བསྐྱར་འདང་གི་ཟུག་གཟེར།

ལོ་རིམ་བཞི་པའི་སློབ་གཉེར་བ། བཀྲ་ཤིས་དཔལ་འབྱོར།

༡༽ ཁྲོ་ཚིག

“ཀུ་འུག ཀུ་འུག ཀུ་འུག……”
དྭངས་གསལ་ཤེལ་ཅོག་དེའི་སྟེང་ན་ཁ་སྦུབ་ཏུ་བཞག་པའི་ཀུ་ཤུ་རྟགས་ཅན་གྱི་ཁ་པར་དེ་ལས་ཁུག་རྟའི་སྐད་སྒྲ་དལ་ལ་འཇམ་པ་ཞིག་ཡང་ནས་ཡང་དུ་གྲག་བྱུང་། མདང་ས་སྲོད་ནས་བཟུང་སེམས་ཀྱི་ཞིང་ཁམས་ཡངས་པོར་འགྱོད་གདུང་གི་ན་བུན་ཞིག་གིས་སླར་ཡང་ནག་འཐོམ་མེར་བཀབ་ཅིང་། ནང་དབུགས་མིད་པར་འཚངས་ཤིང་མིག་ཟུང་མཆི་མར་བྱིངས་ནས་ལོ་ལས་རིང་བའི་མཚན་མོ་ཞིག་བསྐྱལ་བ་ཡིན། དང་ཐོག་སུ་ཞིག་གིས་བོས་ཀྱང་ཨ་ལན་སྟེར་འདོད་མེད་ནའང་ཁ་པར་དེས་སྐད་བརྒྱབ་པ་ཙམ་མིན་པར་སྦིར་སྒྲ་རབ་ཏུ་གྲག་པས་དེར་ལག་སྙོབ་ཅིག་མི་བྱེད་ཀ་མེད་བྱུང་། སྔ་ཤོར་བྱ་ངན་དེས་འགྱོད་པའི་སྤྲིན་ཕུང་བསྡུས་ཤིང་དེ་མ་ཉིད་ནས་ཡིད་ལ་གདུང་བའི་དྲག་ཆར་འབེབས་སྟབས་དོན་དག་དེ་ཚོ་དཔེ་དེབ་ནང་ནས་སྦྱངས་པའི་ཡོན་ཏན་དང་འདྲ་བར་གཏིང་བརྗེད་དུ་སོང་ན་ཅི་མ་རུང་སྙམ་ཡང་། གནས་ཚུལ་འགའ་ཞིག་དང་གདོང་ཐུག་རྒྱག་སྐབས་ཡིད་ཀྱི་ཡོལ་བའི་ངོས་སུ་ཐལ་ཟིན་པའི་རི་མོ་དེ་རྣམས་མི་འདོད་ན་ཡང་གསལ་ལེར་འཆར་འོང་གི་འདུག ལག་གཡོན་མས་ཁ་པར་དེ་ཡར་ཁ་བསློགས་ནས་ལྟ་སྐབས་ཡང་ལེགས་ཕྲུག་རེད་འདུག
མཆོད་རྟེན་ཆེན་མོའི་སྐོར་ལམ་དེ་སྔར་བཞིན་འཁྲུག་ཆ་དོད་ལ་འདུ་འཛི་ཤིན་ཏུ་ཆེ་བས་ནན་གྱིས་མ་བལྟས་ན་མི་རྣམས་ཡར་འགྲོ་མར་ཡོང་འབའ་ཞིག་བྱེད་པའི་སྣང་བ་སྟེར། མི་ཚོགས་ཀྱི་ཁྲོད་དེར་ཕར་གྲུ་ཟུར་ཁེལ་ན་དགོངས་སེལ་མི་ཞུ་ཞིང་ཚུར་རྡོག་ཐོ་ཕོག་ཀྱང་སྣང་མེད་ངང་སྐྱོད་བཞིན་པའི་ལོ་གཞོན་ཞིག་གིས་ང་རང་འགྱེལ་ལ་ཁད་ཅིག་རྐང་བཙུགས་ནས་འཕུལ་བྱུང་བས། ད་གཟོད་རང་ཉིད་ནི་དབང་ཆེ་བའི་དྲན་གདུང་ཞིག་གིས་བདས་ནས་ཚོར་བའི་ལུང་ཁུག་དོག་མོ་ཞིག་ན་ཁེར་རྒྱུག་བྱེད་བཞིན་པ་ཤེས་བྱུང་། དེ་དུས་ནམ་མཁའ་གཡའ་དག་ཅིང་ས་གཞིར་བསིལ་རླུང་འཇམ་པོ་ཞིག་ཟླ་བའི་ཟེར་དང་འགྲོགས་ནས་དལ་གྱིས་ལྡང་ལ། མི་ཡི་སྐད་དང་འཕྲུལ་འཁོར་གྱི་སྒྲ། དེ་བཞིན་ཕྱི་མའི་བདེ་བར་འདུན་པ་རྣམས་ཀྱི་སྨོན་ལམ་དང་ད་ལྟའི་འདོད་པར་ཆགས་པ་རྣམས་རང་ཉིད་མོས་པའི་གླུ་དབྱངས་སོགས་ཀྱི་སྒྲ་དུས་གཅིག་ཏུ་གྲག་པར་བརྟེན་ཆུ་ཀླུང་ཤིན་ཏུ་ཆེན་པོ་ཞིག་གཡང་གཟར་ནས་ལྡོག་མེད་དུ་འབབ་པ་བཞིན་དིར་སྒྲ་དང་འུར་སྒྲས་ཁེངས་འདུག གློག་སྒྲོན་འདྲ་མིན་གྱི་དགུ་ཚིགས་ས་ལ་བརྐྱངས་པ་ལྟ་བུའི་ལམ་དེར་ཕོ་མོ་གཞོན་ནུ་རྣམས་རང་ཉིད་བརླག་སྟོར་དུ་དོགས་པ་ཡིན་པ་འདྲ་སྟེ། ཕན་ཚུན་དཔུང་པ་འཁྲི་ཤིང་བཞིན་འཁྱུད་ཅིང་ལག་མཐིལ་འདབ་མ་ལྟར་འབྱར། མཛུབ་རྩེ་གེ་སར་བཞིན་འདྲེས་ནས་མི་ཚོགས་ཀྱི་དབུས་སུ་བརྩེ་གདུང་གི་རོ་ལ་ཅི་གར་ལོངས་སུ་སྤྱོད་བཞིན་འདུག གཞན་ཡང་འགའ་རེས་པར་ལེན་པ་དང་། འགའ་ཤས་ཧབ་ཆ་རྒྱག་པ། ལ་ལས་ཕན་ཚུན་མིག་ཞགས་འཕེན་པ་སོགས་ཤིན་ཏུ་དགའ་བདེར་ལོངས་སྤྱོད་པར་སྣང་།
འོན་ཀྱང་མི་ཚོགས་དེ་དག་ཁྲོད་དུ་ཕྲན་ནི་མིག་ཟུང་གི་རྫི་མ་ཟུམ་པའི་རྩེ་ནས་མུ་ཏིག་གི་འཕྱང་འཕྲུལ་ཞིག་མཁུར་ཚོས་ཀྱི་ངོས་གཉིས་སུ་ནར་ནར་དུ་དཔྱངས་བྱུང་། ཚོར་བ་དྭངས་མ་དང་རྙོག་པ་ལྷན་དུ་འཁྱོམས་པའི་མཚོ་མོ་ནས་བསྒྲུགས་པའི་ཆུ་ཤེལ་ནོར་བུའི་འཕྱང་འཕྲུལ་འདི་གཞན་གྱིས་མཐོང་བར་དོགས་ནས་དེ་མ་ཐག་དཔེ་ཁུག་ནང་དུ་གཙང་ཤོག་ཅིག་བཙལ་བ་ཡིན། གྲུ་བཞི་ནར་མོ་ལྟེབ་ཚིགས་ཅན་གྱི་གཙང་ཤོག་དེ་ཁ་པར་ལྷན་དུ་རུག་གེར་འདུག་ཅིང་ཁ་པར་ངོས་དེར་ཡིག་འཕྲིན་དང་ངག་འཕྲིན་མང་པོ་འབྱོར་བའི་བརྡ་རྟགས་ཀྱང་ཤར་འདུག ཞིབ་ལྟ་ཞིག་བྱས་པས་ལེགས་ཕྲུག་ནས་ཁ་པར་ཐེངས་ལྔ་འབྱོར་བ་མཐོང་། འགྱོད་གདུང་གིས་མནར་བའི་ངག་སྒོ་འདི་གནས་སྐབས་ཤིག་སུ་ལ་ཡང་ཡ་བྱེད་འདོད་མི་འདུག་པས། ཁ་པར་ཡང་སྒོ་བརྒྱབས་ནས་བཞག་པ་ཡིན། དེ་ནས་མིག་ཆུ་འབྱིད་ཞོར་གོམ་པའི་འདེགས་འཇོག་མྱུར་དུ་བཏང་ནས་ནང་ལ་ལོག་དུས་ལམ་བར་ནས། ད་གིན་རང་ཉིད་ལ་འབུད་རྒྱག་རྒྱག་མཁན་གྱི་གཞོན་མ་དེའི་གཤིས་སྤྱོད་ངན་པ་ལ་བསམས་ནས་ཁོང་ཁྲོ་ཡང་ལངས་སོང་ལ། མནོ་བསམ་ཞན་པས་སྙིང་རྗེ་ཞིག་ཀྱང་སྐྱེ་བ་དང་སྦྲགས་སྔོན་མ་རང་ཉིད་ཀྱང་དེ་འདྲ་རང་ཡོད་པ་དྲན་ངོས་སུ་ཤར་བྱུང་།
དེང་དུས་འཆར་བཀོད་ཅན་གྱི་ཁང་བརྩེགས་སྤུས་ལེགས་དེ་ཡི་གཙང་སྦྲ་དང་དག་ཆ་ཆེ་བའི་སྒོ་གཡབས་ན་རང་བྱུང་བསིལ་བུས་བསྒུལ་བའི་ཆུ་རྐྱལ་རྫིང་བུའི་འགྲམ་གྱི་འབོལ་གདན་འབྲུག་རིས་ཅན་གྱི་སྟེང་ལྟག་དགྱེ་ལོག་ནས་མིག་ཆུ་གྱེན་ལྡོག་བྱེད་ཀྱིན་བསྡད། “ཨ་མ་ཁྱོད་རང་ལུང་པ་རུ་བསྡད་ན་ཏག་ཏག་རེད། སྡོད་ས་ཡོད་ཀྱང་སྡོད་ཚུགས་མེད། གོས་སློག་ཡོད་ཀྱང་གྱོན་སྟངས་མེད། ཨ་མ་ཁྱོད་རང་གིས་བྱས་ནས་ང་མི་ཚོགས་ཀྱི་ཁྲོད་འདིར་ངོ་ཚ་པོ་ཆགས་ཀྱི་འདུག” ཅེས་པའི་ཁྲོ་ཚིག་དེ་དག་སླར་དྲན་སྐབས་མ་རྒན་བྱམས་སེམས་ཅན་གྱིས་བཟོད་ཀྱང་ང་ནི་བཟོད་ཐབས་བྲལ་བའི་ཐབས་ཟད་ཅིག་ཏུ་གྱུར་སོང་། ཨ་མའི་ངག་ནས་“ཡ་གི་ན་ང་ལ་ལྟ་མཁན་སུ་ཡང་མེད།” ཟེར་འཕྲལ་དབུགས་རིང་ཞིག་བཏང་ནས་“ཨ་མའི་སྙིང་གོང་། ང་དུས་བཟང་འགའ་རེ་ལ་མ་གཏོགས་སྒོ་ཕྱིར་འགྲོ་མི་ཡོང་ཨ།” ཞེས་འུ་ཐུག་གི་གཏམ་འདར་འཁྲིལ་འཁྲིལ་དེ་བརྩེ་བའི་ཚིག་གིས་མདུན་གཞུག་བསུས་ནས་གསུངས་བྱུང་བ་དེ་ཡིད་ངོགས་སུ་འཚང་དུས། བཞིན་རས་དཀའ་སྡུག་གིས་ཁེངས་པའི་ངའི་མ་ཡུམ་དེ་སྙིང་ཁོང་རུས་པའི་གཏིང་ནས་ཡང་བསྐྱར་ཤུགས་དྲག་གིས་དྲན་སོང་བས་མིག་ཆུ་མུ་ཏིག་གི་དོ་ཤལ་ལུང་ཐག་ཆད་པ་བཞིན་གཡས་གཡོན་གང་སར་ཐར་ཐར་ཟགས་སོང་།

