ལོ་རིམ་བདུན་པའི་སློབ་གཉེར་བ། ཞི་རྒྱས་ནོར་བུ།
དེ་ཡང་སྙན་གྲགས་ཆེ་བའི་གཏམ་བཤད་བྱེད་མཁན་དང་རྩོམ་པ་པོ་མང་ཆེ་བས་ང་ཚོ་ལ་སོ་སོའི་དམིགས་ཡུལ་ལམ་ཕུགས་འདུན་བཟོ་དགོས་ཞེས་ཡང་ཡང་སྐུལ་མ་བྱེད་ཀྱི་ཡོད། ཡིན་ན་ཡང་དོན་གཉེར་ཅན་ཕལ་ཆེ་བས་དཔེར་ན་ཕུགས་བསམ་གྱི་གནད་དོན་ཤོག་དཀར་སྟོང་པའི་སྟེང་དུ་འབྲི་དུས་ཡ་མཚན་ཅན་གྱི་རྟགས་མཚན་འབྱུང་བའི་གནས་ཚུལ་དེ་ཉིད་དངོས་གནས་སྨྲ་བསམ་བརྗོད་འདས་ཀྱི་སྟོབས་ཤུགས་ཅན་གྱི་སྒྲིགས་ལམ་ཞིག་ཡིན་མིན་གྱི་རྒྱུ་མཚན་རྩ་བ་ཉིད་ནས་འགྲེལ་བཤད་རྒྱག་གི་མེད་པ་ཪེད། ང་ཡི་བསམ་ཚུལ་གྱི་སྟེང་ནས་བཤད་ན། ཞི་འཇམ་གྱི་གོམས་གཤིས་རྒྱུད་ལ་མངའ་བའི་ཐོག་རང་གི་ཕུགས་བསམ་གྱི་གནད་དོན་དེ་ཉིད་བཀོད་སྒྲིག་བྱས་ནས་ལས་ཀ་བྱས་པ་ཡིན་ན་ཁྱེད་རང་གི་མི་ཚེ་ཧྲིལ་པོའི་བྱ་བ་མཐའ་དག་དེའི་ལམ་ནས་འགྲོ་དགོས་པ་ནི་དངོས་པོའི་གནས་ཚུལ་ཞིག་རེད། དེ་བས་བློ་རིག་བཀྲ་ཞིང་སེམས་ཁམས་སུ་ཤེས་འདོད་ཉར་འདོད་ཀྱི་བློ་སྟོབས་འཕེལ་བ་དང་། མ་ཟད་ཆོས་ཡོད་དོ་ཅོག་གི་ཁྲོད་ནས་དམིགས་དོན་འགྲུབ་ངེས་ཀྱི་བྱ་བ་ཞིག་འདེམས་སྒྲུག་བྱས་ནས་མི་ཚེ་དོན་ལྡན་བཟོ་ཐུབ་པའི་ཐབས་ལམ་རྣམ་པ་གསུམ་གྱི་སྒོ་ནས་བཤད་རྒྱུ་ཡིན།
དང་པོ་ནི། སྒྲིགས་ལམ་དེའི་བརྒྱུད་རིམ་ནས་ཁྱེད་རང་གི་གང་ལ་བསམ་པའི་དམིགས་ཡུལ་བསྒྲུབས་ན་ནང་གི་ཚོར་ཤེས་ཀྱི་འཇིག་རྟེན་དང་མི་ཚེའི་གདམ་གའི་ཁྲོད་ཀྱི་དཀའ་རྙོག་ཤིན་ཏུ་ཆེ་བའི་འཇིག་རྟེན་དེ་ཉིད་བསྐྱར་གསོ་བྱེད་ཐུབ། ང་ཚོ་གནས་བཅས་པའི་དུས་རབས་འདིར་ཐབས་མཁས་པའི་ཐོག་ནས་དུས་ཚོད་ངེས་ཅན་ཞིག་ལ་ང་ཚོའི་ཚད་ལས་བརྒལ་བའི་བྱ་བ་སྣ་ཚོགས་ཀྱི་བརྒྱུད་རིམ་དུ་འགྲན་སྡུར་བྱེད་མཁན་ཁྲི་ཕྲག་སྟོང་ཕྲག་ཡོང་གི་ཡོད་པ་རེད། འུར་ཟིང་དེའི་ཁྲོད་ནས་རང་གི་མཐར་ཐུག་གི་དམིིགས་ཡུལ་ཞིག་བཞག་ནས་བྱ་བ་དེ་ལ་བློ་ཁ་ཕྱོགས་པ་ཡིན་ན་སོ་སོས་ཉར་བསྡད་ཡོད་པའི་སེམས་ཀྱི་རྨ་ཁ་ཡང་སེལ་ཐུབ་པའི་གནས་ལས་མ་འདས། བྱ་གཞག་དེ་འགོ་བཙུགས་པ་ནས་བཟུང་། སོ་སོས་རིག་པ་རྩེ་སྒྲིམ་གྱིས་ཡོད་ཚད་བྱ་བ་དེའི་ཕྱོགས་སུ་བཏང་བ་ཡིན་ན་མ་འོངས་འབྱུང་འགྱུར་གྱི་འབྲས་བུ་རང་གི་ལག་མཐིལ་དུ་གཡུར་དུ་ཟ་བ་ཞིག་འཐོབ་ཡོང་། ཡང་དོན་དངོས་ཀྱི་སྟེང་ནས་བཤད་ན། ཕུགས་བསམ་དེ་བཀོད་སྒྲིག་གསལ་པོར་བྱས་ན་གདམ་ག་མཆོར་པོ་ཞིག་བྱ་རྒྱུ་ལ་རམ་འདེགས་བྱེད་ནུས་པ་དང་སོ་སོའི་བྱ་བའི་སྣེ་ལམ་ནས་འགྲོ་རྒྱུ་ཡིན་མིན་སོགས་འཕྱུགས་པ་མེད་པར་རྒྱུད་ལ་མངའ་བས་བྱ་བ་དེ་ཉིད་འདེམས་སྒྲུག་བྱས་ནས་ལས་སླ་མོའི་ངང་འཛུལ་འཇུག་བྱེད་ནུས་པ་ནི་བཤད་མ་དགོས་པ་ཞིག་ཡིན། དེ་བས་ཁྱེད་ཀྱིས་སྔ་ས་ནས་སེམས་ལ་ཉར་ཡོད་པའི་ཕུགས་བསམ་མམ་དམིགས་ཡུལ་དེ་ཤོག་དཀར་སྟོང་པའི་ནང་དུ་བྲིས་ནས་དེ་དང་མཐུན་པའི་བྱ་གཞག་ཅིག་ལས་པ་ཡིན་ན་སོ་སོའི་དམིགས་དོན་དེ་གཙང་སེལ་བྱེད་ཐུབ་པ་མ་ཟད་ཁྱེད་རང་གི་དམིགས་པའི་ལམ་དེར་འགྲོ་མི་འགྲོ་སོགས་ཤེས་རྟོགས་བྱེད་ནུས་པའི་ཐབས་ལམ་ཡང་ཡིན་སྙམ། བརྩམས་སྒྲུང་རྩོམ་པ་པོ་སོལ་བྷིལ་ལོས་ (Novelist Saul Bellow) བཤད་པ་ལྟར་འཆར་གཞི་དང་ཕུགས་བསམ་གཙང་མས་ང་ཚོའི་བཟང་འདེམས་ཀྱིས་ཐད་དུ་མནར་བཞིན་པའི་སྐྱོ་སྡུག་ལས་སྐྱོབ་གསོ་བྱེད་པ་དང་། དེ་བཞིན་དུ་རྩོམ་པ་པོ་གི་ལིན་བལེཎྜ་ (Author Glenn Bland) ཀྱིས་ཕུགས་བསམ་དང་འཆར་གཞི་བཀོད་སྒྲིག་བྱས་ན་སེམས་ཁྲལ་གྱི་གཤེད་མ་དེ་ཉིད་ང་ཚོའི་འཚོ་བའི་ཁོར་ཡུག་ནས་ཕྱིར་འབུད་ཐུབ་ཅེས་གཏམ་བཤད་གང་མང་གླེང་འདུག གལ་སྲིད་ཁྱེད་ཀྱིས་ཕུགས་བསམ་དང་འཆར་གཞི་བཀོད་སྒྲིག་བྱས་པ་ཡིན་ན་ཁྱེད་ཀྱི་མི་ཚེའི་བསྒྲུབ་དོན་དེ་ཉིད་ཉིན་རེ་བཞིན་སེམས་ཁམས་ལས་བསྐྲུན་པའི་བྱ་བའི་ཐད་ནས་མ་ཡིན་པར་སྔ་མའི་གཏན་འབེབས་ཀྱི་བྱ་བའི་ཁྲོད་ནས་འགྲོ་ཐུབ་ལགས།
