ཚུལ་ཁྲིམས་རྒྱ་མཚོ། ལོ་རིམ་གསུམ་པ།
ཕྱི་མའི་འཕྲང་རིང་ལ་འགྲིམས་པའི།།
ཆུང་ནས་འདྲིས་པ་ཡི་བརྩེ་གྲོགས།།
དྲན་པའི་སེམས་ངོགས་ཀྱི་མིག་ཆུ།།
ལན་གཅིག་འཕྲིན་པ་ལ་སྦང་འདོད།།
སྔོན་བསགས་ལས་དབང་གི་མེ་ཏོག།
ལྷན་ཅིག་ལྡུམ་ར་རུ་བཞད་ཅིང་།།
མ་གྲོས་རང་མཐུན་གྱི་བཀོད་པ།།
ཅི་འདྲའི་ཡིད་འོང་གི་མི་ཚེ།།
བྱིས་བློ་རྩེད་འཇོ་ཡི་ཟློས་གར།།
རུ་སྡེ་གཅིག་པ་རུ་འཁྲབ་པའི།།
ལས་སྐལ་མཆོག་གསུམ་གྱིས་གནང་བ།།
ཚེ་སྔོན་ལས་སྨོན་ཡང་ཡིན་ངེས།།
ལོ་ན་བཅུ་གཉིས་ཀྱི་དུས་ནས།།
དགོན་པའི་གྲལ་མཐའ་རུ་ཞུགས་ཏེ།།
གསལ་བྱེད་སུམ་ཅུ་ཡི་ཕྲེང་བ།།
མཉམ་དུ་བགྲང་བ་ཡང་གཅིག་བྱུང་།།
ཁྱོད་དང་འགྲོགས་པ་ནས་བཟུང་སྟེ།།
གྲོགས་ཀྱི་འདུན་པ་རང་རྒྱས་བྱུང་།།
ཁྱོད་ཀྱི་ཕྱི་ཐག་ལ་བསམས་ན།།
གཙང་པོའི་བཞུར་རྒྱུན་དང་འདྲ་བ།།
ཁྱེད་དང་ལྷན་ཅིག་ཏུ་འགྲོགས་ནས།།
དགོན་འདབས་པྲ་ཚག་གི་བྱ་བ།།
གཅིག་གཅིག་གཉིས་གཉིས་ཀྱིས་བརྩེས་པ།།
ད་དུང་ཡིད་ངོ་ལ་གསལ་འདུག།
ལོ་ཟླའི་འཕེལ་འགྲོས་ཀྱི་ཆབ་རྒྱུན།།
ག་ཙམ་ཕྱིན་པ་ཡང་མ་ཤེས།།
ད་ལྟ་ཕྱི་མིག་གཅིག་འཕེན་ཚེ།།
ལོ་ངོ་སུམ་ཅུ་ལ་ཟིན་འདུག།
རང་རང་དམིགས་འདུན་གྱི་ཆེད་དུ།།
ཁྱེད་ཉིད་དགོན་པ་ནས་ཕེབས་ཏེ།།
དགའ་ཕྱོགས་ཚོང་ལས་ལ་ཞུགས་ནས།།
འཚོ་ཐབས་ཁྱིམ་པ་རུ་གྱུར་སོང་།།
ང་ནི་དྲན་རྒྱུ་རང་མང་བས།།
གོམ་ཁ་མི་ཡུལ་ལ་གཏད་ནས།།
ལོ་ཟླའི་དུས་ཚོད་ཀྱི་བཞུར་རྒྱུན།།
ལྔ་ཟུང་བཅུ་ཕྲག་ལ་ཟིན་འདུག།
ཁྱེད་ཀྱིས་རང་ཡུལ་ལ་ཤོག་ཅེས།།
སྐུལ་མ་ལན་མང་དུ་གནང་ཡང་།།
གོམ་ཁ་ལྕི་མོ་ཡི་འདེགས་འཇོག།
ཕྱིར་ལ་གཏོད་ཐབས་རང་མ་བྱུང་།།
ད་ལྟ་བསམ་བློ་རེ་བཏང་ཚེ།།
འགྱོད་གདུང་རྟ་མཆོག་གི་གོམ་ཁ།།
སྙིང་གི་རྩ་ཕྲན་ལ་བརྒྱུགས་ཀྱང་།།
ཕྱིར་ལ་འཆོས་ཐབས་ནི་མི་འདུག།
ལས་དབང་གནམ་ལྕགས་ཀྱི་ཐོག་མདའ།།
གློ་བུར་མགོ་ཐོག་ཏུ་ལྷུང་སྟེ།།
ཁྱེད་ཀྱི་མི་ཚེ་ཡི་ཕྲེང་ཐག།
སྐད་ཅིག་དེ་ཉིད་ལ་ཆད་སོང་།།
མི་ཚེ་རྨི་ལམ་གྱི་ཟློས་གར།།
རེས་སྐྱིད་རེས་སྡུག་གིས་འདས་ཏེ།།
ཁྱེད་ཉིད་འཆི་བདག་གིས་ཟིན་ནས།།
ངེད་གཉིས་ཡང་བྲལ་དུ་གྱུར་སོང་།།
ལྷད་མེད་སེམས་པ་ཡི་གཏིང་ནས།།
སྙིང་གཏམ་ཕར་ཚུར་ལ་བསྐུར་བ།།
ད་དུང་སྐད་འཕྲིན་དུ་ལྷག་པ།།
ནམ་ཡང་སུབ་འདོད་དེ་མི་འདུག།
བསམས་ན་གླེན་རྟགས་ཤིག་རེད་དེ།།
སྔ་མའི་དྲན་རྟེན་ཞིག་མེད་པར།།
ནམ་ཞིག་བློ་ཡུལ་ནས་བརྗེད་ན།།
ཁྱེད་ཀྱི་ཐུགས་སེམས་དེ་སྐྱོ་འགྲོ།།
