སློབ་དཔོན་ཚེ་དགའ་དབང་རྒྱལ།
དཀར་ངོགས་འཇིག་རྟེན་ནུབ་ཅིང་མུན་པའི་སྨག་ཞགས་གཡོགས་བྱུང་།།
སྲོག་ལྡན་གཉིད་ལ་ཡུར་ནས་སྲང་ལམ་དབེན་པས་བཏུམས་སོང་།།
ལྷིང་འཇགས་མཚན་མོ་དེ་ནས་ཚོར་བའི་ཁ་དོག་དཀྲུགས་ནས།།
གཟུགས་མེད་སེམས་ཀྱི་རྟ་ཕོ་ས་མཆོང་གནམ་མཆོང་བྱེད་ཀྱི།།
རབ་རིབ་ནག་ནོག་ཅིག་དེས་སྣང་བའི་འོད་དཀར་འཕྲོགས་ནས།།
དུག་སྦྲང་ངུ་སྒྲ་གཟན་པོས་རྣ་བའི་སྒོ་ཁ་རྡུང་དུས།།
མིག་ཤེས་མུན་པས་ཟིན་ཀྱང་ཚོར་བའི་ཀུན་རྟོག་ངང་ནས།།
འདས་མ་ད་གསུམ་ཡུལ་ལ་སྐད་ཅིག་ཉིད་ལ་འགྲིམས་སོང་།།
མཚན་ལྗོངས་དབེན་པའི་ཁྲོད་ནས་སེམས་པའི་སྙིང་རྩ་འགུལ་དུས།།
དྲི་གཞོན་དབྱངས་ཀྱི་རོལ་མོ་རྩེ་གསུམ་ཁ་ནས་བསྐྱུགས་ཐལ།།
མ་འོངས་སེམས་ཁམས་རི་མོ་ཤོག་དཀར་ངོས་སུ་བཀྲམས་ཏེ།།
སྙན་ཚིག་དབྱངས་ཀྱི་བུ་མོས་ཚོར་བའི་སེམས་གསོ་བྱེད་ཀྱི།།
གཉིད་མེད་མཚན་གཞུང་འདི་ནས་བསམ་བློ་མི་འཁོར་དགུ་འཁོར།།
ཁུ་སིམ་རྨི་ལམ་དྲི་ཞིམ་དྲན་རྟོག་རྒོད་པོས་དཀྲོགས་སོང་།།
ངེས་མེད་ལས་རླུང་དེད་པའི་འཚོ་བའི་གྲུ་ཁ་འདི་ནས།།
ཡིད་ལ་གཏད་སོ་མེད་པའི་སེམས་པའི་རུས་ཚིགས་བཅག་ཐལ།།
རླུང་བུ་སིལ་སིལ་ལྡང་ཞིང་སྡོང་ལོ་ལྡེམ་ལྡེམ་གཡུག་གིན།།
སྒེའུ་ཁུང་རས་དཀར་འཇམ་པོས་གདོང་གི་ངོས་ལ་བྱིལ་བྱུང་།།
ཟང་ཟིང་འུར་སྒྲ་བཅོམ་པའི་ནམ་གུང་འཇིག་རྟེན་འདི་ནི།།
སྙིང་ཁ་དྲག་ཏུ་ལྡིང་བྱེད་ཕུགས་ཀྱི་གཏན་ཚིགས་བཙན་པོ།།
མཚན་གྱི་དགུ་ཚིགས་སྐྱ་མོ་འཚོ་བའི་ཁ་ཕྱོགས་འདྲ་བ།།
སྟོང་སང་མུན་པའི་མཚན་ལྗོངས་ཕུགས་ཀྱི་མདུན་ལམ་འདྲ་བ།།
དྲན་ཤེས་རྦ་རླབས་འཕྱུར་བའི་གུང་གི་དུས་ཚིགས་འདི་ལ།།
ཚོར་བའི་ཀུན་རྟོག་ཕྲ་མོ་དྲན་རླུང་ཤུགས་ཀྱིས་བསྒུལ་བྱུང་།།
ཐུན་གསུམ་སྨག་རུམ་འོག་ཏུ་མི་ཚེའི་ཉིན་ཐོ་བཀླགས་ཤིང་།།
ཞི་བའི་གཉིད་ཀྱིས་རྨི་ལམ་ཕྱིར་དྲན་ལོ་ཟླས་ཟིན་ནས།།
ཁེར་རྐྱང་བུང་བའི་སེམས་པ་དགུང་གི་མཁའ་ལ་འཕྱོ་སྟེ།།
ཁོག་ལ་འཁྱིལ་བའི་རྟོག་ཚོར་སྒྱུ་མའི་ངག་གིས་བསྐུལ་བྱུང་།།
ཟང་ཟིང་སྣང་བ་ནུབ་པའི་དབེན་པའི་རྒྱ་གྲོང་གསེབ་ནས།།
ལུས་སེམས་ཁ་དོག་སྨུག་པོ་འཚོ་བའི་དབྱངས་དང་བསྡོངས་ཏེ།།
སྙིང་གི་སྟོད་ལ་ལྡིང་བའི་ཚོར་བ་དཀར་ཁྲ་དམར་ཁྲ།།
སེམས་ཀྱི་ཟབ་ས་ཞིག་ནས་རྩོལ་མེད་ངག་ནས་རྡོལ་བྱུང་།།
