ལོ་རིམ་བདུན་པའི་སློབ་གཉེར་བ། གློ་བོ་ལྷུན་གྲུབ།
༡༽
༢༠༡༦/༣/༡༡ རེས་གཟའ་པ་སངས།
བཀྲ་ཤིས་པར་ཤོག དེ་རིང་ཉིན་ཐོ་འབྲི་དེབ་གསར་པ་འདི་ཉོས་པ་ཡིན། དེ་བས་དེ་རིང་གི་ཉིན་ཐོའི་ཚབ་ཏུ་རང་ཉིད་ཀྱི་ངོ་སྤྲོད་མདོ་ཙམ་འབྲི་བར་འདོད། ང་ནི་གློ་བོ་མ་རང་ཟེར་སའི་གྲོང་སྡེ་ཆུང་ཆུང་ཞིག་ཏུ་བཙས་འདུག ང་སྐྱེས་ནས་ལོ་ངོ་གཉིས་ཀྱི་རྗེས་སུ་ང་ཡི་ཨ་མ་དང་ཨ་ཕ་གཉིས་བཟའ་ཚང་ཐོར་རེད་ཟེར། དྲང་པོར་བཤད་ན་ངེད་ཚང་ལ་མ་གཡར་མ་བསུས་སྔོན་དུ་ཨ་མ་མེད་ཀྱང་ཨ་ཕས་ང་སྡུག་ཏུ་བཅུག་མྱོང་མེད། ད་དུང་ཁོང་གིས་ང་ཡི་ངོ་ལ་བལྟས་ནས་ལོ་ངོ་འགའ་ཡི་རིང་ཕོ་ཧྲེང་བསྡད་པ་རེད། ང་ལོ་བདུན་ལོན་དུས་ལུང་མི་དང་སྤུན་མཆེད་རྣམས་ཀྱི་རེ་བ་ལྟར་པ་ལགས་ཀྱིས་ཆུང་མ་གཞན་ཞིག་བླངས། དེའི་ལོ་རྗེས་མ་དེར་མ་གཡར་ལ་བུ་མོ་ཞིག་སྐྱེས། རྒྱུ་མཚན་གང་ལ་ཐུག་མིན་མི་ཤེས་ཀྱང་མ་གཡར་ལ་བུ་མོ་སྐྱེས་ནས་བཟུང་ཨ་ཕས་ང་ལ་བཀའ་བཀྱོན་དང་རྡུང་རྡེག་གནང་འགོ་བཙུགས། དེ་ནས་བཟུང་ཤིན་ཏུ་ཞེ་སུན་པའི་མ་གཡར་གྱི་འཇིགས་སྐུལ་དང་གཉའ་གནོན། དོན་དག་ཡོད་མེད་ལ་མི་ལྟོས་པར་ཨ་ཕའི་ཉེས་རྡུང་ཉོ་རྒྱུ་བཅས་ནི་ངའི་མི་ཚེའི་གྲུབ་ཆ་ཞིག་ཏུ་གྱུར། ལོ་ཟླ་རིམ་བཞིན་འདས་པ་ན་ཁོ་བོ་ཁྱིམ་ཚང་དེ་ཡི་གཡོག་པོ་ཆགས་ཚར་བ་ང་རང་གིས་ཀྱང་མ་ཚོར། སྐབས་དེ་དུས་ང་ང་རང་གི་མི་ཚེ་ལ་འ་ཆད་འུ་ཐུག་པ་མ་ཟད། ལུང་མི་ཚོ་ཡང་ང་མཐོང་དུས་རང་དབང་མེད་པར་མིག་མཐའ་མཆི་མས་བརླན་པ་ཉུང་ཉུང་ག་ལ་ཡིན། དེ་ལྟར་མཚམས་ཆད་རྒྱུ་མེད་པའི་གདུག་རྩུབ་ལ་སྡུག་རུས་མ་ནུས་པར། སྤྱི་ལོ་ ༢༠༠༧ ལོར་ང་ཕ་ཡུལ་དང་ཁ་ཐག་གྱེས་དགོས་བྱུང་། ཉིན་དེའི་དུས་ཚེས་ཏག་ཏག་དྲན་ངོས་ན་མི་འདུག་མོད་གང་ལྟར་སྟོན་མཇུག་གི་ཉིན་མོ་ཞིག་རེད། དེ་དུས་མ་གཡར་ལ་ཡང་བསྐྱར་མངལ་ཆགས་ནས་ཁྱིམ་དུ་བསྡད་ཡོད་ཅིང་ཨ་ཕ་དང་ང་གཉིས་པོ་ཞིང་ཁར་དགུན་ཆུ་འཆུ་རུ་ཕྱིན། དགོང་མོ་ངེད་གཉིས་ནང་ལ་ལོག་ཡོང་དུས་ནུ་མོ་ཆོས་འཛོམས་ཀྱིས་ང་ལ་འཐམས་ནས་“ཅོ་ཅོ་ཁྱོད་ཀྱིས་ང་ལ་རྔན་པ་ཅི་ཞིག་ཁྱེར་ཡོད་དམ་”ལབ་པ་མ་གཡར་གྱིས་མཐོང་། དེ་མུར་ཆོས་འཛོམས་ཕར་འཐེན་ནས་“ལྟས་ངན་ཁྱོད་ཀྱིས་ངའི་བུ་མོ་ལ་བཙོག་པ་བསྐུས་ཨང་”ཟེར་བཞིན་ང་ལ་སྡིགས་མོ་བྱས། ང་ལ་སྡིགས་མོ་བྱེད་པ་ཐབ་ཚང་ནང་ལ་འཛུལ་མ་ཐག་པའི་ཨ་ཕས་ཐོས་པ་འདྲ། དོན་རྐྱེན་གང་ལ་བརྟེན་ནས་སྡིགས་མོ་བྱས་པ་ཤེས་མིན་གང་ལྟར་ཡང་ངའི་ལག་ན་ཡོད་པའི་ལྕགས་ཁྱེམ་ཕྲོགས་ཏེ་མགོ་དང་རྐང་པ་གར་འཐེབ་ཏུ་གཞུས། སྐབས་དེ་དུས་མིག་ཆུ་ཐིགས་པ་གཅིག་ཀྱང་ཟགས་མ་སོང་། ཡིན་ནའང་ཁ་ནས་ཁྲག་བཞུར་ཞིང་ལུས་པོ་འདར་འཁྱོམ་མེར་ལུས་པ་དངོས་ཡོད་རེད། དེ་ཡང་ཡིན་ཏེ་ཤ་དང་རུས་པ་ནས་མཆེད་པའི་ཨ་མས་ཀྱང་བསྐྱུར་བའི་ང་ལ་མཚོན་ན་ཁོང་ཚོས་ཐུབ་ཚོད་བྱས་ཚད་ལ་མིག་ཆུ་ཤོར་ཚོད་ག་ལ་ཡོད་ཨང་། མཚན་མོ་དེར་སྟོན་མཇུག་གི་གྲང་རླུང་དང་ཨ་ཕའི་རྡུང་རྡེག་གཉིས་ཀྱིས་མཚན་གཉིད་ཧད་དུ་བཅུག་པ་ད་ལྟ་ཡང་གསལ་ལེར་དྲན་གྱི་འདུག
དེའི་ཕྱི་ཉིན་གྱི་ཐོ་རངས་སྐྱེ་སའི་ཕ་ཡུལ་དང་ལུང་མི། ད་དུང་སྙིང་ནས་བརྩེ་བའི་ནུ་མོ་ཆོས་འཛོམས། སྡང་ཟུག་ཆེ་བའི་ཨ་ཕ་དང་མ་གཡར་རྣམས་བོར་ཏེ། ནུབ་ནས་ནུབ་ཏུ་འཐེན་ཡོད་པའི་ལམ་སྣེ་དེ་དེད་ནས་བྲོས་བྱོལ་དུ་ཡོང་བ་ཡིན། འབྲོས་ཀྱིན་འབྲོས་ཀྱིན་ངའི་སེམས་པར་“ང་ད་བར་ལུང་པ་བསྐྱུར་ནས་ག་བར་ཡང་འགྲོ་མྱོང་མེད་པས་རི་བོ་དེའི་རྒྱབ་ཏུ་ང་རང་འཚོ་གནས་བྱེད་ས་ཡོད་མེད་ཀྱང་སུས་ཤེས། དེ་སྔོན་ལུང་མི་རྣམས་ལུང་ཚན་གཞན་དག་ལ་འགྲོ་དུས་གོས་སློག་གང་གཙང་གང་ལེགས་གོན་ནས་འགྲོ་བ་མཐོང་། རང་ཉིད་ནི་ཁ་སང་ཞིང་འཆུ་དུས་འདམ་བག་འགོས་ཡོད་པའི་གོས་སློག་དེ་ཀ་རང་གོན་ཡོད་པས་གཞན་དག་གིས་འཕྱ་མི་ཡོང་ངམ་”ལྟ་བུ་ད་ལྟ་བསམས་ན་དགོད་བྲོ་བའི་མནོ་བསམ་དྲུག་གསུམ་བཅོ་བརྒྱད་གཏོང་གིན་ཨ་ཕ་ངའི་རྗེས་འདེད་ཡོང་བའི་རེ་བ་བཅངས་ནས་ལུང་པ་མཐོང་སའི་ལ་མགོ་དེར་དུས་ཡུན་རིང་པོའི་བར་དུ་བསྡད་པ་ཡིན། འོན་ཀྱང་ང་དེ་ལྟར་འབྱོལ་སྟངས་དེ་སུས་ཀྱང་གོ་ཚོར་མ་བྱུང་བ་ཡིན་ནམ། ཡང་ན་ལུང་པ་དེར་ང་ལ་དོ་ཁུར་བྱེད་མཁན་སུ་ཡང་མེད་པས་ཡིན། གང་ལྟར་མི་ལྟ་ཅི་ཁྱི་ཞིག་ཀྱང་ངའི་རྗེས་འདེད་བྱས་ནས་སླེབས་མ་བྱུང་། མཐར་འཇིགས་སྐྲག་དང་སེམས་སྡུག་གང་ཞིག་གིས་ང་ཉིད་མི་ཡུལ་ནས་མི་ཡུལ་དུ་གྱར། རེད། མི་ཡུལ་ནས་མི་ཡུལ་དུ་གྱར།
མི་ཡུལ་འགྲིམ་དུས་ཀྱི་དཀའ་སྡུག་བཤད་ན་ཚར་རྒྱུ་མི་འདུག་མོད། ལོ་ངོ་འགའ་ཤས་སྔོན་ནས་སྟོན་པ་བཅོམ་ལྡན་འདས་ཀྱི་རྗེས་སུ་འཇུག་ཅིང་། ཁོང་གི་གསུང་ལ་ཐོས་བསམ་བྱེད་ཞོར་དུ་སྐྱིད་རྒྱུ་མེད་ཀྱང་སྡུག་རྒྱུ་དེ་ཙམ་མེད་པའི་མི་ཚེ་ཞིག་སྐྱེལ་བཞིན་པའི་སྒང་ཡིན། ཞེས་པའང་བཤད་གྲྭ་གུང་སེང་ནས་སླར་ཡང་དབུ་འཛུགས་པའི་ཉིན་མོར་རང་ཤག་ཏུ་བྲིས།
༢༽
༢༠༡༧/༧/༨ རེས་གཟའ་སྤེན་པ།
དེ་རིང་ཞོགས་པ་ཕ་ཡུལ་ནས་མ་གཡར་གྱི་ཁ་པར་འབྱོར། མ་གཡར་གྱིས་ཟེར་ན། “ད་ཆ་ཨ་ཕའི་ནད་གཞི་ཉིན་རེ་ནས་ཉིན་རེར་ཇེ་སྡུག་ཏུ་འགྲོ་ཡི་འདུག་ཅིང་། ད་ནི་ང་གཅིག་པུས་ནང་ལས་དང་ཨ་ཕའི་ནད་གཡོག ད་དུང་ལུང་པའི་འུ་ལག་སོགས་རྒྱུག་ཐུབ་པ་མི་འདུག ཁྱོད་ཀྱི་ནུ་མོ་ཆོས་འཛོམས་དང་དབྱངས་སྒྲོན་གཉིས་ནི་སློབ་མཐར་ཕྱིན་ནས་བཟུང་ནང་ལ་ལོག་མྱོང་མེད་པར་མ་ཟད། ‘ནང་དུ་བུ་ཡོད་བཞིན་དུ་བུ་མོ་ལ་མག་པ་ལེན་འདོད་དམ། ལུང་མི་ལ་ངོ་གདོང་གང་འདྲ་སྟོན་དགོས་སམ། ཁྱོད་རང་གཉིས་ངོ་མི་ཚ་ནའང་ང་ཚོ་ངོ་གནོང་འོང་གི་འདུག མ་གཞི་ནས་ཁྱེད་ཚོ་ལ་ལས་འབྲས་མི་འདུག҆ ཅེས་ཁྱོད་ཀྱི་ཨ་ཕ་དང་ང་གཉིས་ལ་སྡིགས་མོ་རྐྱང་རྐྱང་བྱེད་ཀྱི་ཡོད་པ་ངས་མ་བཤད་ནའང་ཁྱོད་ཀྱིས་ཤེས་གསལ་རེད། ད་ངེད་རྒས་འཁོགས་གཉིས་པོ་ཤི་ན་གཤིན་ཆོག་འདོན་མཁན་གྱི་ཆོས་པ་ཕེབས་བསུ་ཞུ་མཁན་ཡང་མེད་པ་ཆགས་ས་རེད།” སྐད་ཆ་དེ་ཚོ་བཤད་དུས་མོའི་རེ་འདོད་ངས་མགོ་འཚོས་སོང་ན་ཡང་མོ་རང་གིས་གང་བཤད་ལ་ཉན་པ་ཡིན། ད་དུང་མོས་ཟེར་ན། “ངས་ང་རང་རང་ནས་བཙས་པའི་བུ་མོ་གཉིས་པོ་ལ་བློ་གཏད་བྱས་ནས་ཁྱོད་ལ་སྡུག་པོ་ཚད་མེད་བཏང་ཡོད་པ་དག་ཁྱོད་ཀྱིས་བརྗེད་མེད་ཚོད་རེད། ཡིན་ན་ཡང་ཁྱོད་ཆོས་པ་ཞིག་ཡིན་པའི་ངོས་ནས་སེམས་གནག་བཅངས་མེད་པའི་ཡིད་ཆེས་ཆེན་པོ་ཡོད་”ཟེར། ད་དུང་གཅིག་གཅིག་དང་གཉིས་གཉིས་ཟེར་ནས་མང་དག་ཅིག་བཤད་སོང་མོད་ཨ་ཕ་ནད་ཀྱིས་མནར་ཡོད་པ་གོ་སྟབས་མོའི་སྐད་ཆ་ཚང་མ་དྲན་ངོས་སུ་བཞག་ཐུབ་མ་སོང་ལ་འཇོག་འདོད་ཀྱང་མེད། ང་ལ་མཚོན་ན་མ་གཡར་གྱི་ཁ་པར་སླེབ་ཐེངས་རེ་རེར་མིག་ཆུ་དང་སེམས་སྡུག་རྐྱང་རྐྱང་གིས་བརྩེགས་པའི་འདས་དོན་རྣམས་དྲན་པའི་ངོས་རིས་སུ་གློག་བརྙན་བཞིན་ཤར་འོང་ལ། གཙེས་ཆེ་བའི་བདག་གི་སེམས་པ་དེ་ལ་ཨི་ཁུང་མང་དག་ཅིག་རྟོལ་བར་བྱེད། ད་ཐེངས་མ་གཡར་གྱིས་བཤད་པའི་སྐད་ཆ་དེ་ཚོས་མོ་རང་སྔར་བྱས་ལ་གནོང་འགྱོད་བྱེད་ཀྱིན་ཡོད་པ་མཚོན་གྱི་འདུག་ནའང་། མོས་མི་ལ་མི་ཡི་རིན་ཐང་མི་སྤྲོད་པར། ཀུན་པོ་རང་དོན་ཁོ་ན་ཡིན་དགོས་པའི་ལྟ་བ་དེ་ད་དུང་བསྐྱུར་མི་འདུག་ཚོད། མི་ལོ་མང་པོའི་བར་ངས་མི་ཡུལ་འདི་ནས་དཀའ་ལས་བརྒྱབ་པའི་གྲུབ་འབྲས་ལ་སྣང་དག་མི་བྱེད་པ་ལྟ་ཅི། མ་མཐའི་ས་ནས་ང་བླ་མར་སྐྲ་ཕུད་ཕུལ་པའི་རབ་བྱུང་ཞིག་ཡིན་པ་ཡང་བརྗེད་དེ། ད་ལོ་ཡིན་གཅིག་མིན་གཉིས་རྩ་དགོངས་ཞུས་ནས་ཡོང་ན་མ་གཏོགས་མི་འགྲིག་ཚུལ་ལུང་པ་གང་བཤད་ནས་ཁ་པར་བཞག་སོང་།