གཉིས་པ་ནི། དམིགས་ཡུལ་ལམ་ཕུགས་བསམ་ཡོད་པའི་ཐོག་ནས་ལས་ཀ་བྱེད་སྲིད་པའི་དབང་དུ་བཏང་བ་ཡིན་ན་གོ་སྐབས་ཀྱི་སྣེ་མོ་ནས་སྤྱང་གྲུང་དང་ལྡན་པ་ཞིག་བཟོ་ཐུབ་པ་དང་། སྒྲིགས་ལམ་དེའི་ངང་ནས་གོ་སྐབས་གསར་པ་ཞིག་འཚོལ་ཞིབ་བྱེད་པ་ལ་སེམས་འགུལ་ཐེབས་ཐུབ་པ་མ་ཟད་ཁྱེད་རང་གི་རེ་འདོད་བཞིན་སོ་སོའི་སྒེར་གྱི་འཚོ་བའི་གནས་སྟངས་དང་འཚོ་ཐབས་ཀྱི་ལས་ཪིགས། དེ་ནས་རིན་ཐང་བྲལ་བའི་ཆོས་པའི་མི་ཚེ་སོགས་ལག་མཐིལ་དུ་མངོན་པའི་དངོས་རྡོག་བཞིན་མཐོང་ཆོས་སུ་གནས་པ་བཤད་མ་དགོས་པ་ཞིག་རེད།
གསུམ་པ་ནི། དེས་ཁྱེད་རང་གི་གལ་གནད་ཅན་གྱི་ཐད་ལ་ཡང་བློ་སྟོབས་འཕེལ་བའི་གོ་ས་འབྱིན་པ་དང་། མ་ཟད་བྱ་ལས་དེ་སོ་སོའི་མི་ཚེའི་བརྒྱུད་ལམ་དུ་འབྱུང་ངེས་པ་བཟོ་རྒྱུ་ལས་གོ་སྐབས་གསར་པ་ཞིག་རང་གི་མིག་ལམ་དུ་མངོན་ཡོང་བསམ་པའི་རེ་སྒུག་བྱེད་པ་ནི་ཕལ་ཆེར་དཀའ་ཁག་གི་གནས་སུ་མཆིས། དམིགས་ཡུལ་ལམ་ཕུགས་བསམ་བཀོད་སྒྲིག་ལ་ཁ་གཏད་དང་བརྒྱུད་སྐུལ་བྱེད་པ་ནི་སོ་སོའི་མི་ཚེ་ཡི་ཁས་འཆེ་བའི་བྱ་གཞག་གི་སྤུས་ཚད་གོང་འཕེལ་བྱ་རྒྱུའི་ཐབས་ལམ་ཡག་ཤོས་ཤིག་ཡིན་པ་དང་བརྒྱུད་རིམ་དེའི་ལམ་ནས་རང་རང་སོ་སོའི་ཉིན་རེའི་བྱ་བ་ལ་ལུས་སེམས་ཀྱི་སྟོབས་ཤུགས་འཕེལ་སྐྱེད་གཏོང་ཐུབ་ལགས། གཤིས་རྒྱུད་བཟང་པོ་མངའ་བའི་གྲོགས་མཆོག་རྣམས། ཕུགས་བསམ་ཡོད་པའི་ལས་འགུལ་ཞིག་བཀོད་སྒྲིག་བྱོས་དང་།
ཁྱེད་ཀྱིས་ཆོས་དང་འཇིག་རྟེན་གང་ཅིའི་ཐད་ནས་བསམ་བློ་བཏང་ནའང་ཐབས་ལམ་མང་དུ་བསྟན་ནས་ལས་སླ་མོའི་ཐོག་ནས་བློ་ཁ་ཕྱོགས་ཐུབ་ལ་མངོན་གྱུར་གྱི་གྲུབ་འབྲས་ཀྱང་མི་ཚེ་དེ་ཉིད་ལ་འགྲུབ་ཐུབ། ཕུགས་བསམ་གྱི་ཡང་སྙིང་འཛིན་པའི་ཆེད་དུ་ཡོད་ཚད་ཅིག་བཏོན་ནས་དེའི་ལམ་ནས་གོམ་པ་སྤོ་རོགས་ཞུའོ།།
བསྒྱུར་གཞི།
རྩོམ་པ་པོ་རོ་བྷིན་ཤར་མས་ (Robin Sharma) མཛད་པའི་ (ཁྱེད་རང་ཤི་དུས་སུ་ཡིས་ངུ་སྐད་འབྱིན་ (Who Will Cry When You Die) ཞེས་པའི་དོན་ཚན་ནས་བསྒྱུར།
