ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཡང་སྟོན་པ་མཉན་ཡོད་དུ་བཞུགས་པའི་ཚེ། རྒྱལ་པོ་གསལ་རྒྱལ་ལ་བློན་པོ་མཆོག་གཉིས་ཡོད་དེ། གཅིག་གི་མིང་ལ་རི་དྭགས་འཛིན་ཞེས་བྱ་ཞིང་གཅིག་གི་མིང་ནི་བྱིན་པ་ཞེས་བྱའོ། །དེ་གཉིས་མཛའ་བཤེས་ཡིད་གཅུགས་པར་གྱུར་ནས་སྔར་ལྟར་གྱིས་ཕྱིན་ཆད་གཉེན་སྦྲེལ་བར་ཆད་དོ། །དེ་ནས་རི་དྭགས་འཛིན་ལ་བུ་བདུན་བྱུང་བའི་ཆེ་བ་ལ་མིང་ས་ག་ཞེས་བཏགས་སོ། །བྱིན་པ་ལ་བུ་མོ་གཟུགས་བཟང་ཞིང་ལྟ་ན་སྡུག་པ་ཞིག་བྱུང་སྟེ། བཙས་མ་ཐག་པ་ནས་ཆོས་ཉན་པ་ལ་སྤྲོ་བ་ཞིག་བྱུང་བས་ཆོས་བྱིན་མ་ཞེས་བཏགས་སོ། །དེ་ནས་ཆོས་བྱིན་མ་ཆེར་བསྐྱེད་པ་ན། སངས་རྒྱས་ཀྱི་བསྟན་ལ་དད་པ་རྙེད་ནས་ཕ་མ་ལ་གསོལ་ཏེ། དུས་དུས་སུ་དགེ་སློང་དང་དགེ་སློང་མ་རྣམས་ལ་བཤོས་དྲངས་ནས་མདུན་དུ་འདུག་སྟེ་ཆོས་ཉན་པར་བྱེད་དོ། །དེ་ནས་དེས་སྐྱབས་འགྲོ་དང་བསླབ་བྱ་བསླབ་པའི་གཞི་ཡང་བླངས་ནས་ཁྱིམ་ལ་གནས་བཞིན་དུ་ཕྱིར་མི་འོང་གི་འབྲས་བུ་མངོན་དུ་བྱས་ཏེ་རྫུ་འཕྲུལ་ཡང་གྲུབ་བོ། །དེས་བདེན་པ་མཐོང་ནས་ཕ་མ་ལ་རབ་ཏུ་བྱུང་བར་གསོལ་བ་དང་། ཕ་མས་བདག་གཉིས་ལ་དབང་མེད་ཀྱིས་ཁྱོད་སྦར་མ་སྐྱེས་པའི་གོང་ནས་གཞན་ལ་བྱིན་ཟིན་པས་གནང་བར་བྱར་མི་རུང་མོད། འོན་ཀྱང་ཁྱོད་ཉིད་ཀྱིས་ཁྱིམ་ཐབ་ལ་གསོལ་བ་ཐོབ་ཅིག་ཅེས་སྨྲས་ནས། ཁྱིམ་བདག་བྱིན་པས་སང་གི་གདུགས་ཚོད་ལ་སངས་རྒྱས་འཁོར་དང་བཅས་པ་སྤྱན་དྲངས་ཤིང་། ཁྱིམ་བདག་རི་དྭགས་འཛིན་ལའང་གོ་བར་བྱས་ཏེ་བུ་མོ་རབ་ཏུ་བྱུང་བར་འདོད་པས་ཟློག་མི་ནུས་པས་ཁྱོད་ཀྱང་ཤོག་ལ་ཟློག་ཅིག་ཅེས་བྱས་སོ། །ཕྱིར་ཉིན་སངས་རྒྱས་འཁོར་དང་བཅས་པ་བྱོན་ནས་བཤོས་གསོལ་ཏེ་ཁྱིམ་བདག་འཁོར་དང་བཅས་པ་ལ་ཆོས་བསྟན་ནས་གཤེགས་པའི་རྗེས་སུ། ཆོས་བྱིན་མ་ཡང་དགེ་སློང་མའི་དགེ་འདུན་དང་ཐབས་ཅིག་ཏུ་སོང་ངོ་། །དེ་རི་དྭགས་འཛིན་པ་ཕ་བུ་འཁོར་དང་བཅས་པས་མཐོང་ནས། ཁྱེའུ་ས་གས་བུ་མོ་ཆོས་བྱིན་མ་འཛིན་པར་བརྩམས་པ་དང་། དེ་སྟེང་གི་ནམ་མཁའ་ལ་འཕགས་ཏེ་འབར་བ་ལ་སོགས་པའི་ཆོ་འཕྲུལ་བསྟན་པས་ཁྱེའུ་ས་ག་མངོན་པར་དད་ནས་ཞབས་ལ་ཕྱག་བྱས་ཏེ་བཟོད་པར་གསོལ་ནས་ཅི་བདེ་བར་གནང་ངོ་།། དེ་ནས་དེ་དགེ་སློང་མའི་གཙུག་ལག་ཁང་དུ་སོང་སྟེ། རབ་ཏུ་བྱུང་ནས་དགེ་སློང་མ་རྣམས་ཀྱིས་དེ་ལ་དགེ་ཚུལ་གྱི་བསླབ་གཞི་རྣམས་ཀྱང་ཕོག