ལོ་རིམ་གསུམ་པའི་སློབ་གཉེར་བ། བསྟན་པ་ཚེ་རིང་གུ་རུང་།
ཡངས་ཤིང་སྒོ་ཆེའི་ནམ་མཁའ་སྤྲིན་པས་གཡོགས།།
ཁོར་ཡུག་བདེ་མོར་སྣ་ཚོགས་མེ་ཏོག་བཏུམས།།
སོས་ཀའི་མཛེས་མ་འདི་ལྟར་འཛུམ་པ་ན།།
བུ་ཆུང་ང་ཡི་སེམས་ཁོང་སྡུག་གིས་ཁེངས།།
རྟ་བདུན་དབང་པོ་ནུབ་ཏུ་ཡིབ་ལ་ཉེ།།
ལས་མི་བྱ་བ་བཤོལ་ཏེ་ལོག་ལ་ཉེ།།
བསླེབ་རྒྱུ་མེད་པའི་ང་ཡི་ཆུང་འདྲིས་དེ།།
བསམ་བཞིན་བསམ་བཞིན་གདོང་ཁ་བརླན་ལ་ཉེ།།
ཞི་བདེའི་དེད་དཔོན་བྱ་རྒོད་ནུབ་ཏུ་འཕུར།།
གཞིས་ལུས་ཉམ་ཆུང་བྱ་ཚོགས་སྡུག་གིས་མནར།།
ཡིད་མཐུན་སེམས་ཀྱི་གྲོགས་པོའང་བཞུད་པས་ན།།
བན་ཆུང་སེམས་པ་སྐྱོ་བས་ཅིས་མི་མནར།།
ནམ་ཐུག་འཛུམ་དམུལ་སྟོན་པའི་སྙིང་གི་གྲོགས།།
མི་ཡུལ་འདི་ནས་བཞུད་པས་སྟོང་སིང་སིང་།།
ཆུང་དུས་འུ་གཉིས་འབྲེལ་བའི་ཚུལ་བསམས་ན།།
ཁྲ་ཆུང་མིག་ལ་སྡུག་གི་གཙང་པོ་འཁྱིལ།།
མི་ལ་ཞེན་ཆགས་ཟབ་པ་འཁོར་བའི་ཆོས།།
ཁྱེད་ལ་ཞེན་ཆགས་ཟབ་པ་ང་ཡི་གཤིས།།
ང་ཚོ་ལྷན་དུ་འགྲོགས་ཡུན་ཐུང་ནའང་།།
འགྲོགས་པའི་རིང་ལ་སྐྱིད་པའི་ཉི་མ་རྫོགས།།
ད་ལོ་དགོན་འདིར་ཐུག་པའང་སྔོན་གྱི་ལས།།
གྲོགས་པོའི་ལག་རྡང་ཆད་པའང་སྔོན་གྱི་ལས།།
སྔོན་གྱི་ལས་ལ་འཆོས་ཐབས་མི་འདུག་པས།།
རེ་ཞིག་སེམས་ཆུང་སེམས་པར་སེམས་བཞིན་བསྡད།།
དགོང་མོའི་ཆར་པ་འཇོ་བའི་དུས་ཤིག་ལ།།
ཁེར་རྐྱང་སྐྱིད་མ་སྡུག་གི་འཇིག་རྟེན་ནས།།
ཁྱེད་རང་ཕངས་པའི་གདུང་བ་སེམས་པར་ལྷུང་།།
སེམས་ཀྱི་གདུང་བ་སྨྱུ་གུའི་རྩེ་ནས་ཐོར།།