༣༽
༢༠༡༧/༧/༩ རེས་གཟའ་ཉི་མ།
དེ་རིང་གྲོགས་པོ་མང་ཆེ་བ་འཛམ་གླིང་སྤྱི་བསང་སྲུང་བརྩི་བྱེད་ཆེད་“རི་བོ་བྷེ་ཏ་པུར་”ལ་ཕྱིན་སོང་། ང་ནི་ཁ་སང་མ་གཡར་གྱིས་བཤད་པའི་སྐད་ཆ་དེས་ཉིན་གང་སྐྱིད་དུ་མ་བཅུག་སྟབས། ཕྱི་དྲོ་ཆུ་ཚོད་དྲུག་པ་ཟིན་དུས་ཁེར་རྐྱང་བཤད་གྲྭའི་རྒྱལ་སྒོ་ནས་ཐོན་ཏེ། མཁའ་རླུང་འཇམ་པོ་དེ་ལ་བྲང་ཁ་གཏད་ཅིང་། དགོན་པའི་སྤོ་ལོ་ཐང་དང་ཟམ་པ་ཆུང་ཆུང་། ད་དུང་ཡིད་དུ་འོང་བའི་སྤྲིན་པ་དང་ལམ་ཟུར་ན་ཡོད་པའི་ཨ་ཤོམ་ཞིང་ཁ། རིང་ཐུང་མི་སྙོམ་པའི་རྩི་ཤིང་སོགས་ལ་མིག་ཉུལ་བྱེད་ཞོར། ཧ་ཅང་རྒྱུས་མངའ་ཆེ་བའི་སྣུམ་ལམ་སྟེང་ནས་དལ་ཞིང་ལྗིད་པའི་གོམ་ཁ་མདུན་ནས་མདུན་དུ་སྤར་གྱིན་པདྨའི་རྫིང་ཆུང་ཕྱོགས་སུ་བསྐྱོད་པ་ཡིན།
དགོན་པ་དང་ཁ་ཐག་མི་རིང་བའི་པདྨའི་རྫིང་ཆུ་ཆུང་ཆུང་དེ་ནི་“གུ་རུ་ཀུལ་སློབ་གྲྭའི་”གཞུང་ལམ་བསྐྱུར་ནས་མར་ཙམ་ཕྱིན་ན་གཤོང་ཆུང་ཞིག་ཏུ་དལ་ཅག་གེར་འཁྱིལ་ཡོད། ཁ་ཁུ་སིམ་པའི་པད་རྫིང་ཡོད་ས་དེ་ནས་ཡར་བལྟས་ན་བཀྲ་ཤིས་ལྷུན་པོ་དགོན་པའི་རྒྱ་ཕིབས་མངོན་འོང་ལ་དེ་ལས་ཉེ་ས་ཞིག་ནས་གུ་རུ་ཀུལ་སློབ་གྲྭ་མཐོང་ཐུབ། རྫིང་བུའི་གཡས་ངོས་ཀྱི་སྤང་གཤོངས་དེ་མདུན་དུ་འཁྱིལ་ཡོད་པའི་མཚེའུ་དང་པདྨའི་འདབ་མ་ད་དུང་གསར་དུ་བཞད་ཡོད་པའི་མེ་ཏོག་དང་རྣ་བར་སྙན་པའི་བྱིའུ་ཡི་སྐད་ཚོགས་ལ་གཡེངས་འདུག་པ་ལྟར་སྣང་། ཡུལ་ལྗོངས་དེར་སླེབ་ཐེངས་རེ་རེར་ངས་“ཅི་འདྲའི་ལྷིང་ཞིང་འཇགས་ལ་ཡིད་དུ་འོང་བ་ཞིག་ཡིན་འདུག་ཨང་།” ཞེས་ཆིག་ལབ་ཡང་ཡང་བརྒྱབ་མྱོང་།
མ་གཞི་ང་ལ་མཚོན་ན་སྙན་ངག་ཐན་ཐུན་རེ་སླ་འགོ་བཙུགས་པ་ནས་བཟུང་སྣོད་ཀྱི་འཇིག་རྟེན་ལ་ཧ་ཅང་དགའ་ཞེན་ཆེ་བ་མ་ཟད། “ཇེ་ཀྲིཥ་ཎཱ་མཱུར་ཏིའི་”«J. krishnamurti»གསུང་འབུམ་འགའ་བཀླགས་རྗེས་སུ་ང་ཡི་ཁོར་ཡུག་ཡུལ་ལྗོངས་ལ་བཅངས་པའི་བརྩེ་སེམས་དེ་དེ་བས་ཀྱང་ཟབ་ཏུ་ཕྱིན། དྲང་པོར་བཤད་ན་ཡུལ་ལྗོངས་ལ་བརྩེ་བ་ནི་ང་ཡི་གཤིས་ཀ་ཞིག་ཏུ་གྱུར་ནས་ཡོད། དེར་བརྟེན་སེམས་སྐྱོ་དགོས་པའི་གནས་སྟངས་རེ་མགོ་ཐོག་ཏུ་ལྷུང་བ་དང་། ངའི་སེམས་སུ་ཁ་ཁུ་སིམ་པའི་ཁོར་ཡུག་གང་དེ་འགོག་མེད་དུ་དྲན་འོང་ཞིང་ད་གཟོད་ང་རང་གཅིག་པུ་པད་རྫིང་ཡོད་ས་དེར་ཕྱིན་ནས་འདས་མ་ད་གསུམ་གྱི་གནད་དོན་མང་པོ་ཞིག་ལ་ཁ་གཏད་ལངས་མྱོང་ཡོད་ལ། སུས་ཀྱང་ཚོར་མི་སྲིད་པའི་མིག་ཆུ་མང་དག་ཅིག་བཞུར་དུ་བཅུག་པ་ཡིན། དེ་རིང་ཡང་ནམ་རྒྱུན་ཇི་བཞིན་ང་ཁོ་ན་ལ་དབང་བའི་འཇིག་རྟེན་དེར་ཡུན་རིང་པོའི་བར་དུ་ཅེར།
རེད་ཡ། དེར་ཕྱིན་ནས་སེམས་ཀྱི་རྨ་ཁ་ཡོད་ཚད་མིག་ཆུ་རུ་བསྐོངས་ནས་ཡིད་ཚིམ་པོ་རེ་ངུས་ན་ད་གཟོད་སེམས་པ་ལྷོད་ལ་བབས་འགྲོ། ཡིན་ན་ཡང་ད་ཐེངས་ཀྱི་གནད་དོན་འདི་ནི་རྒྱུན་ལྡན་ལྟར་མིན་སོང་། དུས་རྒྱུན་བདག་གི་སེམས་ངལ་གསོ་སའི་ཁོར་ཡུག་དེར་སེམས་པ་ག་ཚོད་ཡན་ཁུལ་བྱས་ཀྱང་། དྲན་སྣང་རྦ་རླབས་བཞིན་འཕྱོ་ཞིང་། སྐྱོ་སྣང་སྤྲིན་ནག་བཞིན་འཐིབས་མུར། འཇིགས་ཡེར་བའི་ཚོར་སྣང་སྐྱུར་མོ་ཞིག་སྙིང་གི་གཏིང་རུམ་ནས་ཇེ་ཆེ་ཇེ་དྲག་ཏུ་མཆེད་དེ་བཟོད་བསྲན་མི་ཐུབ་པའི་ཚོད་དུ་བསྐྱལ། དང་ཐོག་ངའི་ཆེས་དགའ་ས་དང་གཅེས་ས། ཡིད་དུ་འོང་ཤོས་ཡིན་པའི་ཡུལ་ལྗོངས་དེ་ཡང་རྣམ་པ་གཞན་ཞིག་ཏུ་གྱུར་འདུག རྣ་རྩ་རུ་གྲག་འོང་བའི་བྱིའུ་ཡི་སྐད་སྒྲ་དག་རྙིང་ཧྲུལ་དུ་སོང་ཟིན་པའི་རླངས་འཁོར་རྫོབ་པོ་ཞིག་གི་དུང་སྒྲ་དང་མཚུངས་ལ། བཅོས་མིན་འཛུམ་གྱིས་ཕྱུག་ཅིང་ལྷོད་ཤིག་གེར་བཞད་ཡོད་པའི་མེ་ཏོག་པདྨ་རེ་རེས་ང་ལ་ཅི་ཞིག་ཅོ་འདྲི་བར་བསྒུགས་འདུག་པ་ལྟར་སྣང་། ད་དུང་རླབས་རིས་ཕྲ་མོ་རེ་རེ་ང་ལ་རྒྱབ་ཀྱིས་ཕྱོགས་ཏེ་མུ་སྦྲེལ་གྱིས་རྒྱང་ནས་རྒྱང་དུ་ཡལ་སྟངས་དེ་སྙིང་ཉེ་སུ་ཞིག་གིས་ང་རང་བོར་ནས་འགྲོ་ཡི་ཡོད་སྣང་ཤར། “ཨ་ཙི། ཞེད་སྣང་ལ། སྣོད་བཅུད་དགྲ་རུ་ལངས་པ་རེད་དམ། མ་གཞི་ལེགས་པར་བརྟགས་ན་ནུས་མེད་ལ་ཐུབ་ཚོད་དང་ཁྱད་གསོད་བྱེད་པ་ནི་མི་ཁོ་ནའི་བྱ་སྤྱོད་མིན་པ་འདྲ། སྡུག་བསྔལ་གྱི་ཁུར་པོ་མི་ཐེག་པའི་ང་ལ། ཁོར་ཡུག་ཡུལ་ལྗོངས་ཀྱིས་ཀྱང་བརྙས་བཅོས་བྱས་བྱུང་།” གང་བྱས་ཡིད་དུ་འོང་བའི་པད་རྫིང་འཁྱིལ་བའི་ཡུལ་ལྗོངས་འདིས་ཀྱང་ད་ལན་བདག་སེམས་ལ་མི་སྨན་པའི་ཁར་སྡུག་ཐོག་ཏུ་སྡུག་སྣོན་བྱེད་ཙམ་ཡིན་སོང་བས། ལྗིད་ཆེ་བའི་སེམས་ངལ་དང་འགོག་ཏུ་མེད་པའི་མིག་ཆུ་ཁོ་ན་ལ་རེ་བ་བཅོལ་ནས་རང་དགོན་དུ་ལོག་ཡོང་བ་ཡིན།
