ལོ་རིམ་དགུ་པའི་སློབ་གཉེར་བ། སྤྲུལ་སྐུ་པདྨ་ཀློང་ཡངས་རྒྱ་མཚོ།
གསང་ཆེན་སྔ་འགྱུར་བསྟན་པའི་རྒྱལ་མཚན་མཆོག།
སྲིད་པའི་གནས་འདིར་སྒྲེང་མཁས་ཐུབ་བསྟན་སྲོག།
བཀའ་གཏེར་མན་ངག་རྒྱ་མཚོའི་འབྱུང་གནས་ཞེས།།
རིག་འཛིན་བརྒྱུད་པའི་བསྟི་གནས་ཆེན་པོར་བསྔགས།།
ཞེས་ཆོས་སྡེ་ཆེན་པོ་འདི་ཉིད་ཐོག་མར་གང་དུ་ཆགས་པའི་ཡུལ་ངོས་བཟུང་སྟེ་གྲུབ་མཐའ་གང་ཞིག་བརྒྱུད་འཛིན་བྱས་པ་དང་། བར་དུ་གདན་རབས་དང་མཁན་རབས་ཇི་ལྟར་བརྒྱུད་ཚུལ། མཐར་བསྟན་བདག་བླ་མས་ལུང་དང་མཐུན་པར་ཇི་ལྟར་དར་རྒྱས་སུ་བཏང་བ། མཇུག་འཕྲོས་དོན་དང་བཅས་བཞི་ལས།
དེ་ལ་དང་པོ་འཇམ་དཔལ་རྩ་རྒྱུད་ལས། ང་ནི་འདས་ནས་ལོ་བརྒྱ་ན། །ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་དང་། ལྷ་མོ་དྲི་མ་མེད་པས་ཞུས་པའི་མདོ་ལས། བྱང་ཕྱོགས་གངས་རིའི་རྒྱུད་ཀྱི་སར། །དགེ་བ་ལྡན་པའི་ས་ཕྱོགས་སུ། །དམ་པའི་ཆོས་ནིི་རྒྱས་པར་འགྱུར། །ཞེས་གསུངས་པ་བཞིན་རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་ཉི་མ་ཤར་བ་ལྟར་དར་རྒྱས་ཧ་ཅང་བྱུང་བའི་བྱང་ཕྱོགས་གངས་རིའི་རྒྱལ་ཁམས་མདོ་དབུས་ཁམས་གསུམ་དུ་གྲགས་པའི་ཡ་གྱལ་མདོ་སྨད་ས་ཡི་ཐིག་ལེ། རྨ་ཀླུང་གསེར་ལྡན་ཕྱུག་མོའི་རྒྱུད་དུ། མགོ་ལོག་ཨ་སྐྱོང་གོང་མ་ཚང་གི་སའི་ཆར་མཐའ་དཀར་དུ་འབོད་པའི་གནས་སུ་ཕྱི་ལོ་ ༡༨༢༧ ལོར་རིག་འཛིན་འཇིགས་མེད་གླིང་པའི་ཡང་སྲིད་སྔགས་འཆང་འཇའ་ལུས་རྡོ་རྗེའམ་མདོ་མཁྱེན་བརྩེ་ཡེ་ཤེས་རྡོ་རྗེ་ཞེས་པས་དགུང་ལོ་ཉེར་བརྒྱད་ཙམ་གྱི་སྟེང་འོད་གསལ་རྫོགས་པ་ཆེན་པོ་གསང་བ་སྙིང་ཐིག་གི་བསྟན་པའི་རང་རྐང་ཚུགས་ཆེད་ཐོག་མར་ཕྱག་བཏབ། རྨ་ཉིན་གོང་མའི་ཆོས་སྒར་རམ་ཨ་སྐྱོང་གོང་མའི་སྤྱི་དགོན་ཞེས་གྲགས་པ་འདི་ཉིད་ལོ་མང་རིང་སྦྲ་གུར་གྱི་རྣམ་པ་ལས་རིམ་བཞིན་སའི་དཔྱད་ཕུན་སུམ་ཚོགས་པ་རྒྱབ་རི་གླང་ཆེན་ཉལ་འདྲ། ཤར་རི་དུང་དཀར་བཞེངས་འདྲ། ལྷོ་རི་གཡུ་འབྲུག་འཕུར་འདྲ། བྱང་རི་རུས་སྦལ་བསྡད་འདྲ། ད་དུང་ཨ་མྱེས་རྨ་ཆེན་སྤོམ་ར། གནས་ཆེན་པདྨ་རི་མཐོ། གཏེར་གནས་གཉན་པོ་གཡུ་རྩེ་སོགས་ཀྱིས་མཐའ་རུ་བསྐོར་བ། ཉི་ཟླའི་འཆར་ལམ་ཡངས་ཤིང་སའི་ཕུད་འཛོམས་པ། རྨ་ཀླུང་གསེར་ལྡན་ཕྱུག་མོ་དང་ཁོ་ཆུ་དལ་བ་རིང་མོ་གཉིས་གཡས་གཡོན་ནས་ཤར་དུ་འབབ་པའི་འདྲེས་མདོར། གདོང་མ་བཞིའི་དཔོན་པོ་ཁྲོ་ཐུང་གི་རྟ་ནོར་ལུག་གསུམ་འཚོ་སྐྱོང་བྱེད་སའི་གནས་ལུང་སྐྱ་དང་ལུང་སྔོན་གཉིས་ཀྱི་བར་མདོ་རུ་དུས་འགྱུར་ཆེན་མོའི་སྡུག་བསྔལ་གྱི་ཡོ་ལང་ཅུང་ཙམ་ལྷོད་ཡངས་སུ་ཕྱིན་པ་ལོ་རབས་བརྒྱད་ཅུའི་སྐབས་སུ་༸ཁྱབ་བདག་དྲིན་ཆེན་བླ་མ་གཏེར་ཆེན་པདྨ་གཏུམ་དྲག་རྡོ་རྗེས་རྟགས་དང་རྟེན་འབྲེལ་མང་པོ་ལ་དཔྱད་ནས་གནས་འདིར་དགོན་པ་སྤོས་ཤིང་གཙུག་ལག་ཁང་རྟེན་དང་བརྟེན་པ་གསར་བཞེངས་གནང་བས་གཏན་ཆགས་སུ་ད་ལྟའི་བར་དར་རྒྱས་ཆེན་པོ་བྱུང་།
དགོན་པ་འདི་དབུ་ཚུགས་ནས་ད་བར་མི་ལོ་ ༡༩༠ ཕྱིན་ཡོད་པས་དེའི་རིང་ལ་གྲུབ་མཐའ་གང་ཞིག་བརྒྱུད་འཛིན་དང་ཇི་ལྟར་ཉམས་བཞེས་གནང་གི་ཡོད་དམ་ཞེ་ན་འདི་ལྟར་ཆོས་ཀྱི་ཆེ་བ་ཐོག་མར་གླེང་བར་བྱ་སྟེ། དེ་ལ་འདིར་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་དང་ལྡན་པ་གང་གིས་ཐོག་མར་བསྐལ་ཆེན་གྲངས་མེད་གསུམ་ལ་ཚོགས་བསགས་སྒྲིབ་པ་སྦྱངས་རྗེས་རྒྱ་གར་རྡོ་རྗེ་གདན་དུ་མངོན་པར་སངས་རྒྱས་པའི་ཚུལ་བསྟན་ནས། ཡུལ་ཝཱ་རཱ་ཎ་སཱི་ལ་སོགས་པར་ཆོས་ཀྱི་འཁོར་ལོ་རིམ་པ་གསུམ་བསྐོར་ཞིང་དེའི་དུས་སུ་ཡེ་ཤེས་ཀྱི་ལུས་འོག་མིན་གྱི་གནས་སུ་གཤེགས་ནས་གསང་སྔགས་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་གསུངས་ཟིན་པའི་ཕྱིར་ན་འཇིག་རྟེན་གྱི་ཁམས་འདིར་རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་མདོ་སྔགས་རིག་གནས་དང་བཅས་པ་དར་རྒྱས་ཆེན་པོ་བྱུང་བ་མ་ཟད་བོད་གངས་ཅན་གྱི་ཡུལ་དུའང་ཆོས་རྒྱལ་མེས་དབོན་རྣམ་གསུམ་གྱི་སྐུ་རིང་ལ་རྒྱ་གར་གྱི་པཎ་གྲུབ་དང་བོད་ཀྱི་ལོ་ཙཱ་བ་རིན་ཆེན་བཟང་པོ་ཡན་གྱིས་བསྒྱུར་ཅིང་གཏན་ལ་ཕབ་པའི་ཆོས་ཐམས་ཅད་ལ་སྔ་འགྱུར་ཆེ་བ་དྲུག་ལྡན་གྱི་བདག་ཉིད་ཅན་ཞེས་ཡོངས་སུ་གྲགས་པའི་དཔལ་གསང་ཆེན་སྔ་འགྱུར་རྙིང་མའི་བསྟན་པ་སྤྱི་དང་ཁྱད་པར་དུ་འོད་གསལ་རྫོགས་པ་ཆེན་པོ་ཀློང་ཆེན་སྙིང་ཐིག་གི་བསྟན་པ་འདི་ཉིད་ནི་ཆོས་སྐུ་ཀུན་ཏུ་བཟང་པོ་ནས་བརྒྱུད་པ་གསུམ་གྱི་བྱིན་རླབས་བར་མ་ཆད་པར་མངོན་སུམ་དུ་གནས་ཤིང་ཚེ་གཅིག་ལུས་གཅིག་ལ་དཔལ་གདོད་མའི་མགོན་པོའི་གོ་འཕང་ལ་དཀའ་ཚེགས་མེད་པར་འགོད་ནུས་པའི་ཟབ་ཆོས་ཐུན་མོང་མ་ཡིན་པ་ཡིན་པས་འདི་ཉིད་ལ་དུས་ད་ལྟའི་བར་དུ་ཁོག་པའི་སྙིང་དང་དཔྲལ་བའི་མིག་ལྟར་གཅེས་སྤྲས་བླ་ན་མེད་པ་དང་བཅས་སྒྲུབ་པ་ཉམས་བཞེས་གཙོ་བོར་གནང་བཞིན་པའོ།།
བར་དུ་གདན་རབས་དང་མཁན་རབས་ཇི་ལྟར་བརྒྱུད་ཚུལ་ནི།
དེ་ལ་འདིར་གདན་རབས་དང་པོ་གྲུབ་པའི་དབང་ཕྱུག་ཆེན་པོ་མདོ་མཁྱེན་བརྩེ་ཡེ་ཤེས་རྡོ་རྗེ་མཆོག་ནི། ཕྱི་ལོ་ ༡༨༠༠ ལོར་མདོ་སྨད་མགོ་ལོག་གོང་གསེར་ཁ་མདོ་ཞེས་པའི་གནས་སུ་ཡབ་ཆོས་སྐོར་བསོད་ནམས་འཕན་དང་ཡུམ་ཚེ་དབང་སྨན་གཉིས་ཀྱི་སྲས་སུ་ངོ་མཚར་བའི་ལྟས་དང་བཅས་སྐུ་འཁྲུངས། དེ་ཡང་ཀུན་མཁྱེན་འཇིིགས་མེད་གླིང་པས། འདི་འོག་ཡེ་ཤེས་རྡོ་རྗེའི་རོལ་པ་ཡི། །རྡོ་རྗེ་སྙིང་པོའི་རིང་ལུགས་བསླངས་ནས་སླར། །གཤེ་ཞིང་སྐུར་བ་འདེབས་པ་རྣམས་ཀྱི་དོན། །སྤྲུལ་པ་སྣ་ཚོགས་སྟོན་ལ་གསོལ་བ་འདེབས། །ཞེས་གསུངས་པ་ལྟར་སྐུ་ཆུང་ངུའི་དུས་ནས་དམ་པའི་རིགས་སད་ཅིང་དག་པའི་གཟིགས་སྣང་བསམ་གྱིས་མི་ཁྱབ་པ་བྱུང་བས་ཀུན་མཁྱེན་འཇིགས་མེད་གླིང་པའི་ཡང་སྲིད་འཁྲུལ་མེད་དུ་ཡོངས་སུ་གྲགས།
དེ་ནས་གྲུབ་པའི་དབང་ཕྱུག་འཇིགས་མེད་ཕྲིན་ལས་འོད་ཟེར་རམ་རྡོ་གྲུབ་ཀུན་བཟང་གཞན་ཕན་མཐའ་ཡས་ཀྱིས་རིག་འཛིན་འདུས་པའི་བཀའ་དབང་ཟབ་མོ་དང་བཅས་མ་མགོན་ལྕམ་དྲལ་ལ་གཉེར་གཏད་ཐུན་མིན་སོགས་མཛད་པ་ཞུས་ཤིང་རིམ་བཞིན་སྡེ་དགེ་དང་ལྷ་ལྡན་གྱི་ཕྱོགས། སྐུ་གོང་མའི་གདན་ས་ཚེ་རིང་ལྗོངས་སོགས་སུ་ཕེབས་སྐབས་ཁྲི་སྟོན་རྒྱ་ཆེར་བྱས་ཤིང་མདོ་རྒྱུད་མན་ངག་དང་བཅས་པ་གསན་པ་མཐར་ཕྱིན་མཛད། ཁྱད་པར་དུ་དགུང་ལོ་བཅུ་གཉིས་སྟེང་ཡབ་རྗེ་བླ་མ་མཆོག་གིས་སྙིང་ཐིག་གོང་འོག་གི་དབང་ལུང་གདམས་ངག་མ་ལུས་པ་ཆིག་བརྒྱུད་ཀྱི་ཚུལ་དུ་གནང་ནས་ངེས་པ་དོན་གྱི་རྒྱལ་ཚབ་ཏུ་མངའ་གསོལ་བྱས།
དེ་ཡང་དཔལ་སྤྲུལ་རིན་པོ་ཆེས། དགེ་དང་མི་དགེ་མཉམ་པ་ཉིད་གཟིགས་ནས། །སྦྱོར་དང་སྒྲོལ་བ་ངོ་མཚར་ཐབས་ཆེན་པོས། །ངན་འགྲོའི་རྒྱུན་ཅན་སྐད་ཅིག་གཅིག་ཁོ་ནར། །འདྲེན་པའི་ཐབས་མཁས་མངའ་ལ་གསོལ་བ་འདེབས། །ཞེས་གསུངས་པ་བཞིན་སྐབས་དེ་ནས་བཟུང་རི་བྲག་སོགས་ལ་ཟང་ཐལ་དུ་ཕེབས་པ། སྐུ་དངོས་རྟར་ཆིབས་ཏེ་ཉེ་གནས་འོད་ཟེར་དང་བཅས་མཁའ་སྤྱོད་ཀྱི་ཞིང་ཁམས་ཉུལ་བ། བསད་པ་གསོ་ནུས་ཤིང་ཤི་བ་འདྲེན་ནུས་པ་སོགས་གྲུབ་པའི་བརྟུལ་ཞུགས་ཀྱི་མཛད་སྤྱོད་བསམ་གྱིས་མི་ཁྱབ་པ་ནི་ཁོང་གི་རང་རྣམ་མཁའ་འགྲོའི་ཞལ་ལུང་ལས་གསལ་བ་ལྟར་རོ།།