༢༽ བརྩེ་འཕྲིན།

ནག་ནོག་དྲི་མས་མ་འགོས་པའི་དཀར་གསལ་ཟླ་བའི་འཛུམ་ཞལ་ཅན་གྱི་ཆུང་གྲོགས་གསལ་བཟང་ལགས། ཁྱེད་སྐུ་ཁམས་བདེ་ཞིང་སྐུ་ལུས་ལྕུག་ཕྲན་ལྟར་གཡོ་སྒེག་འཕྲུལ་གྱི་སྟོན་མོ་དེ་ད་ལྟ་ཡང་འགྱིང་སྤོབས་ཆེན་པོས་ངོམ་བཞིན་ཡོད་རེ་ཆེ། དྲང་པོར་བཤད་ན་ཁྱེད་བདེ་ན་ང་ཡང་བདེ་ཞིང་ལྷོད་ལ་བག་ཕེབས་པ་ཡིན། གསལ་བཟང་ལགས། མདང་ས་སྲོད་ནས་ཁྱེད་ལ་ཁ་པར་མ་མང་ན་ཡང་མི་ཉུང་བ་ཞིག་བཏང་ཡང་ཁྱེད་ཀྱིས་ཨ་ལན་སྟེར་རྒྱུ་མེད་པའི་ཁར་ཁ་པར་སྒོ་བརྒྱབས་སོང་། ཞོགས་པ་ཡང་ཁ་པར་མ་བསླངས་སྟབས་ཡི་གེ་ཞིག་འབྲི་བར་མ་ལོབས་ན་ཡང་མི་འབྲི་ཐབས་མེད་བྱུང་། མ་གཞི་ཁྱོད་ཀྱི་ཕྱག་ཟུང་དུང་དཀར་འདྲ་ལ་སོར་མོ་གཡང་ཊི་ལྟར་མཚར་བ་དག་ཁ་པར་ལ་རེག་ཐུག་མང་ན་ཟད་ཉེན་ཆེ་བས་ཁོ་བོ་ཡང་ཕངས་སེམས་སྐྱེ་ཡི་འདུག དེ་ཕྱིར་ཁྱོད་ཀྱིས་ཕྱག་ཟུང་ལ་གཅེས་སྐྱོང་གནང་བར་བཀའ་དྲིན་མ་བརྗེད་པར་བྱེད་ངེས་ཡིན་ལགས། ཁྱོད་དང་བཀྲ་རྒྱས་ཀྱི་ལང་ལིང་ཡ་ཡོ་ཁྱག་ཁྱོག་མང་བའི་འབྲེལ་བ་དེ་གློག་བཞུ་དང་ནུས་ཟད་ཀྱི་གློག་སྨན་བཞིན་མཇུག་འབྲས་རབ་རིབ་མག་མོག་ཚམ་ཚུམ་ཞིག་ལས་ཡོང་མི་སྲིད་ནའང་ནུས་རྫས་གཞན་ཞིག་གི་རྐྱེན་གྱིས་མཇུག་འབྲས་བཟང་པོ་ཞིག་བསྟན་རྒྱུའི་ཁ་ཕྱོགས་ཡོད་པ་འདྲ། དེ་ལ་ཁོ་བོས་སེམས་ཀྱི་གཏིང་ནས་འཁྲིལ་བཞིན་པའི་ཚོར་བས་དགའ་བསུའི་མེ་ཏོག་ཅིག་ཕངས་བཞིན་དུ་འབུལ་ལོ། །སེར་སྣ་ཆེ་བའི་མེ་ཏོག་འདི་ཁྱེད་ཀྱི་སྒྱུ་ལུས་ངོ་མཚར་གྱི་ལྡུམ་རར་ཁོང་ཁྲོ་སོགས་ཀྱིས་འབྱུང་ཁམས་དཀྲུགས་ནས་མི་སྡུག་པའི་ཐན་པ་དང་སེར་བ་སོགས་ཀྱིས་འཛུམ་པའི་མེ་ཏོག་བཅོམ་ཡོད་ཚེ། སླར་འཛུམ་གྱི་མེ་ཏོག་གསར་དུ་བཞད་པའི་ཆེད་དགོད་བྲོའི་གཏམ་དང་སྙན་པའི་ཚིག་གིས་ཆུ་བསིལ་ཙམ་ཞིག་གཏོར་བ་ཡིན་པས་དགོངས་པ་དང་འགལ་ཡོད་ན་ཁོ་བོར་བསམ་ཚད་མ་ལོངས་པའི་མི་ཞིག་ཏུ་བརྩིས་ཏེ་བཟོད་གསོལ་གནང་རོགས།
ཁྱེད་ནི་འདི་ཕྱོགས་ཀྱི་གྲོང་དང་ཡུལ་ལུང་མང་པོར་“སྨན་ཞབས་བྱམས་སེམས་མ་”ཞེས་གྲགས་འདུག་ཀྱང་ད་རེས་ཁྱེད་ཀྱི་མིང་དོན་མཚུངས་པའི་མཚན་དེའི་གྲགས་པའི་འོད་ཟེར་བཀྲག་མདངས་ཇེ་ཆེར་འགྲོ་རྒྱུ་ཡིན་ངེས་འདུག་པ་བདག་གི་གྲོགས་པོ་གཞུང་ཞབས་པ་ཞིག་གི་བརྒྱུད་ནས་ཤེས་རྟོགས་བྱུང་། དེ་ནི་ཁྱེད་ཀྱི་ཤེས་ཡོད་ཚོད་མེད་ལ་གཏམ་བཟང་གི་བདུད་རྩི་དངོས་དེ་ཁ་མ་ཕྱེ་བའི་སྔོན་དུ་ཁོ་བོའི་སེམས་ཀྱི་གཏིང་རིང་ནས་བསྙབས་པའི་དགའ་བསུའི་དར་དཀར་ཏེ་“བཀྲ་ཤིས་བདེ་ལེགས།”ཞེས་པའི་སྐད་གསང་གཟེངས་སུ་གཏད་དེ་འཚམས་འདྲི་ཞུ་བ་དང་སྦྲགས།
ཞུ་དོན་ནི་དེ་ཡང་ཁྱེད་ཀྱི་གྲགས་པ་དེ་ཉིད་སྟོན་ཀའི་སྤྲིན་དང་གནམ་གྱི་བྱ་བཞིན་ཕྱོགས་གང་སར་ཡུད་ཀྱིས་བཅད་ནས་རང་རྒྱལ་བལ་པོའི་ཡུལ་ལུང་ཀུན་ཏུ་རླུང་ལྟར་ཁྱབ་ཅིང་སྲིད་གཙོ་ཨོ་ལི་མཆོག་གིས་གཙོས་པའི་གཞུང་ཞབས་པ་ཡོངས་ནས་ཁྱེད་ཀྱི་གཞན་ཕན་ཁུར་བཞེས་ཀྱི་བྱ་བར་ཡིད་སྨོན་གྱི་བསྟོད་དབྱངས་ལྷན་དུ་སྒྲོག་ཅིང་“སྨན་ཞབས་བྱམས་སེམས་མ་”ཞེས་པ་དེ་སྲིད་ཀྱི་གཡོ་སྦྱོར་ཐོབ་ཤོར་སོགས་ཀྱི་ཆེད་བཟོ་སྐྲུན་བྱས་པ་མ་ཡིན་ཞིང་དེ་ནི་ཞབས་ཞུ་མ་ཞིག་གི་འབད་འབུངས་ལ་རང་བཞིན་གྱིས་ཐོབ་འོས་པའི་མཚན་བྱང་དོན་སྙིང་ལྡན་པ་ཞིག་རེད་ཅེས་གྲོས་ཚོགས་ནང་མང་མོས་འདུན་སེམས་གཅིག་སྒྲིལ་གྱིས་མཚན་འདི་ཉིད་ད་ནས་བཟུང་སྨན་ཞབས་མ་བྱས་རྗེས་ཅན། ལྷག་བསམ་ཅན། འཇོན་ཐང་ཅན་སོགས་ལ་རང་རྒྱལ་དབུས་གཞུང་མི་རིགས་དབྱེར་མེད་ཀྱི་སྡིངས་ཆ་དབྱིངས་མཐོན་པོའི་རྩེ་མོར་སྲིད་གཙོ་ཡན་ཆད་ནས་བཀུར་འོས་པའི་ཆེ་མཐོང་མཚོན་བྱེད་དུ་དབུལ་རྒྱུ་ཡིན་ཞིང་“སྨན་ཞབས་བྱམས་སེམས་མ་” (Compassionated Nurse) ཞེས་པའི་གསོལ་རས་ཐོག་མ་དེ་ཡང་དབུས་གཞུང་འདུས་ཚོགས་རྒྱས་སྤྲོས་ཀྱི་སྟོན་མོ་ཞིག་དང་བསྟུན་ཏེ་སྲིད་གཙོ་ཨོ་ལི་ལགས་ཀྱི་ཕྱག་ནས་བདག་སྙིང་པདྨའི་གེ་སར་བཞད་པར་བྱེད་པ་གསལ་བཟང་དབང་མོ་ཁྱེད་ལ་སྩོལ་གནང་རྒྱུ་ཡིན་ངེས་རེད་འདུག ཁོ་བོས་གཏམ་བཟང་ཁུར་ཡོང་བའི་རྔན་པར་ཁྱེད་ཀྱི་མཉེན་པའི་ཕྱག་ལ་འོ་སྦྱོར་རམ་མཛེས་པའི་བཞིན་ལ་འགྲམ་ཐུག་གི་སྒོ་སྐབས་ཤིག་མེད་ཀྱང་“རྒྱ་སེ་དམར་པོའི་ཟ་ཁང་” (Red Rose Restaurant) དུ་དུས་ཚོད་གཏན་ཁེལ་ཞིག་ལ་གསུང་གི་པི་ཝང་སྙན་མོ་དཀྲོལ་གནང་ཡོང་བའི་ཞལ་བཞེས་གཏམ་བཟང་དེར་རེ་སྒུག་བྱེད་པ་དང་ལྷན། ཁྱེད་ཀྱི་འབྱུང་འགྱུར་འཚོ་བ་དག་ཀྱང་ཉིན་རེ་ནས་ཉིན་རེར་ཡར་རྒྱས་གོང་འཕེལ་འགྲོ་བའི་སྨོན་འདུན་བཅས་ངག་ཡིག་གང་རུང་གི་འཕྲིན་ལན་ལ་རེ་སྒུག་གི་ངང་ཁ་པར་སྟེང་ནས་མཛུབ་མོས་ངལ་མཚམས་འཇོག་བཞིན་པ་ནི་ཁྱེད་ཀྱི་ཆུང་གྲོགས་ལེགས་ཚོགས་འབྱུང་གནས་ནས་སྤྱི་ལོ་ ༢༠༡༩ ཟླ་བ་ ༠༡ ཚེས་ ༡༥ ཉིན་བཟང་པོར་ཕུལ།
“གསལ་བཟང་ལགས། བདག་གི་རྩོམ་ཡིག་འདི་ལ་ཡང་དག་བཅོས་ནན་མོ་གནང་རོགས།” ཞེས་པའི་ཡི་གེ་ཞིག་དང་ལྷན་རྩོམ་ཐུང་ཞིག་ཀྱང་འབྱོར་བྱུང་།