༤༽
༢༠༡༧/༩/༢༡ རེས་གཟའ་ཕུར་བུ།
ཁ་ཉིན་དབྱར་གནས་ཚར། ཁ་སང་ལྗོངས་རྒྱུ་ལ་ཕྱིན། དེ་རིང་བཤད་གྲྭ་གུང་སེང་ཡིན་ཙང་གྲོགས་པོ་འགའ་ཤས་མཉམ་དུ་ཞོགས་ལྟོ་ཟ་བར་ཕྱིན། ངས་སེམས་གཏམ་གང་ཡོད་ཁོང་ཚོ་ལ་བཤད་པ་ཡིན། གྲོགས་པོ་གཅིག་གིས་ཟེར་ན། “མ་གཞི་ང་ཚོ་ནི་དཔེ་ཆའི་ནང་གི་སྐད་ཆ་སྦོམ་པོ་རྣམས་བཟླ་རྒྱུ་མཁས་པ་ཙམ་ལས་ལག་ལེན་ཕྲ་མོ་ཡང་མི་སྟར་བ་རེད། དཔེར་ན་ཁྱོད་བཞིན། ཚེ་སྔ་ཕྱི་དུ་མ་ཞིག་གི་ཕ་མའི་བཀའ་དྲིན་འཇལ་དགོས་ཀྱི་ཡོད་རབས་བཤད་ནས་ཁ་ཕོ་བྱེད་ཀྱང་། དོན་དངོས་ཐོག་ཚེ་འདིའི་ཨ་ཕ་འཆི་ལ་ཁད་དུས་ཀྱང་ཁྱོད་ང་ཚོ་མཉམ་དུ་དགོད་ཡ་རྩེད་ཀྱིན་འགྲོ་བསྡད་ཡོད་པ་ལྟ་བུ་རེད་”ཟེར། གྲོགས་པོ་གཞན་ཞིག་གིས། “རེད། ནང་ཆོས་ལ་ཐོས་བསམ་ལོ་ངོ་དེ་འདྲ་མང་པོ་བྱས་ཟིན་པའི་ཁྱོད་ཀྱིས་རང་ཉིད་མ་གཏོགས་མཐོང་གི་མེད་ན། སྤྱི་ཚོགས་ཀྱི་སློབ་གསོ་དང་ཆོས་ཀྱི་གོ་རྟོགས་གང་ཡང་མེད་པའི་ཁྱོད་ཀྱི་ཨ་ཕ་དང་མ་གཡར་གཉིས་པོ་ལ་ཁག་འཛུད་འོས་པོ་དེ་ཙམ་མཐོང་གི་མི་འདུག་”ཟེར། གཡས་ཕྱོགས་ན་ཡོད་པའི་གྲོགས་པོ་དེས། “མ་གཞི་ནས་གྲྭ་པའི་མི་ཚེ་ལ་མདུན་ལམ་གཉིས་ལས་མི་འདུག དང་པོ་ཐོས་བསམ་མཐར་ཕྱིན་ནས་ཉམས་ལེན་རྣལ་མ་ཞིག་བྱ་རྒྱུ་དེ་རེད། གཉིས་པ་སངས་རྒྱས་ཀྱི་བསྟན་པ་རང་ལ་བསམ་མནོ་བཏང་ནས་དགོན་པ་ག་གེ་མོ་ཞིག་གི་བསྟན་བདག་བྱེད་ནུས་ན་མ་གཏོགས། གཞན་ན་ཚོད་ཡོད་དུས་མི་ཡི་སྤྲད་ཚད་བླངས། རང་ཁོ་ན་མགུ་བའི་མཁན་སློབ་ཀྱི་མིང་བྱང་སྐམ་པོ་ཞིག་ངོམ་གྱིན། ཡར་འཁྱམས་མར་འཁྱམས་མཐར་རྒས་ཤིང་འཁོགས་དུས་གཞན་གྱིས་ཐུབ་ཚོད་ག་ཚོད་བྱས་ཀྱང་མི་འདོད་བཞིན་དུ་བཟོད་དགོས། ད་དུང་ཡ་གི་དང་མ་གི་ཟེར་གྱིན་ཡོད་ཚད་ལ་ཁ་རྐྱང་རྐྱང་ཟེར་ནས་འགྲོ་འདུག་རྒྱུ་ལས་མདུན་ལམ་གསུམ་པ་ཞིག་ངས་ནི་མཐོང་གི་མི་འདུག དེ་བས་ཁྱིམ་གཞིས་བསྐྱངས་ན་མ་མཐའི་ས་ནས་རྒས་དུས་གཞན་ངོ་སྒུར་མི་དགོས་པ་མ་ཡིན་ནམ།” ཞེས་གཟབ་ནན་གྱིས་བཤད། སྐད་ཆ་དེ་ཚོས་ང་བསམ་གཞིག་གི་ཀློང་དུ་ལན་མ་ཁ་ཤས་མ་ཐིམ་རང་དབང་མེད་པ་བཟོས། “རེད་འདུག ངས་སེམས་ཅན་ཐམས་ཅད་དང་མ་གྱུར་འགྲོ་བ། གཞན་ཕན་དང་སྙིང་རྗེ། ད་དུང་དགྲ་ལའང་སྙིང་རྗེ་སྐྱེ་དགོས་པའི་སློབ་གསོ་རྣམས་བཤད་ཡ་གཅིག་པུ་ཡིན་ནམ། ཡང་ན། ? གང་བྱས་དེ་རིང་གྲོགས་པོ་ཚོས་བཤད་པའི་སྐད་ཆ་རེ་རེ་ལ་གནས་ལུགས་འདུག “ཧ་ཡོ་ཡ། དེ་རིང་ཉིན་གུང་སྤོ་ལོ་བརྩེས་ཆེ་བ་འདྲ། ཉིན་ཐོ་སྤུས་དག་པོ་ཞིག་ཀྱང་འབྲི་ཐུབ་པ་མི་འདུག” མཚན་མོ་བདེ་ལེགས།
༥༽
༢༠༡༧/༡༠/༦ རེས་གཟའ་པ་སངས།
དྲང་པོར་བཤད་ན་ང་རང་ལོ་ན་ཆུང་དུས་སུ། མ་གཡར་དང་ཨ་ཕས་དཀའ་སྡུག་གི་དོང་རིམ་དགུ་ཡི་ནང་དུ་བཙན་བཅུག་བྱས་པས་ཡིན་ནམ། ཡང་ན་ཨ་མའི་བརྩེ་བ་མྱངས་མ་མྱོང་བས་ཡིན་གང་ལྟར་ང་ནི་མི་ཡ་མེད་ཚ་པོའི་གྲས་ཤིག་ཡིན། ཡིན་ན་ཡང་ང་ག་ཚོད་ཡ་མེད་ཆེ་ནའང་ཆུང་དུས་སུ་ཉི་མ་སྡུག་ལ་སྦྱར་ཞིང་མཚན་གཞུང་མིག་ཆུ་ལ་བསྲེས་པའི་ལོ་ཟླ་རྣམས་ཡ་མེད་ཟེར་བའི་ཐ་སྙད་དེ་ལ་བཏགས་ཏེ་མཐོ་ས་གང་ཞིག་ནས་སྤུར་མ་ནུས་པར་སེམས་ཀྱི་ཟབ་ས་ཞིག་ཏུ་ལུས་ཡོད། རེད་མོད་དུས་ཚོད་དེ་འདྲ་ཞིག་གི་མཚམས་སུ་ད་དུང་ངས་ཁོང་གཉིས་པོ་ལ་འཁོན་འཛིན་པ་དེ་ལུགས་མཐུན་རང་ཡིན་ནམ། མི་ལོ་དེ་གའི་རིང་བྱང་ཆུབ་ཀྱི་སེམས་དང་གཞན་ཕན་གྱི་སློབ་གསོ་རྐྱང་རྐྱང་ལ་ཉན་བཤད་བྱས་པའི་གྲུབ་འབྲས་དེ་ཙམ་རེད་དམ།
ཕྱོགས་གཞན་ཞིག་ནས་བསམས་ན། བླ་མའི་བཀའ་དང་འགལ་ན་མི་ཚེ་མཐའ་འཁྱོལ་པོ་ཞིག་ཆགས་ཨེ་ཡོང་། མ་ཚད་ད་ལྟ་བར་དུ་རིག་པའི་གཞུང་ལུགས་ལ་ཐོས་པ་བྱས་པའི་ལག་རྗེས་དེ་སྐྱ་བོ་ཞིག་གི་ལས་ཀ་ལ་འཇུག་ཆེད་རེད་དམ། དེ་འདྲ་ཡིན་ན་སྨན་པ་བྱེད་ཆེད་དམག་མིའི་ལས་ཆར་སློབ་སྦྱོང་བྱས་པའི་དཔེ་རུ་སོང་བ་མིན་ནམ། “འུན་…. ད་བཞག་ཞོག” ཆ་མེད་ཡ་མེད་ཁོ་ན་ཡིན་པའི་མིའི་སྤྱི་ཚོགས་འདིར་ང་ཁོ་ནའི་མི་ཚེ་དེ་འདྲ་མིན་ཚོད་རེད་ལ། མ་གཞི་རྐང་ཆག་ལག་ཆག་ཡིན་པའི་མི་ཚེ་ཡི་གོམ་ཁ་རེ་རེ་སྤོ་ནི་དགོས་དགོས་པ་རེད། དེ་བས་ཅི་ཡིན་ནའང་ཡིན་དུ་ཆུག ཉིན་ཐོ་དེ་བྲིས་ཚར་བ་དང་། སང་ཉིན་དགེ་སྐོས་ཆེན་པོའི་སྐུ་མདུན་ནས་རྩ་དགོངས་ཞུ་ཆེད་དགོངས་ཤོག་སྟབས་བདེ་པོ་ཞིག་བྲིས་ན་ལེགས། དགོངས་པ་གནང་ན་ཡག་ཤོས་རེད་མ་གནང་ནའང་བྱེད་ཐབས་ལྷག་པོ་གང་ཡང་མི་འདུག ཨ་ཙི། ད་ནི་མི་ཚེ་གསར་པ་གསར་རྐྱང་ཞིག་འགོ་འཛུགས་དགོས་པ་རེད་དམ། མ་གཞི་གྲྭ་པ་རང་བྱས་ནས་ཁོང་གཉིས་པོའི་ཞབས་ཏོག་ཞུས་ནའང་མི་འགྲིག་རྒྱུ་ཆེར་མེད་པ་མ་ཡིན་ནམ། ཨ་ཁ། དེ་འདྲ་ག་བར་ཡོང་གི་རེད། ཆོས་དང་འཇིག་རྟེན་གཉིས་ཀ་འཁྱོང་དཀའ་པོ་རེད། “ཧ་ཡོ་ད།” བཀའ་དྲིན་ཅན་གྱི་བླ་མ་རང་མཁྱེན། ང་ལ་ང་ཡི་མི་ཚེ་ཡང་དབང་བའི་ཚོད་མི་འདུག་ན་ང་མདུན་ནས་མདུན་དུ་ཇི་ལྟར་བསྐྱོད་དགོས་སམ། འགག་རྩ་འདི་ལ་ཐུག་དུས་ཟླ་ཤས་སྔོན་དུ་ང་རང་གིས་བྲིས་པའི་“ཇ་ཞོར་གྱི་སྙན་ངག་”ཅེས་པ་དེ་སེམས་གསོའི་ཚུལ་དུ་དྲན་འོང་གི་འདུག་གཤིས། དེ་རིང་ཉིན་ཐོའི་ཤོག་ངོས་སུ་བཤུས་ན་འདོད།
