུད།།
ངོ་མཚར་སྣ་ཚོགས་སྤྲས་པའི་འཇིག་རྟེན་ཞིག །
རྫ་རི་སྨུག་པོ་དམ་རྫས་སྟེགས་སུ་བརྩེགས།།
མཛེས་པའི་སྨུག་ཞགས་དར་དཔྱངས་སྐེད་ལ་གཡོགས།།
དྭངས་གཙང་འབབ་ཆུ་རི་བོའི་སུལ་ནས་མྱུལ།།
སྣ་ཚོགས་རིན་ཆེན་གཏམས་པའི་འཇིག་རྟེན་ཞིག །
དགུང་སྔོན་དྭངས་མས་འོད་སྣང་དབྱིངས་སུ་སྤྲོ།།
ལྷོ་སྤྲིན་སྨུག་པོ་ཉི་ཟླའི་མཚམས་ནས་འཁྲིགས།།
བྲག་དམར་སེར་འོད་གཙང་ཆབ་མཁའ་ལ་འགྱིང་།།
རང་བྱུང་འཁོར་ལྗོངས་མཛེས་པའི་འཇིག་རྟེན་ཞིག །
འོད་སྟོང་བདག་པོ་ཤར་རིའི་རྩེ་ནས་འཕྲོས།།
མཚམས་སྤྲིན་གསར་པ་ལྷུན་པོའི་འཁྲིས་ནས་གཡོ།།
ལྷབ་ལྷུབ་སྨུག་ཞགས་རི་གླེའི་བར་ནས་ཉིལ།།
བཅོས་མིན་ཁོར་ལྗོངས་ཡིད་ཀྱི་ངོས་ན་མཛེས།།
དབྱར་སྐྱེས་ལང་ཚོ་མཛེས་མཆོར་ལ་རུ་ངོམ།།
སྣ་ཚོགས་ལྗོན་པའི་ཚང་ཚིང་ལུང་དུ་འབུས།།
ཞིམ་པའི་དྲི་བསུང་བར་སྣང་མཁའ་རུ་འཕྱོ།།
སྨན་ལྗོངས་ཞིང་གི་རིན་ཐང་ཡིད་ལ་བརྣགས།།
གཟི་ལྡན་གངས་རིའི་མུ་ཁྱུད་མཐའ་ནས་འཁྱོགས།།
རྣམ་མང་ལྗོན་པའི་གཡུ་ལོ་འདབས་ནས་བཞད།།
གཟི་བྱིན་ཉི་ཟླའི་འོད་སྣང་འཁྲིས་ནས་འཚེར།།
རང་བྱུང་ཁམས་ཀྱིས་བརྒྱན་པའི་འཇིག་རྟེན་དྲན།།