༣༽ རེ་སྟོང་།

ཆུང་ངུ་ཉིད་ནས་སྤྱང་གྲུང་དོད་ལ་བློ་རིག་རྣོ་བའི་བཀྲ་ཤིས་དགའ་རྒྱས་ནི་དཔོན་ལྡིང་ཡུལ་གྱི་བྱིས་གཞོན་བར་མ་ཀུན་ཀྱིས་གང་དུའང་ལབ་གླེང་དང་ཁ་རྡུང་གཏོང་ས་ཞིག་རེད། དྲང་མོར་བཤད་ན་ཚང་མ་ཁོ་དང་འགྲོགས་རྒྱུའི་འདུན་པ་སྙིང་ན་འཆང་བཞིན་ཡོད་ནའང་ཁ་ཙམ་གྱིས་“ངོ་ཚ་མེད་ལ་སྡོད་ཚུགས་མེད་པའི་ཇག་པ།”ཞེས་འདོད་པའི་མེ་ཏོག་དེ་གཡོ་སྒྱུའི་གྲིབ་ཁུང་ནང་དུ་ཨུ་ཚུགས་ཀྱིས་ཟུམ་པར་འཇུག་གོ།
ཁོ་ནི་འབད་མེད་དབྱངས་ཅན་སྙིང་ལ་འཁྲུངས་པའི་བྱིས་པ་ཞིག་སྟེ་ཕོ་མོ་འདུ་འཛོམས་བྱེད་ས་དག་ཏུ་འདོད་ཚིག་དྲུག་གསུམ་བཅོ་བརྒྱད་སྙན་པའི་ཚིག་ལ་སྦྱོར་མཁས་ཤིང་། ན་གཞོན་གསང་བའི་རྐྱལ་བར་ཨི་ཁུང་གང་སར་འབིགས་སྟབས་ལྡོག་མེད་དུ་རྡོལ་ཡོང་བའི་གཞོན་ནུའི་ཡིད་ཀྱི་ཚོར་རླབས་དྲོན་མོས་བྱད་བཞིན་དམར་སྦྲིད་དུ་སོང་བ་དང་སྦྲགས་“མར་སྤྱོད་ཚ་བ་ལ།” ཞེས་མི་འདོད་ཚུལ་བཤད་ནའང་བཞིན་གྱི་ལྡུམ་རར་ཡང་ཡང་འཁྲུངས་མི་སྲིད་པའི་འཛུམ་པའི་པདྨ་བཞད་པར་གཞིགས་ན་འདོད་པའི་ཉི་འོད་ཤར་ཡོད་པ་གསལ་ལེར་མངོན། བཀྲ་ཤིས་དགའ་རྒྱས་ལ་“བཀྲ་རྒྱས།”ཞེས་པའི་མིང་དེ་སློབ་གྲྭར་ཐོགས་ཤིང་དེ་ཡང་ཨ་ཁུ་དཔལ་མགོན་གྱིས་ངེད་ཡུལ་གཅིག་གི་ཕྲུ་གུ་གསུམ་ཉིན་གྲངས་དུ་མའི་རིང་ལ་བར་དོའི་འཕྲང་རིང་དང་། ལ་མོ་གནམ་ཟུག་ཅེས་པ་སོགས་ལ་ལུང་འཇིགས་སུ་རུང་བ་མང་པོ་བརྒྱུད་ནས་བལ་ཡུལ་རྒྱལ་ས་ཀཱཋམཱཎཌུ་རུ་ཁྲིད་ཅིང་སློབ་ཆུང་ཞིག་ཏུ་བརྫངས། སློབ་གྲྭ་རུ་སླེབས་རྗེས་ཁོ་ནི་ཤིང་སྒྲུག་ཆུ་ལེན་སོགས་ཀྱི་དཀའ་སྡུག་གི་ར་བ་ལས་ཐར་བ་དང་ཡུལ་ལུང་འཕྲུལ་ཆས་ཀྱིས་ཁེངས་པའི་གནས་ཤིག་ཏུ་སླེབས་སྟབས། སྔར་ལས་ལྡབ་འགྱུར་གྱིས་གྲུང་ཤ་དོད་དུ་ཕྱིན་ཅིང་དགེ་སློབ་ཡོངས་ཀྱི་འདོད་མོས་བྱེད་སའི་གཅེས་ཕྲུག་ཅིག་ཏུ་གྱུར།
ཉིན་ཞིག་འཛིན་གྲྭའི་དགེ་རྒན་ཞིག་གིས་“བཀྲ་ཤིས་དགའ་རྒྱས་ཞེས་པ་མི་གཞན་གྱི་མིང་དུ་སྔར་མ་གྲགས་ལ་སྙན་པོ་ཡང་འདུག་ཅིང་བཀྲ་རྒྱས་ཞེས་བསྡུས་ན་བདེ་པོ་ཡང་འདུག་”ཅེས་གསུངས་པས་དེ་ནས་བཟུང་ཁོ་ལ་“བཀྲ་རྒྱས་”ཞེས་འབོད་ལ་ཡང་དགེ་རྒན་གྱིས་ལེགས་ཚོགས་འབྱུང་གནས་ཀྱི་མིང་བསྡུས་ན་“ལེགས་ཕྲུག་”ཅེས་དགེ་རྒན་ལགས་ཀྱིས་གསུངས་མ་ཚར་གོང་ནས་སློབ་ཕྲུག་ཚོས་ཧབ་ཆ་བརྒྱབ་བྱུང་བས་འཛིན་ཁང་ཁྲེལ་དགོད་ཀྱིས་ཁེངས། རྒན་ལགས་ཀྱིས་བསྡུས་ཚིག་གི་དོན་དག་དེ་འདྲ་མ་རེད་ཅེས་གསལ་བཤད་གནང་ན་ཡང་། “ལེགས་ཕྲུག་”རང་དུ་ཐོགས་ཤིང་ད་ཆ་ཁོ་ཕོ་གསར་སྟག་ཤར་ཅན་ཞིག་ཆགས་ཀྱང་ལེགས་ཕྲུག་ཅེས་འབོད་དགོས་པ་རེད།
ད་ལོ་བཀྲ་རྒྱས་ཕོ་ལོ་ཉེར་དྲུག ང་ཉེར་བདུན། ལེགས་ཕྲུག་ལོ་སུམ་ཅུ་རེད། ད་ཆ་བཀྲ་རྒྱས་ནི་ལྟ་བཟོ་དོད་པའི་སྐྲ་ལོ་བཞག་ཅིང་ངོ་གདོང་ཁམས་དྭངས་ལ་སྨིན་མ་མཐུག་པོར་འཁྱོགས་པའི་འོག་བཟང་མིག་གི་གཟི་འོད་འཕྲོ། འགྲམ་དཀྱུས་རིང་ལ་འབུར་བཟོ་དོད་པའི་སྣ་སྦུག་དང་སྲབ་མཐུག་སྙོམས་པའི་མཆུ་སྒྲོས་ཁྲོད་ན་དཀར་མདངས་རྒྱས་པའི་སོ་སྟར་ཤིན་ཏུ་འགྲིག ལུས་རིང་ཞིང་ཁོག་སྟོད་ཞེང་ཆེ་ལ་སྦོམ་ཞིང་མཁྲེགས་པའི་དཔུང་པ་དང་སྒྱིད་པ་དག་ཤ་སྣད་འཁྱུར་རེར་རྒྱས། གོན་པ་གྱོན་མཁས་ཤིང་མི་དང་གནས་དུས་ལ་བསྟུན་ནས་གཏམ་སྙན་པོ་བཤད་རྒྱུ་ནི་བཅོས་མིན་རང་གཤིས་སུ་གྱུར་ཡོད་སྟབས་ཁོ་ནི་ལྡུམ་རའི་ནང་གི་མེ་ཏོག་རྐང་གཅིག་བཞིན་མོ་གཞོན་བུང་བ་མ་ལུས་འཁོར་ས་ཞིག་ཏུ་གྱུར་ཡོད་པས་ལེགས་ཕྲུག་གིས་བཤད་པ་བཞིན་ང་དང་ཁོའི་འབྲེལ་བ་ནི་ཡ་ཡོ་ཁྱག་ཁྱོག་ཅན་ཞིག་མིན་ཟེར་ན་མདུན་བཀག་ཀྱང་རྒྱབ་མི་ཁེགས་པའི་དཔེར་འགྱུར་ངེས་པ་རེད།
བཀྲ་རྒྱས་དང་ངེད་གཉིས་ཀྱི་འབྲེལ་བ་དེ་ཆུང་ཆུང་ནས་ཆེ་སློབ་གྲྭའི་བར་གྱི་ལོ་རྒྱུས་ལྡན་པའི་གནའ་ཆུ་རིང་མོ་ཞིག་སྟེ། ཆུང་ངུའི་སྐབས་ཡུལ་པ་རྣམས་ཀྱིས་“ཁྱེད་གཉིས་ནང་གཅིག་གི་མི་རེད་”ཅེས་ཟེར་ཞིང་དེའི་གོ་དོན་དེ་སློབ་གྲྭར་སླེབས་ཏེ་ལོ་མང་རྗེས་སུ་གཞི་ནས་རྟོགས། དེ་ནི་གྲོང་པ་ཕན་ཚུན་གྱི་ཕ་གཉིས་པོས་བྱིས་པ་ནར་སོན་ཚེ་གཉེན་སྒྲིག་བྱ་རྒྱུའི་ཐག་བཅད་ཅིང་ཕ་གཅིག་པོ་དེས་“གལ་སྲིད་མ་མཐུན་པ་བྱུང་ཚེ་”ཞེས་དོགས་པའི་ཚིག་ཞགས་འཕེན་སྐབས། གཞན་དེས་“བཟའ་ཚང་འཁྲུག་པ་ཤོར་ན་སྒྲིག་བཟླུམ་མལ་ཆའི་ནང་རེད་ཟེར་བ་མ་རེད་དམ་”ཞེས་བཤད་འཕྲལ། ར་བཟི་རྒད་པོ་གཉིས་ལྷན་དུ་ཧབ་དགོད་རྒྱག་ཅིང་ནམ་ཕྱེད་བར་ཆང་འཐུང་གིན་བསྡད་པ་སོགས། ཕྱིས་སུ་ནང་མི་ཞིག་གིས་ང་ལ་སྦས་པའི་ཚུལ་དུ་བཤད་པས་མི་རྒན་ཆང་གིས་སྨྱོ་དུས་ནང་མི་གཉིད་ཤོར་ཡོད་མེད་ཀྱང་བརྗེད་སོང་བ་འདྲ།
ངའི་ཡབ་ཆེན་ནི་ཡུལ་མི་གཞན་དང་འདྲ་བར་སྣ་སྦུག་ཆུང་ཆུང་མ་ཡིན་པར་སྣ་ཟོར་ཟོར་ཆེན་པོ་ཡོད་ལ་དེ་ལ་བརྟེན་ནས་ང་ཡང་སྣ་དབྱིབས་ཆེ་བ་ཞིག་ཡིན་པས་ཡུལ་མི་ཚོས་ང་ལ་“ཕུན་ཚོགས་ཁང་གི་བུ་”ཞེས་སྙད་བརྐོ་བྱེད་ལ་ཕྱིས་སུ་སློབ་གྲྭར་སླེབ་སྐབས་དེ་ནི་“སྣ་གཟེངས་མཐོ་བ་”ཞེས་མཛེས་པའི་རྒྱན་དུ་གྱུར་ཅིང་དཔོན་ལྡིང་ཡུལ་དང་སྐྱིད་གཤོངས་ལུང་པའི་སློབ་ཕྲུག་མང་དག་ཅིག་ཡོད་ཀྱང་མི་མང་པོས་ང་ལ་“སྐྱིད་གཤོངས་ལུང་གི་མོ་གཅིག་”ཅེས་བསྟོད་བསྔགས་བྱེད་ལ་“སློབ་གྲྭ་འདིར་ཡོད་པའི་བོད་མོ་འགའ་ཞིག་དང་བལ་མོ་རེ་གཉིས་ཤིག་མ་གཏོགས་གསལ་བཟང་དབང་མོའི་མོ་སྒོ་ལ་འགྲན་བཟོད་ཀྱི་མ་རེད་”ཅེས་ལེགས་ཕྲུག་གིས་མི་ཚོགས་དཀྱིལ་ནས་སྤྲེལ་ལད་དམ་གང་ཡིན་ཆ་མ་མཆིས་པ་ཞིག་བཤད་མྱོང་ལ། ང་ནི་ལྡུམ་རའི་ནང་གི་མེ་ཏོག་རྐང་གཅིག་དེ་མ་ཡིན་ཡང་“མཚར་སྡུག་རྣམ་པར་རྒྱས་པའི་པདྨ་ཞིག་རེད་”ཅེས་ཕོ་གཞོན་ཚོས་བསྟོད་པའི་གླུ་དབྱངས་སྙན་པོ་ངག་འཕྲིན་གཉིས་ཀའི་བརྒྱུད་ནས་ཡང་ཡང་གྱེར་བར་བྱེད། དེ་ལྟར་ཡིན་མོད་གཅིག་ན་ཕ་འདས་པོའི་རེ་འདུན་དང་གཉིས་ནས་བཀྲ་རྒྱས་ཤེས་འཇོན་བརྗིད་གསུམ་འཛོམས་པས་ཁོང་ཉིད་དང་གཏན་དུ་འགྲོགས་རྒྱུའི་བློ་ཐག་བཅད་དེ་འབྲེལ་བ་ཡ་ཡོ་ཁྱམ་ཁྱོམ་ཅན་དེར་ལོ་གྲངས་བསྟུད་མར་ཨུ་ཚུགས་ཀྱིས་འཐམས་ནས་བསྡད་པ་ཡིན། དེང་སང་བཀྲ་རྒྱས་སྨྱོ་སྤྱོད་ཆེ་རུ་ཕྱིན་པ་དང་ལེགས་ཕྲུག་ནི་ཁ་འཇམ་ཚིག་འཇམ་ཙམ་མིན་པར་སྔར་བཞིན་ཁ་ཚ་དགོས་གཏུགས་ཀྱི་རོགས་སྐྱོར་བར་མེད་བྱེད་བཞིན་པ་ཡིན། བཀྲ་རྒྱས་དང་ང་ཡི་འབྲེལ་བ་དེ་གྱོན་པ་ཞིག་ཡིན་ན་ཤིན་ཏུ་རྙིང་ཟད་ཐབས་རྡུགས་ཅན་དུ་གྱུར་ཟིན་པས་ད་དུང་མ་དོར་བར་ཤི་འཐམས་བྱས་ན་ཕུགས་གཏན་གྱི་སྙིང་པོ་ཞིག་ཡོད་མེད་ལ་མནོ་བསམ་འཕར་མ་ཞིག་གཏོང་འགོ་བཙུགས།