སྔ་རྗེས་སུ་རྨ་ཉིན་གོང་མའི་ཆོས་སྒར་འདི་ཉིད་གཙོས་པའི་དགོན་སྡེ་དང་རི་ཁྲོད་གང་མང་ཞིག་འཛུགས་སྐྲུན་གསར་བཞེངས་གནང་ཞིང་སྐབས་དེ་དུས་ནས་སྡེ་དགེའི་རྒྱལ་པོ་དང་། རྒྱལ་རོང་རྒྱལ་པོ། ལྕགས་ལའི་རྒྱལ་པོ་རྣམ་པའི་དབུ་བླ་གཙོ་བོར་གྱུར། ཟབ་ཆོས་དགོངས་གཏེར་གྱི་སྐོར་ལ་པོད་གྲངས་སུམ་ཅུ་ལྷག་ཡོད་ཀྱང་དུས་དབང་གིས་དེང་སྐབས་པོད་གྲངས་བཅུ་ལྷག་ལས་འཚོལ་སྡུད་བྱེད་ཐུབ་མེད་པར་སྣང་། གང་ལྟར་སྐབས་དེ་དུས་མདོ་དབུས་ཁམས་གསུམ་གྱི་བླ་ཆེན་དང་དཔོན་ཆེན་སེར་སྐྱ་མཆོག་དམན་ཕལ་ཆེ་བ་ཁོང་གི་ཞལ་སློབ་ཏུ་མ་གྱུར་པ་མེད་པ་ལྟ་བུར་གྱུར། མཐར་ཕྱི་ལོ་ ༡༨༦༦ ལོ་དགུང་གྲངས་ ༦༧ ཟིན་སྐབས་དར་མདོ་ལྕགས་ལའི་ཕོ་བྲང་དུ་ངོ་མཚར་བའི་རྟགས་མཚན་དང་བཅས་གཟུགས་སྐུའི་བཀོད་པ་ཆོས་ཉིད་གདོད་མའི་དབྱིངས་སུ་ནུབ་པའི་ཚུལ་བསྟན་ཏོ།།
གདན་རབས་གཉིས་པ་དགེ་རྩེ་བླ་མ་ཚེ་དབང་རིག་འཛིན་མཆོག་ནི། ལྷོ་རྫ་རྒྱུད་དུ་སྐུ་འཁྲུངས་ཤིང་ཆུང་ངུ་ནས་དམ་པའི་རང་གཤིས་མངོན་པ། ཁྱད་པར་དུ་ཀུན་མཁྱེན་འཇིགས་མེད་གླིང་པ་དང་རྡོ་གྲུབ་འཇིགས་མེད་ཕྲིན་ལས་འོད་ཟེར་སོགས་སྔ་འགྱུར་སྐྱེས་ཆེན་དམ་པ་མང་པོའི་ཞལ་གྱི་དཀྱིལ་འཁོར་ལས་མདོ་སྔགས་གཞུང་ལུགས་མང་པོར་ཐོས་བསམ་སྒོམ་གསུམ་རྒྱ་ཆེར་བྱས་ཏེ་མཁས་གྲུབ་གཉིས་ལྡན་དུ་གྱུར། མཐར་མགོ་ལོག་ཕྱོགས་སུ་ཕེབས་སྐབས་ཨ་སྐྱོང་དཔོན་པོ་དང་མཆོད་ཡོན་དུ་གྱུར་ནས་འགྲོ་དོན་ཆེར་རྒྱས་པའི་དུས་སུ་གྲུབ་པའི་དབང་ཕྱུག་མདོ་མཁྱེན་བརྩེ་ཡེ་ཤེས་རྡོ་རྗེས་ལུང་བསྟན་ནས་ཨ་སྐྱོང་གོང་མའི་ཆོས་སྒར་འདི་ཉིད་ཀྱི་བདག་པོར་མངའ་གསོལ་བྱས། དུས་དེ་ནས་བཟུང་དགོན་འདིར་སྔ་འགྱུར་འོད་གསལ་སྙིང་ཐིག་གི་བསྟན་པ་གཙོར་བྱས་པའི་བསྟན་པ་དང་སེམས་ཅན་གྱི་འགྲོ་དོན་མཐར་ཕྱིན་པའོ།།
གདན་རབས་གསུམ་པ་དོམ་ཚ་བླ་མ་རིག་འཛིན་རྣམ་རྒྱལ་མཆོག་ནི། ལྷོ་རྒྱུད་རྫ་ཡུལ་དུ་སྐུ་འཁྲུངས་ཤིང་རྡོ་གྲུབ་འཇིགས་མེད་ཕྲིན་ལས་འོད་ཟེར་གཙོས་པའི་སྔ་འགྱུར་མཁས་གྲུབ་དགེ་བའི་བཤེས་གཉེན་རྣམས་ལས་ལུང་སྡེ་སྣོད་གསུམ་དང་ལམ་བསླབ་པ་གསུམ་སོགས་ལ་ཐོས་བསམ་ཉམས་བཞེས་རྒྱ་ཆེར་གནང་བས་མཁས་བཙུན་བཟང་པོའི་གྲགས་པ་ཐོབ། དེ་ནས་ལྷས་ལུང་བསྟན་པ་བཞིན་ཨ་སྐྱོང་གོང་མའི་ཡུལ་སྡེར་ཕེབས་ནས་ཕྲིན་ལས་ལྷག་པར་རྒྱས་པ་བྱུང་། ཁྱད་པར་དུ་ཆོས་སྒར་འདིར་སྔ་འགྱུར་སྒྲུབ་མཆོད་དུ་མའི་ཕྱག་བཞེས་དང་གར་ཐིག་དབྱངས་གསུམ་འབུད་རྡུང་བཅའ་གསུམ་སོགས་ཀྱི་རྒྱུན་བཙུགས། སྐུ་ཚེའི་སྨད་ལ་མཁན་ཁྲིར་བཞུགས་ཏེ་དམ་ཆོས་འདུལ་བའི་ཕྱག་བཞེས་ཚུལ་བཞིན་གནང་བས་དོམ་ཚ་མཁན་པོ་ཞེས་བཀའ་དྲིན་ཧ་ཅང་ཆེ་ཞིང་བཤད་སྒྲུབ་ལས་གསུམ་གྱི་མཛད་པ་རྒྱ་ཆེར་གནང་ནས་སྐུ་ཚེ་མཐར་ཕྱིན་པའོ།།
གདན་རབས་བཞི་པ་དགེ་རྩེ་སྤྲུལ་སྐུ་ངག་དབང་པདྨ་བསྟན་འཛིན་མཆོག་ནི། ཡབ་དགེ་རྩེ་བསོད་ནམས་དབང་ཆེན་དང་ཡུམ་ལྕགས་བཟའ་བཀྲ་ཤིས་དཔལ་མཚོ་གཉིས་ཀྱི་སྲས་སུ་སྐུ་འཁྲུངས། འཇམ་དབྱངས་མཁྱེན་བརྩེ་དབང་པོ་དང་ཀོང་སྤྲུལ་ཡོན་ཏན་རྒྱ་མཚོ་སོགས་མཁས་གྲུབ་དུ་མའི་ཞབས་པད་སྤྱི་བོར་བླངས་ཏེ་མདོ་སྔགས་གཞུང་ལུགས་ཐམས་ཅད་ལ་མཁས་པར་སྦྱངས། ཁྱད་པར་དུ་ཨ་སྐྱོང་གོང་མའི་ཆོས་སྒར་འདིར་ཡུན་རིང་བཞུགས་ཏེ་རབ་བྱུང་གི་སྡོམ་རྒྱུན་དང་རྫོགས་ཆེན་སྙིང་ཐིག་གི་བསྟན་པ་གཙོར་བྱས་པའི་མདོ་སྔགས་རྒྱ་མཚོའི་ཟབ་ཆོས་མང་དུ་སྤེལ་བས་བཀའ་དྲིན་བསམ་གྱིས་མི་ཁྱབ། དབལ་ཤུལ་བླ་མ་བསོད་ནམས་མཁས་གྲུབ་དང་ཨ་རྐོང་མཁན་པོ་བློ་བཟང་རྡོ་རྗེ་སོགས་སློབ་རྒྱུན་མང་པོ་བྱུང་ཞིང་མཐར་ངམ་འབྲིང་ཧྭ་དམར་ད་ཝ་ཞེས་པའི་སར་ཧོས་དམག་གིས་བཟུང་ཡང་མཚོན་གྱིས་མ་ཚུགས་པར་ཁོང་གིས་གསུངས་པ་བཞིན་ལུག་ཁྱུ་ཐོག་ཏུ་བསྐོར་ནས་སྐུ་གྲོངས་པའོ།།
གདན་རབས་ལྔ་པ་གཤི་ཆེན་བླ་མ་ཨྱོན་ཆེ་མཆོག་ནི། སྟག་ཐོག་ཧོར་སྐོར་དུ་སྐུ་འཁྲུངས་ཤིང་ཆུང་ངུ་ནས་གཤི་ཆེན་མ་འདས་རིན་ཆེན་སོགས་སྐྱེས་ཆེན་དུ་མ་ལས་མདོ་སྔགས་གཞུང་ལུགས་ལ་ཐོས་བསམ་གནང་། ལྷས་ལུང་བསྟན་པ་བཞིན་ཨ་སྐྱོང་དོམ་སྐོར་དུ་ཕེབས་ཤིང་དེར་མཁའ་འགྲོའི་མཚན་ཉིད་དང་ལྡན་པ་དོམ་བཟའ་དབྱངས་ཅན་ལྷ་མོ་གསང་ཡུམ་དུ་བརྟེན་ནས་བཞུགས། སྐབས་ཤིག་ནམ་མཁའི་ཐོག་ཞུན་འབར་བ་གཟན་ཁུག་ཏུ་བླངས་ཏེ་རྡོ་རྗེར་བསྒྱུར་པས་ཐོག་རྒོད་བླ་མ་ཞེས་ཀུན་ལ་གྲགས། ཡང་སྟག་ཐོག་ཁྲམ་རྒོད་ཟླ་སེར་ཟེར་བ་འགས་སྒོ་ཕྱུགས་འབྲི་གཡག་དུ་མ་དེད་ནས་ལམ་བར་དུ་བཤས་ཏེ་ནང་ཁྲོལ་སོགས་བཙོས་ནས་ཟ་ལ་ཉེ་སྐབས་སྦྲུལ་དང་སྦལ་པ་སོགས་སུ་གྱུར་ནས་ཀུན་སྐྲག་པར་གྱུར། དེར་ཟླ་སེར་ན་རེ། ཐོག་རྒོད་བླ་མའི་ནུས་མཐུ་རེད། མིག་བཙུམས་ནས་ཟོ་དང་རྒྱུ་མ་རེད། ཅེས་པའི་བཤད་རྒྱུན་ཡང་དེང་སང་བར་དུ་གྲགས་ཤིང་གང་ལྟར་གྲུབ་པའི་བརྟུལ་ཞུགས་དང་ནུས་མཐུ་གཞན་ལ་ངོམ་ཆོག་པ་ཞིག་ཡོད། མཐར་རང་དགོན་འདིར་ཡུན་རིང་བཞུགས་ཏེ་བཤད་སྒྲུབ་ལས་གསུམ་གྱི་ཕྲིན་ལས་རྒྱ་ཆེར་གནང་ནས་སྐུ་ཚེའི་ཚད་ངམ་མཐའ་ཞེས་པའི་ས་ནས་རྫོགས་པའོ།།
གདན་རབས་དྲུག་པ་སྐྱབས་བླ་མ་ངག་དབང་རིན་ཆེན་མཆོག་ནི། རང་སྡེའི་ལམ་སྐོར་ཚོ་བར་སྐུ་འཁྲུངས་ཤིང་ལྷ་བ་བླ་མ་ཀུན་བཟང་དཔལ་ལྡན་ལས་སྦྱོར་དྲུག་སོགས་ཞུས་པའི་སྐབས་ཤིག་ལ་བླ་མས་ཁྱོད་ཀྱི་ལས་འབྲེལ་བླ་མ་ཨ་འཛོམས་འབྲུག་པ་རིན་པོ་ཆེ་ཡིན་པས་ཁོང་བསྟེན་ན་བསྟན་དོན་ཆེ་ཚུལ་གསུངས་མ་ཐག་དད་པ་ཤུགས་ཆེར་སྐྱེས་ནས་བརྩོན་པ་དྲག་པོས་ཞབས་པད་སྤྱི་བོར་བླངས་པས་ཉམས་རྟོགས་ཀྱི་ཡོན་ཏན་དཔག་མེད་རྒྱུད་ལ་འཁྲུངས། སྔ་འགྱུར་རྙིང་མའིི་རྫོགས་ཆེན་སྙིང་ཐིག་གི་ཟབ་ཆོས་མང་པོ་དང་ཁྱད་པར་དུ་ཨ་འཛོམས་ནས་བརྒྱུད་པའི་གསང་བ་ཡང་གསང་གི་མན་ངག་མཐའ་དག་གསན་ནས་ཕྱིར་རང་དགོན་འདིར་ཕེབས་ཏེ་ཟབ་རྒྱའི་ཆོས་ཀྱི་འཁོར་ལོ་བསྐོར་བའང་ཁྲ་དགེ་སློང་གིས་མཛད་པའི་རྣམ་ཐར་གསོལ་འདེབས་ལས། རྡོ་རྗེའི་རྣལ་འབྱོར་དུས་འཁོར་སྦྱོར་དྲུག་དང་། །པདྨའི་རིང་ལུགས་རྫོགས་ཆེན་སྣང་བཞིའི་ལམ། །ཟུང་འབྲེལ་གསང་ཆེན་བསྟན་པའི་སྲོག་ཤིང་མཆོག །ལུགས་གཉིས་མཁས་མིང་གཙུག་རྒྱན་ཁྱོད་ལ་འདུད། །བཤད་སྒྲུབ་སྣང་བ་ཕྲ་བའི་ཡུལ་མཐའ་འདིར། །གདོས་བཅས་འོད་སིམ་སྔ་འགྱུར་ཡང་སྙིང་མཆོག །དགོངས་པ་ཟང་ཐལ་ལྕེ་བཙུན་སྙིང་ཐིག་བཅས། །དབང་ཁྲིད་དགའ་སྟོན་ཕྱོགས་བརྒྱར་འགྱེད་ལ་འདུད། །ཅེས་གསུངས་པ་བཞིན་དུས་དེར་མཛད་རྗེས་ཧ་ཅང་ཆེ་ཞིང་མཐར་རྨ་སྲིབ་སྤོས་ཁྱིམ་དུ་རེ་ཞིག་གདུལ་བྱའི་མཛད་པ་རྫོགས་སོ།།
