ཀུན་མཁྱེན་ཀློང་ཆེན་རབ་འབྱམས།
་་་་་འདོན་ཐེངས་སྔ་མའི་འཕྲོ།
འཚོ་བའི་སྲོག་ནི་འཆི་བདག་བདུད་ཀྱིས་འཕྲོག།
དར་བའི་ལང་ཚོ་དུས་ཀྱི་ནད་ཀྱིས་འཕྲོག།
འགྱུ་བའི་དབུགས་ནི་འཆི་བདག་སྲིན་པོས་འཕྲོག།
ཚེ་འདིའི་སྣང་བ་དུས་ཀྱིས་གཉེར་ཏེ་འཕྲོག།
དེ་བས་ནམ་འཆི་ངེས་པ་མ་མཆིས་པས།།
ཡུལ་དང་གནས་དང་ལོངས་སྤྱོད་ལ་སོགས་དང་།།
ཕུང་པོ་མི་རྟག་སྒྱུ་མའི་ལྡིང་ཁང་ལ།།
སེམས་ཤེས་སུ་ཞིག་སྲིད་པ་འཕེལ་བར་བགྱིད།།
མ་རིག་ཡང་སྲིད་སྡུག་བསྔལ་ཆུ་བོ་ལ།།
ནན་གྱིས་འཇུག་པ་འཁོར་བའི་རང་བཞིན་ལས།།
མཁས་པ་རྣམས་ནི་རབ་ཏུ་རྟོགས་པའི་ཕྱིར།།
འཇིག་རྟེན་ཚེ་འདིའི་འཛིན་པ་གཏོང་བར་མཛོད།།
འཇིག་རྟེན་འདི་ན་རྟག་པ་འགའ་མེད་དོ།།
སྣོད་ཀྱི་འཇིག་རྟེན་གླིང་བཞི་རི་རབ་དང་།།
ཉི་ཟླ་གཟའ་སྐར་འདོད་ལྷའི་སྐྱེད་མོས་ཚལ།།
བསམ་གཏན་གནས་དང་བཅས་པ་མ་ལུས་ཀུན།།
མེ་བདུན་ཆུ་གཅིག་རླུང་གིས་ཐོར་བའི་ཚེ།།
སྐྲ་རྩེའི་ལྷག་རོ་ཙམ་ཡང་མི་ལུས་ཤིང་།།
ཞིག་ནས་སྟོང་སྟེ་ནམ་མཁའ་གཅིག་ཏུ་འགྱུར།།
སོས་ཀ་དབྱར་དང་སྟོན་དུས་དགུན་དང་དཔྱིད།།
ལོ་ཟླ་ཚེས་གྲངས་སྐད་ཅིག་འགྱུར་བ་སྟེ།།
ཁ་སང་དེ་རིང་སང་དུ་འཕོ་བ་བཞིན།།
འདི་ལྟར་ས་སྟེང་འཇིག་རྟེན་མ་ལུས་ན།།
དབྱར་དུས་རྩྭ་ཤིང་མེ་ཏོག་སྨན་སྤོས་དང་།།
སེམས་ཅན་ཕྲ་མོ་ཇི་སྙེད་ཡོད་པ་ཀུན།།
དགུན་དུས་བསྐམས་ཏེ་མེད་པར་གྱུར་ལ་ལྟོས།།
བཅུད་ཀྱི་སེམས་ཅན་མི་རྟག་འགྱུར་བ་སྟེ།།
བདག་གིས་དྲན་དུས་ས་སྟེང་མི་རྣམས་ལས།།
རྒན་རབས་གཞོན་རབས་སྐལ་མཉམ་དུ་མ་འདས།།
ཕ་མ་མཛའ་བཤེས་གཉེན་འདུན་བྲན་དང་འཁོར།།
ཁྱིམ་གང་ནང་ནས་ལྷན་ཅིག་ཚོགས་རྣམས་ལས།།
ཕལ་ཆེར་འདས་ཤིང་མི་རྟག་སྐྱེ་བོ་འཕེལ།།
འགའ་ཙམ་ཡོད་ཀྱང་ལ་ལ་ཕྱོགས་གཞན་སོང་།།
རང་ཉིད་གཅིག་པུར་ད་ལྟ་གནས་ལ་སོགས།།
ལོ་བརྒྱའི་ཁོངས་སུ་འདས་པའི་མི་རྣམས་ཀྱིས།།
རྟག་ཏུ་རེ་བས་ནོར་དང་རྫས་བསགས་ཀྱང་།།
བཞག་ནས་སོང་སྟེ་ཤ་རུས་སོ་སོར་འབྲལ།།
སྐྱེ་ཤིའི་འཁོར་ལོས་གནས་པ་གཅིག་ཀྱང་མེད།།
ད་ལྟའི་ས་སྟེང་འགྲོ་བ་ཕལ་ཆེར་ཡང་།།
བདེན་པར་ཞེན་ནས་ནོར་དང་རྫས་ལ་སྲེད།།
འདོད་པས་གདུངས་ཏེ་གསོག་བྲུན་སྣ་ཚོགས་བྱེད།།
རྟག་ཏུ་སྡོད་སྙམ་གཅིག་གིས་གཅིག་ལ་འཚེ།།
ཆགས་སྡང་འཐབ་རྩོད་ཕྱོགས་རིས་བྱེད་ན་ཡང་།།
