སློབ་དཔོན་ཚུལ་ཁྲིམས་ནོར་བུ།
ལུང་རྟོགས་བསྟན་པ་སྲོག་ཏུ་བྱས་ཡོད་བཤད་དང་སྒྲུབ་པའི་དགའ་ཚལ་ཡིན།།
གཞི་གསུམ་འདུལ་བའི་ལག་ལེན་བསྣམས་ཡོད་གོ་ཏ་མ་ཡི་རྗེས་འབྲངས་ཡིན།།
མཁས་གྲུབ་བྱེ་བའི་རོལ་མཚོ་ཆགས་ཡོད་སྔ་འགྱུར་བསྟན་པའི་ཕ་ཁྱིམ་ཡིན།།
གསེར་འོད་ལམ་མེར་ལྗོངས་རྒྱུར་ཕྱོགས་པ་འདི་ཡང་བསྟན་པའི་ཆེད་དུ་ཡིན།།
གནས་གཅིག་ཁོ་ནར་བདག་འཛིན་མི་བྱེད་ཕྱི་རོལ་ལྗོངས་ལ་ཕེབས་ནས་འགྲོ།།
ངལ་ཞིང་དུབ་པས་ཉལ་ནས་མི་འདུག་རང་བྱུང་ཁམས་ལ་བསྐོར་ནས་འགྲོ།།
ཅི་ཡང་དྲན་མེད་ཐོམ་མེར་མི་སྡོད་དབེན་པའི་ནགས་ཚལ་ཉུལ་ནས་འགྲོ།།
ལྗོངས་རྒྱུ་བ་ཡི་དགེ་འདུན་ཚོ་དང་ང་ཡང་མཉམ་དུ་འགྲོགས་ནས་འགྲོ།།
ཆོས་གོས་སེར་པོའི་ཁ་དོག་མཛེས་སར་ཉི་མའི་འོད་ཀྱིས་དམ་པོར་འཁྱུད།།
གྲྭ་ཚོགས་ཁྱུ་ཡི་བསྟར་ཕྲེང་སྒྲིག་སར་ལྗོན་པ་ཤིང་གི་བསིལ་གྲིབ་གུག །
བཞུད་པའི་གོམ་ཁ་དལ་གྱིས་ལེན་སར་རྩ་སྔོན་སྟེང་གི་ཟིལ་ཐིགས་བབ།།
ལྗོངས་རྒྱུ་བ་ཡི་དགེ་འདུན་འདི་ཚོ་འཛུམ་དང་དགོད་པའི་ངང་ན་ཡོད།།
མདུན་ན་བསུ་བའི་མེ་ཏོག་མཆོད་སར་ལྷ་བསངས་སྔོན་མོའི་དུད་པ་བྱིན།།
གླིང་བུ་སྙན་མོའི་རོལ་མོ་དཀྲོལ་སར་འཁར་གསིལ་སྐྱོར་བའི་སིལ་སྒྲ་སྒྲོག །
གཎྜའི་སྒྲ་ལ་རྣ་བ་བླག་སར་བྱ་དང་བྱིའུས་གྲེ་འགྱུར་ངོམ།།
ལྗོངས་རྒྱུ་བ་ཡི་དགེ་འདུན་འདི་ཚོ་སྐྱིད་དང་བདེ་བའི་ལམ་ཁར་ཡོད།།
ལྷ་རྣམས་དགའ་བའི་དད་ཕྱག་དང་བཅས་ཞོགས་པའི་ཆོ་ག་དབྱངས་སུ་གྱེར།།
ཡུལ་འདིའི་གཞི་བདག་མགྲོན་དུ་བཀུག་འདྲ་བསང་དང་གསོལ་ཁའི་གསེར་སྐྱེམས་མཆོད།།
ལུང་རིགས་རྣོན་པོའི་མཚོན་ཆ་ཅན་ཡིན་རྩོད་པའི་གར་གྱི་སྐོར་བྲོ་བརྡུངས།།
ལྗོངས་རྒྱུ་བ་ཡི་དགེ་འདུན་འདི་ཚོར་ལྷ་དང་བླ་མའི་བརྒྱུད་པ་ཡོད།།
ཇ་དང་བག་ལེབ་ཞོགས་པའི་བཟའ་བཏུང་ལྟོ་ལ་རན་པའི་འཚོ་བ་ཡིན།།
གདུགས་དང་གཟན་གྱི་གྲིབ་མ་ཤར་ཤུར་ཉི་འོད་གཡོལ་བའི་བསིལ་གྲིབ་ཡིན།།
གདོང་ན་ཁོལ་བའི་འཛུམ་མདངས་རེ་རེ་འཛོམས་པ་འདི་ཡི་མཛེས་སྡུག་ཡིན།།
ལྗོངས་རྒྱུ་བ་ཡི་དགེ་འདུན་འདི་ཚོའི་མི་ཚེ་སྐྱིད་ལ་འདྲེས་ནས་ཡོད།།
མགོ་ཡི་སྐྲ་ལོ་གྲི་ལ་བྱིན་ཀྱང་ཞལ་རས་དྭངས་ཤིང་གཙང་མ་ཞིག །
རྒྱབ་ཀྱི་ཤམ་ལྭ་རས་རྐྱང་ཡིན་ཡང་གསེར་དང་འོད་ཀྱི་མདངས་ཅན་ཞིག །
ཞབས་ཀྱི་གདིང་བར་ནམ་ནེམ་མེད་རུང་འདུལ་བའི་ཡོ་བྱད་འཆུག་མེད་ཅིག །
ལྗོངས་རྒྱུ་བ་ཡི་དགེ་འདུན་འདི་ཚོས་འདོད་ཆུང་ཆོག་ཤེས་བསྐྱངས་ནས་ཡོད།།
འགྲོ་བའི་གོམ་ཁར་ལྷོད་ཅིག་བབ་པས་ལུས་ཀྱི་གཡོ་བ་མཛེས་ས་ཡོད།།
བཤད་པའི་སྐད་ཆར་གདངས་ཤིག་སླེབས་པས་ཞལ་གྱི་སྨྲ་བ་སྙན་ས་ཡོད།།
ཞི་ཞིང་དུལ་བའི་ངང་ཚུལ་ལྡན་པས་གཤིས་ཀྱི་ཚུགས་ཀར་དད་ས་ཡོད།།
ལྗོངས་རྒྱུ་བ་ཡི་དགེ་འདུན་འདི་ཚོར་ཕ་གཅིག་བླ་མའི་བྱིན་རླབས་ཡོད།།
2015/9/1