གདན་རབས་བདུན་པ་དབལ་ཤུལ་བླ་མ་བསོད་ནམས་མཁས་གྲུབ་མཆོག་ནི། ཁྲག་འཐུང་བདུད་འཇོམས་རྡོ་རྗེའི་གཏེར་ལུང་ལས། ཡུལ་བདུད་སྡེ་གསུམ་གྱི་ཉེ་ས་རུ༔ ཆུ་རྦ་རླབས་གནམ་དུ་འཕྱོ་བའི་འགྲམ༔ གཡས་སེང་གེ་གནམ་ལ་བལྟས་འདྲ་དང་༔ གཡོན་མདུང་རྩེ་ལྟ་བུའི་རི་བོ་ཡོད༔ མདུན་རིན་ཆེན་སྤུངས་འདྲའི་རི་བོ་ཁ༔ ཤིང་གཡབ་མོ་ཅན་གྱིས་བརྒྱན་པ་ཡོད༔ གདན་གད་པ་བརྩེགས་པའི་ལའུ་སྟེང་༔ ལྷ་སྒྲིབ་པ་རྣམ་སེལ་རྣམ་རོལ་དཔྱིད༔ ཁོང་རིན་ཆེན་མིང་འཛིན་འགྲོ་བའི་མགོན༔ བརླ་གཡས་སུ་སྨེ་བ་ནག་པོ་དང་༔ ཕྲག་གཡོན་དུ་ཤ་མཚན་བརྒྱན་པ་ཡོད༔ རྗེ་དེ་དང་བླ་མའི་སྒྲུབ་པ་འདི༔ འཕྲད་གྱུར་ན་འགྲོ་དོན་རྒྱ་ཆེར་འགྲུབ༔ ཅེས་གསུངས་པ་བཞིན་ཡབ་དབལ་ཤུལ་ཉི་མ་འབུམ་དང་ཡུམ་བྱང་ཆུབ་སྒྲོལ་མ་གཉིས་ཀྱི་སྲས་སུ་ཨ་སྐྱོང་རྨ་ཉིན་ཤར་འོད་ཆོས་ཁྲིའི་ཁུག་ཏུ་ཡ་མཚན་པའི་གཟིགས་སྣང་དང་བཅས་སྐུ་བལྟམས། དགུང་ལོ་བཅུ་བདུན་སྟེང་གསང་སྟབས་ཀྱིས་བྲོས་ཏེ་སང་སང་དྲ་དྲ་སྤྲུལ་པའི་སྐུ་པདྨ་འགྲོ་འདུལ་རྡོ་རྗེ་དང་མཇལ་ཏེ་མི་ལོ་བཅུ་གཉིས་བར་དུ་མཉེས་པ་གསུམ་གྱིས་ལེགས་པར་བསྟེན་ཅིང་སྨིན་གྲོལ་གྱི་གདམས་པ་མཐའ་དག་རྒྱལ་ཐབས་སྤྱི་བླུགས་ཀྱི་ཚུལ་དུ་ཡོངས་སུ་རྫོགས་པ་ཐོབ། ཀུན་མཁྱེན་མི་ཕམ་རྒྱ་མཚོ་གཙོས་སྔ་འགྱུར་སྐྱེས་ཆེན་དག་ལས་མདོ་སྔགས་གཞུང་ལུགས་མང་དུ་གསན་ནས་མཁས་གྲུབ་གཉིས་ལྡན་དུ་གྱུར་ཀྱང་ད་དུང་སྦས་པའི་རྣལ་འབྱོར་གྱི་ཚུལ་དུ་ཨ་སྐྱོང་གོང་མའི་སྒྲུབ་མཆོད་ཀྱི་གླིང་བུ་འབུད་པའི་འགན་བཞེས་དུས་གླིང་བུ་ལ་སོག་མ་མི་དགོས་པར་བུས་པས་འདུས་པ་ཡོངས་ངོ་མཚར་བར་གྱུར། དུས་འཁྲུག་གི་སྐབས་སུ་ཁོང་ཧོས་དམག་གི་ལག་ཏུ་ཤོར་ཡང་མཚོན་སོགས་འབྱུང་བཞིའི་གནོད་པས་མ་ཚུགས་པར་བྱ་ཐབས་ཡོངས་སུ་བྲལ་ཞིང་རྗེས་སུ་རང་དགོན་འདིའི་བསྟན་པའི་འགན་བཞེས་ནས་འཛིན་སྐྱོང་སྤེལ་གསུམ་བྱས་པས་བཀའ་དྲིན་བླ་ན་མེད་པའོ། །ཁོང་གི་སློབ་མའི་གཙོ་བོ་རྗེ་བྲོ་དབོན་པོ་བློ་བཟང་རྣམ་དག་དང་། ལམ་ཁོའི་མཁན་པོ་གསང་སྔགས། དབུ་ར་གཏེར་སྟོན། ཁྲ་དགེ་སློང་ཚུལ་ཁྲིམས་དར་རྒྱས་སོགས་མང་པོ་བྱུང་། ཁོང་གི་བརྩམས་ཆོས་ཀྱི་སྐོར་ལ་སྔོན་འགྲོ་སོགས་ཁྲིད་ཡིག་དང་གདམས་ངག་གི་སྐོར། ཉམས་མགུར་སོགས་མང་པོ་བཞུགས། མཐར་དགུང་གྲངས་བརྒྱད་ཅུ་ཙམ་ལ་བཞུགས་ནས་གཞན་དོན་གཟུགས་སྐུའི་བཀོད་པ་ཉེ་བར་བསྡུས་སོ།།
གདན་རབས་བརྒྱད་པ་པུ་རུ་བླ་མ་ཀུན་བཟང་མཆོག་ནི། ཡབ་པུ་རུ་ཨ་སྐྱ་དང་ཡུམ་རྡོ་བཟའ་ལྷ་མོ་གཉིིས་ཀྱི་སྲས་སུ་འཁྲུངས་ཤིང་ཆུང་ངུ་ནས་དམ་པ་མང་པོས་བྱང་ཆུབ་སེམས་དཔའི་རྣམ་རོལ་དུ་ཡང་ཡང་བསྔགས། དཔལ་ཡུལ་དར་ཐང་དགོན་དུ་ལོ་དྲུག་ལ་བཞུགསཤིང་སྐབས་ཤིག་ལ་སྐུ་གེགས་སེལ་ཕྱིར་ལྕགས་སྤྲུལ་རོལ་པའི་རྡོ་རྗེའི་མདུན་དུ་བཅར་དུས་གུ་རུའི་ཐུགས་དམ་རྒྱུད་བསྐུལ་གསུངས་མ་ཐག་ཚོགས་དྲུག་གི་རྟོག་པ་ཐམས་ཅད་འགགས་ཏེ་སླར་སོར་ཆུད་སྐབས་འོད་དཀར་གྱི་ཀློང་ལས་གུ་རུས་ཞལ་གཟིགས་ཤིང་གནས་ལུགས་ཀྱི་རྟོགས་པ་མངོན་དུ་གྱུར། སྔ་ཕྱིར་དགེ་བའི་བཤེས་གཉེན་བཅུ་ཕྲག་དུ་མར་བསྟེན་ནས་ལུང་སྡེ་སྣོད་གསུམ་ལ་ཐོས་བསམ་དང་ལམ་བསླབ་པ་གསུམ་ལ་ཉམས་བཞེས་མཛད་པས་མཁས་བཙུན་བཟང་པོའི་ཡོན་ཏན་ཐོབ། དབལ་ཤུལ་བླ་མ་བསོད་ནམས་མཁས་གྲུབ་མཆོག་སྐུ་འདའ་ཁར་རང་དགོན་གྱི་བསྟན་པའི་འགན་ཡོངས་རྫོགས་གཏད་དེ་རྒྱལ་ཚབ་ཏུ་བསྐོས། དེ་ནས་བཤད་སྒྲུབ་ལས་གསུམ་གྱི་མཛད་ཕྲིན་སྐྱོང་བཞིན་པའི་སྐབས་སུ་གངས་ལྗོངས་ཡོངས་ལ་ཆོས་སྲིད་ཉམས་རྒུད་བློས་མི་བཟོད་པ་བྱུང་ནས་གང་སྐུའི་དཀྱིལ་འཁོར་ཡང་གཞན་དབང་དུ་གྱུར་པའི་ཚུལ་བསྟན་ཏོ།།
གདན་རབས་དགུ་པ་༸ཁྱབ་བདག་འཁོར་ལོའི་མགོན་པོ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན་ཨོ་རྒྱན་སྐུ་གསུམ་གླིང་པའམ་གཏེར་སྟོན་པདྨ་བདུད་འདུལ་གཏུམ་དྲག་རྡོ་རྗེ་རོལ་པ་རྩལ་གྱི་བྱུང་བ་མདོར་བསྡུས་ཙམ་འོག་ཏུ་འབྱུང་བས་དེར་གཟིགས་པར་འཚལ་ལོ།།
གདན་རབས་བཅུ་པ་མདོ་མཁྱེན་བརྩེའི་ཡང་སྲིད་རིག་འཛིན་ཧཱུཾ་ཀར་རྡོ་རྗེ་མཆོག་ནི། ཕྱི་ལོ་ ༡༩༦༩ ལོར་མགོ་ལོག་ཨ་སྐྱོང་གོང་མར་ཡབ་སྤྲུལ་བའི་གཏེར་ཆེན་པདྨ་གཏུམ་དྲག་རོལ་པའི་རྡོ་རྗེ་དང་ཡུམ་གད་ཐོག་གདུགས་དཀར་སྒྲོལ་མ་གཉིས་ཀྱི་སྲས་སུ་ངོ་མཚར་བའི་ལྟས་དང་བཅས་སྐུ་འཁྲུངས། ཆུང་ངུ་ནས་ཡབ་ཀྱི་དྲུང་དུ་སྔོན་རྩ་རྫོགས་གསུམ་གཙོས་པའི་དབང་ལུང་མན་ངག་ཟབ་གཏེར་སོགས་བུམ་པ་གང་བྱོའི་ཚུལ་དུ་མནོས། ཁྱད་པར་དུ་ཕྱི་ལོ་ ༡༩༨༩ ལོར་རྒྱ་གར་འཕགས་ཡུལ་དུ་ཕེབས་ཏེ་༸གོང་ས་ཐམས་ཅད་མཁྱེན་པའི་གསེར་ཞལ་མཇལ་ཞིང་གསུང་གི་བདུད་རྩི་ཐོག་མར་མྱོང་བའི་སྐལ་བ་དང་བཅས་མཚན་ལྡན་གྱི་བླ་མ་གང་མང་ལ་བསྟེན་ནས་ཐོས་བསམ་སྒོམ་པའི་གནས་ལ་ཤེས་རབ་ཀྱི་མིག་ཟུང་ལྷག་ཏུ་རྒྱས་ཏེ་རྣམ་དཔྱོད་དང་རིག་པའི་འགྲོས་སོགས་གཞན་ལས་ལྷག་པ་བྱུང་བས་ཀུན་ཀྱིས་ཡིད་སྨོན་བྱེད་ས་ཞིག་ཏུ་གྱུར། སྔ་འགྱུར་བསྟན་པའི་བདག་པོ་༸སྐྱབས་རྗེ་གྲུབ་དབང་པདྨ་ནོར་བུ་མཆོག་གིས་རྡོར་གདན་སྔ་འགྱུར་སྨོན་ལམ་ཆེན་མོའི་སྐབས་སུ་མདོ་མཁྱེན་བརྩེའི་ཡང་སྲིད་དུ་ཁྲི་འདོན་མངའ་གསོལ་མཛད་ཅིང་དེ་ནས་རིམ་པས་ཨ་རིར་རྒྱལ་སྤྱིའི་སྐད་ཡིག་སློབ་ཆེན་དང་རྒྱ་ནག་པེ་ཅིན་ནང་བསྟན་སློབ་གླིང་སོགས་ནས་སློབ་སྦྱོང་གང་མང་མཛད་མཐར་མཁས་བཙུན་བཟང་པོའི་རྒྱན་དུ་སོན། དེང་སྐབས་ཡབ་རྗེ་གཏེར་ཆེན་བླ་མའི་གདན་སའི་ཤུལ་འཛིན་གྱི་གཙོ་འགན་བཞེས་ཏེ་ཕྱི་ནང་གསང་གསུམ་གྱི་བཀོད་པ་སྔར་ལས་དར་རྒྱས་སུ་བཏང་ཞིང་དབང་ལུང་ཁྲིད་གསུམ་གྱི་རྒྱུན་བཟང་གདུལ་བྱའི་ཁམས་དབང་མོས་པ་དང་བསྟུན་ནས་དགོས་འདོད་འབྱུང་བའི་ནོར་བུ་བཞིན་གང་ལ་གང་འདོད་དུ་སྟེར་ཞིང་། གཞན་ཕན་དང་ལྷག་བསམ་གྱིས་ཐུགས་རྒྱུད་ཡོངས་སུ་ཕྱུག་པས་འཛམ་གླིང་སྤྱི་དང་ཁྱད་པར་དུ་དེར་གནས་ཀྱི་སྐྱེ་འགྲོ་ཐམས་ཅད་ལ་ཕན་པ་དང་བདེ་བ་རྒྱ་ཆེར་སྐྲུན་བཞིན་ཞབས་ཟུང་འཁོར་ལོའི་རེ་ཁ་མི་འཇིགས་གདོང་ལྔའི་ཁྲི་འཕང་ངོགས་སུ་མངོན་པར་སྐྱོད་བཞིན་པའོ།།
དེ་ལྟར་གདན་རབས་སྐབས་སུ་བགྲངས་པའི་བྱང་ཆུབ་སེམས་དཔའི་རྣམ་སྤྲུལ་འདི་དག་གིས་སྔ་འགྱུར་བསྟན་པ་སྤྱི་དང་ཁྱད་པར་དུ་སྙིང་ཐིག་བསྟན་པའི་རྒྱལ་མཚན་དུས་ད་ལྟའི་བར་དུ་འཛིན་སྐྱོང་སྤེལ་གསུམ་གྱིས་སྔར་ལས་ལྷག་པ་དར་རྒྱས་སུ་བཏང་སྟེ་དེང་སྐབས་ས་ཆེན་པོ་གོ་ལ་འདིའི་སྟེང་དུ་ཉི་ཟླ་ལྟར་གཟི་མདངས་རྒྱས་ཤིང་ཡིད་བཞིན་ལྟར་དགོས་འདོད་འབྱུང་བར་གནས་པ་འདི་བསྟན་འཛིན་གྱི་སྐྱེས་བུ་དམ་པ་ཁོང་ཅག་གི་བྱས་རྗེས་བླ་ན་མེད་པ་ཡིན་པས་བཀའ་དྲིན་བརྗོད་ཀྱིས་མི་ལང་ངོ་།།
ད་ནི་དགོན་འདིའི་མཁན་རབས་བྱུང་ཚུལ་བསྡུས་ཙམ་ནི།
མཁན་རབས་དང་པོ་སེར་ཤུལ་སྤྲུལ་སྐུ་དགེ་ལེགས་འཇམ་དཔལ་གྲགས་པ་ནི། ཡབ་ཤུགས་སྒང་གཏེར་ཆེན་དང་ཡུམ་སོག་རུ་བཟའ་གཉིས་ཀྱི་སྲས་སུ་སྐུ་འཁྲུངས་ཤིང་ཆུང་ངུ་ནས་དམ་པའི་རང་གཤིས་མངོན་པ། རྫ་སེར་ཤུལ་དགོན་དུ་ཐོས་བསམ་རྒྱ་ཆེར་བྱས་ནས་མཐར་རང་དགོན་གྱི་མཁན་པོའི་འགན་བཞེས་ཏེ་དམ་ཆོས་འདུལ་བའི་བསྟན་པ་རྒྱ་ཆེར་སྤེལ་བར་བྱས་སོ།།
