ལོ་རིམ་ལྔ་པའི་སློབ་གཉེར་བ། སྤྲུལ་སྐུ་བསྟན་པ་རྒྱལ་མཚན།
ཚན་རྩལ་རིག་པའི་མཁའ་དབུགས་གང་སར་ཁྱབ་པའི་ཁྲོད། སྲོལ་རྒྱུན་ལ་ཐན་དུ་ལྟ་ཞིང་། རིག་གསར་ལ་གསེར་དུ་སྒོམ་པ་སྟེ། ཁ་སང་དེ་རིང་གི་དུས་རབས་འདིར་སྤྱི་ཚོགས་གསར་པའི་འགྲོ་སྟངས་དང་འཚམས་པར་ཀླད་གསར་བ་བྱེད་དགོས་ཞེས་པའི་ལྟ་སྟངས་དེ་ལ་མཚོན་ན། ཆབ་སྲིད་ཀྱི་གནས་བབས་ཁྲོད་དེས་གོ་ས་ག་འདྲ་ཞིག་བཟུང་ཡོད་མེད་བདག་ལྟ་བུ་ཞིག་གིས་སྨྲ་མི་ཐུབ་མོད། ཁ་ཡོད་ལག་ཡོད་འུ་ཚོ་དང་ཐད་ཀར་འབྲེལ་བའི་ནང་བསྟན་ཆོས་ལུགས་པའི་སྡེ་ཚན། དེའི་ནང་ནས་ཀྱང་གྲྭ་པའི་སྤྱི་ཚོགས་ཤིག་གི་ངོས་ནས་བཤད་ན། ལྟ་སྟངས་དེའི་ཤུགས་རྐྱེན་འོག་གང་ཟག་སྒེར་གྱི་སེམས་ཁམས་ལ་རང་གི་ས་མཚམས་ལས་བརྒལ་བའི་བྱ་གཞག་སྣ་ཚོགས་ཤིག་བསྒྲུབ་རྒྱུའི་ཀུན་སློང་སྐྲུན་བཞིན་ཡོད་པ་ནི་ཕར་བལྟས་ཚུར་གསལ་དུ་གྱུར་འདུག
དེས་ན་ཁོ་བོས་རང་ཉིད་གང་དུ་སྡོད་སའི་གྲྭ་པའི་སྤྱི་ཚོགས་ནང་ལྟ་སྟངས་དེའི་ཐོག་ནས་རང་གི་ས་མཚམས་ལས་བརྒལ་ཏེ། རང་ཉིད་གང་ལ་ཆོས་སྒོར་ཞུགས་སའི་ཐུབ་བསྟན་སྤྱི་དང་བྱེ་བྲག་དེ་འཛིན་གྱི་སྐྱེས་བུ་དམ་པར་ཟུར་ཟ་ཁ་སྨྲས་བྱེད་མཁན་མངོན་སུམ་མཐོང་ཆོས་སུ་གྲུབ་སོང་བ་ཡིད་སྐྱོའི་གནས་ཚུལ་དེའི་ཐད། བསྟན་དོན་ཡིད་ལ་བརྣགས་ཏེ་གཤམ་དུ་འབོད་སྐུལ་ཚུལ་དུ་སྐད་ཆ་ཁ་ཤས་ཞུ་འདོད་བྱུང་།
སྤྱིར་དུས་རབས་ཀྱི་ཡར་རྒྱས་དང་མཉམ་དུ་མིའི་རིགས་ལ་དགོས་མཁོའི་བློ་སྐྱེད་མང་དག་ཅིག་བླང་རྒྱུ་ཡོད་པ་ནི་དངོས་འབྲེལ་ཡིན་མོད། ཡིན་ན་ཡང་དང་ཐོག་ཁ་ནང་ལ་ཕྱོགས་ཏེ་རང་ཉིད་སུ་ཞིག་ཡིན་མིན་ཤེས་པའི་ཐོག་ནས། བྱ་གཞག་གང་ཡིན་རུང་རང་གི་ས་མཚམས་ལས་བརྒལ་བ་རེད་འདུག་དང་མི་འདུག་བསམ་གཞིག་བྱས་ཏེ། དེ་ལ་འཇུག་ལྡོག་བྱེད་དགོས་པ་ནི་གལ་ཆེན་དུ་མཐོང་སྟེ། ཆོས་འཇིག་རྟེན་གང་རུང་གི་ཁྲིམས་དང་ལྡན་པའི་སྤྱི་ཚོགས་ཤིག་གི་ཁྱབ་ཁོངས་སུ་བསྡད་ཕྱིན་དེ་ལ་བྱ་བ་དེ་དང་དེ་བྱེད་ཆོག་དང་མི་ཆོག་གི་ས་མཚམས་ཀྱང་ཡོད་པས། གལ་ཏེ་གང་ཟག་སུ་ཞིག་གིས་ས་མཚམས་ལས་བརྒལ་བའི་བྱ་གཞག་བསྒྲུབས་ཚེ་མང་ཚོགས་ནས་དེ་ལ་རང་བཞིན་གྱིས་ལྟ་སྟངས་ངན་པ་ཞིག་ཡོང་གིན་ཡོད། དཔེར་ན་སློབ་གྲྭ་ཞིག་ལ་མཚོན་ན་སློབ་ཕྲུག་དེས་སྒྲིག་གཞིའི་ས་མཚམས་ལས་བརྒལ་བའི་ལས་ཀ་ཞིག་ལས་ཚེ་གོང་རིམ་ནས་དེ་ལ་ཉེས་ཆད་འགེལ་བ་སོགས་ལྟ་སྟངས་ངན་པ་ཡོང་བ་བཞིན་ཏེ། དེས་ན་ཞུ་འདོད་པ་ནི་དེང་སང་རང་རེ་གྲྭ་པའི་སྤྱི་ཚོགས་ཁྲོད་འདི་འདྲ་ཞིག་ཡོང་གིན་པ་སྟེ། ཚང་མ་ལ་ཞུས་པ་ལར་ནས་མིན་ཡང་ཁ་ཅིག་འདི་ལྟར་དོ་བདག་སོ་སོས་གཞུང་ལུགས་ཏོག་ཙམ་འགྲེལ་ཤེས་པ་དང་། བོད་ཡིག་དབྱངས་གསལ་སོ་བཞིའི་ཚིག་སྒྲུབ་བཟོ་ཤེས་པ་ནས་བཟུང་རང་ཉིད་སུ་ཞིག་ཡིན་པ་དང་ས་མཚམས་ལས་བརྒལ་ཡོད་མེད་ལ་མ་བལྟོས་པར། གང་ལ་ཆོས་སྒོར་ཞུགས་སའི་ཐུབ་བསྟན་སྤྱི་དང་བྱེ་བྲག་དེ་འཛིན་གྱི་སྐྱེས་བུ་དམ་པ་རྣམས་ལ་དངོས་དང་རྩོམ་ཡིག་སོགས་ཀྱི་ལམ་ནས་ཟུར་ཟ་ཁ་སྨྲས་ཀྱི་གཏེར་སྒོ་ཕྱེ། ད་དུང་ཕར་ལ་གནས་ལུགས་བཤད་དུས་ཚུར་ལ་སྟོན་པ་ཤཱཀྱ་ཐུབ་པས་ཀྱང་ཉིད་ཀྱིས་གསུངས་པའི་བཀའ་དག་མགོ་ཐོག་ཏུ་བཞག་ཆོག་ཆོག་མིན་པར་དཔྱད་པ་བྱེད་དགོས་པར་གསུངས་ཡོད་པ་མིན་ནམ་ཞེས་རྫིག་གཏམ་དུང་ཆེན་ལྟར་བསྒྲགས་འོང་། ངོ་མ་བཤད་ན་མཁས་པའི་སྙན་པ་ས་གསུམ་དུ་གྲགས་པའི་རྒྱན་དྲུག་མཆོག་གཉིས་སོགས་ཀྱིས་བསྲེགས་བཅད་བརྡར་གསུམ་གྱིས་དཔྱད་པའི་གྲུབ་དོན་ལ་ཉེས་ཆ་རྡུལ་ཙམ་ཡང་མ་གཟིགས་པའི་ཐུབ་བསྟན་གསེར་གྱི་ཡང་ཞུན་ལྟ་བུ་འདི་ལ་ཁོང་རྣམ་པའི་རྣམ་དཔྱོད་ལ་ལྟོས་ན་སོར་མོའི་རྡུལ་ཙམ་གྱི་རང་བཞིན་ལས་མ་འདས་པའི་ཁྱེད་ཅག་གི་རིགས་པ་ཉི་ཚེ་བས་དཔྱད་པའི་གཏམ་དེ་ནི་བླུན་པོ་བ་ལང་རྫི་ལྟ་བུ་ཞིག་གིས་བདེན་ཁ་སྟེར་སྲིད་ན་མ་གཏོགས་གཟུ་བོར་གནས་པ་ཞིག་ལ་མཚོན་ན་བཞད་གད་ཀྱི་གནས་སུ་གྱུར་ཡོད་པ་སྨོས་ཅི་དགོས།
གཞན་ཡང་ལག་ན་བགྲང་ཕྲེང་དང་འཁོར་ལོ་ཐོགས་པས་མཚོན་གང་ཟག་ག་གེ་མོ་རེ་མཆོད་རྟེན་སྐོར་བ་སོགས་དགེ་སྦྱོར་ལ་བརྩོན་བཞིན་པ་མཐོང་ཚེ་ཐོད་གཉེར་སྨིན་མཚམས་སུ་བསྡུས་ཏེ་འདི་ཚོ་ནི་རྨོངས་དད་དང་། ཀླད་པ་རྙིང་པ་རེད་ཅེས་གཞན་གྱི་དགེ་བ་ལ་རྗེས་སུ་ཡི་རང་བྱ་རྒྱུའི་ཚབ་ཏུ་དེ་དག་ལ་ཕན་པ་མེད་མདོག་མདོག་གིས་འཕྱ་སྨོད་བྱེད་པ་ཡིན། མནོ་བསམ་ཞིག་ཐོངས་དང་། གོང་ཞུས་བཞིན་དང་ཐོག་རང་ཉིད་སུ་ཞིག་ཡིན་པ་ལེགས་པར་སོམས་ཤིག རང་རེ་ནི་གྲྭ་པ་སྟེ། དགེ་འདུན་པ་དང་། རབ་ཏུ་བྱུང་བ་དགེ་ཚུལ་སློང་ཞེས་སྟོན་པ་ཤཱཀྱ་ཐུབ་པའི་འཁོར་རྣམ་བཞིའི་ནང་ནས་ཐུ་བོའི་གྲས་ཀྱི་མིང་ཞིག་ཁུར་ཡོད་པའི་ཁར་མང་ཚོགས་ངོས་ནས་ཀྱང་རྩི་བཀུར་ཞུ་ས་དང་ཆོས་ཕྱོགས་ཀྱི་ལམ་སྟོན་ཞུ་ས་ཞིག་ཏུ་ཡང་གྱུར་ཡོད་པ་མིན་ནམ།
དེས་ན་དེ་ལྟའི་མི་སྣ་ཞིག་གིས་རང་ལ་ལྟོས་པའི་ངོ་ཚ་དང་། གཞན་ལ་ལྟོས་པའི་ཁྲེལ་སོགས་གང་ཡང་མེད་པར་ཆེས་རྫབ་ཆེན་དུ་གྱུར་པ་རང་ཉིད་གང་ལ་ཆོས་སྒོར་ཞུགས་སའི་ཐུབ་བསྟན་སྤྱི་དང་བྱེ་བྲག་དེ་འཛིན་གྱི་སྐྱེས་བུ་དམ་པ་རྣམས་ལ་ཟུར་ཟ་ཁ་སྨྲས་བྱེད་པ་སོགས་རང་གི་ས་མཚམས་ལས་བརྒལ་བའི་བྱ་གཞག་སྒྲུབ་བཞིན་པ་དེ་ནི་འཇིག་རྟེན་མི་ཆོས་ཀྱི་ཐད་ནས་བཤད་ནའང་གདོང་ལ་པགས་པ་ཡོད་ན་ངོ་ཚ་དགོས་པའི་གནས་སུ་ལྷུང་ཡོད་པ་སྟེ། ཆོས་རྗེ་ས་པཎ་གྱིས། ནགས་ན་གནས་པའི་སྤྲེའུ་དག །ལྗོན་པའི་ཤིང་ལ་མི་གཙང་འཐོར། །ཞེས་གསུངས་པ་ལྟར་གྱུར་ཡོད། ཆོས་ཕྱོགས་ཐད་ནས་བཤད་ན་ཚུལ་དེ་ནི་སྐྱབས་འགྲོའི་བསླབ་བྱ་དང་ཡོངས་སུ་འགལ་ཡོད་པར་མ་ཟད་མཁས་གྲུབ་ཀརྨ་ཆགས་མེད་ཞབས་ཀྱིས། བྱང་ཆུབ་སེམས་དཔའ་རྣམས་ལ་སྐུར་བ་བཏབ། །དོན་མེད་སྡིག་ཆེན་བསགས་པ་མཐོལ་ལོ་བཤགས། །ཞེས་པ་