ཤེས་རབ་བཟང་མོ། བཙུན་དགོན་བཤད་གྲྭའི་འཛིན་རིམ་དགུ་པ།
མདང་དགོང་སེར་བ་དང་ཆར་པ་གཉིས་འདྲེས་མར་བབས་འདུག་པས། འགྲོ་ལམ་ཡོད་ཚད་སྔོན་དུ་སོང་བའི་བ་ཕྱུགས་དང་མི་རྣམས་ཀྱི་རྐང་པས་བརྫིས་ཏེ་འདམ་གྱིས་ཉར་ཉོར་དུ་བཏང་འདུག ང་རང་མགོ་བོ་གཟན་གྱིས་བཏུམས་ཤིང་མིག་ཤེལ་ཐོད་པའི་སྒང་བཞག་སྟེ་ཁ་རླངས་འཐུལ་འཐུལ་འཕྱུར་བའི་ངང་ལག་པས་ཤམ་ཐབས་ཀྱི་མཐའ་གཡས་གཡོན་གཉིས་ཡར་བརྫེས་ཤིང་། རས་ལྷམ་འདམ་ནང་ནུབ་དོགས་ཀྱིས་ལམ་གྱི་གཡས་གཡོན་དུ་སེར་བ་དང་འཁྱག་པ་འདྲེས་མ་ཡོད་ས་ལ་མཆོང་གིན་མཆོང་གིན་གོམ་པ་སྤོས་ཏེ་སྦྱིན་བདག་གི་ཁང་པའི་ཕྱོགས་སུ་ཕྱིན།
སྦྱིན་བདག་གི་ཁང་པའི་ནང་སླེབ་དུས་འབུམ་ཀློག་མཁན་གྱི་རོགས་པ་ཚང་མ་གྲྭ་ཆུང་རྐྱང་རྐྱང་རེད་འདུག གྲྭ་ཆུང་རྣམས་ཀྱི་ནང་ནས་ཀྱང་ཆུང་ཤོས་དེ་བལྟས་ཚོད་ལ་ལོ་བརྒྱད་དགུ་ཙམ་རེད། འདོན་པ་འགོ་བཙུགས་པ་དང་ལམ་སང་གྲྭ་ཆུང་དེས་ལག་པ་རྒྱགས་པ་ཆུང་ཆུང་གཉིས་བྲང་གར་ཐལ་མོ་སྦྱར། སྐེད་པ་ཅུང་ཡར་འཁྱོག་པའི་ངང་མིག་ཟུང་བཙུམས་ཏེ་ཕར་ཡོ་ཚུར་ཡོ་བྱེད་ཀྱིན་མཆུ་ཅུང་ཟད་ཕྱི་ལ་འབུར་འབུར་གྱིས་འདོན་པ་འདོན་གྱིན་འདུག
དངོས་གཞི་འབུམ་ཀློག་འགོ་བཙུགས་བྱུང་། གྲྭ་ཆུང་དེའི་སྐད་གདངས་ཕྲ་མོ་ཡིན་ཞིང་སྒྲ་དག་ལ་ཀློག་བཟང་བ་ཞིག་རེད་འདུག བར་བར་ལ་མིག་ཆུང་ཆུང་གཉིས་པོས་དབུ་མཛད་ལ་ལྟ་ཙམ་ལྟ་ཙམ་བྱས་ཏེ་འགྲམ་གྱི་རོགས་པ་རྣམས་ལ་སྤྲོ་སྣང་དོད་པོའི་ངང་རྩེད་མོ་རྩེ་བཞིན་སྐར་ཆ་གཅིག་ཀྱང་སྡོད་མི་ཐུབ་པ་ལྟར་བྲེལ་འཚུབ་འཚུབ་བྱེད། དེ་དུས་ངའི་བསམ་པར་ཁོམ་པ་བྱུང་ན་ཁོ་དང་སྐད་ཆ་བཤད་ནས་རྩེད་མོ་རྩེ་དགོས་སྙམ་བྱུང་།
ཉིན་གུང་ཟ་མ་བཟས་ཚར་བ་དང་གྲྭ་ཆུང་དེ་རོགས་པ་ཞིག་དང་ལྷན་དུ་འགྱིག་ཤོག་ནང་བྱི་རིལ་དང་ཁ་ཟས་ཉུང་ཉུང་ཞིག་ཁྱེར་ནས་བྲེལ་འཚུབ་འཚུབ་བྱས་ཏེ་ཕྱིན་སོང་།