མཁན་རབས་གཉིས་པ་དོམ་ཚ་མཁན་པོ་པདྨ་རྣམ་རྒྱལ་ནི། གདན་རབས་ཀྱི་སྐབས་སུ་བྱུང་བ་མདོར་ཙམ་བརྗོད་ཟིན་པས་འདི་ཉིད་ཀྱིས་སྐུ་ཚེའི་སྨད་དུའང་རང་དགོན་འདིར་མཁན་ཁྲིར་བཞུགས་ཏེ་འདུལ་བ་གཞི་གསུམ་གྱི་ལག་ལེན་སོགས་ཚུལ་བཞིན་གནང་བས་བཀའ་དྲིན་ཤིན་ཏུ་ཆེའོ།།
མཁན་རབས་གསུམ་པ་ཆུ་སྲིབ་སོག་པོ་སྤྲུལ་སྐུ་ནི། རང་སྡེའི་ཆུ་སྲིབ་ཏུ་སྐུ་འཁྲུངས་ཤིང་རང་དགོན་འདིའི་མཁན་པོའི་འགན་བཞེས་ཏེ་འདུལ་བའི་བསྟན་པ་ལ་ཕན་ཐོགས་རྒྱ་ཆེར་གནང་ཡོད་པ་གོར་མ་ཆག་མོད་འོན་ཀྱང་ཁོང་གི་འཁྲུངས་ཡུལ་ཙམ་ལས་ལག་སོན་མ་བྱུང་བས་འབྲི་མ་ནུས་སོ།།
མཁན་རབས་བཞི་པ་དབལ་ཤུལ་བླ་མ་བསོད་ནམས་མཁས་གྲུབ་ནོར་བུ་ནི། གདན་རབས་ཀྱི་སྐབས་སུ་བརྗོད་ཟིན་པས་འདི་པས་རང་དགོན་འདིར་མི་ལོ་བཞི་བཅུ་ལྷག་ལ་བསྟན་པའི་འགན་བཞེས་ཏེ་འདུལ་བའི་བསྟན་པ་ལའང་བཀའ་དྲིན་བླ་ན་མེད་པའོ།།
མཁན་རབས་ལྔ་པ་ཨ་དགའ་མཁན་པོ་ནི། རང་སྡེའི་དོམ་སྐོར་དུ་འཁྲུངས་ཤིང་དཔལ་ཡུལ་མཆོག་སྤྲུལ་དང་ཁྲ་དགེ་སློང་སོགས་ལས་འདུལ་གཞུང་དང་གཞི་གསུམ་ལག་ལེན་དང་བཅས་པ་ལ་མཁས་པར་སྦྱངས་ནས་རང་དགོན་གྱི་མཁན་ཁྲིར་བཞུགས་ཏེ་དམ་ཆོས་འདུལ་བའི་བསྟན་པ་རྒྱས་པར་བྱས་སོ།།
མཁན་རབས་དྲུག་པ་སེར་ཤུལ་མཁན་པོ་དགེ་ལེགས་བརྩོན་འགྲུས་ནི། སྐྱེས་བུ་དམ་པ་འདི་ཉིད་ཀྱི་སྐོར་ལ་གསལ་ཁ་ལག་སོན་མ་བྱུང་བས་མཁན་རབས་ནང་ལ་བཞག་ཡོད་པའི་རྒྱུ་མཚན་གྱིས་དགོན་འདིའི་འདུལ་བའི་བསྟན་པ་ལ་བྱས་རྗེས་མི་དམན་པ་ཞིག་ཡོད་པ་ནི་གདོན་མི་ཟའོ།།
མཁན་རབས་བདུན་པ་ལམ་ཁོའི་མཁན་པོ་ངག་དབང་གསང་སྔགས་རྒྱ་མཚོ་ནི། ཡབ་ལམ་ཁོའི་བཟང་ལྡན་དང་ཡུམ་ཆོས་མཚོ་གཉིས་ཀྱི་སྲས་སུ་འཁྲུངས་ཤིང་ཤར་འཛམ་ཐང་སོགས་སུ་མཚན་ལྡན་གྱི་སྐྱེས་བུ་དམ་པ་མང་པོ་ལས་ཐོས་བསམ་རྒྱ་ཆེར་གནང་། སྐབས་ཤིག་རང་དགོན་གྱི་མཁན་ཁྲིར་བཞུགས་ཏེ་འདུལ་བའི་བསྟན་པ་ལ་བྱས་རྗེས་བླ་ན་མེད་པ་བཞག་གོ།
མཁན་རབས་བརྒྱད་པ་དགེ་རྩེ་འཇིགས་མེད་བྱང་ཆུབ་ནི། རང་སྡེའི་དགེ་སྐོར་དུ་འཁྲུངས་ཤིང་དབལ་ཤུལ་བླ་མ་བསོད་ནམས་མཁས་གྲུབ་དང་པུ་རུ་བླ་མ་ཀུན་བཟང་སོགས་ལས་གཞུང་ལུགས་རྒྱ་མཚོ་ལྟ་བུ་ལ་ཐོས་བསམ་གནང་བས་མཁས་བཙུན་བཟང་པོའི་གྲགས་པ་རྒྱས་ཤིང་དགོན་འདིར་མཁན་པོའི་འགན་བཞེས་ཏེ་འདུལ་བསྟན་ལ་བྱ་བ་རྒྱ་ཆེར་གནང་ངོ་།།
མཁན་རབས་དགུ་པ་ཨ་གནམ་བསྟན་པའི་ཉི་མ་ནི། རང་སྡེའི་ཨ་གནམ་དུ་འཁྲུངས་ཤིང་ཨ་མདོ་དགེ་བཤེས་འཇམ་དཔལ་རོལ་པའི་རྡོ་རྗེ་དང་ཆེ་བོའི་སྤྲུལ་སྐུ་བློ་བཟང་མདོ་སྔགས་ཆོས་ཀྱི་རྒྱ་མཚོ་སོགས་སྐྱེས་བུ་དམ་པ་མང་པོ་ལས་མདོ་སྔགས་རིག་གནས་དང་བཅས་པ་གསན་པས་མཁྱེན་རྒྱ་ཡངས་པོར་བྱས་ཤིང་མཐར་རང་དགོན་གྱི་མཁན་ཁྲིར་བཞུགས་ནས་བསྟན་པའི་བྱ་བ་རྒྱ་ཆེར་གནང་ངོ་།།
མཁན་རབས་བཅུ་པ་ཨ་གནམ་མཁན་པོ་དགེ་སྐྱབས་ནི། མཁན་རིན་པོ་ཆེ་བསྟན་པའི་ཉི་མའི་སྐུ་མཆེད་དུ་འཁྲུངས་ཤིང་དབང་མདའི་གྱང་སྤྲུལ་དོན་གྲུབ་རྡོ་རྗེ་གཙོས་པའི་བླ་མ་མང་པོ་བསྟེན་ནས་འདུལ་བའི་བསྟན་པ་འཛིན་པའི་རྒྱན་དུ་གྱུར། རང་དགོན་གྱི་མཁན་པོའི་འགན་བཞེས་ཏེ་ལོ་གཉིས་ཙམ་ནས་གངས་ལྗོངས་ཆོས་སྲིད་ཉམས་རྒུད་ཀྱི་དབང་གིས་ཕྲིན་ལས་འཕྲོ་ཅན་དུ་ལུས་སོ།།
མཁན་རབས་བཅུ་གཅིག་པ་༸སྐྱབས་རྗེ་མཆོག་སྤྲུལ་ཐུབ་བསྟན་གར་དབང་ཉིན་བྱེད་བཤད་སྒྲུབ་ཕྲིན་ལས་དཔལ་བཟང་པོ་ནི། ཕྱི་ལོ་ ༡༩༥༠ ལོར་ཨ་སྐྱོང་གོང་མ་ལུང་སྐྱའི་སྨིན་ལུང་རི་རྒྱལ་ཕྱུག་མོའི་རི་ཞོལ་དུ་ཡབ་གད་ཐོག་ཨ་པོ་དང་ཡུམ་བསོད་ནམས་སྐྱིད་གཉིས་ཀྱི་སྲས་སུ་ངོ་མཚར་བའི་རྟགས་དུ་མ་དང་བཅས་སྐུ་འཁྲུངས། དགུང་ལོ་བཞིའི་སྟེང་དཔལ་ཡུལ་མཆོག་སྤྲུལ་རིན་པོ་ཆེས་ཡེ་ཤེས་དབྱིངས་གཟིགས་ཀྱིས་ལྷ་སྤྲུལ་རིན་པོ་ཆེའི་ཡང་སྲིད་འཁྲུལ་བྲལ་དུ་ངོས་འཛིན་གནང་། དཔལ་ཡུལ་དར་ཐང་དགོན་དུ་གདན་དྲངས་ཏེ་ཁྲི་འདོན་མངའ་གསོལ་རྒྱ་ཆེར་བྱས་ཤིང་མཆོག་སྤྲུལ་རིིན་པོ་ཆེ་གཙོས་པའི་མཁས་གྲུབ་སྐྱེས་ཆེན་རྣམས་ལས་གཞུང་ལུགས་མན་ངག་དང་བཅས་པ་རྒྱ་ཆེར་གསན། སྙིགས་མའི་དུས་འདིར་འདུལ་འཛིན་བྱེ་བའི་གཙུག་རྒྱན་ལྟར་བཞུགས་ཤིང་དཔལ་ཡུལ་དར་ཐང་དགོན་པའི་བསྟན་བདག་མཛད་དེ་དེང་སྐབས་ཞབས་ཟུང་རྡོ་རྗེའི་ཁྲི་འཕང་ཡངས་པོའི་ཀློང་དུ་བཞུགས་བཞིན་པ་དང་། ཁྱད་པར་དུ་གངས་ལྗོངས་བསྟན་འགྲོ་རྒུད་པའི་སྨག་རུམ་སླར་ཡང་འོད་དཀར་གྱི་སྣང་བ་ཅུང་ཙམ་ཤར་བའི་དུས་ཕྱི་ལོ་ ༡༩༨༡ ལོར་༸སྐྱབས་རྗེ་ཁོང་གིས་བསྟན་པ་དང་སེམས་ཅན་གྱི་དོན་ཆེན་ཁུར་བཞེས་མཛད་དེ་དགོན་འདིར་ཐོག་མའི་རྟེན་འབྲེལ་ལ་གཞིགས་ཏེ་ལོ་ངོ་གཅིག་རིང་མཁན་ཁྲིར་བཞུགས་ནས་དམ་ཆོས་འདུལ་བ་གཞི་གསུམ་གྱི་ལག་ལེན་ཚུལ་བཞིན་དར་སྤེལ་གནང་བས་བཀའ་དྲིན་གཞལ་དཀའ་བའོ།།
མཁན་རབས་བཅུ་གཉིས་པ་མགར་བ་མཁན་པོ་བློ་བཟང་ཚུལ་ཁྲིམས་ནི། མགོ་ལོག་ཨ་སྐྱོང་གོང་མའི་ནང་སྐུ་འཁྲུངས་ཤིང་ཆུང་ངུ་ནས་དཔལ་ཡུལ་མཆོག་སྤྲུལ་རིན་པོ་ཆེ་དང་། ཨ་རྐོང་མཁན་ཆེན་བློ་བཟང་རྡོ་རྗེ། ཁྱད་པར་དུ་བོད་སྤྲུལ་མདོ་སྔགས་བསྟན་པའི་ཉི་མ་སོགས་ཀྱི་ཞབས་པད་སྤྱི་བོར་བླངས་ཏེ་མདོ་སྔགས་གཞུང་ལུགས་མན་ངག་དང་བཅས་ལ་ཐོས་བསམ་སྒོམ་པའི་བརྩོན་པ་བསྐྱེད་དེ་དཔལ་ཡུལ་དར་ཐང་དགོན་དུ་རྒྱུན་རིང་བཞུགས། དུས་འགྱུར་གྱི་རྗེས་སུ་དགོན་འདིར་ལོ་བཞིའི་རིང་མཁན་པོའི་བཀའ་དྲིན་བསྐྱངས་ཏེ་ཕྱིར་དར་ཐང་དགོན་དུ་ཕེབས་ཤིང་མཐར་དགུང་གྲངས་བརྒྱད་ཅུའི་ཐོག་སྦྲ་གསར་དགོན་ནས་བསྟན་འགྲོའི་དོན་ཆེན་མཐར་ཕྱིན་པའོ།།
མཁན་རབས་བཅུ་གསུམ་པ་མཁན་པོ་པདྨ་ཆོས་འབྱོར་རྒྱ་མཚོ་ནི། ཡབ་གད་ཐོག་ཨ་པོ་དང་ཡུམ་བསོད་ནམས་སྐྱིད་གཉིས་ཀྱི་སྲས་སུ་འཁྲུངས་ཤིང་མཆོག་སྤྲུལ་ཨོ་རྒྱན་གར་དབང་ཉི་མ་སོགས་སྐུ་མཆེད་དུ་མ་བྱུང་། དཔལ་ཡུལ་མཆོག་སྤྲུལ་རིན་པོ་ཆེ་དང་ཨ་གནམ་མཁན་པོ་བསྟན་པའི་ཉི་མ། ཨ་རྐོང་མཁན་ཆེན་ལ་སོགས་མཁས་གྲུབ་ཀྱི་སྐྱེས་བུ་དམ་པ་མང་པོའི་མདུན་ནས་གསན་པ་མཐར་ཕྱིན། ཕྱི་ལོ་ ༡༩༨༡ ནས་ལོ་ལྔའི་རིང་དབྱར་བདག་དང་དེའི་རྗེས་སུ་མཁན་པོའི་ཁྲིར་འཁོད་དེ་དབྱར་གནས་དང་སྒྲུབ་མཆོད་དུ་མའི་དབུ་བཞུགས་དང་། བཤད་གྲྭའི་སློབ་དཔོན་སོགས་གནང་ནས་འདུལ་བའི་བསྟན་པ་ལ་འཆད་ཉན་དར་སྤེལ་རྒྱ་ཆེར་གནང་བས་རང་དགོན་འདིར་བཀའ་དྲིན་བླ་ན་མེད་པའོ།།
ཞེས་མཁན་རབས་གསེར་རིའི་ཕྲེང་བ་འདི་དག་གིས་དམ་ཆོས་འདུལ་བའི་བསྟན་པ་མི་ཉམས་གོང་འཕེལ་དང་ཉམས་པ་སླར་གསོ་མཛད་དེ་དུས་ད་ལྟའི་བར་དུ་རྒྱལ་བསྟན་ཉི་མ་ཤར་བ་ལྟར་དར་སྤེལ་གནང་པས་ཤིན་ཏུ་བཀའ་དྲིན་ཆེའོ།།
དེ་ལྟར་གདན་རབས་དང་མཁན་རབས་མ་ཡིན་པའི་མཁས་གྲུབ་ཀྱི་སྐྱེས་བུ་དམ་པ་མང་པོ་ཞིག་གིས་དགོན་པ་འདིར་མཛད་ཕྲིན་དང་ཕྱག་རྗེས་བཞག་པ་སོགས་ནི་སྐབས་འདིར་བཀོད་མེད་དོ།།
མཐར་བསྟན་བདག་བླ་མས་ལུང་དང་མཐུན་པར་ཇི་ལྟར་དར་རྒྱས་སུ་བཏང་བ་ནི།
