ཀུན་མཁྱེན་ཀློང་ཆེན་རབ་འབྱམས།
་་་་་་འདོན་ཐེངས་སྔ་མའི་འཕྲོ།
དེ་ནས་ངུར་པ་དེ་དག་གིས་ཞེ་ས་དང་བཅས་པས་སྨྲས་པ།
ངང་པའི་རྒྱལ་པོ་བཞུད་པ་ན།།
ཕྱོགས་འདིར་ལྷགས་པའི་སྐྱེ་བོ་འགས།།
ཁྱེད་ཀྱི་ཐ་མའི་ཚིག་འདྲི་ན།།
དེ་ལ་བདག་གིས་ཇི་སྐད་བྱ།།
ངང་པས་སྨྲས་པ།
དེ་དག་ལ་ཕན་པ་ཉེ་བར་སྟོན་པའི་ཚིག་འདི་སྐད་སྨྲོས་ཤིག
ཡོངས་འཛིན་བཤེས་གཉེན་རྣམས་ལ་ཕྲིན་འདི་ཞུས།།
རྒྱལ་བའི་བསྟན་པ་རིན་ཆེན་ལེགས་སྐྱོང་ཞིང་།།
ཕྲིན་ལས་བཟང་པོས་གདུལ་བྱའི་དོན་ལ་བརྩོན།།
ཕོངས་པ་སྐྱོང་ཞིང་བྱམས་སེམས་ལྡན་པར་མཛོད།།
རབ་བྱུང་བཙུན་པ་རྣམས་ལ་ཕྲིན་འདི་ཞུས།།
བསླབ་གསུམ་གླང་པོ་ཐོས་བསམ་དྲྭ་བས་གཡོགས།།
མཁས་པ་བསྟེན་ཅིང་དགེ་བའི་ལས་ལ་བརྩོན།།
ཆོག་ཤེས་དུལ་བའི་ནོར་དང་ལྡན་པར་མཛོད།།
མཚན་ཉིད་སྟོན་པ་རྣམས་ལ་ཕྲིན་འདི་ཞུས།།
བླ་མ་ལ་གུས་ང་རྒྱལ་མེད་པ་དང་།།
ཉིན་མཚན་བརྩོན་པས་འཆད་ཉན་ལྷུར་བླངས་ཤིང་།།
ཐོས་པའི་དོན་བཞིན་ཉམས་སུ་བླང་བར་མཛོད།།
བཀའ་གདམས་འདུལ་འཛིན་རྣམས་ལ་ཕྲིན་འདི་ཞུས།།
འཇིག་རྟེན་ཆོས་བརྒྱད་དག་ལ་མི་སེམས་ཤིང་།།
བླ་མ་ལ་གུས་ང་རྒྱལ་མེད་པ་དང་།།
ལུས་ངག་ཇི་བཞིན་སེམས་ཀྱང་འདུལ་བར་མཛོད།།
ཡོངས་ཀྱི་སྒོམ་ཆེན་རྣམས་ལ་ཕྲིན་འདི་ཞུས།།
ལྟ་བའི་རྗེས་སུ་སྤྱོད་པ་མི་འབྲང་ཞིང་།།
ཕྱོགས་བཅུར་མི་རྒྱུ་རི་ཁྲོད་དབེན་བརྟེན་ནས།།
སེམས་ཉིད་སྙིང་པོའི་དོན་ལ་ནན་ཏན་མཛོད།།
དཀོན་མཆོག་སྔགས་པ་རྣམས་ལ་ཕྲིན་འདི་ཞུས།།
གཞན་རྒྱུད་མི་སྲེག་རང་རྒྱུད་འདུལ་བ་དང་།།
ཉིན་མཚན་བསྐྱེད་རྫོགས་དོན་ལས་མ་ཡེངས་པར།།
བཟླས་བརྗོད་བརྩོན་ཞིང་བསྟན་པ་སྲུང་བར་མཛོད།།