དུས་ཀྱིས་རྙིངས་པའི་ཤིང་ཏོག་བྲུལ་བ་བཞིན།།
སྔ་ཕྱིར་ཟད་ནས་རྟག་པ་འགའ་མེད་དེ།།
ལོ་བརྒྱའི་ནང་དུ་གཅིག་ཀྱང་ལུས་མི་འགྱུར།།
ཚལ་རྣམས་མེ་ཏོག་ཤིང་ལོ་འབོ་བ་བཞིན།།
སོ་དང་སྐྲ་སེན་ཤ་རུས་སོ་སོར་འབྲལ།།
འཚོལ་སྐྱོང་འདོད་པ་དུ་མས་ཅི་ཞིག་བྱ།།
ཚུལ་འདིས་ས་སྟེང་འགྲོ་བ་ཕལ་ཆེར་བསླུས།།
དེ་ལྟར་མི་རྟག་གཡོ་བར་མ་ཤེས་པར།།
ཕ་མ་མཛའ་བཤེས་གཉེན་དང་ནོར་གྱི་ཕྱིར།།
ཀུན་དང་རྩོད་ཅིང་མི་དགེའི་སྡིག་རྣམས་བསགས།།
སྡིག་དེ་བདག་ཉིད་གཅིག་པུས་མྱོང་བ་ལས།།
དེ་དག་སྐལ་ནོར་འགྱུར་བ་འགའ་ཡང་མེད།།
རྣམ་སྨིན་ཕྱི་ཕྱིར་འབྲང་བའི་ཁུང་ཐོགས་ནས།།
བདག་ཉིད་གཅིག་པུ་ཕྱི་རོལ་འགྲོ་བ་ན།།
སྡིག་པས་བསགས་པའིི་ནོར་རྣམས་གཞན་གྱིས་སྤྱོད།།
སེར་སྣས་ཡིད་ལ་འཕྲེང་ཡང་བྱ་ཐབས་མེད།།
གྲོ་ཟན་གཅིག་ཀྱང་ཁྱེར་བའི་དབང་མེད་ཅིང་།།
ཤུལ་རིང་བགྲོད་ལ་འགྲོགས་པའི་ཟླ་མི་རྙེད།།
ཆོས་མེད་མི་རྣམས་དེ་དུས་འཇིགས་པས་འདར།།
བར་དོའི་འཕྲང་ལ་གཅིག་པུར་འགྲོ་བ་ན།།
འཁོར་འདབས་ནང་མི་གཅིག་ཀྱང་ཁྲིད་དབང་མེད།།
ནོར་རྫས་ཏིལ་འབྲུ་གཅིག་ཀྱང་ཁྱེར་དབང་མེད།།
ཁ་དྲག་དཔུང་པ་གཅིག་ཀྱང་འཚོང་དབང་མེད།།
རང་དབང་གྲོས་མཐུན་གཅིག་ཀྱང་བྱ་དབང་མེད།།
བཟོ་རིག་ཡོན་ཏན་གཅིག་ཀྱང་བསྐྱང་དབང་མེད།།
བདེ་དལ་ཅུང་ཟད་གཅིག་ཀྱང་རང་དབང་མེད།།
འཁྲུལ་སྣང་ལས་ཀྱི་མེ་ལོང་གསལ་བར་འགྱུར།།
ཀྱེ་མ་དད་ལྡན་སྐྱེ་བོའི་ཚོགས་རྣམས་ཀུན།།
ད་ལྟའི་འདི་བཞིན་གཏན་དུ་མི་འོང་བས།།
གནམ་ས་འགྲེ་ལྡོག་རང་སྣང་བསྐལ་པ་འཁྲུག།
དེ་དུས་སྟོངས་པའི་དམ་ཆོས་བྱེད་རེ་རན།།
རན་པ་བས་ཀྱང་ཕྱིས་པར་གྱུར་པ་ཙམ།།
ད་ལྟ་ཉིད་ནས་བརྩོན་པས་འབད་འཚལ་ལོ།།
ལྷན་ཅིག་འདུས་པའི་ལུས་ཀྱང་སོ་སོར་འབྲལ།།
མཛའ་བཤེས་གཉེན་འདུན་སྲེད་པས་ཅི་ཞིག་བྱ།།
ཐམས་ཅད་བོར་ཏེ་གཅིག་པུར་འགྲོ་དུས་ན།།
སུ་ཉེ་སུ་མཛའ་ཇི་སྙེད་ཡོད་གྱུར་ཀྱང་།།
བདག་གི་ཕྱི་བཞིན་འགྲོ་བ་གཅིག་ཀྱང་མེད།།
གཉེན་བཤེས་བུ་སྨད་རྣམས་ཀྱིས་ཅི་ཞིག་བྱེད།།
ཚེ་འདིར་བསགས་པའི་ནོར་རྫས་ཅི་ཡོད་ཀྱང་།།
བཞག་ནས་འགྲོ་དུས་ཕན་པ་གཅིག་ཀྱང་མེད།།
དེ་བས་ད་ལྟ་སྦྱིན་པའི་གཏེར་དུ་སྦོས།།
རྗེས་སུ་འབྲང་ཞིང་འཕྲོག་ཏུ་མེད་པར་གསུངས།།
ནོར་རྫས་སྒྱུ་མ་ཡིན་གྱི་ཞེན་པ་སྐྱུངས།།