དེ་ཡང་༸ཁྱབ་བདག་འཁོར་ལོའིི་མགོན་པོ་ཨོ་རྒྱན་སྐུ་གསུམ་གླིང་པའམ་གཏེར་སྟོན་པདྨ་བདུད་འདུལ་གཏུམ་དྲག་རྡོ་རྗེ་རོལ་བ་རྩལ་ནི་ཕྱི་ལོ་ ༡༩༣༤ ལོར་མགོ་ལོག་ཨ་སྐྱོང་གོང་མ་རྨ་སྲིབ་མེ་ཏོག་ཐང་དུ་ཡབ་དབལ་ཤུལ་བླ་མ་ལྷུན་འགྲུབ་མགོན་པོ་དང་ཡུམ་རྒོད་བཟའ་པདྨ་གཡུ་མཚོ་གཉིས་ཀྱི་སྲས་སུ་ངོ་མཚར་བའི་ལྟས་དུ་མ་དང་བཅས་སྐུ་འཁྲུངས། ཡུམ་གྱི་སྣང་བ་ལ་སྤྲིན་དཀར་གྱི་སྡོང་པོ་ཡལ་འདབ་རྒྱས་པའི་གསེབ་ལས་གུ་རུའི་མཚན་སྔགས་དབྱངས་སུ་གྱེར་བ་སོགས་རྟགས་མཚན་མང་པོ་བྱུང་ཞིང་ཁྱད་པར་དུ་གཞན་དང་མི་འདྲ་བ་ཞིག་ཡོད་པ་ནི་མི་ལོ་སུམ་བརྒྱ་ཡར་མར་ཙམ་ནས་སྐྱེས་བུ་དམ་པ་འདི་འབྱུང་བའི་དུས་དང་། དགུང་སྙིང་། སྐུའི་རྣམ་འགྱུར། གཏམ་གསུང་སྟངས། གཏེར་ཆོས་ཅི་ཞིག་གདོན་རྒྱུ། གསང་ཡུམ་སུ་དང་འཕྲད་རྒྱུ། དགོན་པ་དང་རྟེན་བཞེངས་ཇི་ལྟར་བྱེད་ཚུལ་སོགས་བསླུ་མེད་རྡོ་རྗེའི་ལུང་གིས་ཡང་ཡང་བསྔགས་པ་འདི་དག་རེད། དེ་ཡང་གཏེར་སྟོན་ཀུན་བཟང་ཉི་མས། ཨ༔ མཆོག་འཛིན་སྐྱེས་བུ་ལྷ་ལུང་དཔལ་རྡོར་བ༔ ཟབ་གཏེར་ལ་དབང་ཅོར་ཆུང་འུར་མགོ་མཐོ༔ ཕྱོགས་མིན་གནས་སུ་འགྲོ་དོན་འབྱུང་བར་འགྱུར༔ སྐྱེས་བུ་དེ་ཡང་བདག་གི་གདུང་འཛིན་ཡིན༔ གཏེར་སྤྱོད་དེ་དག་མཚམས་བཞི་ལོ་བ་ཡིན༔ གཏད་མེད་ཧུར་ཡང་ལུས་ནི་གྲུ་བཞི་བརྗིད༔ མིག་རྩ་མཐོ་ཞིང་ངག་ནི་བྱུང་རྒྱལ་སྨྲ༔ སེམས་ཀྱང་ཚབ་ཚུབ་སྤྲོ་ཐུང་རིག་པ་ཧུར༔ གནས་གསུམ་སྨེ་བ་གསང་སྤྱོད་ལམ་ལ་མོས༔ ཕྱིན་ཅི་མ་ལོག་རྟགས་མཚན་ཁྱད་པར་འཕགས༔ སྐྱེ་བ་དེ་ཡང་ང་སྤྲུལ་སྙིང་གི་བུ༔
ཞེས་གསུངས་པ་འདི་ཁོ་ནས་ཀྱང་སྐུའི་རྣམ་འགྱུར་ལ་སོགས་པ་གསལ་པོར་སྟོན་ལ། གཙོ་བོ་ཁོང་གིས་ཨོ་རྒྱན་མ་ཧཱ་གུ་རུའི་དགོངས་གཏེར་འདི་དག་གཏེར་སྨྱོན་ཞིག་གི་ཚུལ་དུ་བསྣམས་ནས་ཕེབས་པ་འདི་རེད། ཅོག་གཙང་མདོ་སྤྲུལ་བས། གཏེར་ཁ་གསུམ་ལ་དབང་བ་ཡི༔ གཏེར་སྨྱོན་ཨ་ལྕགས་འབྲི་ནས་བྱོན༔ ཨ་ཌིའི་མཚན་འཆང་ཁྱི་ལོ་བ༔ དེ་དང་འབྲེལ་བ་ཐོགས་ཚད་ཀུན༔ ངེས་པར་པདྨ་འོད་དུ་དྲངས༔ ཞེས་དང་། དབུས་བཟའ་མཁའ་འགྲོ་བདེ་བའི་རྡོ་རྗེས། པདྨའི་ཐུགས་སྤྲུལ་ཨ་ལྕགས་འབྲི་ཡུལ་ནས༔ ཨ་ཌི་ཡཱ་ན་ལཀྵིམ་ཞེས་བྱའི་བུ༔ ཤིང་གི་ཁྱི་ལ་ཞོན་པའི་སྐྱེས་བུ་འབྱུང་༔ ཞེས་གསུངས། ཁྱད་པར་དུ་བོད་ཁུལ་ཡོངས་ལ་དུས་འགྱུར་བཙན་པོའི་དབང་གིས་ཆོས་སྲིད་ཉམས་རྒུད་བྱུང་བ་དག་འཕྲལ་དུ་ཟློག་བྱེད་དུས་བབ་ཀྱི་ཟབ་ཆོས་དག་ནི་རིག་འཛིན་ཉི་མ་གྲགས་པའི་གཏེར་ལུང་ལས། བྱང་ཨ་ལྕགས་འབྲི་ཡུལ་སྔགས་རིགས་ཀྱི༔ ཁོང་ལྷ་ལུང་དཔལ་རྡོར་སྐྱེས་མཐའ་ཅན༔ ནོར་སྐྱོང་གི་ལོ་བ་ཨ་ཌིའི་མཚན༔ དེའི་ལྟེ་བར་སྨེ་ཐིག་ལྔ་ཚོམ་ཡོད༔ ཤིང་འབྲུག་གི་དུས་ལ་ཨ་ལྕགས་ཡུལ༔ ལྷ་བདེ་གཤེགས་ཚོམ་དགུའི་གཏེར་བཏོན་ན༔ བོད་ཁ་བ་ཅན་ལ་བདེ་སྐྱིད་དར༔ བྱང་ཨ་ལྕགས་འབྲི་ཡི་སྡུག་བསྔལ་སེལ༔ ཞེས་དང་།
ཨ་པང་གཏེར་ཆེན་དཔའ་བོ་ཆོས་དབྱིངས་རྡོ་རྗེས། ཤར་རྒྱ་ནག་དམག་གི་རུ་འཛིང་ངོམ༔ མི་ཐམས་ཅད་རྩ་ཕུག་ཤིང་ཕུག་ཡིབ༔ དེའི་དུས་སུ་ལྡན་མ་རྩེ་མངས་ཀྱི༔ རྣམ་སྤྲུལ་གཅིག་ཨ་ལྕགས་འབྲི་ནས་བྱོན༔ ཆོས་གཏེར་ཁ་གསུམ་ལ་དབང་སྐལ་ཅན༔ སྔགས་རིགས་ལ་ཁྱི་ལོ་ཨ་ཌིའི་མཚན༔ དེས་འཇམ་དཔལ་གཤིན་རྗེའི་གཏེར་བཏོན་ན༔ རྒྱལ་བསྟན་ཀྱང་རབ་བྱུང་གཅིག་ལ་བསྣུར༔ གང་འབྲེལ་ཚད་མཁའ་སྤྱོད་ཞིང་དུ་འདྲེན༔ ཞེས་གསུངས་པ་ལྟར་སྤྲུལ་པའི་གཏེར་ཆེན་འདི་ཉིད་བསམ་བཞིན་རྒྱལ་བསྟན་སྤྱིའི་རྒུད་པ་སེལ་ཕྱིར་ཕེབས་པ་ཞིག་ཡིན་པ་སྨྲོས་མ་དགོས་སོ།།
ཕྱི་ལོ་ ༡༩༤༡ ལོར་ཁོང་དགུང་ལོ་བརྒྱད་ལ་སོན་སྐབས་རང་གི་ཁུ་བོ་དབལ་ཤུལ་བླ་མ་བསོད་ནམས་མཁས་གྲུབ་ཀྱི་མདུན་དུ་ཐོག་མར་ཡི་གེ་སྦྱོར་ཀློག་གི་འགོ་ཚུགས་ཤིང་རིམ་བཞིན་ཀློང་ཆེན་སྙིང་ཐིག་སྔོན་འགྲོའི་ཟབ་ཁྲིད་ཞུས་ཏེ་འབུམ་ལྔའི་བསགས་སྦྱང་སོགས་ཀྱང་མཛད། དེ་ནས་དཔལ་ཡུལ་དར་ཐང་དགོན་དུ་ཕེབས་ཏེ་ཨ་རྐོང་མཁན་པོའི་མདུན་དུ་རབ་བྱུང་གི་སྡོམ་པ་མནོས་པ་དེའི་ཚེ་ཕྱག་རྡོར་ཞི་མ་ཁྲོའི་རྣམ་པར་ཞལ་གཟིགས་ཏེ། ཁྱོད་ནི་སོ་ཐར་གོས་སེར་གྱོན་པ་མ་ལགས་ཏེ༔ སྔགས་སྐྱེས་ཁྱིམ་པའི་ཚུལ་འཛིན་སྐྱེས་བུ་ཡིན༔ ཉེར་བདུན་ཚེ་ཡི་མཐོང་ཁོངས་རྒྱ་མཇལ་ཚེ༔ ཕྱག་ན་རྡོ་རྗེའི་དགོངས་རྒྱུད་ཕ་ཕོག་བབས༔ དྲི་མེད་ཟབ་གཏེར་ཆོས་ཀྱི་མཛོད་སྒོ་རྡོལ༔ རིགས་གསུམ་ཐུགས་སྒྲུབ་བླ་མའི་སྒྲུབ་པ་དང་༔ ཡེ་ཤེས་ཀློང་དགུ་ཡི་དམ་སྒྲུབ་པ་དང་༔ ཡང་དག་རྗེས་འབྲེལ་ཕྱག་རྡོར་མཐའ་ཡས་སྐོར༔ འཇམ་དཔལ་གཤིན་རྗེ་མེ་འཁོར་དམར་པོ་དང་༔ རྟ་ཕག་སངས་རྒྱས་མཉམ་སྦྱོར་ཆོས་སྐོར་དང་༔ འཕགས་མའི་སྒྲུབ་སྐོར་ཕག་ཁྲོས་སེང་གསུམ་སྐོར༔ ཨོ་རྒྱན་ནོར་ལྷ་ལ་སོགས་གཡང་གི་སྐོར༔ མཛོད་ལྔའི་གྲངས་ལྡན་རྒྱ་ཆེར་བརྡ་བཀྲོལ་ན༔ རྒྱལ་བསྟན་རྒུད་པ་རབ་བྱུང་གཅིག་ལ་བསྲིང་༔ ཞེས་བརྡ་ལུང་དངོས་སུ་བསྟན་ནས་མི་སྣང་བར་གྱུར་པ་དང་རེ་ཞིག་རྡོ་ལས་གྲུབ་པའི་སྒྲོམ་བུ་དུང་དཀར་གྱི་དབྱིབས་ཅན་ཞིག་རྙེད་པ་མཁན་པོར་ཕུལ་བས་ཁྱོད་མ་འོངས་པར་གཏེར་སྔགས་སུ་འགྱུར་བར་གསུངས་ཀྱང་དེའི་དུས་སུ་བཏང་སྙོམས་སུ་བཞག་གོ།
ཁོང་དགུང་ལོ་གསུམ་གྱི་སྟེང་ཡབ་སྐུ་གཤེགས་པ་དང་། བཅུ་དྲུག་ཐོག་མ་ཡུམ་སྐུ་གྲོངས་ནས་ཐུགས་སྐྱོ་ངལ་ཚད་མེད་བྱུང་བ་ན་དུས་ད་ནས་བཟུང་བྱང་ཆུབ་སྙིང་པོ་མ་ཐོབ་ཀྱི་བར་ཏུ་གཞན་ལ་ཕན་གང་ཐོགས་དང་ཆོས་ཕྱིར་རང་གི་སྲོག་ཀྱང་གཏང་བར་བྱའོ་སྙམ་པའི་དམ་བཅའ་ཕུལ་ཏེ་དབུས་གཙང་ཕྱོགས་སུ་འགྲོ་རྒྱུའི་འདུན་པ་ཤར་བའི་ཚུལ་མཆོག་སྤྲུལ་རིན་པོ་ཆེ་དང་། ཨ་རྐོང་མཁན་ཆེན། སྒྱེ་བྲོས་དབོན་པོ་སོགས་ལ་ཞུས་ཏེ་རིམ་པས་ལྷོ་ཕྱོགས་ནས་སྟོང་སྐོར་དང་ཧོར་ཁོག་དེ་ནས་སྡེ་དགེ་དང་གོ་འཇོ་བརྒྱུད་དེ་ལྷ་ལྡན་ཕྱོགས་སུ་བསྐྱོད་དོ།།
དེ་ནས་དགུང་གྲངས་བཅོ་བརྒྱད་སྟེང་ཐོག་མར་ལྷ་སའི་བསམ་ཡས་མཆིམས་ཕུ་རུ་སླེབས་མ་ཐག་ད་ལྟའི་སྣང་བ་སྐད་ཅིག་ལ་ཡལ་ནས་ཉམས་དང་རྟོགས་པ་འུར་ཞིང་སྔོན་གནས་རྗེས་དྲན་སོགས་གསལ་ལྷང་ངེར་དྲན་ཞིང་ད་དུང་སྟེང་ཕྱོགས་དུར་ཁྲོད་མེ་རི་འབར་བའི་ཞིང་གི་མཐོང་སྣང་ལས་སྟོན་པ་གཞོན་ནུ་སྟོབས་ལྡན་དཔའ་བོ་འཁོར་རིག་འཛིན་གྲུབ་ཐོབ་རྒྱ་མཚོས་བསྐོར་བའི་མདུན་དུ་སླེབས་པ་སོགས་ཉམས་སྣང་ཁྱད་པར་ཅན་བྱུང་བའི་ཚེ་མ་དང་མཁའ་འགྲོའི་ཚོགས་ཀྱིས་ཨོ་རྒྱན་སྐུ་གསུམ་གླིང་པ་ཞེས་མཚན་གྱི་མེ་ཏོག་རྒྱན་དུ་ཕུལ། དུས་དེ་ནས་བཟུང་སྔོན་གྱི་ལས་འཕྲོ་སད་པའི་ཚུལ་གྱིས་གཏེར་གྱི་ཁ་བྱང་དང་ཡང་བྱང་གནད་བྱང་སོགས་ཤར་ནས་དགོངས་པའི་གསང་མཛོད་རྡོལ་བར་གྱུར་ཅིང་ད་དུང་གསུང་མགུར་དང་ལུང་བསྟན་རྣམས་མ་བཅོས་ཐོལ་བྱུང་གི་ཚུལ་དུ་གསུངས་པས་ལྐོག་གྱུར་སྟོན་པའི་ཚད་མ་ལྟ་བུར་གྱུར།