བར་གསེང་ཟིན་རྗེས་ཚོགས་པ་འགོ་མ་བཙུགས་པའི་སྐར་མ་ལྔ་ཙམ་གྱི་སྔོན་དུ་བྲེལ་འཚུབ་འཚུབ་ཀྱི་ངང་ནས་རྐང་པ་ཆུ་ལའང་མ་བཤལ་བར་ཕྲུ་གུ་དེ་གཉིས་བརྒྱུགས་ནས་འབྱོར་བྱུང་། ཉིན་རྒྱབ་ཚོགས་པའི་སྐབས་ལ་ཀློག་བཟང་ཞིང་སྐད་གདངས་ཕྲ་མོ་ཅན་གྱི་གྲྭ་ཆུང་དེའི་སྐད་ཐོས་རྒྱུ་མི་འདུག་པས། ངས་ཁོ་གཉིད་ཁུགས་མིན་ནམ་སྙམ་སྟེ་མགོ་བོ་ཅུང་ཡར་བཀྱགས་ནས་ལྟ་དུས་ཐུར་ལ་ལུག་གྲབས་ཡོད་པའི་འགྲམ་པ་གཡས་གཡོན་གཉིས་པོའི་མདོག་སྔར་ལས་ལྷག་པ་དམར་ནག་ཏུ་གྱུར་འདུག་ལ། དེའི་སྒང་ནས་མཆི་མས་བཤལ་བའི་ཤུལ་ཞིག་དོད་ཅིང་། མགོ་བོ་གཡས་ཕྱོགས་སུ་འཁྱོག་འཁྱོག་བྱས་ཏེ་ཅི་ཞིག་དྲན་པ་ལྟར་མཚམས་རེར་དབུགས་རིང་ཡང་གཏོང་གིན་འདུག ལག་པར་ཕྱུ་ར་འབོལ་སོབ་ (Cheese Ball) ཟས་ཐུམ་ཞིག་ཁ་ཕྱེ་ནས་མིག་ཟུང་ཧད་དེའི་ངང་ལག་པས་ཟས་རྡོག་རྐང་རེ་རེ་ནས་ཁ་ལ་འཇུག་གིན་རེས་འགའ་སོས་ལྡད་ཙམ་དང་། རེས་འགའ་མ་བལྡད་པར་མིད་ཀྱིན་འདུག ཚོགས་གྲལ་དུ་གསོལ་ཇ་འདྲེན་དུས་སུའང་མགོ་བོ་གཡུག་གིན་འཐུང་མི་འདོད་པའི་བརྡ་སྟོན་བཞིན་མཆིས། སྔ་དྲོ་ཁ་ཟས་ཁྱེར་ཡོང་དུས་ངོ་ཚ་དང་མཚེར་སྣང་གང་ཡང་མེད་པར་ལམ་སང་ལག་པ་བརྐྱངས་ནས་གཉིས་གཉིས་གསུམ་གསུམ་བསྙབས་ཏེ་བླངས་ནའང་ད་ལྟ་དེ་ཡང་མི་ལེན། གྲྭ་ཆུང་གཞན་པ་ཁ་ཤས་རྩེད་མོ་བརྩེས་ཏེ་བགད་ཀྱང་ཁོ་དགོད་པ་ཞིག་མ་མཐོང་། དེ་དུས་ངས་གཅུང་པོ་ལ་“ཁོ་ག་རེ་བྱས་པ་ཡིན་ནམ་”ཞེས་དྲིས། གཅུང་པོས་གང་ཡང་ཧ་གོ་མི་འདུག་པས་འགྲམ་གྱི་གྲྭ་ཆུང་དེ་ལ་སྐད་ཆ་འདྲི་དུས་གྲྭ་ཆུང་དེས། “ཉིན་གུང་བར་གསེང་སྐབས་སུ་ནང་ལ་འགྲོ་དུས་ཨ་ཕ་གྲོངས་ཟིན་པ་ཧ་གོ་འདུག”ཟེར། གཅུང་པོས། “ཁོའི་ཨ་ཕ་དེ་སུ་ཡིན་ནམ་”ཞེས་དྲིས། འགྲམ་གྱི་གྲྭ་ཆུང་དེས་ཁོའི་མིང་དང་ཁྱིམ་མིང་ཚང་མ་ལབ་སོང་བས། ང་རང་རེ་ཞིག་ལ་ཧད་དེ་ལུས། དེ་ནི་གྲྭ་ཆུང་དེར་མཚོན་ན་བསམ་ཡུལ་ལས་འདས་པའི་ཆག་སྒོ་ཞིག་རེད་ཨང་།