ལྟར་གལ་ཏེ་དེ་ཡང་ཁས་མི་ལེན་ན་མ་གཏོགས་དོན་མེད་ཀྱི་སྡིག་པ་ཚབས་ཆེན་བསགས་པ་ཡིན་པར་གསུངས་ཡོད། དེ་ལས་ཀྱང་རང་རེ་བོད་བརྒྱུད་ནང་བསྟན་གྱི་རྗེས་འབྲངས་པ་ཉུང་ཟད་རེ་སྲིད་མཐའ་མ་ཁེགས་ཙམ་ཡོད་སྲིད་པ་ལས་ཕལ་ཆེ་བ་ཞིག་གསང་སྔགས་ཀྱི་སྒོར་ཞུགས་ནས་དབང་སྣ་རེ་ཡིན་ནའང་ཐོབ་མ་མྱོང་བ་མེད་པ་ལྟར་གྱུར་ཡོད་པར་བརྟེན་དམ་ཚིག་ཟེར་བ་སྲོག་བཞིན་བསྲུང་དགོས་པ་གཞུང་ནས་གསུངས་པ་ལྟར་ཡིན་མོད། ཡིན་ན་ཡང་གོང་གི་མི་སྣས་དམ་ཚིག་ལ་གཅེས་སྤྲས་བྱ་རྒྱུ་ཕར་ཞོག་བླ་མ་ཟེར་བ་རྨོངས་དད་དར་སྤེལ་བ་དང་། དེའི་གསུངས་ཚད་རྨོངས་དད་རེད་ཅེས་སྨད་པ་ནི་གསང་སྔགས་ཀྱི་རྩ་ལྟུང་ཕོག་སྟེ་རང་གིས་རང་ཉིད་མར་ལ་འཁྲིད་པའི་རྒྱུ་གསོག་པ་ཡིན་ཏེ། ཀོ་ས་ལའི་རྒྱན་ལས། སྙིང་ནས་སློབ་དཔོན་སྨོད་པ་དང་། །བསྒྲུབས་ཀྱང་འགྲུབ་པར་མི་འགྱུར་རོ། །ཞེས་དང་། སྒྱུ་འཕྲུལ་དྲྭ་བའི་རྒྱུད་ལས། བླ་མ་ལ་ནི་སྨོད་པ་དང་། །ཐུགས་དཀྲུགས་པ་ཡི་ཉེས་པ་ནི། །ཕྱི་ཡི་རྒྱ་མཚོ་ཆེན་པོ་ལས། །ཆུ་དེ་སྐྲ་ཡིས་གཏོར་གྱུར་པ། །དེ་ཡི་ཚད་དུ་སྡུག་བསྔལ་མྱོང་། །རྡོ་རྗེའི་དམྱལ་བར་གྲགས་པ་ཡིན། །ཞེས་གསུངས་སོ། །ཡང་དེ་ཙམ་དུ་མ་ཟད་མཐོང་བ་རིག་འཛིན་བརྒྱུད་པའི་ཕྱག་བཞེས་སུ་གྱུར་པའི་འབུད་རྡུང་དཀྲོལ་གསུམ་སོགས་ལ་སེམས་ཅན་གྱི་པགས་པ་རྡུང་བ་དང་ལྕགས་ལེབ་དཀྲོལ་བ་དེ་ཚོས་ཅི་བྱ་ཞེས་གྲྭ་གོས་ཀྱི་འོག་ནས་དེ་ལྟར་ཟུར་ཟ་ཁ་སྨྲས་བྱས་འོང་བ་ནི། ལུས་ངག་གི་བྱ་བ་སྤྱི་ལྟར་སེམས་ཀྱི་བསམ་པ་སྔོན་དུ་མ་ཕྱིན་པར་ཡོང་མི་སྲིད་པས་དེ་ལྟ་ན་རང་གིས་རང་ཉིད་ལྟ་ལོག་པར་དག་འབུད་བྱས་པ་མིན་ནམ། སྤྱིར་རང་རེ་མང་གཙོའི་རྒྱལ་ཁབ་ཅིག་ཏུ་བསྡད་ཡོད་སྟབས་སྨྲ་བརྗོད་རང་དབང་ཡིན་ཟེར་ཤོད་བཞིན་ཡོད་ན་ཡང་། སྒྲིག་གཞིའི་རང་བཞིན་ལྡན་པའི་གྲྭ་པའི་སྤྱི་ཚོགས་ཐེ་བའི་སྤྱི་ཚོགས་ཤིག་གི་ཁྱབ་ཁོངས་སུ་བསྡད་ཕྱིན་སྨྲ་བརྗོད་རང་དབང་དེ་ལ་ཡང་ས་མཚམས་ཡོད་པ་ལས་གུ་ཡངས་ཡངས་ཤིག་ག་ལ་ཡིན་ཏེ་མིན་ནོ།།