འོན་ཀྱང་ཁ་ཤས་ཀྱིས་ཁུངས་མེད་ལུང་མེད་ཡིན་ཞེས་ཕྲག་དོག་གི་དུག་ཆུས་མ་བཟོད་པར་གང་སར་གླེང་འགོ་བརྩམས་ཤིང་དེའི་ཚེ་ཁོང་གིས་ཀྱང་ང་ནི་ཁུངས་མེད་ལུང་མེད་ཡིན་ནོ་ཞེས་ཡིན་ལུགས་ཀྱི་མགུར་ཐེ་ཚོམ་ཤིན་ཏུ་སློང་བའི་སྐུལ་མ་ཞེས་པ་ལས། སྔོན་ཁུངས་མེད་པ་ཐོད་ཕྲེང་གིས༔ ང་ལུང་མེད་དཔལ་གྱི་རྡོ་རྗེ་ལ༔ ཆོས་ཕུགས་མེད་དགོངས་པའི་གཏད་རྒྱ་ཐེབས༔ ཞིང་གདུལ་བྱ་གར་ཡོད་སྐྱེ་བའི་ཕྲེང་༔ དེར་ཕ་ནོར་བུ་ཡི་གཅེས་སྐལ་བབས༔ ཁྱོད་བླ་བཙོང་ཟེར་ཡང་ཉམས་མི་ང་༔ ཡུལ་ཀུན་ཀྱི་ཧ་ཞས་བག་མི་ཚ༔ ལས་སྨོན་ལམ་སད་པའི་གཏེར་སྨྱོན་ང་༔ མ་མཁའ་འགྲོས་སྐུ་གསུམ་གླིང་པར་གསོལ༔ རང་ཉེ་བརྒྱུད་དགོངས་པའི་གསང་མཛོད་རྡོལ༔ འདི་ཤུགས་ཀྱིས་རྡོལ་ན་ཟློག་མེད་རེད༔ ང་གཏེར་རྫུན་ཁྲམ་པའི་ཡིན་ལུགས་ལ༔ སྙིང་མི་ཤིགས་གཉུག་མའི་ཀློང་སྒྲོམ་དུ༔ དཔལ་གདོད་མའི་གདོན་ཆེན་ཀུན་བཟང་ཞུགས༔ འདྲེ་རྒྱལ་བ་རིགས་ལྔ་མངོན་དུ་མཇལ༔ ཞེས་དང་།
སེམས་རེ་དོགས་བདེ་སྡུག་རོ་སྙོམ་སོང་༔ རྩལ་གཉིས་འཛིན་འཁྲུལ་བའི་སྣང་བ་ཞིག༔ སེམས་ཨ་འཐས་ཚེ་རོགས་གཏན་དུ་བོར༔ ཡུལ་ཟང་ཐལ་གཏེར་སྨྱོན་ཕོ་ཡུག་བུད༔ ལས་ཉོན་མོངས་བག་ཆགས་ཕྱུགས་ལུག་ཟད༔ ལམ་རྣམ་པར་གྲོལ་བའི་གོད་ཁ་བྱུང་༔ བློ་ཆོས་བརྒྱད་ནོར་མེད་སྤྲང་པོར་འཁྱམས༔ སེམས་ཉེར་ལེན་བྱ་རའི་ཉེ་འབྲེལ་མེད༔ དབྱིངས་སྐུ་གསུམ་མུ་གེས་འཆི་ངེས་རེད༔ ལམ་སྟོང་ཉིད་ལྟ་བས་སྐོམ་ངེས་རེད༔ མར་སྒྲིབ་གཉིས་དག་པས་སྲོག་ཀྱང་ཆད༔ སྐུ་གསུམ་གྱི་གདོན་བརླམས་བདུད་རྒན་ང་༔ གཞི་དབུ་མ་ཆེན་པོའི་ཆམ་ཁ་རྒོད༔ ལམ་ཕྱག་རྒྱ་ཆེན་པོའི་ཟུག་གཟེར་ཆེ༔ ཆོས་རྫོགས་པ་ཆེན་པོའི་གཅོང་གིས་ཐེབས༔ དབྱིངས་ཆོས་སྐུའི་དགྲ་བགེགས་འཚུབ་མར་འཕྱོ༔ ཞེས་དང་། ད་སྐུ་ལྔའི་ནད་ལ་སངས་རྒྱུ་མེད༔ སེམས་ཆོས་ཟད་ཕན་ལ་མཐའ་རྒྱུ་མེད༔ གང་འབྲེལ་ཚད་དོན་ལྡན་སྐྱོ་མོར་གདའ༔ ལྷ་གསང་བདག་གྲོགས་ངན་ཁ་ལ་རྒྱུག༔ མ་འགྲོ་དྲུག་སེམས་ཅན་ལམ་སྣ་དྲངས༔ ཞེས་དང་། ཕ་ཨྱོན་ཆེན་པོའི་བཀའ་བཞིན་ལས༔ གཞན་མི་མགོ་བསྐོར་བ་བདག་ལ་མེད༔ ངའི་རང་སེམས་བདེན་པའི་དཔང་དུ་བཙུགས༔ ཞེས་གསུངས་པ་བཞིན་རྐྱེན་འདི་དག་ལ་བརྟེན་ནས་དུས་བབ་ཀྱི་ཟབ་ཆོས་མ་ཧཱ་གུ་རུའི་ཐུགས་བཅུད་ཟབ་མོ་བྱིན་རླབས་དང་ནུས་ཚད་མྱུར་བ་དག་འདོན་དགོས་ཐུག་པ་འདིས་རང་ཉིད་གཏེར་སྟོན་དག་མ་དང་གཏེར་ཆོས་ཡང་དག་ཡིན་པའི་སྒྲུབ་བྱེད་རྣལ་མ་ཅིག་སྟོན་ལ་ད་དུང་རྐྱེན་ངན་གྲོགས་སུ་སོང་ཞེས་པའང་འདི་ལས་གཞན་ཅི་ཞིག་ཡོད། དེས་ན་རྒྱུད་རིམས་འདི་དག་བརྒྱུད་དགོས་པའང་འཇིག་རྟེན་གྱི་ཆོས་ཉིད་ཅིག་ཡིན་ནོ།།
སྔ་ཕྱིར་སྐྱེས་བུ་དམ་པ་འདིས་༸གོང་ས་ཐམས་ཅད་མཁྱེན་པ་དང་། པཎ་ཆེན་བཅུ་པ་ཆེན་པོ། ཀརྨ་པ་རིག་པའི་རྡོ་རྗེ། རྫོང་སར་མཁྱེན་བརྩེ་ཆོས་ཀྱི་བློ་གྲོས། མཆོག་སྤྲུལ་རྡོ་རྗེ་འཆང་། ཨ་རྐོང་མཁན་ཆེན། རྡོ་གྲུབ་ཆེན། དགྱེས་བྲོ་དབོན་པོ་སོགས་དེའི་སྐབས་སུ་བཞུགས་པའི་མཚན་ལྡན་བླ་མ་དྲག་ཤོས་བཅུ་ཕྲག་ལྔ་ལྷག་གི་ཞབས་པད་སྤྱི་བོར་བླངས་ཏེ་ཚུལ་བཞིན་བསྟེན་པར་བྱས། ཁྱད་པར་དུ་ཉག་བླ་བྱང་ཆུབ་རྡོ་རྗེའམ་གོ་འཇོ་ར་ཁྲིད་གཏེར་སྟོན་དང་མཇལ་བས་ཆོས་ཉིད་སྟོང་གསལ་རིག་པ་ཆེན་པོའི་ཀློང་དུ་བླ་སློབ་ཐུགས་དགོངས་དབྱེར་མེད་གཅིག་ཏུ་གྱུར། ད་དུང་རྡོ་གྲུབ་རིག་འཛིན་འཇའ་ལུས་རྡོ་རྗེས་ཤོག་དྲིལ་དུ་པདྨ་བདུད་འདུལ་གཏུམ་དྲག་རྡོ་རྗེ་རོལ་པ་རྩལ་ཞེས་བྲིས་ཏེ་མཚན་གྱི་ཅོད་པཎ་གནང་ཞིང་བསྔགས་བརྗོད་དང་བཅས་ཁོང་གི་སློབ་ཆེན་དུ་ཡང་གྱུར། གཙོ་བོ་ཨ་རྐོང་མཁན་ཆེན་གྱི་ཞབས་པད་སྤྱི་བོར་ཡང་ཡང་བླངས་ཤིང་དུས་འཁྲུག་སྐབས་སུ་ཡང་རང་སྲོག་ལས་ཀྱང་རྩ་ཆེན་དུ་བཟུང་ནས་ཉེན་ཡོལ་དང་སྐུ་སྙོར་ཞབས་ཏོག་རྒྱ་ཆེར་བྱས་པས་དགེ་བའི་བཤེས་གཉེན་སྟེན་ཚུལ་མ་ནོར་བ་ཞིག་ཕྱི་རབས་པ་རྣམས་ལ་མིག་དཔེར་བཞག་ཡོད།
ཁོང་གི་དགོངས་གཏེར་གྱི་ཐོག་མ་ཕྱག་རྡོར་དྲག་པོ་ལྷ་གསུམ་གྱི་སྒྲུབ་ཐབས་དང་དེའི་ལས་དཀྱིལ་སོགས་ཀྱི་ཆོས་བདག་ཏུ་གཏེར་གྱི་ཁ་བྱང་ལས་གསལ་བ་ལྟར་མཁན་ཆེན་ཉིད་ལ་སྤྱན་འབུལ་ཞུས། དེའི་སྐབས་སུ་མཁན་ཆེན་དམ་པས་ཀྱང་ཟབ་ཆོས་འདི་ཉིད་མ་ཧཱ་གུ་རུའི་ཐུགས་དགོངས་ཟབ་མོ་འཁྲུལ་མེད་ཡིན་པ་ནི་སྒྲུབ་འབྲས་དང་རྟགས་མཚན་ནུས་པ་སོགས་ལ་དཔྱད་ནས་དུས་བབ་ཀྱི་གཏེར་སྟོན་དང་ཟབ་ཆོས་ཡང་དག་ཡིན་པ་ཐུགས་ལ་ངེས་ཤེས་འཁྲུངས་ཏེ་བླ་མ་དྲག་པོ་ལྷ་གསུམ་གྱི་དོན་ལ་དཔྱོད་པ་ལེགས་བཤད་སྐྱ་རེངས་དང་པོ་ཞེས་པ་བརྩམས་ཤིང་དེའི་མཆོད་བརྗོད་ལས། རྗེ་འབངས་ཉེར་ལྔ་ལྡན་མ་རྩེ་མངས་དང་། །ཨེ་མི་བྱ་ནག་ལྷ་ལུང་དཔལ་རྡོར་ནས། །པདྨ་བདུད་འདུལ་གཏུམ་དྲག་རྡོ་རྗེའི་བར། །རྩ་བརྒྱུད་བླ་མ་རྣམས་ལ་མགོས་ཕྱག་འཚལ། །སྙིགས་མའི་རྒུད་པ་གསོ་བའི་སྨན་གཅིག་པུ། །གཏེར་ཁ་གསུམ་འདུས་དྲག་སྒྲུབ་བསྐལ་བའི་མེའི། །ལྷ་སྔགས་ཕྲིན་ལས་ཟབ་མོའི་རྣམ་གཞག་ལ། །རྨོངས་བློས་དཔོག་ཚོད་དཔྱད་པའི་སྒོ་ཙམ་འབྲི། །ཞེས་ལུང་རིགས་མན་ངག་གིས་ཡང་དག་པར་བསྒྲུབས་ཤིང་དེར་ཡོད་ཀུན་ལ་དབུལ་པོའི་ཁྱིམ་ནས་གཏེར་རྡོལ་བ་བཞིན་དུ་བྱུང་བའི་ཟབ་ཆོས་འདི་ཉིད་སྒོ་གསུམ་འབད་པ་དྲག་པོས་བརྩོན་པར་གྱིས་ཤིག་ཅེས་བསྐུལ་མ་ཡང་ཡང་བྱས་སོ།།
འོན་ཀྱང་སྐུ་ཚེ་འདི་ཉིད་ཀྱི་དགོས་པ་གཙོ་བོ་ནི་འཇམ་དཔལ་གཤིན་རྗེ་མེ་འཁོར་དམར་པོའི་དགོངས་གཏེར་ཕབ་ནས་རྒྱལ་བསྟན་སྤྱིའི་རྒུད་པ་གསོ་རྒྱུ་འདི་ཡིན་ལ། ཨ་པང་གཏེར་ཆེན་གྱིས། དེས་འཇམ་དཔལ་གཤིན་རྗེའི་གཏེར་བཏོན་ན༔ རྒྱལ་བསྟན་ཀྱང་རབ་བྱུང་གཅིིག་ལ་བསྣུར༔ གང་འབྲེལ་ཚད་མཁའ་སྤྱོད་ཞིང་དུ་འདྲེན༔ ཞེས་གསུངས། པ་སེན་གཏེར་སྟོན་གྱིས། ཆུ་སྟག་ལོ་ལ་ལྷ་ལུང་དཔལ་རྡོར་གྱིས༔ ཐུགས་གཏེར་ཟབ་མོ་གཤིན་རྗེ་མེ་འཁོར་སྤེལ༔ འོན་ཀྱང་བདུད་ཀྱི་བར་ཆད་འབྱུང་ལས་ཆེ༔ མཆོག་དམན་སྐྱེ་འགྲོ་ཀུན་ཀྱིས་དམ་སྲུང་གལ༔ ཞེས་གསུངས་པ་ལྟར་གཤིན་རྗེའི་ཆོས་སྐོར་ཕབ་པའི་ཚེ་རང་ལ་འཁུ་ཞིང་གླགས་ལྟའི་རིགས་སྣ་ཚོགས་བྱུང་ཡང་རང་སྲོག་ཉེན་ཁ་དག་ལ་མ་འཛེམས་པར་ཟབ་ཆོས་འདི་ཉིད་ལེགས་འགྲུབ་བྱུང་བས་རྒྱལ་བསྟན་རྒུད་པ་གསོ་བའི་སྨན་ལྟ་བུར་གྱུར།
དེས་ན་༸གོང་ས་སྐྱབས་མགོན་ཆེན་པོས་ཕྱི་ལོ་ ༡༩༩༡ ལོར་གནང་བའི་ཕྱག་ཡིག་ནང་། སླད་ཀྱང་། སྤྱི་སྒོས་སྐྱེ་འགྲོ་མ་ལུས་འཕྲལ་ཡུན་ཕན་བདེར་འཁོད་སླད་རྩ་གསུམ་རྒྱལ་བ་རྒྱ་མཚོར་གསོལ་འདེབས་དང་། དུས་བབ་རིམ་གྲོ་ཁག་སྨིན་བསྒྲུབ་ངོས། ཞེས་དང་། ཡང་ཕྱི་ལོ་ ༡༩༩༣ ལོར་གནང་བའི་ཕྱག་ཡིག་ལས། ཉིད་ཀྱི་གཏེར་ཆོས་འགའ་ཞིག་ཀྱང་འདིར་སོན་གང་ལེགས་བསྟན་འགྲོར་ཕན་ངེས་ཤིང་། འབྱུང་འགྱུར་ཡང་། སྤྱི་དགོས་བསྟན་འགྲོར་སྨན་པའི་རིས་མེད་རྒྱལ་བསྟན་བཤད་སྒྲུབ་ཟུང་འབྲེལ་གྱི་སྒོ་ནས་དར་རྒྱས་གོང་འཕེལ་ཡོང་བའི་འཁུར་བརྩོན་ཆེ་བསྐྱེད་ངོས། དམིགས་བསལ་གྱི་གནས་ཚུལ་མོལ་འོས་རིམ་བསྲིངས་ཡོད་པ་བཅས་ཡིད་འཇགས་འཚལ། ཞེས་གསུངས་སོ།།