གཡུང་དྲུང་བོན་པོ་རྣམས་ལ་ཕྲིན་འདི་ཞུས།།
ལྟ་ངན་སྤོངས་ལ་སྣང་སྲིད་འཁོར་འདས་ཀུན།།
རྒྱུ་དང་འབྲས་བུ་ངོ་བོ་ཉིད་ཀྱི་བོན།།
ལེགས་པར་རྟོགས་ནས་ཚོགས་གཉིས་སྒྲུབ་པར་མཛོད།།
སྣ་ཚོགས་ཡོན་ཏན་མཁན་ལ་ཕྲིན་འདི་ཞུས།།
གང་ཡིན་དོན་ལ་དང་པོ་མཁས་པར་སློབ།།
བར་དུ་སྦྱངས་ཤིང་ཐ་མ་ང་རྒྱལ་མེད།།
འདོད་པ་ཆུང་བས་གཞན་དོན་ངང་གིས་མཛོད།།
ཕྱོགས་རིས་གོང་མ་རྣམས་ལ་ཕྲིན་འདི་ཞུས།།
འོག་མ་སྐྱོང་ལ་བཀའ་ཁྲིམས་དམ་པ་དང་།།
སྙན་ཁུངས་འཐུག་ལ་ཐུགས་རྒྱུད་སྒམ་པ་དང་།།
དགེ་ལ་བརྩོན་ཞིང་སྡིག་ལ་འཛེམ་པར་མཛོད།།
གཙོ་བོ་རྒན་རབས་རྣམས་ལ་ཕྲིན་འདི་ཞུས།།
ཚད་མར་བཞག་ཚེ་ཉེ་རིང་མེད་པ་དང་།།
སྤྱི་ཚིས་ཆེ་ཞིང་འཕྲལ་ཕུགས་གཞིག་པ་ཆེ།།
བྱ་བ་ཀུན་ལ་གྲོས་དང་ལྡན་པར་མཛོད།།
སྐྱེ་བོ་དྲྭ་མ་རྣམས་ལ་ཕྲིན་འདི་ཞུས།།
རྒན་རབས་བཀུར་ཞིང་ཆུང་མའི་ངོར་མི་ལྟ།།
སེམས་རྒྱུད་དྲང་ཞིང་ཕྱི་ཐག་རིང་བ་དང་།།
དགྲ་འདུལ་གཉེན་སྐྱོང་སོ་ནམ་ཞིབ་ཏིག་མཛོད།།
ཡུལ་གྱི་མོ་བཙུན་རྣམས་ལ་ཕྲིན་འདི་ཞུས།།
རྗེ་དཔོན་བཀུར་ཞིང་འཁོར་གཡོག་རྣམས་ལ་བྱམས།།
བྱ་བཞག་བརྩོན་ཞིང་ངང་རྒྱུད་རིང་བ་དང་།།
ཟས་ལ་ཡངས་ཤིང་གཉེན་བཤེས་དགའ་བར་མཛོད།།
སྐྱེས་ཕྲན་གཞོན་ནུ་རྣམས་ལ་ཕྲིན་འདི་ཞུས།།
དཔའ་མཛངས་ལྡན་ཞིང་འགྲོགས་ན་བདེ་བ་དང་།།
གསང་ལ་དེས་ཤིང་རྒན་པའི་ངག་ལ་ཉན།།
གཉེན་ལ་བརྩེ་ཞིང་བྱ་བ་གྲིམས་པར་མཛོད།།
ཡུལ་གྱི་ན་ཆུང་རྣམས་ལ་འདི་སྐད་ཞུས།།
འཛུམ་དང་ཞེ་ས་གཙང་སྦྲ་ལྡན་པ་དང་།།
ངང་རྒྱུད་དལ་ཞིང་གཟེག་དང་མོ་སོར་ལྟ།།
གཡེང་ལ་མི་དགའ་ཡིད་དུ་འོང་བར་མཛོད།།
བྱིས་པ་གཞོན་ནུ་རྣམས་ལ་ཕྲིན་འདི་ཞུས།།