གཉེན་བཤེས་འཆིང་བ་ཡིན་གྱི་བརྩེ་གདུང་སྤོངས།།
ཚེ་འདི་རྨི་ལམ་ཡིན་གྱི་མི་རྟག་སྒོམས།།
གཟུང་འཛིན་འཁོར་བ་ཡིན་གྱི་རྒྱབ་ཏུ་བོར།།
ཐམས་ཅད་འགྱུར་ཡང་ད་དུང་རྟག་ཏུ་རེ།།
མཛའ་དང་མི་མཛའི་དོན་ཕྱིར་ཆགས་སྡང་བྱེད།།
འཁྲུལ་སྣང་དངོས་ལ་བློ་ལྟོས་བདེན་ཞེན་འཆའ།།
བྱིས་པའི་བྱ་བ་འདི་འདྲས་མངོན་པར་སྐྱོ།།
དེ་བས་ད་ལྟ་རང་གི་ཡོ་བྱད་དང་།།
གཉེན་འདུན་ཕྱིར་ཡང་སྡིག་པ་མི་གསོག་ཅིང་།།
དོན་མེད་འཚེ་དང་རྩོད་པ་མི་བྱ་ལ།།
ཉེའམ་རིང་ཡང་གཞན་གྱི་སེམས་མི་དཀྲུག།
ཀུན་ལ་སེམས་སྙོམས་ལས་སུ་རུང་བར་བྱ།།
དེས་ནི་འདི་ཕྱིར་ཕན་བདེ་འགྲུབ་པར་འགྱུར།།
དོ་ཅིག་ཡོང་བས་སང་ཕོད་ཡོད་པ་ལྟར།།
ཚེ་འདིར་ཡོད་པས་ཕྱི་མ་ཡོང་བར་འགྱུར།།
སང་ཕོད་ལོ་དང་ཚེ་རབས་ཕྱི་མ་གཉིས།།
གང་སྔ་ཡོང་བའང་སུ་ལ་གཏོལ་མེད་པས།།
སང་ཕོད་དོན་ལ་སོ་ནམ་བྱེད་པ་བཞིན།།
ཕྱི་མའི་དོན་དུ་དམ་ཆོས་སྤྱད་པར་རིགས།།
དེ་རིང་དོ་ནུབ་སང་ཉིན་མི་འཆི་ཞེས།།
རེ་ཞིག་བརྟགས་པས་འདུག་པར་རིགས་མ་ཡིན།།
གློ་བུར་རྐྱེན་གྱིས་མི་རྟག་གཡོ་བར་འགྱུར།།
དེ་བས་དེ་རིང་ཉིད་ནས་བརྩོན་པར་རིགས།།
ཚེ་འདི་འབབ་ཆུ་འདྲ་སྟེ་རྟག་པ་མེད།།
ལུས་འདི་གཡར་པོ་འདྲ་སྟེ་ཡིད་རྟོན་མེད།།
སྐྱེ་ཤི་འཁོར་ལོ་འདྲ་སྟེ་ཕ་མཐའ་མེད།།
ཆོས་ཀུན་སྒྱུ་མ་འདྲ་སྟེ་སྙིང་པོ་མེད།།
རང་གཞན་དར་རྒུད་རྨི་ལམ་སྣང་བ་འདྲ།།
རྟག་ཏུ་ཡིད་བརྟན་མེད་དོ་དམ་ཆོས་སྒྲུབས།།
ཚེ་འདིའི་འཁྲུལ་སྣང་བྱིས་པའི་རྩེད་མོ་འདྲ།།
བསླུ་ཞིང་འགྱུར་བ་ཡིན་ནོ་ཐར་ལམ་སྒྲུབས།།
ཐམས་ཅད་བདེན་མེད་བར་སྣང་འཇའ་ཚོན་འདྲ།།
གང་ལའང་ཡིད་བརྟན་མེད་ཀྱིས་བྱང་ཆུབ་སྒྲུབས།།
གཟུང་འཛིན་ཉོན་མོངས་སྤྲིན་ཚོགས་འཁྲིགས་པ་འདྲ།།
གློ་བུར་བག་ཆགས་ཡིན་གྱིས་སྒྲིབ་པ་སྦྱོངས།།
འདུས་བྱས་མི་རྟག་བར་སྣང་གློག་དང་འདྲ།།
སྐད་ཅིག་འགྱུར་བ་ཡིན་ནོ་གཏན་སྲིད་ཟུངས།།
འགྲོ་བ་གཡོ་བ་དུས་ཀྱི་ཤིང་འདབ་བཞིན།།
སྐྱེས་ཀྱང་འཆི་བ་ཡིན་ནོ་ཆོས་ལ་འབད།།
རང་བཞིན་འགྱུར་བ་ཚོགས་ཁང་སྐྱེ་བོ་བཞིན།།
འདུས་ཀྱང་འབྲལ་བ་ཡིན་ནོ་གདུང་སེམས་སྤོངས།།
རྟག་ཏུ་མི་གནས་རྫིང་བུའི་འབབ་ཆུ་འདྲ།།
བསགས་ཀྱང་འཛད་པ་ཡིན་ནོ་དངོས་ཞེན་སྤོངས།།
ཐམས་ཅད་དར་ཏེ་མེ་ཏོག་བཀྲམ་པ་བཞིན།།