ལར་ཁོ་བོའི་མིག་ཤེས་ལ་སྐྱོན་ཞུགས་ཡོད་ན་མ་གཏོགས་དེ་ལྟའི་མི་སྣ་ནི་རང་རེ་གྲྭ་པའི་སྤྱི་ཚོགས་ཁྲོད་རྟོག་གེའི་རིགས་ལམ་ཤུགས་ཆེར་རྩོད་མཁན་དང་། སྨྱུག་ཐོགས་པའི་ནང་ལ་སྣང་བཞིན་པ་ནི་རེ་བ་བྱེད་ས་ཞིག་ལ་སེམས་ཚེ་ཨ་ཁ་ལབ་རྒྱུ་ལས་མ་འདས་པར་གྱུར་འདུག་པ་དེ་དོན་ངོ་མར་ཤེས་རབ་འཆལ་བའི་དན་རྟགས་སུ་འཁུམས། མ་གཞི་དངོས་ཐོག་བདེན་འཚོལ་ལྟ་བུར་ལྟ་སྟངས་དེའི་རིགས་ཡོང་རྐྱེན་གང་ལ་ཐུག་འདུག་སྙམ་ནས་གཞིགས་ཚེ་ཕྱོགས་གཅིག་ནས་འདི་འདྲ་ཞིག་གིས་ཀྱང་ཏན་ཏན་ཡིན་ལས་ཆེ་སྙམ་སྟེ། དེང་སང་ཚང་མས་ཤེས་གསལ་ལྟར་བརྡ་འཕྲིན་གྱི་དུས་རབས་ཡིན་པར་བརྟེན་སྐད་འཕྲིན་དང་དྲ་རྒྱའི་བརྒྱུད་ནས་རྩོམ་ཡིག་འདྲ་མིན་ལ་ལྟ་ཆོག་པ་དང་། མ་ཟད་དཔེ་དེབ་མང་པོ་ཞིག་ཐོན་དང་འཐོན་བཞིན་པ་ལྟར་དེ་དག་ཀྱང་བརྗོད་བྱ་གང་ཡིན་ལ་མ་ལྟོས་པར་དགོན་སྡེ་ཁག་གི་དཔེ་མཛོད་ཁང་ནང་ལྟ་ཀློག་བྱེད་ཆོག་ཆོག་ཏུ་ཡོད་པ་དེ་དག་ལ་བལྟས་པས་ཤུགས་རྐྱེན་ཐེབས་པ་ཡིན་པ་ཡང་མིན་རྒྱུ་ཅང་མེད་དོ།།
འདི་ནས་ཁོ་བོའི་མཐོང་སྣང་ཞིག་ཞུས་ན། རང་རེའི་སྤྱི་ཚོགས་ཁྲོད་ཀྱི་ཁྱེད་ཅག་གིས་ཀླད་པ་རྙིང་པ་དང་རྗེས་ལུས་པ་ཟེར་བའི་རང་གི་དམིགས་འབེན་དེར་འཕྱ་སྨོད་ཀྱི་ཚིག་མདའ་འཕེན་པ་ལ་བག་ཚ་བ་སྤུ་ཙམ་ཡང་མེད་པ་བྱེད་བཞིན་འདུག་ནའང་། གནས་ལུགས་ཀྱི་ཐིག་ཤིང་གཞུང་ནས་ཀེར་ཏེ་བལྟས་ཚེ་དོན་ལ་སུ་ཞིག་རྗེས་ལུས་པ་རེད་འདུག་མིན་གསལ་གསལ་ཐིང་ཐིང་དུ་ཤེས་ཐུབ་པའི་ཚོད་དུ་སླེབས་འདུག་པར་མཐོང་སྟེ། གནའ་དེང་གཉིས་ཀར་བྱུང་དང་འབྱུང་བཞིན་པ་བོད་ཁུལ་དུ་སྐྱེས་བུ་དམ་པ་ཚོས་སྣང་སེམས་རོ་གཅིག་རྟོགས་པའི་འབྲས་རྟགས་སུ་སྲ་མཁྲེགས་ཀྱི་རྡོ་བ་ལ་ཕྱག་