གནོད་འཚེ་ཆུང་ཞིང་ཕ་མའི་ངག་ལ་ཉོན།།
རབ་ཏུ་བརླིང་ཞིང་ཡོན་ཏན་སློབ་ལ་བརྩོན།།
འགྲོ་བ་ཀུན་གྱི་ཡིད་ལ་འབབ་པར་མཛོད།།
ཅེས་བརྗོད་པ་དང་། དེའི་ཚེ་རྫིང་བུའི་ངུར་པ་ཐམས་ཅད་དགའ་བས་ཕྱག་འཚལ་ཞིང་མགྲིན་གཅིག་ཏུ་སྨྲས་པ། ཀྱེ་བཞིན་བཟང་ད་དུང་ལེགས་པར་བཤད་པའི་བདུད་རྩི་རྣ་བའི་སྣོད་དུ་འཐུང་སྤྲོ་ན། ཡུན་དུ་ཕན་པ་དང་ཐར་པའི་རྒྱུར་འགྱུར་བའི་ཆོས་ཀྱི་ཆར་དག་དབབ་པར་མཛོད་ཅིག ཅེས་བརྗོད་པ་དང་།
ངང་པས་སྨྲས་པ།
ལེགས་སོ་གྲོགས་དག་དད་པས་ཚུར་ཉོན་དང་།།
བདག་ཅག་ཚེ་ནི་སྟོན་ཀའི་སྤྲིན་ལྟར་གཡོ།།
ལུས་ནི་ཆུ་བུར་བཞིན་ཏེ་སྙིང་པོ་མེད།།
འདུས་བྱས་བསགས་པ་རྨི་ལམ་སྒྱུ་མ་འདྲ།།
ཡིད་བརྟན་མེད་པར་ངེས་པར་རྟོགས་བྱས་ནས།།
འདུ་འཛི་སྤངས་ཏེ་དབེན་པའི་ས་ཕྱོགས་སུ།།
ཡངས་པའི་གདན་ལ་བདེ་བའི་ལུས་བསྲངས་ནས།།
འགྲོ་བའི་དོན་དུ་བྱང་ཆུབ་སེམས་བསྐྱེད་དེ།།
སེམས་ཀྱི་གནས་ལུགས་ཇི་བཞིན་གཉུག་མའི་དོན།།
གང་ཤར་འཛིན་མེད་སྤྲོས་དང་བྲལ་བ་བཞག།
རྗེས་ལ་འཁོར་གསུམ་དག་པའི་བསྔོ་བ་བྱ།།
འདི་ནི་ཆོས་ཀུན་མཐར་ཐུག་སྙིང་པོའི་དོན།།
དུས་གསུམ་རྒྱལ་བ་ཀུན་གྱི་གཤེགས་ཤུལ་ཡིན།།
བར་སྐབས་སེམས་ལ་མི་རྟག་འཆི་བ་སྒོམས།།
འདུས་བྱས་སྙིང་པོ་མེད་ལ་སྐྱོན་མང་བ།།
འཁོར་བའི་རང་བཞིན་དེ་ཡང་བསམ་པར་བྱ།།
སྣ་ཚོགས་ཆོས་འདི་སྣང་ལ་བདེན་པས་སྟོང་།།
སྣང་ལ་སྟོང་པའི་གཟུགས་སུ་རྟོགས་པར་བྱ།།