སྔོན་ཆད་བོད་ས་མ་ཤོར་གོང་དུ་ལྷ་སར་༸གོང་ས་མཆོག་ལ་མཇལ་ཞིང་བཀའ་ཆོས་ཡང་ཞུས་མྱོང་བ་དང་ཕྱིས་སུ་དམ་པ་ཁོང་བལ་ཡུལ་དང་རྒྱ་གར་ཕྱོགས་སུ་གནས་བསྐོར་ལ་ཕེབས་ཏེ་སླར་ཡང་༸གོང་ས་མཆོག་ལ་མཇལ་བས་ཐུགས་དགྱེས་ཚོར་ཆེན་པོ་བྱུང་། དུས་དེ་ནས་བཟུང་ཨ་རི་གཙོས་པའི་ཕྱིའི་ཡུལ་གྲུ་ཁག་ཏུ་ཕེབས་ཏེ་ནང་བསྟན་སྤྱི་དང་ཁྱད་པར་དུ་ཁོང་གི་དགོངས་གཏེར་དར་སྤེལ་གནང་བས་དུས་ནད་ཀྱི་རིགས་དང་ཁྱད་པར་དུ་སྨྱོ་གདོན་གྱིས་ཟིན་པའི་ནད་པ་སུ་གང་གིས་དྲག་སྐྱེད་མ་ཐོན་པ་བརྒྱ་ཕྲག་ཁ་ཤས་ལ་དངོས་སུ་ཕན་ཐོགས་ཆེན་པོ་བྱུང་བས་ཕྱི་རྒྱལ་ཁག་ཏུ་འགྲོ་དོན་ཆེན་པོ་བྱུང་ངོ་།།
དུས་འགྱུར་གྱི་སྐབས་ཁོང་སྔ་ཕྱིར་ཁྲིམས་ཁང་དུ་ཐེངས་གསུམ་ལ་སོང་ཞིང་དེའི་དུས་སུ་གླགས་ལྟ་བ་དང་དགྲ་རུ་སྡང་མཁན་རྣམས་ལ་ཆོ་འཕྲུལ་མ་ངེས་པ་སྣ་ཚོགས་དངོས་སུ་བྱུང་བས་ཁོང་ལ་མཐུ་དང་ནུས་པ་འདུག་ཟེར་ནས་གང་སར་གླེང་བ་ཞིག་ཏུ་གྱུར། ཕྱིས་སུ་མཐའ་མའི་བཙོན་གྲོལ་ཐོབ་པའི་ཉིན་ཞིག་ལ་དེ་རིང་ནས་བཟུང་བདག་གིས་ཆོས་སྐྱོང་རྣམས་ལ་བཀའ་དྲིན་ཞུས་ཤིང་ཁྱེད་ཅག་གིས་ད་ནས་བཟུང་ང་ལ་དམན་སྡང་བྱེད་པའི་རིགས་ལ་མཐུ་དང་ནུས་པ་གཏོང་མི་དགོས་ཞེེས་ས་འདི་ནས་ཆོས་སྐྱོང་གཤེགས་གསོལ་བྱས་ཟིན་པ་ཡིན་ཞེས་འདུས་ཚོགས་ཡོངས་ལ་གསུངས། དེ་ལྟར་གཏེར་ཆེན་ཁོང་ཉིད་མ་བཅོས་རྟོགས་ལྡན་གྱི་རྣལ་འབྱོར་པ་ཁྱད་པར་ཅན་ཞིག་ཡིན་པས་བླ་ཆེན་མི་ཆེན་སུ་ཞིག་ཡིན་རུང་ཀུན་ལ་མཐོ་དམན་མེད་པར་ངག་བྱུང་རྒྱལ་དུ་སྨྲ་ཞིང་འཇིགས་སྣང་དང་རེ་དོགས་ཐམས་ཅད་ཡོངས་སུ་བྲལ་བ་ཞིག་ཡིན་ནོ།།
ཁོང་བཙོན་ཁང་དུ་བཞུགས་སྐབས་ཀྱང་བཙོན་རོགས་རྣམས་ལ་རྒྱུན་དུ་གེ་སར་རྣམ་ཐར་འཁྲབ་རྒྱུ་དང་དགོན་པ་གདབ་རྒྱུའི་སྐོར་གླེང་བས་ཚང་མས་དུས་ངན་འདིར་སྲོག་མགོ་ཐོན་ན་རབ་ལས་དགོན་པ་སོགས་གདབ་རྒྱུ་ཕར་ཞོག་སྙམ་པ་ལྟ་བུ་མང་དུ་བྱུང་ཞིང་རྗེས་སུ་ཕྱི་ལོ་ ༡༩༧༧ ལོར་ཁོང་བཙོན་གྲོལ་ཐོབ་ཅིང་དེ་ནས་རིམ་པས་དགོན་པ་སོགས་བཞེངས་རྒྱུའི་ཐུགས་འགན་བཞེས་པ་ནི་ཐོབ་དང་གོ་ས་ཙམ་གྱི་ཆེད་དུ་མ་ཡིན་པར་དངོས་གནས་རྟེན་འབྲེལ་དུས་སུ་བབ་པ་ཡིན་ཏེ། རྫོགས་ཆེན་རིན་པོ་ཆེ་མི་འགྱུར་ནམ་མཁའི་རྡོ་རྗེས། ཕྱག་རྡོར་སྤྲུལ་པ་ནོར་སྐྱོང་ལོ་ལ་ནི། །ཨ་ལྕགས་འབྲི་ཡུལ་གཏུམ་དྲག་ཅེས་བྱའི་བུ། །སྔགས་སྐྱེས་གཏེར་རིགས་ཀུ་མུད་དར་བའི་མདངས། །འཁུ་ཞིང་གླགས་ལྟའི་འཚུབ་མ་རླུང་ལྟར་ལྡང་། །རྨ་ཀླུང་གསང་ཆེན་སྔགས་ཀྱི་སྒྲུབ་སྡེ་འཛུགས། །དམར་སེར་གཉིས་ཀྱི་སློབ་རྒྱུན་དཔའ་བོའི་རིགས། །རྒྱལ་བའི་བསྟན་པ་རབ་བྱུང་གཅིག་པར་བསྣུར། །གང་འབྲེལ་ཐམས་ཅད་བདེ་བ་ཅན་དུ་འདྲེན། །ཞེས་གསུངས་པ་བཞིན་འདི་ནི་གནས་རང་ག་བ་ཞིག་ག་ལ་ཡིན་ཏེ་དམ་པ་མང་པོས་དངོས་སུ་བསྔགས་ཤིང་ལུང་གིས་ཟིན་པ་དང་རྟེན་འབྲེལ་དུས་སུ་འགྲིག་པའི་ཕྱིར་རོ།།
ད་དུང་ཁོང་གི་ཕྲིན་ལས་ཀྱི་ནང་དུ་ངོ་མཚར་བ་ཞིག་ཡོད་པ་ནི་སྔོན་ཆད་ནས་ཐུགས་ལ་དགོངས་པ་བཞེས་པའི་གངས་ལྗོངས་བྱ་རུང་ཁ་ཤོར་འདི་ཉིད་བཞེངས་རྒྱུ་དེ་རེད། དེ་ཡང་སྡེ་ནང་གློ་གཏེར་པདྨ་མཁྱེན་བརྩེ་འོད་ཟེར་གྱིས། བྱང་ཨ་ལྕགས་འབྲི་ཡི་ཡུལ་དེ་རུ༔ ཕྱག་རྡོར་གྱི་སྤྲུལ་པ་རྣམ་གསུམ་བྱོན༔ ཁྱད་པར་དུ་སྔགས་སྐྱེས་དཔའ་བོའི་རིགས༔ ཤིང་ཁྱི་ཡི་དགུང་སྙིང་གཏེར་ལ་དབང་༔ དགུ་བདུན་གྱི་དགུང་གྲངས་བཞེས་པའི་ཚེ༔ དེའི་ཡུལ་དུ་མཆོད་སྡོང་ཆེན་པོ་བཞེངས༔ རེ་ལྔ་ལོར་རབ་གནས་མེ་ཏོག་འཐོར༔ སྡེ་གཉིས་ཀྱི་འདུ་བ་ཆུ་གཏེར་རྒྱས༔ འདིའི་ལོ་ལ་མེ་བཞིའི་རྒྱལ་ཁབ་འཁྲུགས༔ ཞེས་གསུངས་པ་འདིས་སྐྱེས་བུ་དམ་པ་འདི་ངོས་བཟུང་སྟེ་རྟེན་མཆོག་འདི་དགུང་ལོ་ག་དུས་བཞེངས་རྒྱུ་ཡིན་པ་དང་རབ་གནས་ག་དུས་བྱེད་པ་འཁོར་སློབ་ཅི་ལྟར་རྒྱས་པ་སོགས་མ་ནོར་མ་འཆུག་པར་དངོས་སུ་མིག་གིས་བལྟས་པ་བཞིན་བྲིས་པ་ནི་ངོ་མཚར་བའོ།།
མི་ལོ་སུམ་བརྒྱ་ཡར་མར་ཙམ་ནས་ལུང་གིས་ཟིན་པའི་གཏེར་ཆེན་འདི་པ་ཚང་གིས་དགོན་པ་དང་རྟེན་བཞེངས་སོགས་མཛད་ཕྲིན་གང་ཞིག་གནང་ཀྱང་དགོས་པ་དང་རྒྱུ་མཚན་རྟེན་འབྲེལ་ཁྱད་པར་བ་ཞིག་ཡོད་པ་གདོན་མི་ཟ་སྟེ། རྡོ་གྲུབ་རྒན་རིན་པོ་ཆེ་འཇིགས་མེད་ཕྲིན་ལས་འོད་ཟེར་གྱི་མ་འོངས་ལུང་བསྟན་ལས། ཡུལ་འདི་ཡི་བྱང་ཕྱོགས་གནོད་སྦྱིན་གྱིས༔ སྐྱོང་བའི་གནས་མགོ་ལོག་གི་ཡུལ་དེ་རུ༔ མགོན་པད་འབྱུང་དང་དབྱེར་མེད་གདོང་པ་ལྔའི༔ མཚན་ཅན་ཞིག་མུ་ཏྲའི་འདོད་ཡོན་སྤྱོད༔ གང་དེ་ཡིས་བསྟན་འགྲོར་ཕན་བདེ་སྤེལ༔ འཁོར་དམར་སེར་གྱི་སྡེ་གཉིས་འབྱུང་འགྱུར་ཞིང་༔ གནས་སྐྱེད་ཚལ་དུ་པདྨའི་བྱིན་རླབས་འཕོས༔ ཁོང་དམ་པ་དེ་ཡི་སྒྲུབ་གནས་ལ༔ རྩ་གསུམ་གྱི་བྱིན་རླབས་སྤྲིན་ལྟར་འདུ༔ དེར་ཕྱག་མཆོད་དང་བསྐོར་བར་འབད་རྣམས་འཚེང་༔ ཞེས་གསུངས་པ་བཞིན་ཁོང་གི་གདན་ས་འདིར་རྩ་གསུམ་སྲུང་མའི་བྱིན་རླབས་སྤྲིན་ལྟར་གཏིབས་པ་དང་དེར་ཕྱག་མཆོད་དང་སྐོར་བ་བྱེད་མཁན་རྣམས་ཀྱང་དོན་ལྡན་བྱང་ཆུབ་ཀྱི་རྒྱུར་འགྲོ་བར་གསུངས་པ་འདིའོ།།
དེ་ལྟར་གཏེར་ཆེན་ཁོང་གིས་ལུང་དང་མཐུན་པར་དགོན་པ་འདི་འཛུགས་སྐྲུན་གནང་ཞིང་ཡོངས་གྲགས་ལ་མགོ་ལོག་ལུང་སྔོན་དགོན་པ་ཞེས་དང་ཁ་ཤས་ཀྱིས་པདྨ་གཏུམ་པོའི་སྒར་ཞེས་ཀྱང་འབོད་ཀྱིན་ཡོད། འདིའི་བྱེ་བྲག་ལ་གྲྭ་ཚང་དང་། སྒྲུབ་གྲྭ། བཤད་གྲྭ། སློབ་གྲྭ། བཙུན་དགོན། སྔགས་དགོན་སོགས་རིགས་མང་པོ་ཡོད། ལོ་རེ་བཞིན་དམ་པ་ཁོང་གིས་དགུན་ཆོས་ཟླ་བ་གསུམ་གྱི་རིང་མང་ཚོགས་ཁྲི་ཕྲག་ཁ་ཤས་ལ་བར་དོའི་དྲུག་ཁྲིད་ཆེན་མོའི་ཟབ་ཁྲིད་དང་། དགེ་འདུན་པ་དང་བཙུན་མ། སྔགས་སྡེ་བཅས་ལ་རྫོགས་ཆེན་ཁྲིད་ཡིག་ཡེ་ཤེས་བླ་མ། སྙིང་ཐིག་རྩ་རླུང་དང་བསྐྱེད་རྫོགས་ཀྱི་སྐོར། གཅོད་ཁྲིད་དང་སྔོན་འགྲོའི་ཁྲིད་ཡིག་སོགས་མདོར་ན་ཁོང་གི་ཟབ་ཆོས་གཙོས་པའི་དབང་ལུང་ཁྲིད་གསུམ་བཅས་དམ་པའི་ཆོས་ཀྱི་འཁོར་ལོ་རྒྱལ་ཕྱི་ནང་ཀུན་ལ་རིམ་པར་སྤེལ་ཞིང་འགྲོ་དོན་དང་རྟེན་འབྲེལ་དུས་སུ་སྨིན་ནོ།།
ཞོར་དུ་ཁོང་གི་གྲུབ་པའི་བརྟུལ་ཞུགས་ཁ་ཤས་ཤིག་འདིར་བཀོད་ན་ཕྱི་ལོ་ ༡༩༨༤ ལོར་དཔལ་ཡུལ་དར་ཐང་དགོན་པར་རྣམ་ཐར་འཁྲབ་སྟོན་བྱེད་སྐབས་ཐོག་མའི་ས་འདུལ་དུ་སྔགས་ཆས་ཞྭ་བེར་གསོལ་ནས་སྟངས་སྟབས་ཀྱིས་བྱོན་ཚེ་ཞབས་གཉིས་ས་ལ་མ་རེག་པར་གར་སྟབས་བསྒྱུར་པ་ནི་སྐྱ་སེར་མང་པོའི་མཐུན་སྣང་དུ་གྱུར་པས་སྐབས་དེའི་དཔལ་ཡུལ་ཚེས་བཅུ་ཆེན་མོའི་ཁྲོམ་ཚོགས་སུ་གང་སར་གྲགས།
ཡང་ཕྱི་ལོ་ ༡༩༨༨ ལོར་རྒྱལ་བའི་གསུང་རབ་བླུ་ཉོ་བྱེད་པར་ཁོང་སྐུ་འཁོར་དང་བཅས་སྡེ་དགེ་རུ་ཐོན་སྐབས་ཡུལ་དེར་བླ་གྲྭ་མང་པོས་ཆར་འབེབས་ཅི་མང་བྱས་ཀྱང་ཟླ་ངོ་གཉིས་ལ་ཆར་མ་བབས་པར་ལྷག་ཡོད་ཅིང་ཡུལ་དེའི་གཙོ་མི་དག་གིས་མགོ་ལོག་བླ་མ་ལ་མཐུ་དང་ནུས་པ་ཡོད་ན་ཆར་ཕོབ་ཤོག་དང་རྒྱལ་བའི་བཀའ་འགྱུར་ཆ་ཚང་ཞིག་གཏང་རག་ཏུ་འབུལ་རྒྱུ་ཡིན་ཟེར་ཞིང་ད་དུང་ཀུན་ཀྱི་སྔོན་དུ་ལས་དོན་མྱུར་དུ་བསྒྲུབ་ངེས་ཡིན་ཞེས་ཡང་ཡང་ཞུས་མཐར་ཞལ་གྱིས་བཞེས་ཏེ། གླང་ཟླའི་ཚེས་བཅུར་ཀླུ་ཕུག་ཏུ་བྱོན་ནས་རྩི་མར་གྱི་རུས་སྦལ་ཞིག་ཆུ་མིག་ཏུ་བསྐྱལ་ཏེ་བཀྲ་ཤིས་ཚེ་རིང་མར་ཕྲིན་བཅོལ་གནང་ཞིང་ཡུལ་དེའི་གཉན་མདུང་ཟེར་བའི་ཡུལ་ལྷ་མནོལ་བཙོག་ཤོར་བ་གཟིགས་ནས་རི་ཁྲུས་དང་ཆང་བུ་བརྒྱ་རྩ་བསྔོས་མ་ཐག་ཆུ་ཕྲན་དེ་ཉིད་གློ་བུར་དུ་རྡོལ་བས་པུ་རུ་ཕུར་སྐྱབས་ཟེར་བ་ཆུ་ནང་དུ་འགྱེལ་ཞིང་གཞན་རྣམས་འབྲོས་དགོས་པ་བྱུང་། དེའི་མཚན་མོ་ནས་བཟུང་ཉིན་ཞག་བཅུ་བཞིའི་རིང་ཆར་པ་རྒྱུན་ཆད་མེད་པར་བབས་པས་སྡེ་དགེའི་པར་ཁང་གིས་གླེགས་བམ་གང་མཁོ་རྣམས་ཕུལ་ཅིང་ཞབས་ཏོག་རྒྱ་ཆེར་བསྒྲུབས་ནས་གྲགས་པའི་སྙན་པ་ཕྱོགས་སུ་ཁྱབ་བོ།།
