འཆམ་ར་བ་དྲི་མེད་རྒྱལ་མཚན།
གསར་བུ་ཚོ་ཁ་རོག་སྡོད་གསར་གསར་ཞིག་ཅིའང་མི་གླེང་།།
མགོ་སྟོང་ནང་རླུང་སྟོང་རེད་རྣམ་ཤེས་དེ་ག་ཁྱེར་ཁྱེར།།
ཕོ་རྒོད་དང་རིག་རྒོད་ན་ཤེ་མོང་ཞིག་ད་ངོམས་ཤོག།
འཇུ་ས་དང་ལུང་ཐག་དགོས་དེ་མེད་ཚོས་ཁྱི་ཁ་ཚུམས།།
མེ་ལོང་མས་མཐའ་མེད་ཟེར་མཐར་འགེར་པོ་ཁྱེད་ཚོ་རེད།།
རང་གྲོལ་དེར་འུར་ན་ཡང་ཟས་ལྷག་ཅིག་རེད་འདུག་ག།
དྷི་ཚའི་དེ་བཤད་ན་ཡང་སྔོན་མེད་ཅིག་དེ་མིན་པ།།
བུ་རུས་ཅན་འདིར་ཡོད་ན་དེ་རིང་ནས་མྱི་སྐད་རྒྱོབ།།
སེང་རྡོར་གྱིས་འུད་ན་ཡང་གླེང་རིན་ཞིག་ག་རེ་འདུག།
ཚིག་ཆག་གི་ཨུ་ཚུགས་རེད་སྙན་སྙན་འགའ་ཡོད་པ་ནི།།
དཔལ་སྤྲུལ་གྱི་ལད་ཟློས་རེད་མ་རངས་ན་གསུང་འབུམ་ཀློགས།།
ཆགས་མེད་ཀྱི་ཚིག་རིས་རེད་ཟློས་པོ་འདི་འུར་ཆེ་སོང་།།
རྫི་བོ་ཚོས་ལུག་རྗེས་ཀྱི་གཉོམ་གླུ་དག་བླངས་པ་ནས།།
སྨན་ཆུང་ཚོས་འབྲི་མོ་དེའི་བཞོ་དབྱངས་རྣམས་བཀུགས་པ་ནས།།
ད་སང་གི་མགོ་ནག་བོད་ཁ་འཐོར་དང་ཀླད་འཐོར་བར།།
གསར་གཏོད་ཀྱི་སྙན་ངག་མེད་ཡོངས་ཁྱབ་ཏུ་གྲགས་མིན་ཙམ།།
མི་རབས་ཀྱི་གསར་པ་སྐད་སྦམ་སྒྲ་འདི་ཇེ་མང་རེད།།
མི་རིགས་ཀྱི་སྒལ་པ་ན་ཆུ་ཐིགས་ཤིག་སྤོབས་མཁན་མེད།།
གསར་གསར་ཞིག་མ་ཐོན་ཀྱང་གསར་སྐད་དེ་རྒྱག་མ་འདུག།
འཇུ་ས་འདི་མཁྲེགས་པོ་རེད་དེ་ཡིས་ཀྱང་འགྲིག་འགྲིག་ཡོད།།
ནུབ་ལུགས་ཤིག་ཅལ་འདྲོགས་བྱུང་ཕོད་པོ་ཅན་ད་མི་འདུག།
གསར་འདོད་ཅན་ད་ལོངས་དང་གསར་བརྗེ་ཡི་རྩལ་ངོམ་དགོས།།
ཚང་མ་ནི་འཐོམ་འཐོམ་རེད་ཁ་དུང་དེ་བོད་གྲགས་རེད།།
རྩལ་དགུ་དེ་རང་ནས་ཕྱུངས་གཞན་ནོར་ལ་རང་རློམ་སྐྱུར།།