ཆོས་དྲུག་གི་བསླབ་པའི་སྡོམ་པ་ཡང་ཕོག་ནས། དེས་ལོ་གཉིས་ཀྱི་བར་དུ་ཆོས་དྲུག་ལ་བསླབས་ནས་བསྙེན་པར་རྫོགས་པར་འདོད་པའི་ཚེ། དགེ་སློང་མ་རྣམས་ཀྱིས་དེ་ལ་ཚངས་པར་སྤྱོད་པའི་གནས་ཀྱི་སྡོམ་པ་ཕོག་སྟེ། བསྙེན་པར་རྫོགས་པར་བྱ་བའི་ཕྱིར་རྒྱལ་བྱེད་ཀྱི་ཚལ་དུ་ཁྲིད་དོ། །དེའི་ཚེ་སྔར་འདི་ཉིད་ཀྱི་གཟུགས་བྱད་ལ་ཆགས་པས་སྐྱེ་བོ་མང་པོས་བསླངས་ཀྱང་བདག་པོའི་དབང་དུ་གྱུར་པ་སུ་ལའང་མ་བྱིན་པས། དེ་དག་གིས་སྔར་ཁྱིམ་ན་གནས་པའི་ཚེ་བདག་ཅག་གིས་མ་ཐོབ་ཀྱང་འདི་རབ་ཏུ་བྱུང་ཟིན་གྱིས་ལམ་དུ་བདག་གིས་འཕྲོག་སྟེ་ཅི་དགར་ལོངས་སྤྱད་པར་བྱའོ་ཞེས་གྲོས་བྱས་པ་དགེ་སློང་མ་རྣམས་ཀྱིས་ཐོས་པས། ད་འདི་རྒྱལ་བྱེད་ཀྱི་ཚལ་དུའང་འཁྲིད་མི་ནུས་ལ་འདིར་བཞག་པར་ཡང་མི་ནུས་སོ་སྙམ་ནས་ཕ་མའི་ཁྱིམ་དུ་ཁྲིད་དེ་དེར་བཞག་གོ །དེ་ནས་དགེ་སློང་མ་རྣམས་ཀྱིས་བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས། འོ་ན་དགེ་སློང་མ་ཆོས་བྱིན་མ་འཕྲིན་གྱིས་བསྙེན་པར་རྫོགས་པར་གནང་གིས་ཕྱིན་ཆད་གཞན་ཞིག་ཕྱི་རོལ་ཏུ་འབྱུང་བ་ལ། འདི་འདྲ་བའི་ཉེས་དམིགས་འབྱུང་བར་གྱུར་ན། དེ་ཡང་འཕྲིན་གྱིས་བསྙེན་པར་རྫོགས་པར་གྱིས་ཤིག་ཅེས་བཀའ་བསྩལ་པས། དགེ་སློང་མ་རྣམས་ཀྱིས་དེ་འཕྲིན་གྱིས་བསྙེན་པར་རྫོགས་པར་བྱས་ཏེ། གཞུང་བཞིན་རྒྱས་པར་བརྗོད་ནས་ཆོས་བྱིན་མ་ཁྱོད་བསྙེན་པར་རྫོགས་ཟིན་གྱིས་བག་ཡོད་པར་ནན་ཏན་གྱིས་ཤིག་ཅེས་བྱས་སོ། །དེ་ཐོས་མ་ཐག་པར་ཆོས་བྱིན་མས་དགྲ་བཅོམ་པ་ཉིད་མངོན་དུ་བྱས་སོ།།
དེའི་ཚེ་དགེ་སློང་དག་གིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་བསྟན་པ་ལ། ཝཱ་རཱ་ཎ་སཱིའི་ཁྱིམ་བདག་ཅིག་གི་བུ་མོ་རབ་ཏུ་བྱུང་བར་འདོད་པ་ན། དེ་ཕྱི་རོལ་ཏུ་བྱུང་བ་ལས་ཉེས་དམིགས་སུ་གྱུར་ནས། བཅོམ་ལྡན་འདས་འོད་སྲུང་གིས་དེེ་འཕྲིན་གྱིས་བསྙེན་པར་རྫོགས་པར་གནང་སྟེ། དེ་ལ་འཕྲིན་བསྐྱལ་ཅིང་ནན་ཏན་དུ་གདམས་པར་ཟིན་པ་ན། དེས་དགྲ་བཅོམ་མ་མངོན་དུ་བྱས་ཏེ། འབར་བ་ལ་སོགས་པའི་ཆོ་འཕྲུལ་བསྟན་ནས། ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདས་པ་ན། མཁན་མོ་དེས་དེའི་སྐུ་གདུང་ལ་ཡང་མཆོད་པ་བྱས་ཤིང་། ཚེ་གཅིག་ཏུ་ཚངས་པར་སྤྱད་ནས་འཆི་ཁར་སྨོན་ལམ་བཏབ་བོ། །དེའི་དུས་ཀྱི་མཁན་མོ་དེ་ནི་ཆོས་བྱིན་མ་སྟེ། དེའི་དུས་ཀྱི་སྨོན་ལམ་གྱི་ཁྱད་པར་གྱིས་འདིར་ཡང་འཕྲིན་ཆོག་གིས་བསྙེན་པར་རྫོགས་ནས། དགྲ་བཅོམ་པ་ཉིད་མངོན་དུ་བྱས་པ་ཡིན་ནོ་གསུངས། འདི་དག་གིས་ཀྱང་ཚངས་སྤྱོད་ལེགས་པར་བསྲུངས་པ་སོགས་ཀྱི་ཕན་ཡོན་བསྟན་ཏོ།།
ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང་ནས་དཔར་བའི་«མདོ་ལས་བྱུང་བའི་གཏམ་རྒྱུད་སྣ་ཚོགས།»ཞེས་པ་ལས་བཏུས།