ཡང་ཕྱི་ལོ་ ༡༩༩༢ ལོར་ཁོང་སྐུ་འཁོར་ཁ་ཤས་དང་བཅས་རང་ཡུལ་སྒང་སྐོར་སྡེ་བར་ཕེབས་སྐབས་གློ་བུར་དུ་ཆར་སྤྲིན་འཁྲུགས་ཏེ་སེར་བ་དྲག་ཏུ་བབ་པས་ཁོང་རྣམས་དུད་ཁྱིམ་ཞིག་ཏུ་བྱོན་ནས་དལ་ཅིག་བཞུགས་པ་ན་གཡས་གཡོན་གང་སར་གནམ་ལྕགས་ཀྱི་ཐོག་མདའ་འཕངས་ཤིང་དེའི་ཚེ་ཁོང་གིས་ཕྱག་རྡོར་གྱི་དམིགས་རིམ་ངང་ནས་སྤྱན་གྱི་ལྟ་སྟངས་ནམ་མཁར་བགྲད་དེ་བཞུགས། དྲག་ཆར་ཡར་དྭངས་རྗེས་འབྲུག་བཞི་ས་ལ་ལྷུང་ཡོད་ཅིང་ཉ་དགེའི་རྫ་ལུང་མདོ་དང་ཤིང་ནག་ལུང་པའི་སྐེད་པར་ལྷུང་བའི་འབྲུག་གཉིས་ཉིན་གུང་ནས་ཕྱི་དྲོའི་ཆུ་ཚོད་ལྔ་པའི་བར་རིགས་སྔགས་ཀྱིས་བཅིངས་པས་ཀྲོང་ངེར་གནས་པ་ནི་ཁོ་ཡུལ་ཉིན་སྲིབ་ཀྱི་འབྲོག་སྡེ་སྐྱེ་བོ་ཕོ་མོ་ཡོངས་ཀྱི་མཐུན་སྣང་དུ་གྱུར་པ་སོགས་དེ་དང་དེ་མཚུངས་མང་པོ་ཞིག་ཡོད་ཀྱང་སྐབས་འདིར་དེ་ཙམ་ལས་མ་བྲིས་སོ།།
ཁོང་གི་དགོངས་གཏེར་དུས་བབ་ཟབ་ཆོས་ཀྱི་སྐོར་ཕྱག་རྡོར་དྲག་ཁྲོས་དང་། རིག་འཛིན་ཨ་ཙརྱཱ་པདྨ། ཨྱོན་ཛམ་བྷ་ལ། རྟ་མགྲིན། གཤིན་རྗེ། སྒྲོལ་མ། རིག་འཛིན་ཚེ་སྒྲུབ། ཚེ་བདག་ཕྱག་རྒྱ་ཟིིལ་གནོན། མགུར་ཚོགས་བཅས་ད་ལྟ་དངོས་སུ་བཞུགས་པ་གསུང་པོད་སུམ་ཅུ་སོ་གཉིས་ཡོད་པ་དག་ནི་བྱིན་རླབས་དང་ནུས་པ་ཆེ་བར་དངོས་སུ་ཉམས་མྱོང་གིས་གྲུབ་ཅིང་རྒྱལ་ཕྱི་ནང་གི་སྐྱེ་འགྲོ་ཐམས་ཅད་དང་ཁྱད་པར་དུ་ནད་པ་མང་པོར་ཕན་བསྐྱེད་གྲངས་ལས་འདས་པ་བྱུང་དང་འབྱུང་བཞིན་ཡོད་དོ།།
གཏེར་ཆེན་ཁོང་གི་ཆོས་བདག་དང་སློབ་མའི་གཙོ་བོར་གྱུར་པ་ནི་ཨ་རྐོང་མཁན་ཆེན་བློ་བཟང་རྡོ་རྗེ་དང་། ཀ༔ཐོག་རྨོག་རྩ་རིན་པོ་ཆེ། མཆོག་སྤྲུལ་ཉི་ཟླ། གསང་ལུང་སྤྲུལ་སྐུ་སྐལ་བཟང་རྡོ་རྗེ། དབང་མདའི་གྱང་སྤྲུལ་དོན་འགྲུབ་རྡོ་རྗེ། རྡི་བར་ཆོས་རྗེ་ལོ་ཡག་སྤྲུལ་སྐུ། རྫོགས་ཆེན་མཆོག་སྤྲུལ་སྐལ་བཟང་། ཁང་སར་སྤྲུལ་སྐུ་བསྟན་པོ། མཆོག་སྤྲུལ་གར་དབང་ཉི་མ། རྒྱལ་སྲས་པདྨ་ཚེ་དབང་། སྐུ་འབུམ་ཨ་ལགས་གོས་ཀྱ། མཁན་ཆེན་ཟླ་ཟེར། རྡོ་གྲུབ་མཁན་པོ་ངག་ཤེར། སྤྲུལ་སྐུ་སྒོ་སྡེས། རིགས་སྲས་ཧཱུཾ་ཀར་རྡོ་རྗེ་སོགས་མང་པོ་ཞིག་ཡོད་པ་ལས་ཕལ་ཆེར་ཞིག་ཟབ་གཏེར་ཁག་གི་ཆོས་བདག་ཀྱང་ཡིན་ལ་ད་དུང་དགེ་འདུན་པ་དང་མང་ཚོགས་གང་མང་ཞིག་ཀྱང་སློབ་མར་གྱུར་ཡོད་དོ།།
མཐར་ཁོང་གི་རྒྱལ་ཚབ་ཏུ་མཁས་བཙུན་བཟང་པོའི་ཡོན་ཏན་གྱིས་ཕྱུག་པའི་རིགས་སྲས་ཧཱུཾ་ཀར་རྡོ་རྗེ་མངའ་གསོལ་གནང་ཞིང་ཕྱི་ལོ་ ༢༠༠༩ ལོའི་ལོ་འགོ་ཟིན་ཙམ་ན་གདུལ་བྱའི་སྐལ་བས་མ་ཐེག་པར་དགོངས་པ་གཞི་དབྱིངས་རྫོགས་པ་ཆེན་པོའི་ཀློང་དུ་ཐིམ་ཚུལ་བསྟན་ཏོ། །དེང་སྐབས་རིགས་སྲས་དམ་པས་དགོན་པ་འདིའི་ཕྱི་ནང་གསང་གསུམ་གྱི་འགན་ཡོངས་རྫོགས་བཞེས་ཤིང་སྔར་ལས་ལྷག་པ་དར་སྤེལ་རྒྱ་ཆེར་གནང་བཞིན་པའི་སྒང་ངོ་།།
མཇུག་འཕྲོས་དོན་དང་བཅས་དོན་བསྡུ་བ་ནི།
གནས་ཕུན་སུམ་ཚོགས་པ་དེ་ཉིད་ཀྱི་དབུས་སུ་བརྗིད་ཉམས་ལྡན་པའི་ཚོགས་ཆེན་འདུ་ཁང་ནི་དཔལ་བསམ་ཡས་གཙུག་ལག་ཁང་ལ་དཔེར་བླངས་ཏེ་བཟོ་བཀོད་དེང་རབས་ཀྱི་ལག་རྩལ་དང་ལྡན་པའི་སྒོ་ནས་བཞེངས་ཤིང་ནང་རྟེན་བྱིན་ཆེན་སོགས་དང་གྲྭ་པ་སྟོང་ལྷག་ཅིག་ཤོང་ངོ་། །ལོ་རེར་དབྱར་གནས་དང་ཕུར་པའི་སྒྲུབ་ཆེན། ཚེས་བཅུ་ཆེན་མོ་སོགས་འདིའི་ནང་དུ་འཚོག་བཞིན་ཡོད། འདུ་ཁང་གི་གཡས་གཡོན་གང་སར་གྲྭ་ཤག་སྤུས་ཚད་ལྡན་པ་མང་པོས་བསྐོར་བ་དང་། མདུན་ཐང་དེར་ལོ་རེ་བཞིན་ཞི་འཆམ་དང་ཁྲོ་འཆམ་གར་འཆམ་སོགས་དང་དེ་མིན་བྱང་ཤམ་བྷ་ལའི་དམག་འཆམ་དང་རྣམ་ཐར་ཟློས་གར་གྱི་རིགས་ཀྱང་སྐྱ་སེར་མང་ཚོགས་འདུས་པ་ཡོངས་ཀྱི་མིག་ལམ་དུ་འཁྲབ་ཀྱིན་ཡོད་པའོ། །འདུ་ཁང་གི་རྒྱབ་ཕྱོགས་སུ་རྨད་བྱུང་ཐོས་བསམ་སློབ་གླིང་ཞེས་བཤད་གྲྭའི་ལྷ་ཁང་དང་སློབ་གཉེར་བའི་གྲྭ་ཤག་སོགས་ཡོད། སློབ་གླིང་འདིར་ཀུན་མཁྱེན་རྣམ་བཞིའི་གསུང་གཙོ་བོར་བྱས་པའི་སྔ་འགྱུར་རྙིང་མའི་རང་གཞུང་ལ་ཐོས་བསམ་སློབ་གཉེར་དང་བཅས་མཚམས་རེར་གྲུབ་མཐའ་རིས་མེད་ཀྱི་གཞུང་ཡང་འཆད་ཉན་བྱེད་ཀྱིན་ཡོད་དོ།།
བཤད་གྲྭའི་གཡོན་ཟུར་དུ་སྒྲུབ་གྲྭ་པདྨ་འོད་གླིང་ཡོད་ཅིང་དེར་ལོ་གཅིག་དང་གསུམ་དང་དགུ་སོགས་རང་ནུས་དང་བསྟུན་ཏེ་རྩ་གསུམ་ལྷའི་བསྙེན་གྲངས་ཚད་ལྡན་བཅས་ནང་མཚམས་དམ་པོའི་ངང་རྩ་གསུམ་ལྷའི་རྣལ་འབྱོར་ལ་གཞོལ་བཞིན་པའོ། །ཚོགས་ཆེན་འདུ་ཁང་གི་གཡོན་ཕྱོགས་ཕར་ཅུང་ཙམ་གྱི་སར་སྔོན་མར་བྱང་ཤམ་བྷ་ལའི་ཕོ་བྲང་དང་རྗེས་སུ་དེའི་ཤུལ་དུ་འཛམ་གླིང་གེ་སར་རྒྱལ་པོའི་ཕོ་བྲང་སེང་འབྲུག་སྟག་རྩེ་གསར་བཞེངས་དང་དེའི་རྒྱབ་ཏུ་ཇོ་བོའི་ལྷ་ཁང་དང་གཡོན་དུ་སྤྲུལ་རིན་པོ་ཆེ་ཧཱུཾ་ཀར་རྡོ་རྗེའི་གཟིམས་ཤག་དང་གྲྭ་ཤག་སྤུས་ལེགས་བཅས་ཀྱིས་བསྐོར་ཅིང་བརྒྱན་པའོ།།
འདིའི་ནུབ་བྱང་གི་མཚམས་སུ་བདུད་འདུལ་སྔགས་པ་གླིང་ཡོད་ཅིང་དབུས་སུ་ལྷ་ཁང་དང་བྱང་དུ་གཏེར་ཆེན་བླ་མའི་གཟིམས་ཤག་བཅས་སྔགས་བཙུན་ཆུང་བ་བརྒྱ་ལྷག་ཅིག་གིས་གཏེར་ཆེན་བླ་མའི་དགོངས་གཏེར་རིག་འཛིན་ཨ་ཙརྱཱ་པདྨའི་བླ་སྒྲུབ་གཙོས་སྒྲུབ་ཁག་སོགས་ལ་ཉམས་བཞེས་རྒྱ་ཆེར་གནང་བཞིན་ཡོད་དོ། །འདིའི་མདུན་ཕྱོགས་སུ་སྤུས་ཚད་ལེགས་པའི་ཟངས་མདོག་དཔལ་རིའི་ཕོ་བྲང་གསར་བཞེངས་བྱས་ཡོད་ལ་ཕོ་བྲང་འདིའི་མདུན་ཐད་དུ་ཕྱི་ལོ་ ༡༩༩༧ ལོར་བལ་ཡུལ་མཆོད་རྟེན་བྱ་རུང་ཁ་ཤོར་གྱི་བཟོ་དབྱིབས་རྒྱ་ཁྱོན་སོགས་ལ་དཔེར་བྱས་ཏེ་གསར་བཞེངས་བྱས་པའི་གངས་ལྗོངས་མཆོད་རྟེན་བྱ་རུང་ཁ་ཤོར་ཞེས་པའི་རྟེན་མཆོག་འདི་ལོ་ངོ་བཞིའི་རིང་ལེགས་འགྲུབ་ཡག་པོ་བྱུང་བ་དང་། འདིའི་ནང་རྟེན་ལ་རྒྱལ་བའི་བཀའ་འགྱུར་དང་བསྟན་འགྱུར་ཚར་སྟོང་ཕྲག་དང་བཅས་སྐུ་གསུང་ཐུགས་རྟེན་རྩ་ཆེན་གང་མང་ཞིག་གཟུངས་འཇུག་ཏུ་ཕུལ་ཏེ་རབ་གནས་ཚད་ལྡན་དང་བཅས་རྒྱལ་ཕྱི་ནང་གི་སྦྱིན་བདག་རྣམས་འདུས་ནས་ཆོས་སྟོན་དང་དགའ་སྟོན་སོགས་མཛད་ཡོད་།
དགོན་པའི་ནུབ་བྱང་གི་ཆུ་ཕྲན་ཆུང་བ་དེའི་ཕ་རོལ་ཏུ་བཙུན་དགོན་བཀྲ་ཤིས་གཡས་འཁྱིལ་གླིང་གསར་བཞེངས་བྱས་པས་མགོ་ལོག་གི་བཙུན་དགོན་ཐོག་མ་ཡང་དེ་ཡིན་ལ་དེང་སང་ཕལ་ཆེར་བཙུན་མ་སུམ་བརྒྱ་མ་ཟིན་ཙམ་ཞིག་ཡོད། བཙུན་དགོན་འདིའི་ཤར་ཕྱོགས་དང་དགོན་པའི་བྱང་ཤར་འདབས་སུ་དགེེ་སློབ་ཆིག་སྟོང་ཙམ་ཤོང་བའི་ཧཱུཾ་ཀར་རྡོ་རྗེ་མི་རིགས་ལག་རྩལ་མཐོ་འབྲིང་སློབ་གྲྭ་བཙུགས་ཏེ་བྱིས་པ་ན་གཞོན་ཕོ་མོ་མང་པོར་བོད་རང་གི་སྐད་དང་ཡི་གེ་གཙོས་པའི་དེང་རབས་ཀྱི་ཤེས་ཡོན་སློབ་གསོའི་ལས་འགུལ་ཁ་ཡོད་ལག་ཡོད་དུ་སྤེལ་བཞིན་མཆིས་སོ།།