ཟླ་བ་དང་པོའི་ཚེས་པའི་ནང་ཕོ་ལོ་སུམ་ཅུའང་མ་ཟིན་པའི་ཕོ་གསར་ཞིག་གིས་འདྲུད་འཐེན་རླངས་འཁོར་ཞིག་བསྐོར་ནས་ས་ཞིང་རྨོ་རུ་འགྲོ་སྐབས་གྱེན་གཟར་པོ་དེ་རུ་སླེབ་དུས་འགྲོ་ལམ་བདེ་པོ་མེད་པའི་རྐྱེན་གྱིས་འདྲུད་འཐེན་རླངས་འཁོར་ལོག་སྟེ་འཁོར་ལོའི་འོག་ཏུ་ཆུད། ཡུལ་མི་ལ་ལས་སྨན་ཁང་ལ་ཁ་པར་བཏང་ནས་རླངས་འཁོར་མངགས་ཤིང་། ལ་ལས་ཛ་དྲག་ངང་ཁོ་འཁོར་ལོའི་འོག་ནས་འདོན་ཐབས་བྱས་ནའང་། མགོ་དང་མགྲིན་པ་གཉིས་དཀྲུམས་ཏེ་ཤ་དང་རུས་པའི་དབྱེ་བའང་འབྱེད་མི་ཤེས་པར་བལ་ཁྲག་གིས་བངས་པ་ལ་ས་རྡུལ་གོས་པ་ལྟ་བུར་གྱུར་ཟིན་འདུག དེ་དུས་དབུགས་ཆད་མེད་སྟབས་གཟུགས་པོ་ཡོངས་རྫོགས་འགུལ་ཞིང་མགྲིན་པའི་ནང་ནས་ཁྲག་དམར་ནར་ནར་དུ་འཐོན་བཞིན་ཡོད་པས། གསོན་ཐབས་བྲལ་ཡང་ཡུལ་མི་རྣམས་ཀྱིས་བཟོད་མ་ཐུབ་པར་མྱུར་སྐྱོབ་རླངས་འཁོར་ནང་བཅུག་སྟེ་སྨན་ཁང་གི་འགྲམ་དུ་མ་སླེབས་ཙམ་ལ་ཚེ་ལས་འདས། བདུན་ཕྲག་ཁ་ཤས་རིང་ཡུལ་འདིར་གང་དུ་ཕྱིན་ཀྱང་ཚེ་འདས་དེའི་གནས་ཚུལ་ལས་ཐོས་རྒྱུ་གཞན་གང་ཡང་མེད་པ་ལྟ་བུར་གྱུར། “སྙིང་རྗེ། ཕྲུ་གུ་ཚང་མ་ཆུང་ཆུང་ཡིན་པ་མ་ཟད། སྐྱེ་དམན་དེའང་ལོ་གཞོན་ཡིན་སྟབས་ཁང་པ་དེའི་ནང་དུ་སྐྱེས་པ་མེད་པའི་བུད་མེད་གཅིག་གིས་ཞིང་ལས་དང་ཕྲུ་གུ་རྣམས་ལ་སྙོར་སྐྱོང་གང་འདྲ་བྱེད་ཐུབ་ཀྱི་ཡོད་དམ།” ཞེས་མི་ཚོའི་ཁ་ནས་བཤད།
འདས་དོན་དེའི་གནས་ཚུལ་རྣམས་དེ་རིང་གྲྭ་ཆུང་འདིས་ཤེས་པ་ཡིན་ནམ། ཤ་ཚ་བའི་གྲྭ་ཆུང་འདི་ད་དུང་ཕ་མ་ཡ་གཅིག་གི་གདོང་པར་བལྟས་ཏེ་འདས་ཟིན་པའི་ཨ་ཕའི་བྱམས་སྐྱོང་བསམས་ནས་ཇི་ཙམ་ཞིག་གི་བར་སྡུག་བསྔལ་གྱི་ནང་དུ་ལུས་ཀྱི་ཡོད་དམ།
ཚོགས་གྲོལ་སོང་། ད་དུང་གྲྭ་པ་ཆུང་ཆུང་དེའི་ངོ་གདོང་ལ་འཛུམ་ཞིག་མཐོང་རྒྱུ་ཕར་ཞོག མདོག་དམར་ནག་ཏུ་གྱུར་ཅིང་ངུ་གྲབས་ཡོད་པའི་ངོ་གདོང་དེ་ད་དུང་ཡང་སངས་མི་འདུག དགོང་མོའི་ཞལ་ལག་ཁྱེར་ནས་སླེབས་བྱུང་ལ། གྲྭ་ཆུང་ཚང་མས་སོ་སོའི་ཕོར་པ་བརྐྱངས་ཏེ་ཟ་མ་བཟེད། ཁོའི་འགྲམ་ལ་སླེབ་དུས་མགོ་གཡུག་བཞིན་ཟ་མི་འདོད་པའི་རྣམ་འགྱུར་བསྟན་ཅིང་མགོ་བསྒུར་ནས་བསྡད། ནང་གི་ཨ་མ་ལགས་དེས། “ཚོད་མ་ཟ་འདོད་Ḇᨓ᩶་ན་མར་དང་ལྷན་དུ་ཟའམ།” ཟེར་ཞིང་ཨུ་ཚུགས་ག་ཚོད་བརྒྱབས་ཀྱང་མི་འདོད་པའི་རྣམ་འགྱུར་བསྟན་ནས་བསྡད་བྱུང་། ངས་ཨ་མ་ལགས་དེ་བོས་ནས་ཉེ་ཆར་ཚེ་ལས་འདས་སོང་བ་དེའི་བུ་ཡིན་པ་དང་། གནས་ཚུལ་རྣམས་དེ་རིང་མ་གཏོགས་ཤེས་མེད་པའི་སྐོར་རྣམས་ལབ་ཅིང་ཟ་མ་ཉུང་ཙམ་ཞིག་རོགས་པ་རྣམས་ལ་བསྐུར་བའི་རེ་བ་སྟོན། ནང་གི་ཨ་མ་ལགས་དེས་ལམ་སང་གྲྭ་ཕྲུག་དེའི་འགྲམ་ལ་ཕྱིན་ནས། “ང་ཚོའི་ནང་གི་ལུགས་སྲོལ་ལ་འབུམ་བཀླགས་ཏེ་ཟ་མ་མ་བཟས་པ་ཡིན་ན་ཡག་པོར་རྩི་ཡི་མེད་སྟབས། མ་བཟས་པ་ཡིན་ནའང་ཁྱེར་ནས་འགྲོ་དགོས་ཡོད།” ཅེས་གྲྭ་པ་ཅུང་ཆེ་བ་ཞིག་གི་ལག་པར་ཟ་མ་མང་ཙམ་ཞིག་བླུགས་ཏེ་བསྐུར་ཞིང་དགོང་མོ་ངེས་པར་དུ་སྤྲོད་རོགས་གྱིས་ཞེས་མངགས་བཅོལ་བྱས་སོང་། ཁང་པའི་ཕྱི་ལོགས་ལ་ཐོན་དུས་ཐེམ་སྐས་ནས་མར་བབས་པ་དང་ལམ་ཡོད་དོ་ཅོག་འདམ་གྱིས་གང་སྟེ་གོམ་པ་སྤོ་སའང་མེད་པར་གྱུར་འདུག
ནམ་རྒྱུན་གྱི་ནམ་མཁའ་སྔོ་ཐིང་ཐིང་དེ་དང་སྤྲིན་པ་དཀར་ལིང་ལིང་དེའང་མཐོང་རྒྱུ་མེད་པར་ཆར་སྤྲིན་ནག་པོས་ནམ་མཁའ་ཡོངས་སུ་གཡོགས་འདུག་པའི་ཁར། ད་དུང་སེར་བ་དང་ཆར་པ་འདྲེས་མ་ཞིག་ཀྱང་འབབ་བཞིན་འདུག
གཅུང་པོས་རླངས་འཁོར་འགྲོ་ལམ་ཕྱོགས་ལ་ཁ་བསྐོར་བ་དང་གྲྭ་ཆུང་ཅུང་ཆེ་བ་རྣམས་རྒྱབ་ལོགས་ཀྱི་ཅ་ལག་འཇོག་སར་བསྡད་ཅིང་། ཆུང་བ་རྣམས་མདུན་ཕྱོགས་མི་སྡོད་སར་འཛུལ་བྱུང་། དབུ་མཛད་དེ་ཁ་ལོ་བ་དང་ལྷན་མདུན་དུ་བསྡད་དེ་གྲྭ་ཆུང་དེ་པང་ལ་བཞག་ནས་ཕྱིན་སོང་།
ནང་ལ་སླེབས་ཡོད་པའི་མགྲོན་པོ་དང་ནང་མི་ཚོའི་ཁྲོད་དུ་ལ་ལས་ནང་ཕན་ཚུན་གྲྭ་ཆུང་དེ་ངོ་སྤྲོད་བྱེད་ཅིང་། ལ་ལས་སྨྲ་བ་གང་ཡང་མེད་པར་སྒེའུ་ཁུང་ནས་ཁོང་རྣམས་འགྲོ་སར་ཅེར་ཏེ་ལུས་འདུག ང་རང་ཐེམ་སྐས་ཀྱི་ཟུར་ནས་ལག་པར་ཆར་གདུགས་ཤིག་ཐོགས་ཏེ། ནག་ཐིང་ཐིང་གི་སྤྲིན་པའི་གསེང་ནས་བབས་པའི་ཁ་ཆར་ཟམ་ཟིམ་དང་། འདམ་རྫབ་ཀྱི་འགྲོ་ལམ་གྱ་གྱུ། གྱལ་གྱོལ་ངང་མདུན་དུ་བགྲོད་ཀྱིན་པའི་རླངས་འཁོར་ལ་བལྟས་ཏེ་ལུས།