དར་ཡང་རྒུད་པ་ཡིན་ནོ་རློམ་སེམས་སྤོངས།།
ད་རེས་ཐར་ལམ་བྱང་ཆུབ་མ་བསྒྲུབས་ན།།
གཏན་དུ་འཁོར་བའི་གནས་ལས་ཐར་མི་འགྱུར།།
སྡུག་བསྔལ་ཆུ་བོ་ཤིན་ཏུ་བགྲོད་དཀའ་བས།།
རང་གཞན་དུཁས་གདུང་བའི་ཚུལ་ལ་ལྟོས།།
དལ་འབྱོར་སྙིང་པོ་ལྡན་པའི་ལུས་ཐོབ་ནས།།
ཐར་ལམ་མ་ཟིན་དོན་མེད་འདའ་བྱས་ན།།
འདི་ལས་བསླུས་པ་བདག་ལ་གང་ཞིག་ཡིད།།
ཕྱི་ཕྱིར་སྡུག་བསྔལ་བརྒྱ་ཕྲག་བཟོད་ནུས་སམ།།
དེ་བས་རིན་ཆེན་གྲུ་བོ་རྙེད་དུས་འདིར།།
མངོན་མཐོ་ངེས་ལེགས་ལམ་བཟང་སྲོལ་བཏོད་དེ།།
དམ་ཆོས་ཆེད་དུ་བརྩོན་འགྲུས་བརྩམ་པར་བྱ།།
དེས་ནི་བརྒལ་དཀའི་སྲིད་མཚོ་སྒྲོལ་བར་འགྱུར།།
སྲིད་ལས་ཞི་བར་འཇུག་པ་དེ་དག་གིས།།
ལྷ་དང་མི་ཡི་ཆོས་ལུགས་ལ་བརྟེན་ནས།།
རིམ་གྱིས་ཐར་པའི་བྱང་ཆུབ་ཐོབ་པར་གསུངས།།
དེ་ཕྱིར་ཐོག་མར་མངོན་མཐོའི་ཆོས་ལ་བསྟེན།།
དེ་ཡང་ངོ་ཚ་ཤེས་དང་ཁྲེལ་ཡོད་པ།།
གཉིས་ལ་བརྟེན་ནས་ཡོན་ཏན་བསྒྲུབ་པ་སྟེ།།
དགེ་བ་བཅུ་དང་བསམ་གཏན་གཟུགས་མེད་བཞི།།
བག་ཡོད་བསོད་ནམས་ཆ་མཐུན་ལས་རྣམས་ཀྱིས།།
ལྷ་མིའི་བདེ་འབྲས་གོང་མ་ཐོབ་པས་ན།།
དགེ་བའི་ལས་རྣམས་ཀུན་ལ་བསླབ་པར་བྱ།།
འདི་ལྟར་རང་གི་མཛའ་བཤེས་གཉེན་རྣམས་དང་།།
ནང་མི་གྲོང་མཚེས་གཞན་ཡང་འགྲོ་རྣམས་ལ།།
བྱམས་པའི་སེམས་དང་བརྩེ་བའི་མིག་གིས་བལྟ།།
ཆོས་ལ་བསྐུལ་ཞིང་སྡིག་ལས་ལྡོག་པར་བྱ།།
དཀོན་མཆོག་མཆོད་ཅིང་ཕོངས་ལ་སྦྱིན་པ་དང་།།
རྒན་རབས་སྲི་ཞུ་ཕ་མའི་བཀུར་སྟི་དང་།།
ལམ་མཐུན་གློ་བུར་ལྷགས་དང་ནད་པའི་ཚོགས།།
མགོན་མེད་རྣམས་ལ་ཕན་ཐོགས་རྒྱ་ཆེར་བྱ།།
སྡུག་ཕོངས་རྣམས་ལ་དུས་སུ་སྦྱིན་པ་དང་།།
དམ་པ་མཆོད་ཅིང་སྦྱིན་པའི་ས་བོན་གདབ།།
ལམ་གྱི་སྟེགས་དང་གྲུ་ཟམ་འཛུགས་པ་དང་།།
མགྲོན་ཁང་བརྩིག་དང་ཆུ་རགས་བཟང་པོ་དང་།།
ཟས་སྐོམ་ཚུལ་དང་ཕན་ཐོགས་ཅི་འགྲུབ་བྱ།།
ལམ་འཕྲང་སྐྱེལ་བསུ་མི་འཇིགས་སྦྱིན་པ་དང་།།
བྱ་དང་རི་དྭགས་ཉ་དང་འགྲོ་རྣམས་ལ།།
རི་རྒྱ་ཆུ་རྒྱ་མགོན་སྐྱབས་དཔུང་གཉེན་དང་།།
གནས་མལ་སྦྱིན་སོགས་སྐྱབས་ཀྱི་སྦྱིན་པ་དང་།།
མཆོད་རྟེན་ལྷ་ཁང་སྐུ་གཟུགས་ལ་སོགས་ལ།།
ཕྱག་དང་སྐོར་བ་དད་པས་ཐལ་མོ་སྦྱར།།
དང་བས་ལྟ་དང་གུས་པས་མཆོད་པ་དང་།།
རྙིང་པ་གསོ་དང་ཞིག་རལ་བཅོས་པར་བྱ།།
ཕྱི་ནང་ཀུན་ཏུ་བཟང་སེམས་སྙོམས་པ་དང་།།
དོན་མཐུན་སྙན་པར་སྨྲ་བས་ཆོས་ལ་བསྐུལ།།
ཁྲོ་དང་འཐབ་རྩོད་ཚིག་རྩུབ་སྤང་བྱ་ཞིང་།།
ཅི་ནས་གཞན་གྱི་ཡིད་དང་མཐུན་པར་བྱ།།
མི་སྙན་སྨྲ་ལ་རྩུབ་མོའི་ལན་མི་གདབ།།
རྟག་ཏུ་ཁོག་ཡངས་གཟེ་རེ་ཆུང་པ་དང་།།
གཞན་ལ་མི་གནོད་ཅི་འགྲུབ་ཕན་འདོགས་ཤིང་།།
གཡོ་དང་ཟོལ་མེད་རང་སེམས་རྣམ་དག་བྱ།།
བཟང་པོའི་དྲིན་རྣམས་བརྗེད་པ་མེད་པ་དང་།།
ཕྱི་ཐག་རྒྱུན་རིང་འགྲོགས་གཞུང་བསྟེན་བྱ་ཞིང་།།
བྱ་བ་ཀུན་ལ་རང་བཞིན་བརྟག་པ་དང་།།
མཐོ་དམན་གང་ལའང་རེ་བས་བསྒྱུར་བར་བྱ།།
འབྱོར་བའི་དུས་སུ་དྲེགས་པར་མི་བྱ་ལ།།
གཞན་སེམས་མི་དཀྲུག་ཕྲག་དོག་ཟུག་རྔུ་སྤང་།།
འགྲན་སེམས་མི་བྱ་ཆགས་སྡང་འཐབ་རྩོད་དོར།།
ཁྱད་དུ་མི་བསད་ཞི་དེས་ལྡན་པར་བྱ།།
དབུལ་ཞིང་རྒུད་ཚེ་ཧ་ཅང་མི་ཞུམ་ཞིང་།།
སྔོན་གྱི་ལས་བརྟག་གཞན་ལ་འཁང་མི་བྱ།།
སྡིག་ལ་མི་འཇུག་ངོ་ཚ་ཁྲེལ་ཡོད་བསྟེན།།
རང་ཚུགས་ཐུབ་པས་དགེ་ཞིང་བརྟན་པར་བྱ།།
ཆོས་ལྡན་བདེ་ན་གཞན་དུ་མི་འཁྱམས་ཤིང་།།
གང་འདུག་གནས་ལ་རང་བཞིན་བརྟན་པར་བྱ།།
ཆོས་མིན་སྡུག་ན་ཡུལ་གཞན་སྤོ་བྱས་པས།།
སྔར་བས་ཇེ་བདེར་འགྱུར་བ་ཆོས་ཉིད་ལགས།།
མདོར་ན་གང་སྣང་བདེ་སྡུག་མཐོ་དམན་ཀུན།།
ལས་སུ་ཤེས་ནས་ངན་པ་སྤང་བ་དང་།།
བཟང་པོ་སྒྲུབ་ཅིང་ངང་རྒྱུད་དགེ་བར་བྱ།།
འདི་དང་ཕྱི་མར་ལེགས་པ་སྒྲུབ་པ་ལགས།།
རང་གི་སྡུག་བསྔལ་གཞན་ལ་མི་སྤོ་ཞིང་།།
དང་ལེན་བཟོད་པས་བསྲན་པར་བྱ་བ་དང་།།
ཐོག་ཏུ་གང་བབས་རང་གི་ལས་ཤེས་པས།།
དགག་སྒྲུབ་བཏང་ལ་ལེགས་ཉེས་ཤེས་པར་བྱ།།
གཞན་གྱི་ཚིག་ལ་བདེན་རྫུན་བརྟག་བྱ་ཞིང་།།
ཁ་ཏར་ཤེས་པས་བླང་དོར་དྲན་བྱ་ཡིས།།
ཁྲོ་བར་མི་བྱ་སླར་ལ་ཁོང་ཡངས་བསྐྱེད།།
བཟོད་བྱ་དེས་པས་རང་རྒྱུད་དུལ་བར་བྱ།།
དེ་དག་ལ་སོགས་ལེགས་པའི་དངོས་རྣམས་ལ།།
ཆོས་དང་འཇིག་རྟེན་ཕལ་ཆེར་དོན་མཐུན་པས།།
སྔོན་གྱི་ཆོས་རྒྱལ་དམ་པ་དེ་དག་དང་།།
སྐྱེ་བོ་མཛངས་པ་རྣམས་ཀྱི་རྗེས་འགྲོ་བྱ།།
འདི་ནི་རང་གཞན་ཡུན་གྱི་དོན་སྲིད་མཆོག།
ཕན་པའི་གདམས་ངག་བདུད་རྩི་ཡིན་གྱིས་ཉོན།།
འཇིག་རྟེན་དགེ་བ་ཅན་རྣམས་ཐར་པ་ཡི།།
གྲོང་ཁྱེར་མཆོག་ཏུ་འཛེགས་པའི་ཐེམ་སྐས་མང་།།
དེ་ལྟར་ལྷ་མིའི་ཆོས་ལུགས་ལེགས་རྟོགས་ནས།།
སྲིད་པའི་གྲོང་ལས་རབ་ཏུ་འདའ་བའི་ཕྱིར།།
