རྩོམ་སྒྲིག་པ།
སོར་མོའི་མིང་།
ལག་པའི་ཡལ་ག་སོར་མོ་སྟེ།།
༡. ལག་པའི་ཡལ་ག ཇི་ལྟར་ཤིང་ལ་ཡལ་ག་ལྡན་པ་བཞིན་ལག་པ་ལའང་སོར་མོ་རྣམས་ལྡན་པས་འདྲ་བའི་ཆ་ནས་བཏགས་སོ།།
སེན་མོའི་མིང་།
ལག་སྐྱེས་སྡེར་མོ་སེན་མོའི་མིང་།།
༡. ལག་སྐྱེས། ལག་པ་ལས་སྐྱེས་པའི་རྒྱུ་མཚན་ཁོ་ནར་བྱས་ནས་ཐོགས་པའི་སེན་མོའི་མིང་གི་རྣམ་གྲངས་ཤིག་གོ།
༢. སྡེར་མོ། མི་ཡི་སེན་མོ་རིང་པོ་བསགས་ན་གཅན་གཟན་གྱི་སྡེར་མོ་ལྟར་ཆགས་འགྲོ་ཡི་ཡོད་པས་སོ།།
རྐང་པའི་མིང་།
རྒྱུ་བྱེད་བགྲོད་བྱེད་རྐང་པའི་མིང་།།
༡. རྒྱུ་བྱེད། མི་རྣམས་རྒྱུ་བའམ་འགྲོ་བར་བྱེད་པ་ལ་ཆ་རྐྱེན་གཙོ་བོ་རྐང་པ་ཡིན་པར་བརྟེན་མིང་དེ་ལྟར་བསྙད་པའོ།།
༢. བགྲོད་བྱེད། འགྲོ་བ་མིའི་རིགས་རྣམས་ལམ་ལ་བགྲོད་དུས་སམ་ཆས་དུས་རྐང་པ་ལ་བརྟེན་དགོས་ཀྱི་ཡོད་པས་དེ་ལྟར་བཏགས་པའོ།།
སྤྱན་གྱི་མིང་།
ལྟ་བྱེད་འདྲེན་བྱེད་ལྷའི་སྒྲོན་མ།།
སྣང་བྱེད་ཙཱཀྵུ་སྤྱན་གྱི་མིང་།།
༡. ལྟ་བྱེད། རང་ཡུལ་དུ་གྱུར་པའི་ཕྱི་རོལ་གྱི་དངོས་པོ་ཀུན་ལ་ལྟ་ནུས་པའི་བྱེད་ལས་ལྡན་པས་ན་མིང་དེ་ལྟར་ཐོགས་པའོ།།
༢. འདྲེན་བྱེད། གཟུགས་སོགས་གང་སྣང་བའི་ཆོས་རྣམས་འདི་ཉིད་ཀྱིས་ཚུར་འཐེན་པའམ་འདྲེན་པ་ལྟ་བུའི་བྱ་བ་བྱེད་པར་བརྟེན་མིང་དེ་ལྟར་བཏགས་པའོ།།
༣. ལྷའི་སྒྲོན་མ། ཇི་ལྟར་ལྷའི་སྒྲོན་མ་ཡིས་མི་གསལ་བ་རྣམས་གསལ་བ་བྱེད་པ་ལྟར་སྤྱན་ལ་ཡང་ནུས་པ་དེ་དང་མཚུངས་པ་ཞིག་ལྡན་པས་སོ།།
༤. སྣང་བྱེད། རང་ཡུལ་དུ་གྱུར་པའི་དངོས་པོ་རྣམས་གསལ་བར་བྱེད་པས་སོ།།
༥. ཙཱཀྵུ། རྒྱ་སྐད་དུ་སྤྱན་ལ་དེ་སྐད་ཟེར་རོ།།
ལྐུགས་པའི་མིང་།
ཚིག་ཉམས་ངག་དབུལ་ལྐུགས་པ་སྟེ།།
༡. ཚིག་ཉམས། སྨྲ་བྱེད་ཀྱི་དབང་པོ་ཉམས་པའི་རྒྱུ་མཚན་གྱིས་ཚིག་བརྗོད་པའི་ནུས་པ་མེད་པས་དེ་ལྟར་ཐོགས་སོ།།
༢. ངག་དབུལ། ལྐུགས་པ་ལ་ངག་གི་བརྗོད་ནུས་མི་ལྡན་པའམ་དབུལ་བས་མིང་དེ་ལྟར་བསྙད་པའོ།།
བླུན་པོའི་མིང་།
གླེན་པ་རྨོངས་པ་བླུན་པོའི་མིང་།།
༡. གླེན་པ། ལས་གང་ཞིག་བྱེད་ཀྱང་གླེན་རྟགས་ཚ་བས་མིང་དེ་ལྟར་བཏགས་པའོ།།
༢. རྨོངས་པ། བླང་དོར་གྱི་གནས་ལ་ཤིན་ཏུ་རྨོངས་པས་སོ།།
སྤྱང་པོའི་མིང་།
གྲིམ་གྲུང་སྒྲིན་པོ་སྤྱང་པོ་སྟེ།།
༡. གྲིམ་གྲུང་། སྤྱོད་ལམ་ཧ་ཅང་ལྷོད་པོ་མིན་པར་ཁྱུག་ཆ་དོད་པས་ན་མིང་དེ་ལྟར་ཐོགས་པའོ། །གྲིམ་དང་གྲུང་གཉིས་སོ་སོར་བཀྲལ་ནའང་ཆོག་པར་བཤད།
༢. སྒྲིན་པོ། སྤྱིར་སྒྲིན་པོ་ནི་མཁས་པ་ལ་གོ་ཞིང་སྤྱང་པོ་རྣམས་ཀྱང་དེ་དང་འདྲ་ཆེ་བས་ནའོ།།