༤༽ མོ་གསར།

“ལེགས་ཚོགས་འབྱུང་གནས་ལགས། ཁ་ཚ་དགོས་གཏུགས་སྐབས་ཁྱེད་ཉིད་སྒྲོག་ཙེའི་རྐང་པ་དང་སྟེགས་བུའི་རྒྱབ་ཡོལ་ལྟར་ངའི་ཆེད་དུ་གཏན་ལངས་བྱས་པ་དག་ལ་ནན་གྱིས་བསམས་ན་ཁྱེད་ཀྱི་བཀའ་དྲིན་མུ་མེད་ཀྱི་ཐང་ཡངས་འདྲ་བ་དེ་ལ་ངས་འབད་པས་ཐག་པ་རིང་པོ་ཇི་ལྟར་ཞིག་བརྐྱངས་ཀྱང་ཚད་འཇལ་ཐབས་བྲལ་འདུག ད་བར་ཁྱེད་ལ་ཕན་བསམས་པའི་བཟང་ལན་ཞིག་འཇལ་མྱོང་མེད་པའི་བུད་མེད་མ་རབས་ངས་ཧམ་སྨྱོན་ཆེན་པོས་ད་དུང་ཁྱེད་ཉིད་ལ་རྒྱབ་སྙེ་བྱེད་འདོད་ཡོད། དུས་ཚོད་ཁོམ་པ་དང་མོས་མཐུན་ཡོད་ཚེ་རྒྱ་སེ་དམར་པོའི་ཟ་ཁང་དུ་ཕེབས་ཐུབ་པ་བྱུང་ན་གྲོས་ཤིག་འདྲི་སྙིང་འདོད་ལ་སྤོབས་པ་འདང་ན་སྐད་ཆ་གནད་འགག་ཅན་རེ་གཉིས་ཤིག་ཀྱང་བཤད་རྒྱུ་ཡོད་པས་དུས་ཚོད་གཏན་ཁེལ་ཡོང་བའི་ཆེད་དུ་ཁ་པར་གཏོང་གནང་ཡོང་བར་ཞུ།” ཞེས་སྔ་ནས་ད་བར་ལེགས་ཕྲུག་ལ་དགོས་དུས་ཁ་པར་གཏོང་བ་དང་ཐད་ཀར་སྐད་ཆ་ཤོད་པ་ལས་འཇམ་པའི་ཚིག་གིས་མཐའ་བརྒྱན་པའི་འཕྲིན་ཞིག་བཏང་མྱོང་མེད་ལ་མདང་ཉིན་གུང་འདི་འདྲ་ཞིག་སྤྲིངས་ཤོར་སོང་།
ང་བུ་མོ་ཆུང་ཆུང་ཞིག་མ་ཡིན་རུང་མ་མ་ལྟར་གཅེས་སྐྱོང་བྱེད་པའི་གླ་པ་ཨ་མ་དེས་“སྦྱིན་བདག་ལགས་སྐུ་ཁྲུས་གསོལ་ན་གྲ་སྒྲིག་ལེགས་གྲུབ་བྱུང་ཡོད་”སྨྲས་བྱུང་། “ཨ་མ་ལགས། ང་ལ་སྦྱིན་བདག་མ་གསུང་དང་འོ་བརྒྱལ་ཆེན་པོ་གནང་མི་དགོས། ངལ་གསོ་བཞིན་ལྷོད་ལྷོད་ངང་ལས་ཀ་བྱོས་”ཞེས་ལབ་པས། “ལགས་སོ་བཀའ་དྲིན་ཆེ་”ཟེར་ཞིང་བར་ཁང་དུ་བུད་སོང་། གུ་ཡངས་ཤིང་ལྷིང་འཇགས་ཆེ་བའི་ཁྲུས་ཁང་གི་སྟེགས་བུའི་སྟེང་ན་ཟ་བཏུང་སྒྲིག་གཤོམ་དང་ཆུ་གཞོང་གི་ནང་དུ་དྲི་བཟང་བཏབ་པའི་ཆུ་རླངས་པ་ཐུལ་ལེ་བ་དེའི་ཁར་རྒྱ་སེའི་འདབ་མ་ལྡིང་འགྲོས་དལ་པོར་བྱེད་ལ་སྒྲ་སྒམ་བརྒྱུད་ནས་སྙན་འཇེབས་སྙིང་ལ་ཟུག་པའི་གླིང་བུ་དང་པི་ཝང་སོགས་ཀྱི་སྒྲ་མུ་འབྲེལ་དུ་སྒྲོག་པ་ཞིག་སྐད་གདངས་དམའ་པོའི་ངང་བཏང་བཞག་འདུག སྒོ་ནན་པོ་ཞིག་གཏན་རྗེས་གྱོན་པ་མ་ལུས་ཕུད་ནས་གཞོང་པའི་ནང་དེར་དུས་ཀྱི་མཐུན་མཚམས་གཅིག་རིང་ལྷོད་ལྷོད་དུ་ངལ་གསོ་བརྒྱབ། དགོང་མོ་ལེགས་ཕྲུག་ལ་གང་ཞིག་བཤད་དགོས་མིན་གྱི་གཏམ་རྣམས་ཀྱང་གོ་རིམ་མ་འཛོལ་བ་ཞིག་བསམ་བློའི་མདུན་ཅོག་སྟེང་དུ་བཀོད་སྒྲིག་བྱས་པ་ཡིན། གཅིག་ན་དེ་རིང་དུས་བཟང་དང་གཉིས་ནས་མཆོད་རྟེན་སྐོར་བ། གསུམ་ན་རིག་གཞུང་ལ་གཅེས་སྤྲས་ཆེ་བའི་ལེགས་ཕྲུག་ཐུག་ཏུ་འགྲོ་རྒྱུ་ཡིན་པས་རྨ་བྱའི་མཇུག་སྒྲོ་འདྲ་བའི་ཕྱུ་པ་ཕུ་མེད་ཅིག་གི་ནང་སྟོད་ཐུང་ཟིང་སྐྱ་ཞིག་གྱོན་ཏེ་སྐྲ་ཤད་མཛེས་བཟོ་ལེགས་པར་བྱས་ནས་སྐོར་བར་ཆས། སྐོར་བ་གསུམ་ཕུལ་བའི་རྗེས་སྨོན་ལམ་འདེབས་ས་དེར་ཨ་མ་རྒན་མོ་ཞིག་མིག་བཙུམས་ཤིང་གཉེར་མ་སྨིན་མཚམས་སུ་བསྡུས་ནས་“ངའི་བུ་མོ་”དང་“ངའི་བུ་མོ་”ཞེས་སྐད་གདངས་གསལ་ལ་མི་གསལ་བའི་སྨོན་ལམ་རིང་པོ་ཞིག་འདེབས་བཞིན་འདུག ཨ་མ་འཚོ་བཞུགས་ཡོད་མཁན་ཚོ་ངོ་མ་བསོད་ནམས་ཆེན་པོ་ཡིན་པ་ཞིག་སླར་དྲན་གསོ་བྱས་སོང་། གལ་སྲིད་ངའི་ཨ་མ་ཡང་འདིར་ཡོད་ན་དེ་ལྟར་སྨོན་ལམ་འདེབས་ཀྱི་ཡོད་ངེས་རེད། ད་ལྟ་ང་རང་ཉམས་མི་དམན་པ་ཙམ་འདི་ཡང་ཨ་མའི་སྨོན་ལམ་གྲུབ་པ་ཡིན་ངེས་རེད་སེམས་བཞིན་སྐོར་ལམ་ནས་རྒྱ་སེ་དམར་པོའི་ཟ་ཁང་ལ་ཁ་ལྷོད་ཀྱིས་ཕྱོགས། ལམ་མདུན་དེར་ན་ཚོད་བཅོ་ལྔ་བཅུ་དྲུག་ཡས་མས་ཀྱི་གཞོན་ནུ་མ་ཞིག་བསིལ་ལྷམ་རྟིང་པ་རྟ་རྨིག་ལས་ཀྱང་མཐོ་བ་ཞིག་གྱོན་ནས་འཕོངས་ཤ་མཁྲེགས་སུ་གཅུར་བའི་དཔྱིད་མགོ་རྡོག་འགྲིལ་བ་གཉིས་ཤ་འབྱར་དོར་མའི་ངོས་ནས་ཕྲིལ་ཕྲིལ་དུ་གཡོ་ལ། སྟོད་ཐུང་ཕུ་མེད་སོག་པ་དང་རྒྱབ་གཞུང་མཁལ་མའི་ཉེ་འགྲམ་གྱི་རྩིབས་ལོགས་སོགས་དམར་རྗེན་དུ་མངོན་པ་ཞིག་གྱོན་ཞིང་དོར་མ་ཡང་ཉ་དང་པུས་མོ་མི་ཚད་བརླ་ཤ་ཡང་ཕྱེད་ལྷག་དམར་རྗེན་དུ་ལུས་པ་ཞིག་གྱོན་ནས། གཡས་ཀྱོག་གཡོན་ཀྱོག་གི་འགྱིང་སྟབས་དེས་རྐང་པ་གཉིས་ཕན་ཚུན་འཁྲིལ་ལ་ཉེ་བའི་ངང་ནས་གོམ་པའི་འདེགས་འཇོག་བྱེད། གྱོན་ཆས་འདི་ལྟར་གྱོན་པ་ནི་ད་ལྟ་བཞུགས་བཞིན་པའི་གངས་རིའི་འདབས་ཀྱི་མི་རྒན་ཚོས་ལྟ་མི་བཟོད་ཅིང་ལྟ་སྙིང་མི་འདོད་པའི་ཆ་ལུགས་ཤིག་ཡིན་མོད་ཡར་ཐོན་ཅན་གྱི་རྒྱལ་ཁབ་ཕལ་མོ་ཆེར་ལྟ་བས་ཆོག་མི་ཤེས་པའི་ལུགས་སྲོལ་ཞིག་ཏུ་གྱུར་ཡོད་སྟབས། ཁོ་མོས་དེར་སྙད་འདོགས་དོན་ཞིག་མེད་ཀྱང་མོར་དེ་དང་མཉམ་དུ་གཤིས་སྤྱོད་ལེགས་པོ་ཞིག་ཡོད་ན་ཅི་དྲག མོའི་བྱེད་སྟངས་འདི་ད་ལྟ་ཀུན་ཀྱི་མིག་ལ་གཟན་ཞིང་ནམ་ཕུགས་རང་ཉིད་འགྱོད་དགོས་པའི་རྒྱུ་ལྡོག་ཏུ་མེད་པ་ཞིག་སྐྲུན་བཞིན་པ་མི་ཚོར་བ་རེད། མི་ཚོགས་ཀྱི་ཁྲོད་དེར་རྒྱུག་པར་ཁེན་པའི་ཨ་མ་སྒུར་འཁྱོག་མ་དེར་མོས་སྡང་ཚིག་གི་ཆར་བ་འབེབས་བཞིན་འདུག་ནའང་། མ་ཡུམ་དེ་ད་དུང་མུ་མཐུད་ནས་གོམ་པ་འཁྱལ་འཁྱོལ་གྱིས་འགྲོ་བཞིན་འདུག དྲང་མོར་བཤད་ན་ལོ་འགའི་སྔོན་མོའི་ས་ཆ་དེར་ང་རང་ཡོད་མྱོང་བས་གནས་སྟངས་དེ་མཐོང་འཕྲལ་སྙིང་ཁར་ན་ཟུག་ལྕི་མོ་ཞིག་གཉིད་སད་པ་བཞིན་ཧད་ཀྱིས་ལྡང་ནས་ལུས་ཀྱི་རྩ་རྒྱུས་ཀུན་ནས་འཁྱུད་དེ་བ་སྤུ་མ་ལུས་ཤིག་ཤིག་ཏུ་བསྒུལ་བྱུང་།