ཞེས་བརྗོད་དེ་རྫིང་བུའི་གནས་དེ་ཉིད་ནས་སོང་ངོ་། །དེ་ནས་ངུར་པའི་ཚོགས་དག་ཀྱང་དེའི་སླད་བཞིན་དུ་འབྲངས་ཏེ། ཤར་ཕྱོགས་གངས་རིའི་ར་བ་མཐོང་བའི་ངོས་ཤིག་ཏུ་བསྐྱལ་ཏེ་དད་པས་ཕྱག་བཙལ་ཏེ་འདི་སྐད་དུ། བདག་ཅག་ངང་པའི་རྒྱལ་པོ་ལ་བསྟེན་པའི་ནང་གི་ཐ་མ་ཡང་འདི་ཡིན་ཏེ། སོ་སོར་འབྲལ་བའི་ཆོས་ཉིད་ལ་ལྟོས། ཀྱེ་མའོ་རེ་མཚར། ཁྱོད་ཀྱི་ཞབས་རྟེན་གྱི་པདྨོ་བསྟེན་པའི་འོད་གསལ་སླན་ཆད་མཐོང་རེ་ཀན། ཞེས་གདུང་བའི་མཆི་མ་འབྱིན་ཅིང་ཕྱིར་ལོག་གོ །དེ་ནས་ངང་པའི་རྒྱལ་པོ་དེ་ཡང་རང་གི་འཁོར་དང་ལྷན་ཅིག་ཏུ་ཤར་ཕྱོགས་སུ་སོང་ངོ་། །དེའི་ཚེ་དེའི་དུས་རིང་མོ་ཞིག་ན་གངས་རིའི་རྩེ་མོ་སྐྱེད་མོས་ཚལ་གྱི་ནང་ན་གསལ་ཞིང་། མཐིང་གར་སྣུམ་ཞིང་འཚེར་བའི་ནང་ན་འོད་ཟེར་ནམ་མཁའ་དྭངས་པའི་མདོག་ལྟར་སྔོ་བ་མཐོང་སྟེ། བཞིན་བཟང་གིས་ཞེ་ས་དང་བཅས་པས་ངང་པའི་རྒྱལ་པོ་ལ་དྲིས་པ།
སྟོན་ཀའི་མཚན་མོ་དཀར་བའི་རི་བོང་འཛིན།།
དྭངས་པའི་མཁའ་དང་མཉམ་དུ་ལྷུང་བར་དོགས།།
ཚངས་པ་བདེ་འབྱུང་དག་གིས་བཀོད་པ་འམ།།
ཡིད་འོང་འདི་འདྲ་ཅི་ཞིག་ལགས་སམ་ཀྱེ།།
ངང་པའི་རྒྱལ་པོས་སྨྲས་པ།
ཟླ་བ་ཀུནྡའི་མདངས་འཕྲོགས་མཛེས་པའི་རི།།
ཡིད་འོང་ནགས་ཀྱི་ནང་ན་གསལ་བ་དག།
རང་བྱུང་འཇིག་རྟེན་དབང་པོའི་སྐྱེད་མོས་ཚལ།།
འོད་ཟེར་སྤྲིན་ཞེས་བྱ་བ་ཡིན་པར་ངེས།།
ཞེས་བརྗོད་དེ། སྐྱེད་མོས་ཚལ་དེའི་ཉེ་འཁོར་དུ་སོང་བ་ལས། ནགས་འོད་ཟེར་སྤྲིན་བསམ་གཏན་པ་དག་གིས་བརྟེན་པའི་གནས་སུ་ཡིད་དུ་འོང་བའི་བྱ་དང་ཤིང་དང་མེ་ཏོག་གི་ཚལ་འཛུམ་པས་ཁེབས་ཤིང་། བསིལ་བའི་ཆུ་རྒྱུན་གཙང་མ་ཁ་དུ་མ་ནས་འབབ་པ། འགྲམ་ཐམས་ཅད་རྩྭ་ལྗང་སེར་གྱིས་ཁྱབ་པ་ཞིག་ཏུ་ཕྱིན་ཏེ།
བཞིན་བཟང་གིས་སྨྲས་པ།
རྨ་བྱའི་མགྲིན་པ་ལྟ་བུར་འཚེར་བའི་གནས།།
དབེན་ཞིང་ཉམས་དགའ་ཤིན་ཏུ་ཡིད་དུ་འོང་།།
སྨན་ཤིང་མེ་ཏོག་འབྲས་བུ་རྣམ་བཀྲ་ཞིང་།།