མྱ་ངན་འདས་པ་མཆོག་ཏུ་ཞིར་འགྲོ་བ།།
ཐར་པ་བྱང་ཆུབ་སྒྲུབ་ལ་འབད་པར་བྱ།།
བྱང་ཆུབ་རྩ་བ་ས་བོན་སྙིང་རྗེའི་བདག།
སྲིད་པ་ན་ཡང་བདེ་བའི་འབྲས་མང་ཞིང་།།
མཐར་ཐུག་གཞལ་མེད་ཡོན་ཏན་ཡིད་བཞིན་གཏེར།།
གཞན་དོན་རྫོགས་པའི་བྱང་ཆུབ་སེམས་བསྐྱེད་བྱ།།
འདི་ནི་བསོད་ནམས་ཕུང་པོ་དཔག་མེད་དེ།།
རྒྱལ་བས་བསྔགས་ཤིང་འཇིག་རྟེན་གསུམ་གྱིས་བསྟོད།།
ཆོས་དབྱིངས་ཇི་བཞིན་ནམ་མཁའི་དབྱིངས་ཀུན་ཁྱབ།།
མཐའ་ཡས་ཡོན་ཏན་དཔག་མེད་ཚོགས་དང་ལྡན།།
གང་གིས་ཐར་པའི་མཆོག་ལ་རབ་དམིགས་ཏེ།།
རྫོགས་པའི་སངས་རྒྱས་འགྱུར་ཞེས་སྨོན་པ་དང་།།
འཇུག་པའི་རང་བཞིན་མངོན་པར་སྒྲུབ་བྱེད་ན།།
དགེ་བ་དེ་འདྲ་འཇིག་རྟེན་གསུམ་ན་མེད།།
བྱང་ཆུབ་སྨོན་པ་ཡོངས་བཟུང་དག་པར་སྤེལ།།
ཚད་མེད་བཞི་ལ་བསླབ་པར་སྟོན་པས་གསུངས།།
སྡུག་བསྔལ་མང་ལྡན་སྲིད་པའི་སེམས་ཅན་རྣམས།།
ཐོག་མཐའ་མེད་ནས་འཁོར་བ་འདིར་འཁྱམས་ཏེ།།
རྟག་ཏུ་སྡུག་བསྔལ་གྱུར་ལ་རབ་བརྩེ་བས།།
བྱམས་པའི་ས་གཞིར་སྙིང་རྗེའི་མེ་ཏོག་བཀྲམ།།
དགའ་བའི་ལྗོན་ཚོགས་བཏང་སྙོམས་མཚོ་བསིལ་གྱིས།།
མ་ལུས་འགྲོ་ལ་ཞི་བདེའི་སེམས་མཆོག་སྦྱང་།།
འཇུག་པའི་རང་བཞིན་ཡོངས་བཟུང་དག་པར་སྤེལ།།
ཕ་རོལ་ཕྱིན་རྣམས་རིམ་པས་བསླབ་པར་བྱ།།
ཕྱིན་དྲུག་རང་བཞིན་སུམ་ཅུ་རྩ་དྲུག་ལས།།
གོ་ཆའི་སྒྲུབ་པས་སྒྱུ་མ་བཞིན་དུ་སྤྱད།།
སྤྱོད་པ་པོ་དང་སྤྱད་བྱའི་དངོས་པོ་དང་།།
ཡུལ་རྣམས་མི་དམིགས་འཁོར་གསུམ་དག་པ་ཡིས།།
བྱང་ཆུབ་དགེ་བ་ཐར་པའི་མཆོག་ཏུ་བསྔོ།།
རྒྱལ་སྲས་རྣམས་ཀྱི་སྤྱོད་པ་དམ་པ་ཡིན།།
རྣམ་བཅུ་དབང་ལྡན་ངོ་བོ་འཁོར་གྱི་ཚུལ།།
སྦྱིན་དང་ཚུལ་ཁྲིམས་བཟོད་དང་བརྩོན་འགྲུས་དང་།།
བསམ་གཏན་ཤེས་རབ་ཐབས་སྟོབས་སྨོན་ལམ་དང་།།
ཡེ་ཤེས་ཕ་རོལ་ཕྱིན་བཅུ་རེ་རེ་བཞིན།།
བཅུ་བཅུ་རྗེས་འགྲོ་བརྒྱ་ཕྲག་དམ་པ་ནི།།
ཁྱད་པར་ཅན་དང་ཁྱད་པར་མེད་ཚུལ་གྱི།།
ས་རྣམས་ཀུན་ཏུ་ཡོངས་སུ་བསྒྲུབ་པར་བྱ།།
ཚོགས་སྦྱོར་མཐོང་སྒོམ་པ་ཡི་ལམ་བཞི་རུ།།
དྲན་དང་སྤོང་བཞི་རྫུ་འཕྲུལ་རྐང་པ་བཞི།།
དབང་པོ་སྟོབས་ལྔ་བྱང་ཆུབ་ཡན་ལག་བདུན།།
འཕགས་ལམ་བརྒྱད་དེ་མཉམ་རྗེས་སྤྱོད་ཡུལ་ཅན།།
བྱང་ཆུབ་ཕྱོགས་ཆོས་སུམ་ཅུ་བདུན་བསྒོམ་བྱ།།
གཟུངས་དང་ཏིང་འཛིན་ཉི་མ་རྒྱ་ཆེ་ཞིང་།།