༥༽ འདུས་མཐའ།

འདུ་འཛིའི་ཚང་ཚིང་སྟུག་པོའི་ཁྲོད་ནས་ཚོར་བའི་འགག་འཕྲང་དོག་མོར་ཞུགས་ཏེ་བསྐྱོད་བསྐྱོད་པའི་མཐར་བརྗེད་མི་སྲིད་པའི་ས་ཆ་ཞིག་ཏུ་སླེབས་སོང་། མདུན་དེར་འབྱུང་བ་སྣ་ལྔ་མཚོན་པའི་དར་པོ་ཆེ་གནམ་གྱི་ཀ་བར་བསྒྲེངས་པ་ལྟ་བུ་ཞིག་འདུག་ཅིང་། འཇའ་མཚོན་སྣ་ལྔའི་དར་ཐག་གི་ཡན་ལག་ཕྱོགས་གང་སར་བརྐྱངས་ཤིང་བཟོ་བཀོད་ཤིན་ཏུ་ལེགས་པའི་ཁང་པ་ཐོག་བརྩེགས་ལྔ་ཅན་དེ་ནས་“ཡིད་བཞིན་ནོར་བུའི་མཉེས་ཁང་།”ཞེས་པའི་སྒོ་བྱང་ཆེན་པོ་ཞིག་ནས་གློག་འོད་ཆེམ་ཆེམ་མཆེད་ཀྱིན་འདུག དེ་ནི་སྤྲང་ཕྱུག་དབྱེར་མེད་རང་གི་ཁུག་མ་དང་བསྟུན་ནས་འཛུལ་ཆོག་པའི་ཟ་ཁང་སྤུས་ལེགས་ཤིག་རེད། ངས་ཨ་མ་ལ་ཁ་རྡུང་གཏོང་བ་དང་སྤྱོད་པ་སློག་པ་སོགས་བྱེད་སའང་རེད། གནས་ཁང་དེས་བདག་ལ་བརྗོད་མི་བདེ་བའི་ཚོར་སྣང་ཞིག་བྱིན་བྱུང་། ཟ་ཁང་དེར་ཨ་ཁུ་དཔལ་མགོན་གྱིས་ང་དང་ལེགས་ཕྲུག་བཀྲ་རྒྱས་གསུམ་ལོ་རེ་ལ་ཐེངས་རེ་མ་ཆད་པ་བྱས་ནས་ཁྲིད་མྱོང་ལ་ང་རང་ནར་སོན་སྐབས་ཡིད་ལ་འབབ་པའི་གྲོགས་པོ་འགའ་དང་མཉམ་དུ་སོང་བ་ཡང་མི་ཉུང་བ་ཡིན། ད་ལྟ་ཡང་དེར་འགྲོ་རྒྱུ་ཤིན་ཏུ་མོས་པ་ནི་སྦྱིན་བདག་ནང་མི་ཀུན་ཀྱིས་འདིར་ཕེབས་དེར་ཞུགས་ཀྱིས་བསུ་འདྲེན་མི་དམན་པ་བྱེད་ཅིང་། ཆེད་བཟོས་ཞིམ་ཟས་རབ་དག་སྒྲིག་གཤོམ་བྱེད་རྐྱང་བྱས་སྟབས་མཐོང་ཆེན་ལ་མི་འཐད་ཅེས་སུས་བཤད་ཀྱང་ངོ་མ་མི་མོས་པ་ཞིག་ཤིན་ཏུ་དཀོན་པ་མ་ཡིན་ནམ། འོན་ཀྱང་དེ་རིང་ནི་འགྱོད་གདུང་གི་དཔུང་དམག་བཙན་པོས་བསམ་བློའི་ཁ་ཕྱོགས་ལ་དབང་སྒྱུར་བྱས་སྟབས་འདུག་ཁང་དབེན་པ་དེ་ལས་བྱོལ་ས་གཞན་མ་རྙེད།
དགོང་མོ་དེར་སྒྱུ་མའི་འཛུམ་གྱིས་གདོང་ངོས་འགེབས་པར་བརྩམས་ཀྱང་ཉམས་མྱོང་ཅན་གྱི་གླ་པ་ཨ་མས་ཤེས་ཏེ་འཇམ་པའི་ཚིག་གིས་སྣ་འདྲེན་དང་བཅས་ཆེས་དགའ་མོས་ཅན་གྱི་འཐེན་ཐུག་ཅིག་མདུན་དུ་བསྒྲིགས་བྱུང་། “ཨ་མ་ལགས་དེ་རིང་ང་ཐུག་པ་ཉལ་ཁང་དུ་བཏུངས་ན་འགྲིག་གམ་”ལབ་པས། གླ་པ་ཨ་མས་“བཞེས་ལག་དུས་ཐོག་ཏུ་མཆོད་རོགས་”ཟེར་ཞོར་ཉལ་ཁང་དུ་བསྐྱལ་བྱུང་བས་དེ་རྗེས་ངས་སྒོ་གཏན་མ་ཐག་སྣམ་བུའི་མལ་ཐུལ་འཇའ་རིས་ཅན་གྱི་སྟེང་དུ་གན་རྐྱལ་ལ་ཉལ་བ་ཡིན། མེ་ཏོག་དངོས་རྫུ་སྣ་ཚོགས་ཀྱི་ཁྲོད་ན་གློག་བཞུ་དང་འོད་མདངས་འཕྲོ་ཞིང་རྒྱལ་ཁབ་གཞན་དག་ནས་སྤྲོ་སེང་སྐབས་ཁུར་ཡོང་བའི་དངོས་རྫས་རིན་གོང་གཞལ་དུ་མེད་པ་དག་དང་དགའ་ཉེ་བློ་དཀར་ཅན་རྣམས་ཀྱིས་གནང་བའི་དྲན་རྟེན་དང་ལག་རྟགས་ཡིད་དུ་འོང་བ་དག་གིས་ཁེངས་པའི་ངའི་ཉལ་ཁང་ནི་རིན་པོ་ཆེའི་མཛོད་ཁང་འདྲ་བ་ཞིག་ཡིན་རུང་སྐྱིད་སྣང་དང་བདེ་སྣང་གང་ཡང་མ་སྐྱེས། བསམ་བློའི་འཁྲུལ་གྱི་ཤེལ་སྒོར་སྔར་བྱས་མགོ་མེད་གཞུག་དུམ་མང་པོ་ཞིག་ལྟད་མོའི་འགོ་བརྗོད་དང་འདྲ་བར་ཤར་ཡོང་བ་ལས་མང་ཆེ་བ་ང་དང་ཨ་མའི་ལོ་རྒྱུས་རེད་འདུག དེ་ཡང་སྤྱི་ལོ་ ༢༠༠༥ ཡི་ལོ་འགོ་ནས་ང་ནི་ཡམ་བུ་ལ་འགྲོ་རྒྱུ་རེད་ཅེས་ཡུལ་ལུང་དག་ཏུ་གྲགས་ཤིང་ཨ་མས་ཞལ་དངོས་སུ་མ་བསྲངས་ཀྱང་དབྱར་ཁ་བྱང་འཚོང་རར་གོན་པ་མང་པོ་ཉོ་རྒྱུ་མངགས་གནང་བ་ལ་གཞིགས་ན་ངོ་མ་གཏན་ཁེལ་རེད་འདུག་པས་ང་ནི་སེམས་གཏིང་ནས་དགའ་བ་བརྟས་སོང་། གཉིད་ལམ་ན་ཡང་ཐེངས་མང་པོར་ང་རང་ཡམ་བུར་སླེབས་ཚར་བ་རྨིས་ཤིང་རྨི་ལམ་ནང་མཐོང་བའི་ཅ་ལག་མང་པོ་ཞིག་རྗེས་སུ་ངོ་མ་དེ་ག་རང་འདུག ལོ་དེའི་དབྱར་ཁར་རྫི་བོ་འཚོ་བ་དང་ཤིང་འཐུ་བ་སོགས་གང་ནུས་བྱེད་ཞོར་སྟོན་ཁ་ཡང་མགྱོགས་པོ་ཚེས་བྱུང་། ཉིན་ཞིག་ང་རྫི་བོ་ནས་ལོག་ཡོང་སྐབས་གཅེན་མོ་ཡུལ་ནས་གྲོང་དུ་སླེབས་འདུག ཁོང་གིས་ང་ལ་ལས་དོན་ཤིན་ཏུ་གལ་ཆེན་ཞིག་གི་ཆེད་ཡུལ་དུ་འགྲོ་དགོས་ལུགས་བཤད་པར་ང་བློ་སོམ་ཉིའི་ངང་ནས་“ཨ་ཅེ། ཁྱེད་རང་མནའ་མ་མ་ཕྱིན་སྔོན་ལ་ང་མིའི་ནང་ལ་འགྲོ་ཡི་མིན་ད།”ལབ་པར་“ངོ་ཚ་ཡི་མི་འདུག་གམ། ཁྱོད་ལ་དེ་འདྲ་སུས་བསླབས་སོང་། ད་མགྱོགས་པོ་ལོག་རྒྱུག་”ཟེར་ཞིང་ཡང་ལག་པ་ནས་བཟུང་སྟེ་ཨ་མཆོག་གི་འགྲམ་དེར་ཤུབ་ལབ་ཅིག་བརྒྱབ་བྱུང་བ་སྟེ་“ཨོ་འེ། ཁྱོད་ང་མ་བརྗེད་ཨ།”ཟེར། དེ་དུས་ངས་མགོ་སྒུག་ཙམ་བྱས་པ་ལས་གཏམ་གཞན་ཞིག་ཟེར་མ་ནུས། ང་དང་ཨ་ཅེ་གཉིས་ཐག་རིང་ཐུང་ཇི་འདྲ་ཞིག་དང་དུས་རིང་ཚད་གང་འདྲ་ཞིག་གི་བར་ཁ་བྲལ་ནས་སྡོད་དགོས་པ་ཤེས་ཡོད་ཚེ་ཐོད་པ་གཏུག་རེས་དང་མིག་ཆུ་འབྱིད་རེས་ཤིག་བྱས་ཡོད་ངེས་རེད། འདུས་པའི་མཐའ་མ་བྲལ་བ་དེ་བློ་ཕམ་པོ་ཞིག་ཡིན་ཡང་སླར་འཕྲད་རྒྱུའི་རེ་བ་དེ་སེམས་གསོ་ཕན་པོ་ཞིག་མ་རེད་དམ། འོན་ཀྱང་ང་དང་འདྲ་བར་ནམ་ཞིག་སེམས་གསོ་དེ་དང་ཡང་འབྲལ་དགོས་པ་ཞིག་ཅིས་མ་ཡིན།