བསིལ་བའི་ཆུ་གཙང་པདྨས་ཁེབས་ལ་གཟིགས།།
ཞེས་བརྗོད་དེ་སོང་བ་ལས། གངས་རིའི་ངོས་བྲག་རིའི་མགུལ། རྡོ་རྗེའི་ཁམས་ལས་རང་བྱུང་བའི་སྐུ་གཟུགས་མཐོང་སྟེ།
བཞིན་བཟང་གིས་དྲིས་པ།
ཟླ་བ་ནོར་བུའི་མདངས་འདྲ་འཛུམ་པའི་ཞལ།།
གངས་རིའི་དྲུང་ན་ལྷུན་གྱིས་གྲུབ་པ་ནི།།
ཡིད་འོང་མཚན་དཔེའི་འོད་ཟེར་འགྱེད་པ་བཞིན།།
ཡིད་འོང་འདི་འདྲ་གང་གི་སྐུ་ཡིན་ནམ།།
ངང་པའི་རྒྱལ་པོས་སྨྲས་པ།
འདི་ནི་འཕགས་པ་འཇིག་རྟེན་དབང་པོའི་སྐུ་ཡིན་ཏེ། གང་གིས་བསོད་ནམས་སྤེལ་སླད་དུ་རང་བྱུང་དུ་བྱུང་བའོ། །ཞེས་བརྗོད།
བསྟོད་པས་ཀྱང་བསྟོད་པ།
རབ་དཀར་ལྷུན་པོའི་དྲུང་ན་མཛེས་པའི་སྐུ།།
འགྱིང་བཅས་པདྨའི་སྟེང་ན་མི་གཡོ་ཞིང་།།
ཐོར་ཚུགས་རྩེ་ནས་འོད་དཔག་མེད་འཕྲོ་བའི།།
མགོན་པོ་སྤྱན་རས་གཟིགས་ལ་ཕྱག་འཚལ་ལོ།།
ཞེས་བརྗོད་དེ་སྐྱེད་མོས་ཚལ་དེ་དག་ལས་ཀྱང་འདས་ཏེ་སོང་བའི་ཤར་ཕྱོགས་ན་འཁྲི་ཤིང་རབ་ཏུ་བསྐོར་བའི་གྲོང་ཁྱེར་ཕྱེད་ཙམ་གསལ་བ་དག་མཐོང་སྟེ།
བཞིན་བཟང་གིས་དྲིས་པ།
དཔག་བསམ་ཕྲེང་བས་བསྐོར་བ་ཡི།།
གྲོང་དག་འཛུམ་པས་ལྟ་བ་བཞིན།།
མཐོ་རིས་ལྷ་ཡུལ་འདྲ་བ་ཡི།།
མཛེས་པ་འདི་འདྲ་ཅི་ཡིན་ནམ།།
ངང་པས་སྨྲས་པ།
མེ་ཏོག་འཕྱོང་ཁ་རྒྱས་པའི་ཤིང་།།
ནོར་བུའི་དྲྭ་བས་སྦྲེངས་པ་ན།།
ཡིད་འོང་གྲོང་ཁྱེར་མཛེས་པ་ནི།།
སྐྱིད་པའི་འབྱུང་གནས་ཡིན་པར་མངོན།།
ཞེས་སོ།།
མུ་འགོད།
རྩོམ་སྒྲིག་པའི་གསལ་བཤད།
སྡེ་དགེ་པར་ཁང་ཆེན་མོའི་ཤིང་པར། ཀུན་མཁྱེན་ཀློང་ཆེན་རབ་འབྱམས་ཀྱི་གསུང་འབུམ་པོད་ལྔ་པ་ལ་ཁུངས་གཏུགས་ནས་སྔ་འགྱུར་རིག་མཛོད་རྩོམ་སྒྲིག་པས་བཏུས་པ་ཡིན།
