ལོ་རིམ་ལྔ་པའི་སློབ་གཉེར་བ། དཀོན་མཆོག་བསམ་གཏན།
འཚོ་བ་སྐྱ་བོའི་ལྷས་མཐའ་ཞིག་ནས།།
ནམ་འགྲོ་མེད་པའི་ཕུང་ལྔའི་མགྲོན་ལ།།
སྐྱིད་མ་སྡུག་གི་ཚོར་བ་གཤོམ་མཁན།།
ང་དང་འདྲ་བ་ག་ཚོད་ཡོད་དམ།།
སྡོང་ལོ་ལྗང་གུ་དྲུལ་བའི་འོག་ན།།
ཉི་མའི་འོད་ཐིག་ཕོག་ལ་རེ་ནས།།
རྡུལ་འཚུབ་དཀྱིལ་ལ་མི་ཚེ་འཆོལ་མཁན།།
ང་དང་འདྲ་བ་ག་ཚོད་ཡོད་དམ།།
ཆུ་བོ་ཆེན་མོའི་བཞུར་རྒྱུན་ཟུར་ན།།
བྲག་རྡོ་སྐྱ་བོའི་རྒྱབ་ལ་བསྙེས་ཏེ།།
བསིལ་རླུང་འཇམ་པོ་རྔུབ་འཐུང་རྒྱག་མཁན།།
ང་དང་འདྲ་བ་ག་ཚོད་ཡོད་དམ།།
ཤེས་རིག་དབྱར་གྱི་མཚོ་མོ་རྒྱས་ས།།
གནས་ཆེན་ལྔ་ཡི་ལང་ཚོ་སྨིན་དུས།།
རྗེས་ལུས་ཁུག་མ་རྒྱབ་ལ་འཁུར་མཁན།།
ང་དང་འདྲ་བ་ག་ཚོད་ཡོད་དམ།།
བཙན་པོས་བཞེངས་པའི་ཕ་མཁར་འཁྲིས་ལ།།
ཕ་གསོད་བུ་ལ་འཇོན་རབས་གླེངས་ཏེ།།
བསྔགས་པའི་མེ་ཏོག་ཆེས་ཆེར་འཐོར་མཁན།།
ང་དང་འདྲ་བ་ག་ཚོད་ཡོད་དམ།།
འོད་མདངས་ལྡན་པའི་ལམ་བུ་དེ་ནི།།
མུན་ཁུང་དབུས་སུ་ནག་སུབ་བཏང་སྟེ།།
གཞན་གྱི་རྗེས་སུ་རྐང་པ་རྐྱོང་མཁན།།
ང་དང་འདྲ་བ་ག་ཚོད་ཡོད་དམ།།
གངས་རི་ཨ་མའི་རྣམ་ཤེས་འཐོར་ས།།
ཁེར་རྐྱང་ཞིག་གི་རེ་དོགས་འོག་ན།།
རི་བོ་གྲོང་ལ་གཡོན་འཁོར་རྒྱག་མཁན།།
ང་དང་འདྲ་བ་ག་ཚོད་ཡོད་དམ།།