༦༽ མགོ་སྐོར།

འགྱོད་གདུང་གི་ཚེར་མ་ཟུག་ནས་མི་བཟོད་པའི་འཁུན་སྒྲ་རྡོལ་ཞིང་མཐའ་དབུས་མི་མངོན་པའི་ཚོར་བ་འཐིབ་འཐིབ་ཏུ་འཁྲུག་པའི་ཁྲོད་ནས་གང་ཐེམ་ཞིག་སྨྱུ་གུའི་རྩེ་མོས་བླངས་ནས་ད་བར་ཟླ་བ་གཅིག་ཏག་ཏག་སོང་འདུག དེ་རིང་ཡང་གཏམ་སྣོན་མ་ཞིག་འབྲི་དགོས་ཐུག་སོང་བ་ནི་བདག་གི་གློ་སྙིང་བྲང་གསུམ་འཆོལ་འོས་པའི་ཆུང་འདྲིས་གྲོགས་པོ་ལེགས་ཕྲུག་ལགས་ནས་མགོ་སྐོར་ངུ་དགོད་མི་ཤེས་པ་ཞིག་བཏང་བྱུང་བ་དེ་ཤེས་དགོས་ངེས་ཤིག་ཡིན་པས་གསན་རོགས་གནང་།
འགྲོ་བའི་མགོན་སྐྱབས་དམ་པ་རྒྱལ་བ་དེ་བཞིན་གཤེགས་པ་སྐུ་བལྟམས་པ་ལ་སོགས་པའི་དུས་ཆེན་གསུམ་འཛོམས་ཀྱི་ཉིན་མོར་བལ་པོའི་ཆོས་ལུགས་མཐུན་འབྲེལ་ཚོགས་པའི་འབད་རྩོལ་དང་དམངས་གཙོའི་ལུགས་བཟང་སྐྱོང་བའི་དབུ་ཁྲིད་བཅས་ཀྱིས་ཕྱར་བ་གྲུ་འདེགས་ངང་ཐུབ་པའི་དུས་ཆེན་རྒྱས་སྤྲོས་ཤིག་བརྩི་སྲུང་གནང་ཞིང་། ཤེལ་ཁང་དགུ་ཐོག་ཅན་གྱི་ཁང་མིག་ལྔ་བརྒྱ་ཡོད་པར་གྲགས་པའི་གྱང་ངོས་ན་“སངས་རྒྱས་བལ་པོར་འཁྲུངས་”ཞེས་པའི་འཛམ་གླིང་སྐད་ཡིག་མང་པོའི་ཐོག་བསྒྱུར་པ་ཞིག་འཇའ་མཚོན་སྣ་ལྔའི་གློག་འོད་དང་ལྷན་དུ་ཤར་ཡོང་གིན་གདའ། འཛམ་གླིང་ཡུལ་གྲུ་གཞན་ནས་ཆེད་དུ་གདན་དྲངས་པའི་སྐུ་མགྲོན་རྣམས་སྡིངས་ཆའི་སྟེང་དུ་བཞུགས་ཤིང་མི་མང་འབུམ་ཚོ་འགའ་ཞིག་གྲོག་མའི་ཚང་རྡོལ་བ་བཞིན་གང་སར་འགྲོ་འདུག་བྱེད། དེ་ནི་ལེགས་ཕྲུག་གིས་དེ་སྔོན་བཤད་པའི་དུས་བཟང་སྟེ་གལ་ཆེའི་རང་བཞིན་ལྡན་པའི་དུས་སྐབས་དེར་མི་རིགས་དང་རྒྱལ་ཁབ་ལ་བྱས་རྗེས་ཆེ་བའི་མི་བུ་དག་ལ་རྟགས་མ་དང་གསོལ་རས་གནང་ཞིང་། དམངས་གཙོའི་ལམ་བཟང་གི་འོད་མདངས་ནི་སྣང་བྱེད་ཆེན་པོ་བཞིན་ཕྱོགས་ལྷུང་བྲལ་བས་ངལ་རྩོལ་བ་དག་ལ་འབྲས་བུ་རྙེད་ངེས་ཤིག་ཡིན་སྟབས། ང་རང་གི་ངོས་ནས་ཀྱང་ལོ་འགའི་རིང་སྤྱི་ཚོགས་ཞབས་ཞུ་ཕྲན་བུ་ཞིག་ཞུས་པ་དེར་ཆེར་གཟིགས་ཀྱིས་“སྨན་ཞབས་བྱམས་སེམས་མ་”ཞེས་པའི་ཕྱག་རྟགས་ཐོག་མ་དེ་གུས་པར་བསྩལ་གནང་བ་རེད། ཉིན་ཤས་སྔོན་དེར་ལེགས་ཕྲུག་གིས་ཡིག་འཕྲིན་ཞིག་བསྐུར་བྱུང་བས་དེར་ང་ལ་རྟགས་མ་ཐོབ་པའི་གཏམ་བཟང་ཨ་མར་བཤད་པ་དང་ཨ་མ་རྒན་མོས་ངལ་བ་ཁྱད་བསད་ཀྱིས་ལ་ལུང་མང་པོོ་བརྒལ་ཏེ་དུས་བཟང་དེར་སླེབ་ཐུབ་པར་བྱ་རྒྱུ་སོགས་ཡིད་ཆེས་སའི་གཞི་གང་ཡང་མེད་པའི་ཡི་གེ་ཞིག་འབྱོར་བྱུང་། ལེགས་ཕྲུག་གིས་དེ་འདྲ་ཧམ་རྫུན་ཞིག་ཅིའི་ཕྱིར་ཤོད་དམ། ཁོ་ང་ལ་མགོ་སྐོར་གང་ཞིག་གཏོང་རྩིས་ཡོད། ད་ནི་མགོ་སྐོར་ཅི་ཞིག་བཏང་ནའང་གཏོང་། གཅིག་བྱས་ན་མགོ་སྐོར་དེ་ཡང་ངའི་ཁེ་ཕན་ཁོ་ནའི་ཆེད་ཡིན་སྲིད། ང་ནི་ཁོ་ལ་སྙིང་ཐག་པ་ནས་ཡིད་ཆེས་ཡོད་པས་ཁོ་རང་གིས་གང་ཟེར་ལ་བོར་བ་ཡིན།
གནས་ཚུལ་ངོ་མ་ནི་འདི་ལྟ་སྟེ་ཟླ་བ་གཅིག་དང་བདུན་ཕྲག་གཅིག་གི་སྔོན་རོལ་དེར་ལེགས་ཕྲུག་ཕ་ཡུལ་ལ་ནང་མི་ཐུག་འཕྲད་དུ་སོང་སྟེ་ཚུར་ལ་ལོག་ནས་ཡོང་ཁ་མ་ཞིག་རེད། དེ་ཡང་རྐྱེན་དང་ཆག་སྒོ་མཉམ་འཛོམས་ཟེར་བ་བཞིན་ཞོགས་པ་ཞིག་ལ་རྣ་བར་མི་འདོད་བཞིན་དུ་གཏམ་ངན་ཞིག་བླུགས་བྱུང་བ་ནི་ཡིད་བཞིན་གྱི་ནོར་བུ་ཡོད་ཀྱང་རྙེད་མི་སྲིད་པའི་ཨ་མ་ཁོང་ཚེ་ཡི་དུས་བྱས་ནས་བདུན་ཕྲག་གཉིས་སོང་ཚར་བ་རེད་འདུག དེའི་དགོང་མོར་བཀྲ་རྒྱས་ཆང་གིས་བཟི་ཞིང་སྒོར་མོས་སྨྱོས་པའི་མོ་གསར་འགའ་ཤས་ཉི་ཧོང་ཐོན་ཁུངས་རླངས་འཁོར་སྤུས་ལེགས་ཤིག་གི་ནང་དུ་ཁྲིད་དེ་ངའི་ཁྱིམ་གྱི་སྒོ་འགྲམ་ནས་“གྲོང་གསེབ་ཨ་ཅེ་ལགས། དེ་རིང་ནས་ཁྱོད་ལ་མི་རེ་ཁོ་ཐག་ཡིན་ད་”ཞེས་སྐད་འབོད་དང་སྨྱོ་སྤྱོད་སྟོན་བཞིན་འདུག བླང་དོར་གྱི་གནས་ལ་རྨོངས་པ་སྟེ་བཟང་ངན་གྱི་རི་མོ་ཕྱི་ཙམ་ལ་བརྟག་ཅིང་ཕུགས་རྒྱང་རིང་བའི་བསམ་བློས་ཕོངས་ལ་བློ་དཀར་གཞུང་དྲང་གི་དྲི་མ་ཙམ་ཡང་མི་བྲོ་བ་མིང་ཙམ་གྱི་ཤེས་འཇོན་ཅན་བཀྲ་རྒྱས་ཁོ་སྨྱོ་རྩེད་མ་བརྩེ་ལབ་ན་ཉན་མཁན་ཞིག་མིན་སྟབས་དེ་དུས་ངས་ཁོ་ལ་མི་ཞིག་གི་རྩི་འཇོག་ཙམ་ཞིག་ཀྱང་བྱེད་འདོད་མ་བྱུང་། “བདུད་མོ་ཁྱོད་ལྟ་བ་མཁྲེགས་པ་ལ། ཚང་མ་ལེགས་ཕྲུག་གི་ཁ་ལ་མ་ཉན་པས་ལན་པ་རེད།”ཅེས་ངུ་འབོད་ཆེན་པོས་རང་ཉིད་ལ་ཡང་ནས་བསྐྱར་དུ་ཁ་རྡུང་གཏོང་བཞིན་ཉི་མ་འཁྱོལ་ཙམ་བྱས་པ་ཡིན། དེ་སྔོན་ལེགས་ཕྲུག་གིས་“ད་ལན་ཁྱེད་རང་ཡང་ང་དང་མཉམ་དུ་ཕ་ཡུལ་ལ་ཕྱིན་ན་ཡག་པོ་ཡོད་རེད། དེ་སྔོན་ཡང་ནང་ལ་མ་ཕྱིན་ནས་ཡུན་རིང་སོང་བར་བརྟེན་ཨ་ཕ་དང་མཐའ་མའི་ཐུག་འཕྲད་ཅིག་ཀྱང་མ་བྱུང་བ་རེད། ངས་ཁ་སྡུག་ག་དེ་འདྲ་ལབ་པ་མིན། འོན་ཀྱང་ཁྱེད་རང་གི་ཨ་མ་ད་ཆ་དགུང་ལོ་བགྲེས་པོ་རེད། ཐུག་ཙམ་ཞིག་བྱས་ན་མ་རྒན་སེམས་པ་དགའ་ཡི་རེད། གལ་སྲིད་ཕྱིན་ན་ལམ་བར་ལ་དཀའ་ངལ་མི་འཕྲད་པ་ངས་འགན་ཁུར་ཆོག”ཅེས་བཤད་བྱུང་། ལོ་བདུན་གྱི་གོང་ང་སློབ་མཐར་སོན་ལ་ཉེ་བའི་དུས་དེར་ཨ་མ་ལགས་མི་ཚེ་ཧྲིལ་པོའི་ནང་རྒྱལ་སར་གོམ་པ་ཐོག་མ་ཞིག་སྤོས་པ་རེད། དེ་དུས་ཤེས་ཡོན་སེམས་ལ་མ་འཇགས་པའི་ང་རྒྱལ་གྱིས་ཨ་མར་ཞབས་ཏོག་ལེགས་འབུལ་ཞུ་རྒྱུ་ཕར་ཞོག ཁ་རྡུང་དང་སྨད་ར་ཉེས་འཛུགས་སོགས་གང་དང་གང་བྱས་པ་དག་བཤད་ན་ཤོད་མི་ཕོད་པ་ཞིག་ཡིན་ཏེ། དེ་སྔོན་སྐོར་ལམ་གྱི་“མོ་གསར་”དེ་ལས་ངན་པ་ཞིག་མེད་ན་བཟང་བ་ཞིག་ག་ལ་ཡོད། དེ་རྗེས་གཞུང་གི་ལས་ཀ་དང་སྒེར་གྱི་ལས་འགུལ་སོགས་ལ་གཡེངས་ནས་ཕ་ཡུལ་ལ་འགྲོ་རྒྱུའི་འདུན་པ་ཙམ་རེ་ལས་ཁོམ་པ་ནམ་ཡང་བྱུང་མ་སོང་། ལེགས་ཕྲུག་གིས་འགྲོ་རྒྱུར་སྐུལ་སྐབས་“ཁྱེད་ལ་དུས་ཚོད་མང་དྲགས་ན་ཉིན་གཅིག་ལ་ཆུ་ཚོད་རེ་གཉིས་ང་ལ་བྱིན་དང་”ཞེས་ཚིག་ཞགས་ཀྱིས་བཅིངས་པས་ཁོས་བཟང་ངན་གང་ཡང་སྨྲ་མ་ནུས་ནས་བསྡད། དེ་དུས་ང་ལ་རྒྱལ་ཁ་ཆེན་པོ་ཞིག་ཐོབ་སོང་སྙམ་ནས་ཁྲེལ་དགོད་ཅིག་ཀྱང་ཤོར་བས་དེ་ནི་ངའི་མི་ཚེའི་ནང་ཕམ་ཁ་ཆེ་ཤོས་ཤིག་ཡིན་གཤིས། དེ་ལ་བརྟེན་ནས་ད་ཆ་ང་ངུ་འབོད་དེ་ཚོ་རྒྱག་དགོས་ཐུག་པ་རེད།

