སློབ་དཔོན་ཚུལ་ཁྲིམས་ཟླ་བ།
ནམ་ཕྱེད་རྒྱལ་བའི་དཀྱིལ་འཁོར་ལྷིང་ཞིང་འཇགས་པའི་དུས་ལ།།
དུང་འཁོར་མགོ་ཡི་ཅོང་བརྡ་མུན་པའི་གསེང་ནས་གྲག་བྱུང་།།
མ་བསྐུལ་དབྱངས་རྟ་གྱེར་མཁན་རྣ་བའི་འགྲམ་གྱི་སྦྲང་བུ།།
འཁོར་བརྡས་བསླངས་པ་ཡིན་ནམ་དེ་ཡང་དབྱིངས་ལ་འཕུར་འདུག །
རྨོ་མོའི་མ་ཎིའི་མགུར་དབྱངས་ཕར་ལ་ཉན་གྱིན་ཉན་གྱིན།།
སྦྲ་ནང་ཨ་མའི་གསུང་སྐད་དྲན་པའི་གསེང་དུ་འཚངས་ཐལ།།
གཉིད་ཀྱི་མུན་པ་སངས་སོང་རྣམ་རྟོག་གཏིང་ནས་འཁྲུགས་བྱུང་།།
ལུས་པོ་མལ་དུ་གནས་ཀྱང་སེམས་པ་རྒྱང་ལ་ཆས་སོང་།།
གངས་རིའི་དབུ་རྩེར་འཛེགས་ཡིན་བྲག་དཀར་གཟར་ལས་མཆོངས་ཡིན།།
རྩྭ་ཐང་ཤུགས་ཀྱིས་བཤགས་ཡིན་མཐའ་ཡི་སྒོ་ཆེན་གཏོར་ཡིན།།
ང་དང་ཤ་གཅིག་རུས་གཅིག་དཔུང་པ་མཉམ་དུ་སྦྲེལ་ཏེ།།
རྗེས་མེད་རྐང་འགྲོས་མྱུར་མོས་ཐུགས་སྤྲོའི་གྲ་སྒྲིག་བྱས་ཡིན།།
ཡར་ཡར་ཡར་ལ་སོང་བས་འབྲོག་ཁྱུ་ཞིག་དང་ཕྲད་བྱུང་།།
འབྲོག་རྒན་སྣུམ་རྩི་ཅན་དེ་ང་དང་ངོ་ཤེས་རེད་འདུག །
ང་རང་ཧ་ཅང་དགའ་བའི་འབྲི་མོའི་འོ་མ་རག་བྱུང་།།
སྨྱུག་མའི་དཀྲིས་མ་བྱས་པའི་འོ་ཟོ་མཐོང་བས་དགའ་སོང་།།
རྩྭ་ཐང་ཁ་ཞེང་ཆེན་པོ་ལུས་ཀྱི་མལ་གདན་བྱས་ཡིན།།
མེ་ཏོག་དྲི་མ་འཚུབ་འཚུབ་སྦྲང་མ་འཕུར་ལྡིང་ཡོམ་ཡོམ།།
ནོར་ལུག་རི་ལུང་གང་འདུག་མཁའ་དབུགས་སྔར་ལས་གཙང་བ།།
ང་དང་རྩེད་རའི་གྲོགས་ཀྱང་སྤང་ཁ་དེ་རུ་འཛོམས་འདུག །
ཡར་བལྟས་རི་བོའི་མགུལ་ཆིངས་སྨུག་དཀར་གཡས་སུ་འཁྱུད་འདུག །
ལུང་མདོའི་སྦྲ་ནག་སྟེང་ནས་དུད་སྤྲིན་གནམ་ལ་ཟུག་སོང་།།
མཐོང་བའི་ལ་ལུང་ཡོད་ཚད་ཅི་འདྲའི་ཆ་རྒྱུས་ཆེ་བ།།
དྲི་མ་རླུང་ཁྱེར་འདི་ཡང་རྩ་རྒྱུས་ཀུན་ལ་ཁྱབ་སོང་།།
འདི་གའི་ས་གནམ་ཡོད་ཚད་ང་ཡི་ཁོག་པའི་ནང་རེད།།
དལ་འབབ་ཆུ་བོ་འདིས་ཀྱང་ང་ལ་སྐད་ཆ་ཤོད་ཀྱི།།
སྒང་གི་སྡོང་རྒན་ཕ་མཐའ་མ་འགྱུར་ད་དུང་འགྲེངས་འདུག །
ལུང་པ་རེ་རེ་བཞིན་དུ་བདག་གིས་འཚམས་འདྲི་ཞུས་ཡོད།།
ནམ་ཟླའི་ཁ་དོག་འགྱུར་བས་ཡུལ་གྱི་མཛེས་པ་ཡལ་སོང་།།
མཛེས་རྒུའི་མེ་ཏོག་སྐྱེད་ཚལ་ཁ་དོག་སྐྱ་བོར་གྱུར་འདུག།
འཕྲེང་ཡུལ་ལྷགས་པས་བཅོམ་ནས་ས་ནག་གས་ཀ་དོད་བྱུང་།།
ཡུལ་སྣང་སེམས་སུ་འཕོས་པས་སེམས་པ་གྲང་མོར་གྱུར་སོང་།།
གནའ་དུས་ང་ཡིས་ལས་པའི་རྩེད་ར་མཐོང་སར་མི་འདུག །
རྩེད་གྲོགས་བྱིས་པ་ཚོ་ཡང་ད་ལྟ་གང་དུ་བུད་ཐལ།།
སྣུམ་སྤགས་ལག་གིས་སྟེར་བའི་སྣབས་ལུད་ཁ་ཡིས་འབྱིད་པའི།།
བྱམས་པའི་དབྱངས་རྟ་གྱེར་མཁན་ཁོ་མོ་གང་དུ་བཞུད་ཐལ།།
དྲན་པ་ལྗོངས་རྒྱུར་སོང་སྟེ་ད་ལྟ་ནང་དུ་ལོག་ཡོད།།
མངར་དང་སྐྱུར་མོའི་གཉིད་ཀྱིས་ང་ཡི་ལུས་སེམས་སྦྲིད་སོང་།།
མགོ་བོ་རུམ་དུ་བཅུག་ནས་གཉིད་ལ་ལག་སྐེ་བསྲིངས་ཀྱང་།།
སྙིང་ཆུ་གཏིང་ནས་འཕྱུར་ཏེ་རྦ་རླབས་ལང་ལོང་གཡོས་བྱུང་།།
2016/5/8