སྤྱན་དང་མངོན་ཤེས་འོད་ཟེར་སྟོང་འཕྲོ་བས།།
རིག་པའི་མཁའ་དབྱིངས་དམ་པས་རབ་བརྒྱན་ཅིང་།།
ཞི་བའི་རྣམ་གྲོལ་རབ་ཏུ་བརྟན་པ་ཡིས།།
གོང་ནས་གོང་དུ་ས་རྣམས་རབ་འཕར་ཞིང་།།
སྒྲིབ་པའི་མུན་བྲལ་ཡེ་ཤེས་དབྱིངས་ལ་སྦྱོར།།
ཏིང་འཛིན་ཡོན་ཏན་འབུམ་ཕྲག་ཡངས་པའི་ཆོས།།
རྒྱ་མཚོའི་རྡུལ་གྱི་རྗེས་སུ་འགྲོ་བ་ལགས།།
མཐར་གྱིས་དག་པ་གཉིས་ལྡན་ཆོས་སྐུའི་མཁར།།
ལོངས་སྤྱོད་རྫོགས་དང་སྤྲུལ་པས་རབ་བརྒྱན་ཏེ།།
ཀུན་ཏུ་འོད་ཟེར་འགྱེད་པའི་ས་ཐོབ་ནས།།
རང་གཞན་དོན་གཉིས་ལྷུན་གྱིས་གྲུབ་པ་ཡིན།།
དེ་ཕྱིར་བྱང་ཆུབ་དོན་དུ་གཉེར་རྣམས་ཀྱིས།།
ནམ་གྱི་ཆ་སྟོད་ཉིད་དང་ཆ་སྨད་དང་།།
སྔ་དྲོ་ཕྱི་དྲོ་གུང་རྣམས་རྟག་བརྩོན་པས།།
བསམ་གཏན་དང་ནི་འདོན་ལ་བརྩོན་འགྲུས་བརྩམ།།
མཚན་མོའི་ཐུན་སྨད་གཉིད་ཀྱིས་སྙོམས་པ་ནའང་།།
སྡིག་ཟད་ཉོན་མོངས་མེད་ཡིད་ཅན་གྱིས་ཉལ།།
ལྡང་ཚེ་རྨི་ལམ་སྡིག་པ་བཤགས་བྱ་ཞིང་།།
དགེ་བར་མཐོང་ན་ཡི་རང་བསྔོ་བར་བྱ།།
དུས་རྣམས་ཀུན་ཏུ་མི་རྟག་འཆི་དང་སྐྱེ།།
དགེ་དང་དཀོན་མཆོག་གསུམ་པོ་དྲན་བྱ་ཞིང་།།
སྤྱོད་ཡུལ་དག་པའི་སྤྱོད་པ་རྣམས་སྦྱང་དང་།།
སྐྱེས་བུ་ཆེན་པོའི་རྣམ་རྟོག་བརྒྱད་དྲན་བྱ།།
ཟས་ཀྱི་ཚེ་ནའང་མི་གཙང་འགྱུར་བ་དང་།།
སྲིན་བུའི་གྲོང་ལ་ཕན་པར་འདོད་པ་དང་།།
སངས་རྒྱས་ཆོས་དང་དགེ་འདུན་རྗེས་དྲན་པས།།
རན་པར་ཟ་ཞིང་སྨོན་ལམ་རྒྱ་ཆེར་གདབ།།
ཉིན་མཚན་ཀུན་ཏུ་དད་པས་བརྩོན་འགྲུས་བརྩམ།།
སྤྱོད་ལམ་ཀུན་ཏུ་ཆོས་ཀྱིས་འདའ་བར་བྱ།།
དུས་རྣམས་ཀུན་ཏུ་རང་རྒྱུད་འབའ་ཞིག་འདུལ།།
སེམས་བསྐྱེད་ཀུན་ཏུ་གཞན་ཕན་འབའ་ཞིག་གིས།།
སེམས་ཅན་མཐོང་ལ་བྱམས་པའི་སེམས་གཙང་གིས།།
བྱང་ཆུབ་སྙིང་པོ་ཅན་ཞེས་གུས་པ་བསྐྱེད།།
སྐུ་གཟུགས་མཆོད་རྟེན་བསོད་ནམས་ཞིང་རྣམས་ལ།།
རྒྱལ་བའི་བྱང་ཆུབ་ལྗོན་ཤིང་དྲན་པར་བྱ།།
མཁན་པོ་སློབ་དཔོན་བླ་མའི་གནས་དག་ལ།།
རྒྱལ་བའི་རྣམ་འཕྲུལ་དངོས་སུ་བལྟ་བྱ་ཞིང་།།
ཆོས་མཛད་རྣམས་ལ་འཕགས་པའི་དགེ་འདུན་དུ།།
གུས་པ་བསྐྱེད་ལ་དག་སྣང་མོས་གུས་བྱ།།
གཞན་སྐྱོན་མཐོང་ན་རང་སྣང་འཁྲུལ་བར་བསམ།།
ཡོན་ཏན་མཐོང་ན་རྗེས་སུ་ཡི་རང་བསྒོམ།།
རང་སྐྱོན་ངན་པ་མཚང་དང་ཡུལ་ནས་འདོན།།
ཡོན་ཏན་སྤེལ་ཞིང་བརྩོན་འགྲུས་དཔེ་མེད་བརྩམ།།