༧༽ པདྨ།

གཤིས་རྒྱུད་ཀྱི་ཆུ་མོ་འདམ་རྫབ་ཀྱིས་གཡོགས་ཀྱང་ལེགས་བྱས་ཀྱི་པདྨོ་མི་ཉུང་བ་ཞིག་བཞད་སྲིད་ལ་གལ་ཏེ་ཁྱེད་ཀྱི་པདྨ་དེ་འཛུམ་པ་ལ་བར་དུ་གཅོད་བྱེད་ཀྱི་མུན་པ་ཞིག་ཡོད་སྲིད་ཀྱང་དེ་ཀུན་ནས་བཞད་པར་བྱེད་པའི་སྣང་བྱེད་ཅིག་ཀྱང་ཡོད་ཅིས་མི་སྲིད། བསྙེན་བཀུར་གྱི་ཟིམ་ཆར་ཡུན་རིང་དུ་བབས་ཏེ་མི་བདེ་དང་སྡུག་བསྔལ་སོགས་རྙིང་ཧྲུལ་དུ་གྱུར་པའི་འདབ་མ་དག་དོར་ནས་དྭངས་སིང་ངེ་བ་ཞིག་ཡོད་དགོས་ཀྱང་། དབུ་འཕང་གི་ཉམས་དམའ་བར་འདུག་པ་དེ་ཅི་ཞིག་ཡིན་ནམ། དེ་ནི་ངའི་ཆེད་དུ་རང་གི་གཅེས་སྲོག་ཀྱང་གཏོང་བར་ཉམས་ང་མེད་པ་དྲིན་ཆེན་གྱི་ཨ་མ་དྲན་པ་མ་ཡིན་ནམ། ཉེ་གྲོགས་དུ་མ་ཞིག་བར་ཆད་ཀྱི་སད་སེར་དུ་མས་བརྡུངས་ནས་ཟིམ་ཆར་བཟང་པོ་ཞིག་དལ་ལྷོད་ཀྱིས་ལོངས་སྤྱད་རྒྱུ་མ་བྱུང་ཞིང་རང་ཉིད་ལ་བཀྲ་ཤིས་ལེགས་ཚོགས་ཀྱི་དུས་བཟང་ཞིག་ཐོབ་པ་དེ་མ་ཡུམ་དང་ལྷན་དུ་དགའ་བདེར་སྤྱད་རྒྱུ་མ་བྱུང་བས་སྐྱོ་གདུང་གིས་མགོ་བོ་དུད་པ་ཡིན་ནམ། བདག་ལ་ནི་“སྨན་ཞབས་བྱམས་སེམས་མ་”ཞེས་པའི་རླུང་བུས་བསྐུལ་བའི་ཟིམ་ཆར་དེས་སེམས་ཀྱི་ཆ་ཤས་ཡོངས་ལ་གཙང་བཤལ་ཡངས་སིང་ངེ་བ་ཞིག་བྱས་ཡོད་ཀྱང་ཨ་མ་དྲན་པའི་གདུང་བའི་ཐག་སྣེ་དེ་སེམས་ཀྱི་གཏིང་རུམ་ན་ཟུག་པའི་འགྱོད་གདུང་གི་གཟེར་ཁ་ཞིག་ལ་འཁྲིལ་ནས་མགོ་དབྱིངས་སུ་འདེགས་པའི་རང་དབང་མི་འདུག ཁ་སང་སྟེ་སངས་རྒྱས་ཆོས་ལུགས་པར་མཚོན་ན་སྟོན་པ་འཁྲུངས་པའི་དུས་ཆེན་དང་སྤྱི་ཚོགས་ཞབས་ཞུ་བ་ཞིག་ལ་མཚོན་ན་སེམས་ངར་སླར་འཕེལ་བའི་དུས་བཟང་། བདག་ལ་ཆ་བཞག་ན་ཆེས་རིན་ཐང་ཆེ་བའི་དུས་ཁྱད་པར་ཅན་ཞིག་ཡིན་པ་སྨོས་མི་དགོས། འོན་ཀྱང་བྱས་འབྲས་ཀྱི་རི་བོ་བརྩེགས་པའི་རྩེ་མོར་མ་ཡུམ་མ་བཞུགས་པའི་མི་ཚེ་འདི་ཇི་ཙམ་ཞིག་ཕུན་སུམ་ཚོགས་ཀྱང་ཕྲ་རྒྱན་གྱིས་ཕོངས་པའི་སོར་གདུབ་བཞིན་སྟོང་ཆ་ཞིག་དང་འབྲལ་མེད་དུ་འགྲོགས་དགོས་འདུག
ཁ་སང་མཛད་སྒོ་གྲུབ་རྗེས་རྒྱ་སེ་དམར་པོའི་ཟ་ཁང་ནང་དགའ་ཉེ་བློ་དཀར་ཅན་རྣམས་ཀྱིས་ཐུགས་སྤྲོ་ཞིག་གོ་སྒྲིག་བྱས་འདུག་ལ་ཁྱུང་འབྲུག་ཁ་སྤྲོད་རི་མོ་ཅན་གྱི་སྒྲོག་ཙེ་ཞིག་གི་སྟེང་ན་ངའི་ཨ་མའི་མིང་བྱང་ཡང་བཀལ་ཡོད་པ་དང་། སྒྲོག་ཙེ་དེའི་སྟེང་དུ་པད་དཀར་སོས་པ་དཔུང་གང་ལ་རྒྱ་སེ་དམར་པོ་ཐར་ཐོར་ཡོད་པ་ཞིག་སྣ་ཚོགས་ལོ་མས་མཐའ་བསྐོར་ཞིང་བཀྲག་ཤོག་དྭངས་མ་ཞིག་གིས་གཡོགས་ནས་བཞག་འདུག མེ་ཏོག་དེ་ལ་ཡིག་སྐོགས་ཤིག་ཀྱང་གཟེར་འདུག་པ་དེ་ལེགས་ཕྲུག་གིས་ཡར་བླངས་ནས་ང་ལ་གཟབ་ནན་གྱིས་གཏད་བྱུང་། དགའ་བསུའི་ཡིག་སྒམ་ཚང་མ་ཁ་འབྱེད་ལོང་ཞིག་མི་འདུག་ཀྱང་ཡིག་སྐོགས་ངོས་དེར་“ཨ་མ་ནས་”ཟེར་བ་ཞིག་བྲིས་འདུག་པས་རང་ཉིད་ལ་ཡང་ཡིད་ཆེས་བྱ་རྒྱུ་གཡུགས་ནས་དེ་མ་ཐག་ཁ་ཕྱེས་པ་ཡིན།
“བུ་མོ་ང་སླེབ་མ་ཐུབ་པར་ཁྱོད་ཁོང་ཁྲོ་མ་ལངས་ཨ། ད་ནི་ཨ་མ་ལོ་ན་རྒས་སོང་ལ་ཉིན་རེ་ནས་ཉིན་རེར་ཁྱོད་ཐུག་འདོད་ཇེ་ཆེར་འགྲོ་ཡི་འདུག ཡིན་ནའང་སོ་སོའི་མི་ཚེའི་ལས་འགན་ལས་རྒན་རྒོན་གལ་ཆེ་བ་ཞིག་ཡིན་རྒྱུ་མ་རེད། ཁྱོད་མ་ཐུག་ཀྱང་ཨ་མའི་འདོད་དོན་གལ་ཆེ་ཤོས་དེ་ཁྱོད་ཀྱིས་བསྒྲུབས་ཚར་འདུག་པས་ད་ནི་ང་བློ་བདེ་པོ་ཡོད། དེ་སྔོན་སུ་ལ་ཡང་སྟེར་མ་ཕོད་པའི་ངའི་གཡུ་ཆུང་གྲུ་དཀར་དེ་ལེགས་ཚོགས་(ལེགས་ཕྲུག)ལ་བྱིན་པ་ཡིན། གལ་སྲིད་ཁྱོད་ལ་མོས་མཐུན་མེད་ན་ཁོའི་ལག་ནས་ལེན་རྐྱང་གྱིས། སྔ་ནས་ད་བར་འུ་ཚོའི་ལུང་པར་བུད་མེད་ཀྱིས་ཐབ་མེ་གསོ་བ་ལས་གཞན་ཅི་ཡང་མི་འཇོན་ཤག་ཤག་བྱེད་ཀྱི་ཡོད་པས་ངས་ཁྱོད་དེ་འདྲ་འཇོན་པོ་ཞིག་བྱུང་ཡོང་བསམ་པ་མེད། ལེགས་ཚོགས་ཀྱིས་ཉིན་མང་པོའི་རིང་ལ་ཁྱོད་ཀྱི་ལོ་རྒྱུས་བཤད་བྱུང་བས་ང་ལ་ད་ཆ་བུ་ཞིག་སྐྱེ་མ་ཐུབ་པའི་གནོང་འགྱོད་དེ་ཡལ་སོང་བའི་ཁར་ངོ་མ་བུ་མོ་ཁྱོད་ཀྱིས་ང་ལ་སྤོབས་པ་ཧ་ཅང་ཆེན་པོ་སྐྱེ་རུ་བཅུག་སོང་། ད་ནི་དབུགས་ཆད་ན་ཡང་འགྱོད་པ་མེད་ལ་ཚེ་འདིར་ཁྱོད་ལ་འབྲལ་མེད་ཀྱིས་གཅེས་སྐྱོང་ཞིག་བྱ་རྒྱུ་མ་བྱུང་ཡང་ང་ཚོ་གཉིས་སྐྱེ་བ་རྗེས་མར་ཡང་མ་བུར་གྱུར་ནས་ཚེ་གང་ཁྱོད་ལ་གཅེས་སྐྱོང་བྱ་རྒྱུར་མ་ཤིའི་བར་དུ་སྨོན་ལམ་འདེབས་ངེས་ཡིན།…………”སོགས་ད་དུང་ཀློག་ཚར་རྒྱུ་མེད་པ་ཞིག་བྲིས་འདུག་པའི་ཡི་གེ་དེ་ནི་ཨ་མ་གྲོངས་ཁར་ལེགས་ཕྲུག་ལ་ཕབ་ལེན་བྱེད་དུ་བཅུག་པ་ཞིག་རེད་འདུག དེ་མན་ཆད་མིག་མཆི་མས་བསྒྲིབས་ནས་ཀློག་མ་ནུས་ལ་དབུགས་ཀྱི་རྒྱུ་བ་མིད་པར་འཚངས་ཤིང་མགྲོན་པོའི་དབུས་སུ་ངུ་ཤོར་ནས་ལེགས་ཕྲུག་ལ་མགོ་བོོས་ཤུགས་དྲག་གིས་རྡུང་ཞོར་“ཁྱོད་ང་ལ་མགོ་སྐོར་མ་གཏོང་དང་ངས་ཨ་མ་མེད་པ་སྔ་ས་ནས་ཤེས་ཀྱི་ཡོད། ང་ལ་དེ་འདྲ་སྦ་གསང་གང་བྱས་ནས་བྱས་པ་ཡིན་ནམ།”ཟེར་ཞིང་ཁོར་འཐམས་ནས་ཡུན་རིང་ངུས། ལེགས་ཕྲུག་གིས་མགྲོན་ཚོགས་ལ་དགོངས་སེལ་ཞུས་ནས་ང་ལོགས་ཤིག་ཏུ་ཁྲིད་དེ་སེམས་གསོ་དང་མཉམ་དུ་ང་ལ་ཨ་མའི་རེ་འདོད་ལྟར་སྦ་གསང་བྱེད་དགོས་དོན་དག་བཤད་བྱུང་བས་ད་ནི་ཨ་མས་ཁོ་ལ་གནང་བའི་གཡུ་ཆུང་གྲུ་དཀར་དེ་ལོང་ཞེས་ཨུ་ཚུགས་བྱས་ཀྱང་ལེན་ཕོད་པ་མ་བྱུང་།

