ལོ་རིམ་ལྔ་པའི་སློབ་གཉེར་བ། ལྷག་པ་རྡོ་རྗེ།
མ་བོས་ཀུན་ཁྱབ་དཔལ་མོའི་མགྲོན་པོ་མིན།།
མེ་ཏོག་ཀུ་མུད་འབྱེད་མཁན་དེ་བས་མིན།།
དག་དང་མ་དག་ཆོས་ཀུན་མངོན་སུམ་དུ།།
གསལ་བའི་འོད་ཀྱི་གོང་བུ་བློ་གྲོས་ཡིན།།
མདོ་སྔགས་རིག་པའི་གནས་ལ་མ་སྦྱངས་ཀྱང་།།
མཁས་པའི་བྱ་བ་རྩོམ་པར་མི་སྐྲག་མཁན།།
རི་ཁྲོད་འགྲིམ་པའི་རྟོགས་ལྡན་མིན་ན་ཡང་།།
རྐང་རྗེས་འཇོག་པའི་གྲུབ་ཐོབ་སྨྱུ་གུ་རེད།།
བཀྲེས་སྐོམ་སེལ་བར་རླན་གཤེར་ལོངས་སུ་སྤྱོད།།
འགྲུལ་བཞུད་མི་ཉིད་མཁོ་བའི་རྒྱབ་ཁུར་བ།།
སུག་བཞི་ཅན་གྱི་རྭ་ཅོ་མེད་པའི་གཡག།
ཚན་རྩལ་མཁས་པའི་ལག་རྗེས་རླངས་འཁོར་ཡིན།།
ཀུན་ཀྱིས་ཐོས་པར་མི་འདོད་རྣ་འགེབས་ཤིང་།།
དུག་དང་འདྲེས་པའི་ཟས་ལྟར་བརྩིས་བཞག་པའི།།
བྱེད་པོས་བྱས་མིན་སྤུ་གྲི་ངར་མའི་སོ།།
མི་དགེ་བཅུ་པོའི་སྤུན་ཟླ་ཚིག་རྩུབ་རེད།།
ཕན་གནོད་མཉམ་པ་གཉིས་སུ་མེད་པ་ཡི།།
རྒྱ་ནག་ཡུལ་ནས་འོངས་པའི་སྤུན་ཟླ་གཉིས།།
འགུལ་སྐྱོད་བྱ་བ་སྒོར་མོར་རག་ལུས་པའི།།
ཕོ་ཉ་མོ་ཡི་མིང་ལ་འཕྲིན་ཕྲན་ཟེར།།
བྱ་རེད་ཟེར་ན་གསལ་ཞིང་རིག་པས་དབེན།།
མ་རེད་ཟེར་ན་མཁར་ལྡིང་རོལ་རྩེད་མཚུངས།།
ཉིན་མཚན་ཁོར་མོ་ཡུག་ཏུ་འཁོར་ན་ཡང་།།
རང་སར་ལུས་པའི་བྱ་ལ་རླུང་འཁོར་ཟེར།།