དམ་པར་བསྟེན་ཅིང་སྡིག་པའི་གྲོགས་པོ་སྤང་།།
དབེན་པར་གནས་ཤིང་སྦྱངས་པའི་ཡི་དམ་བླང་།།
ཐོས་བསམ་སྒོམ་པས་རང་གི་རྒྱུད་སྦྱངས་ཤིང་།།
ཅི་བྱེད་དམ་པའི་ཆོས་སུ་འགྲོ་བར་བྱ།།
སེམས་ཉིད་དབྱིངས་ལ་ལྟ་བའི་རྫོང་བཅའ་ཞིང་།།
གནས་ལུགས་ངང་ལ་མི་རྟོག་མཉམ་པར་བཞག།
ཕྱི་ནང་ཆོས་ལ་སྒྱུ་མར་སྤྱད་བྱ་ཞིང་།།
འོད་གསལ་ཆོས་སྐུའི་འབྲས་བུ་མངོན་གྱུར་བྱ།།
འདི་ལྟར་ཡུལ་དུ་སྣང་བའི་ཆོས་རྣམས་ཀུན།།
རྨི་ལམ་སྒྱུ་མ་མིག་གཡོར་སྤྲུལ་པ་འདྲ།།
དྲི་ཟའི་གྲོང་བཞིན་སྣང་དུས་རང་བཞིན་མེད།།
གཟུང་དང་གཟུང་ཡུལ་མེད་པ་གསལ་སྣང་ཙམ།།
འཛིན་པའི་སེམས་ཀྱང་གཞི་རྩ་རྟེན་མེད་དེ།།
ངོ་བོ་དངོས་མེད་ཁ་དོག་དབྱིབས་དང་བྲལ།།
མཁའ་བཞིན་རྣམ་དག་རྒྱ་ཆད་ཕྱོགས་ལྷུང་བྲལ།།
དོན་དམ་བདེ་གཤེགས་སྙིང་པོའི་རང་བཞིན་ལགས།།
དེ་ལྟར་གཟུང་དང་འཛིན་པ་གཉིས་མེད་པས།།
མཁའ་ལྟར་བདག་མེད་སྤྲོས་ཀུན་ཞི་བ་ཉིད།།
མ་སྐྱེས་པ་དང་མི་གནས་འགྲོ་འོང་མེད།།
བསམ་འདས་བརྗོད་མེད་བྱང་ཆུབ་སེམས་ཀྱི་ངང་།།
ཟབ་མོ་འཕགས་པའི་སྤྱོད་ཡུལ་རིག་ཞི་བ།།
བླ་མའི་ལུང་བཞིན་མཉམ་པར་བཞག་པར་བྱ།།
དེ་ལྟར་བརྩོན་པས་ཉིན་མཚན་འདའ་བྱས་ན།།
ལམ་ལྔ་ས་བཅུ་རིམ་གྱིས་གོང་བགྲོད་དེ།།
རང་གཞན་དོན་གཉིས་ལྷུན་གྱིས་གྲུབ་པའི་གནས།།
ཡོན་ཏན་ཚོགས་ཆེན་ལྷུན་གྲུབ་ཐོབ་པར་འགྱུར།།
རབ་བཟང་སྐྱེ་བོ་རྣམས་ལ་ཆོས་ཀྱི་གཏམ།།
དྲི་མེད་ཚངས་པའི་རྔ་ཆེན་སྙན་བསྒྲགས་པས།།
འགྲོ་ཀུན་ཚོགས་གཉིས་དགེ་བའི་ལམ་ཞུགས་ཏེ།།
ཐར་གླིང་བྱང་ཆུབ་འབྱོར་པ་མཐའ་ཡས་ཤོག།
ཚུལ་འདི་ཤེས་བྱའི་ནམ་མཁའ་ཡངས་པ་ལ།།
བློ་གྲོས་འོད་སྟོང་ཉིན་མོར་བྱེད་པ་དེས།།
གངས་རི་ཐོད་དཀར་མགུལ་དུ་ལེགས་པར་སྦྱར།།
དད་ལྡན་ཐར་པ་འདོད་རྣམས་དགའ་བར་མཛོད།།
ཐར་པ་ལ་སྐུལ་བའི་རབས་ཞེས་བྱ་བ་མང་དུ་ཐོས་པའི་སྙན་ངག་མཁན་ཀུན་མཁྱེན་ངག་གི་དབང་པོས་གངས་རི་ཐོད་དཀར་གྱི་མགུལ། འོད་ཟེར་སྤྲིན་གྱི་སྐྱེད་མོས་ཚལ་གྱི་ནང་། ཀུན་ཏུ་བཟང་པོའི་ཁང་བཟང་མཆོག་ཟླ་བ་ཆུ་ཤེལ་གྱིས་འཚེར་བའི་གནས་སུ་ལེགས་པར་སྦྱར་བ་ནི་རེ་ཞིག་རྫོགས་སོ།། དགེའོ།།
ཁུངས་གཏུག་སའི་ཡིག་ཆ།
སྡེ་དགེའི་པར་ཁང་ཆེན་མོའི་ཤིང་པར་ལ་ཁུངས་གཏུགས་ནས་སྔ་འགྱུར་རིག་མཛོད་རྩོམ་སྒྲིག་པས་བཏུས།