༨༽ མཐའ་དོན།

ལེགས་ཕྲུག་གིས་པདྨ་དཀར་པོར་རྒྱ་སེ་དམར་པོས་ཕྲ་བཏབ་པ་དེེ་ལྷད་མེད་ཀྱི་སེམས་ན་རེ་འདུན་གྱི་སྙིང་དམར་ཞིག་མཚོན་པ་ཡིན་ནམ་ངས་ཁོ་ལ་ངུ་ངག་གི་ཁྲོད་ནས་རྡུང་རྡེག་གི་ཚུལ་དུ་མོས་མཐུན་གྱི་མགོ་བོ་ལྕོག་པས་རེད་དམ། ཨ་ཙི་དོན་འགའ་ཞིག་རྩོལ་བས་ཀྱང་མི་འགྲུབ། རེས་འགའ་མ་འབད་ཀྱང་འགྲུབ་པ་འདི་ཆོས་པ་ཚོས་དངོས་པོའི་ཆོས་ཉིད་རེད་ཅེས་པ་ལ་ཆ་འཇོག་བྱ་རྒྱུ་ལས་འགྲེལ་བཤད་གཞན་ཞིག་སུས་རྒྱག་ནུས་སམ། མདོར་ན་ངེད་གཉིས་འཐམ་འཁྱུད་ཀྱི་སྒྱུ་རྩལ་གྲངས་ལས་འདས་པའི་ཁྲོད་གཟུགས་ཕུང་འདི་གཅིག་ཏུ་འགྱུར་མི་སྲིད་ཀྱང་ཕུགས་བསམ་མམ་འདུན་ལམ་གྱི་ཕྱོགས་སུ་དཔུང་པ་མཉམ་གཤིབ་ཀྱི་ངང་ནས་གཞོགས་འདེགས་གཅིག་གྱུར་བྱེད་མཁན་གྱི་མི་ཚེ་གསར་པ་ཞིག་འགོ་བཙུགས་ཡིན།
དེ་རིང་ཞོགས་པ་ངེད་གཉིས་ཨ་ཁུ་བླ་མ་ཚང་ལ་མ་འདས་མོའི་ཆེད་བསྔོ་རྟེན་ཞིག་འབུལ་དུ་ཕྱིན་པ་ཡིན། ང་རང་རིག་གསར་ལ་མོས་ཤིང་སྔོན་ཐོན་ལ་ལྷག་པར་དད་པ་ནི་མི་ཚེའི་དཀའ་སྡུག་རགས་རིམ་དག་སེལ་བ་ལ་སྟོབས་ཤུགས་ཆེ་ཞིང་ཕན་ནུས་ཟབ་པ་སྟེ་གནམ་གྲུ་ལ་སོགས་པས་འཛམ་གླིང་ཤར་ནུབ་ཡུད་ཀྱིས་སྐོར་ནུས་ཤིང་འཕྲུལ་ཆས་ཀྱི་སྡིངས་ཆ་ཡངས་པོར་རང་ཉིད་ཀྱི་ནུས་པ་ཡོད་རྒུ་རང་དབང་གིས་རྩལ་འདོན་བྱེད་ཆོག་པ་འདི་དེང་དུས་ཀྱི་ཡིད་བཞིན་ནོར་བུ་ཞེས་པ་དེ་མ་ཡིན་ནམ། འོན་ཀྱང་ཡིད་བཞིན་གྱི་ནོར་བུ་ནི་ཆེས་རིན་ཐང་ཆེ་བའི་ནོར་བུ་ཞིག་ལ་བཏགས་པ་ལས་ཡིད་བཞིན་དུ་འགྲུབ་མིན་ནི་ཀུན་ཀྱིས་ཤེས་གསལ་ལྟར་ཕྱི་ནོར་གྱི་ཁུར་པོ་གཡག་རྒྱབ་མང་ན་ཡང་ནང་བསམ་པའི་གཡག་ཁྱུར་ཤེད་ཤུགས་མེད་ན་ཚེ་བདེ་སྐྱིད་ཀྱི་ནོམ་པ་རྒྱབ་ཏུ་ལུས་རན་པས། སྐབས་དེ་ཚོར་ང་ནི་སྟོན་པ་སངས་རྒྱས་པས་གསར་དུ་བཏོད་གནང་བའི་ལམ་བཟང་དག་ལ་རྒྱུས་མངའ་ཡོད་པར་གྲགས་པའི་བླ་མ་དེ་ཚོ་ལས་རེ་ས་གཞན་ཞིག་རྙེད་ཀྱི་མི་འདུག ཨ་ཁུ་བླ་མ་ཁོང་ནི་ཕྱི་ལྟར་རྒྱལ་བའི་སྲས་པོ་ཞི་བ་ལྷ་ཞེས་པ་ལྟར་ཡིན་པས་རྒྱུན་དུ་ཁོང་ལ་འབུལ་རྟེན་ཡང་མི་ཉུང་བ་ཞིག་འབུལ་གྱིན་ཡོད་ལ། ཁོང་གི་དལ་ལ་འཇམ་པའི་གསུང་རེ་རེར་ཡང་ལྗིད་ཁོག་གཞན་དང་མི་འདྲ་བ་ཞིག་ཡོད། ད་ལན་འགྱོད་གདུང་གིས་སྨྲེ་སྔགས་དང་བཅས་རང་གིས་བྱས་ཉེས་ཤོར་བ་དག་ཞུས་འཕྲལ། དེང་སྐབས་འཛམ་གླིང་ནང་ཕ་མ་བུ་ཕྲུག་བར་བརྩེ་དུང་ཇེ་ཞན་དུ་འགྲོ་དགོས་དོན་ཅི་ཡིན་ཞུས་པར་“ང་ནི་ཆོས་པ་བཟང་པོ་ཞིག་མིན་ནའང་ཆོས་པའི་མིང་ཁུར་བའི་སློང་མོ་བ་ཙམ་ཞིག་ཡིན་པས་ཤེས་ཡོན་མེད་ལ་འཇིག་རྟེན་པའི་གནད་དོན་དག་ནི་དེ་བས་ཤེས་ཀྱི་མེད་”ཅེས་གསུངས་ནའང་ཕྱག་ཡིག་ཅིག་བསྩལ་བྱུང་བས་དེ་དག་གི་དོན་ཚན་འགའ་ཞིག་སྤྱིར་གྲོགས་ཕོ་མོ་ཀུན་དང་ལྷག་པར་ཤེས་ཡོན་གྱི་གོ་སྐབས་མ་རག་པའི་ཕ་མ་རྣམས་དང་ཕ་མ་གཏིང་བརྗེད་དུ་སོང་བའི་བུ་ཕྲུག་དག་ལ་ཕན་ན་ཅི་མ་རུང་སྙམ་བཞིན་གཟིགས་འབུལ་ཞུས་པ་ཡིན།

༄༅། །ངས་བྱས་ན་བུ་མོ་ཁྱོད་ལ་ཉེས་པ་མེད་པ་མ་ཟད། ཁྱོད་ཀྱི་མ་ཡུམ་ལའང་ཉེས་པ་དེ་བས་མེད། དོན་ཆེན་གྱི་ཐང་ཡངས་འགྲུབ་དགོས་ཚེ་གཅེས་འཛིན་གྱི་ཤིང་ནགས་གཏུབ་དགོས་པ་བཞིན་“སྨན་ཞབས་བྱམས་སེམས་མ་”ཞེས་པ་མ་ཡུམ་ལགས་དང་ཡུལ་ལུང་གི་མིས་མི་ཚད་མི་རིགས་དབྱེར་མེད་དང་ཕོ་མོ་འདྲ་མཉམ་ཡེ་ནས་གནས་པ་ལ་སྐབས་རེར་དགོས་པའི་དབང་གིས་ཕལ་མོ་ཆེར་ཐུབ་ཚོད་ཀྱིས་སྤྱི་ཚོགས་ཁྱོན་ཡོངས་ལ་གྱོང་རྒུད་བཏང་ཡོད་པ་དེར་ཁྱེད་ཀྱིས་དཔུང་པ་འདྲ་མཉམ་མཚོན་པའི་བྱས་རྗེས་རླབས་ཆེན་ཞིག་བཞག་གནང་བ་ལ་འཛམ་གླིང་ཡུལ་གྲུ་ཀུན་ནས་ཆེ་བསྟོད་ཐོབ་པ་དེ་ནི་ཁྱོད་ཀྱི་བློས་གཏོང་གི་གྲུབ་འབྲས་འགྲན་མི་བཟོད་པ་ཞིག་རེད། རྣམ་དཔྱོད་ཀྱི་སྐུད་པ་ཡོད་ཀྱང་ཤེས་ཡོན་གྱི་རྒྱ་ཁབ་མེད་ན་མི་ཚེ་ལ་ལྷན་པ་རྒྱག་མི་ནུས་སྟབས་ཨ་མ་ལགས་དང་ཁྱེད་གཉིས་བར་ལ་སྟོང་ཆ་ཞིག་ལྷག་སོང་བ་རེད། མ་ཡུམ་ལགས་ཀྱིས་ད་ནི་ངའི་བུ་མོ་རྒྱབ་སྒལ་པས་ཁེངས་པ་དང་མདུན་སེར་ཀས་རུལ་དགོས་པའི་སྡུག་ལས་བྱེད་མི་དགོས་པར་མདུན་ལམ་ལེགས་པའི་ལམ་ལ་ཚུད་པ་སྟེ་དམའ་ས་རུ་སློབ་སྦྱོང་བྱེད་དུ་སོང་བ་རེད་ཅེས་སྐྱིད་པོ་ཡོད་ཤག་གི་བསམ་བློས་དངོས་ཡོད་ཀྱི་གནས་སྟངས་མ་རྟོགས་ལ། སྐྱིད་པོ་ཡོད་པའི་དབང་དུ་བཏང་ན་ཡང་ཕ་མ་མི་དྲན་པའི་བུ་ཕྲུག་བཟང་པོ་ཞིག་ཡོད་མི་སྲིད་པས་ལྷད་མེད་ཀྱི་བརྩེ་བས་ཁེངས་པའི་གསུང་ཚིག་དང་གཡོ་མེད་ཀྱི་འཛུམ་མདངས་རྒྱས་པའི་བཞིན་རས་དག་གནས་དུས་ཀྱི་དབང་གིས་ཀྱང་མཚམས་རེར་སྙིང་དབུས་ནས་མཇལ་འདོད་ལོས་སྐྱེ། འོན་ཀྱང་མིག་གིས་མཐོང་ས་དང་རྣ་བས་ཐོས་ས་ལ་ཡང་མེད་པར་ལོ་གྲངས་དུ་མར་སོང་ཚེ་བརྩེ་བའི་ཆུ་རྒྱུན་ཇེ་སྲབ་དང་ཇེ་ཕྲ་རུ་འགྲོ་བ་གཏན་ཁེལ་རེད། བུ་མོ་འཇོན་པོ་ཁྱོད་ལྟ་བུ་རེ་གཉིས་མ་གཏོགས་མང་པོ་ཞིག་ནི་ལྷད་མེད་ཀྱིས་ཕྱོགས་སྟོན་མཐའ་གཅིག་ཏུ་བྱེད་མཁན་ཞིག་མེད་ཚེ་རང་སྣང་གང་དྲན་པ་རུ་གྱུར་ནས་མི་ཚེའི་མདུན་ལམ་བརླགས་དང་བརླག་བཞིན་པ་རེད། དེ་ནི་ཕ་མའི་ནག་ཉེས་ཤིག་མ་ཡིན་ཡང་ཤེས་དགོས་པའི་གལ་གནད་ཅིག་སྟེ་ཕ་མའི་གསུང་ཚིག་རེ་རེ་ལ་ཡང་གཞན་གྱི་གཏམ་ཚོགས་དུ་མས་ཀྱང་འགྲན་ག་ལ་བཟོད་དེ་མི་བཟོད་དོ། །མཐའ་དོན། ཕ་མའི་རེ་བ་ཉག་གཅིག་དེ་ནི་ཕྲུ་གུ་ཉིད་ཀྱི་མི་ཚེ་དོན་དང་ལྡན་པ་ཞིག་ཆགས་རྒྱུ་དེ་རེད། ཁྱོད་ཀྱིས་ཀུན་ཀྱི་མིག་དཔེར་འོས་པའི་མི་ཚེ་ཞིག་འགོ་བཙུགས་པ་དེར་ངོས་ནས་འཚམས་འདྲི་གྲངས་མེད་དང་བཅས་སྔ་ཤོར་གྱི་བྱ་བ་བཟང་ངན་ཀུན་ནས་བློ་སྐྱེད་ལེན་ཞོར་ཕུགས་འདུན་གྱི་རྟ་ཕོར་བརྩོན་པའི་ལྕག་གིས་མུ་མཐུད་དུ་སྐུལ་བ་ལ་བར་ཆད་མི་ཡོང་བའི་སྨོན་འདུན་ཡང་ཡང་ཞུ་ཞེས་གསུངས་འདུག