ཞབས་ཀྱི་རྗེས་འཇོག་པ་དང་། ཁྱད་པར་གསང་སྔགས་རྙིང་མའི་ཕ་ཆོས་ཨ་ཏི་རྫོགས་པ་ཆེན་པོའི་གསེང་ལམ་ནས་མངོན་པར་བྱང་ཆུབ་པའི་གྲུབ་རྟགས་སུ་སྐུ་མི་སྣང་བར་འཇའ་ལུས་སུ་དེངས་མཁན་དེ་དག་ནི། ཡང་སྙིང་ཁྱེད་ཅག་གི་མཐོང་སྣང་ཁྲོད་ཀྱི་ཀླད་རྙིང་ལ་རྫོགས་ཚིག་མ་ཐེབས་མཁན་དང་། རྨོངས་དད་ཀྱི་རྒྱལ་པོ། རྗེས་ལུས་པའི་ལྟེ་བ་དེ་ཚོ་དག་དག་རེད་མི་འདུག་གམ། གཞན་ཀླད་གསར་བ་ག་གེ་མོས་དེ་ལྟའི་གྲུབ་རྟགས་བསྟན་འདུག་ཟེར་བ་ནི་དེ་སྔོན་ཡང་མཐོང་ཐོས་མ་བྱུང་ལ། ད་ཆ་ནི་འབྱུང་གི་མི་འདུག་པར་མ་ཟད་སླད་ནས་འབྱུང་ངེས་པའི་སྔ་ལྟས་ཀྱང་ཅང་མི་སྣང་ངོ་།།
ད་ནི་ཁོ་བོའི་སྐད་ཆ་མཇུག་སྡུད་ཁ་མར་གལ་ཆེན་དུ་སོང་། སླར་ཡང་ནན་ཏན་དུ་ཞུ་རྒྱུ་ལ། རང་ཉིད་གྲྭ་པའི་སྤྱི་ཚོགས་སུ་ཞུགས་ཏེ་གྲྭ་གོས་འོག་ནས་གྲྭ་པ་ཞིག་གི་ས་མཚམས་ལས་ཡོངས་སུ་བརྒལ་བའི་ཐུབ་བསྟན་སྤྱི་དང་བྱེ་བྲག་དེ་འཛིན་གྱི་སྐྱེས་བུ་དམ་པར་དངོས་དང་རྩོམ་ཡིག་སོགས་ཀྱི་ལམ་ནས་ཟུར་ཟ་ཁ་སྨྲས་མ་བྱེད་རོགས། གལ་ཏེ་དེ་ལྟར་ལར་ནས་ཐུབ་ཀྱི་མི་འདུག་ན་ནི་སྤྱི་ཚོགས་འདི་ནས་དགོངས་ཞུས་ཀྱིས་སོ་སོའི་ལྟ་བ་ཁ་ཕྱོགས་དང་འཚམས་པའི་སྤྱི་ཚོགས་གཞན་ཞིག་ཏུ་གོམ་ཁ་བསྒྱུར་ན་ལེགས། ལར་ཐ་ན་དུད་འགྲོ་ཁྱི་ཞིག་ཡིན་ན་ཡང་ལྟོ་ཆས་མ་རག་པའི་དཀའ་ངལ་མེད་པ་ལ་བལྟས་ཚེ་སྨྲ་ཤེས་དོན་གོའི་མི་ཞིག་ལ་ལྟོ་ཆས་ཀྱི་དཀའ་ངལ་མི་ཡོང་རྒྱུ་ནི་ཁོ་བོས་ཁག་འཁུར་ཆོག དེ་མིན་གཉེན་ཉེ་ཁྲོད་ཀྱི་ལག་དམར་བ་ཟེར་བ་ལྟར་གྲྭ་གོས་ནང་གི་བསྟན་བཤིག་དེར་གྱུར་པ་ཡིན་ཏེ། སྟོན་པ་ཤཱཀྱ་ཐུབ་པས་འདི་འདྲ་ཞིག་གསུངས་ཡོད་པ་སྟེ། ང་ཡི་བསྟན་པ་འདི་ལྷ་དང་བཅས་པ་བདུད་ཐུ་བོ་ཆེ་སོགས་གང་གིས་ཀྱང་བཤིག་མི་ནུས་ཏེ། ཡིན་ན་ཡང་ང་མིན་ང་འདྲ་ཞིག་གིས་བཤིག་ཅེས་སྔ་ས་ནས་འབྱུང་འགྱུར་ལུང་བསྟན་ཚུལ་དུ་གསུངས་ཡོད།