«ཇ་ཞོར་གྱི་སྙན་ངག»
མི་ཚེ་ཉི་འོད་གསེབ་ཀྱི་རྡུལ་ཞིག་སྟེ།།
ཁ་བྱང་མེད་པའི་ཁ་དོག་སྐྱ་བོ་འོ།།
ཡང་ན་ལྷ་ལ་དབང་བའི་མེ་ཏོག་ཅིག།
སུས་ཀྱང་འགྲེལ་བཤད་ཕོག་པར་དཀའ་བ་འོ།།
སྒྱུ་འཕྲུལ་ཡ་མ་འཁྱོམ་གྱི་རྨི་ལམ་ལ།།
སེམས་པ་གཏིང་གི་རེ་བ་བཅོལ་བ་ཡང་།།
ང་ཡི་མི་ཚེ་ནང་གི་ཉིན་ཐོ་ཞིག།
དེ་ཕྱིར་ང་ཡང་བློ་བདེ་ངང་ནས་འཚོ།།
ཆུ་ལ་རི་མོ་བྲིས་པའི་རྗེས་ཤུལ་ན།།
ཕྱིར་མིག་དེ་ལ་ལྗིད་ཚད་མི་འདུག་ཀྱང་།།
འཇིག་རྟེན་ཁམས་ཀྱི་འགྲོ་ལུགས་དེ་ག་རང་།།
དེ་བས་ང་ལ་གནོང་འགྱོད་དེ་ཙམ་མེད།།
༢༠༡༧/༤/༡༣ ཉིན་བྲིས། ཡ་…… མཚན་མོ་བདེ་ལེགས།
༦༽
༢༠༡༧/༡༠/༡༥ རེས་གཟའ་ཉི་མ།
མཛེས་ཤིང་ཡིད་དུ་འོང་བའི་ཁོར་ཡུག་ལགས། ཞོགས་པ་བདེ་ལེགས། ད་ལྟ་ང་“བྷེང་ལོར་”རྒྱལ་ས་རུ་འབྱོར་ཡོད། ཞོགས་པའི་ཉི་འོད་གསེབ་ནས་མངོན་འོང་བའི་བྷེང་ལོར་གནམ་ཐང་གི་ཡུལ་ལྗོངས་ནི་ཅི་འདྲའི་ཡིད་དུ་འོང་བ་ཞིག་རེད་ཨང་། མཚམས་སྤྲིན་གཞོན་ནུས་ཡུལ་ལུང་མཛེས་པར་བྱས་ཤིང་། གནག་ཅིང་སྣུམ་པའི་གཞུང་ལམ། གཡས་གཡོན་གྱི་སྤང་ལྗོངས་དང་། དག་ཅིང་གཙང་བའི་ཤེལ་ཁང་། ངོ་རིས་མི་འདྲ་བའི་མི་རིགས་སྣ་ཚོགས། སྒྲིག་ཆས་ཀྱིས་མཛེས་པར་བྱས་པའི་ཞབས་ཞུ་མ། སྤྲོ་ཉམས་དོད་པའི་ཟ་ཁང་དང་ཇ་ཁང་། བརྗིད་ཉམས་ཆེ་བའི་གནམ་གྲུ་ཆེ་ཆུང་གང་མང་། མདོར་ན་ལྟ་ཁོམ་མེད་པའི་ལྟད་མོ་མང་དག་ཅིག་མིག་ལམ་དུ་མངོན་འོང་། ཡིན་ན་ཡང་ང་ནི་རྡོ་ཕོག་པའི་བྱ་དང་འདྲ་བར། ཁུ་སིམ་ས་ཞིག་ཏུ་ལྷན་ནེར་བསྡད་མོད་སེམས་པ་དེ་དེ་ལྟར་ལྷན་ནེ་བ་ཞིག་མིན་སོང་། མཚམས་རེར་བློ་ཐུབ་ཀྱི་གྲོགས་པོ་ཚོ་དྲན་ལ། སྐབས་རེར་དགེ་སྐོས་ལགས་ཀྱིས་གསུངས་པའི་མཐའ་མའི་བཀའ་བཀྱོན་དང་བསླབ་བྱ་གཅིག་ཆོག་དེ་དྲན་འོང་། ལན་རེར་མ་གཡར་གྱི་ངོ་གདོང་ཞེ་མེར་བ་དེ་ཤར་ཞིང་། ཐེངས་རེར་ནད་ཀྱིས་མནར་བའི་ཨ་ཕའི་བཞིན་རས་གཉོམ་པོ་དེ་དྲན་འོང་།
མ་ཟད་དགོན་པའི་ནང་དུ་ཁ་བདེ་མགོ་བདེ་ག་ཚོད་ཡིན་རུང་། ཁ་ཕྱོགས་མི་གཅིག་པའི་སྤྱི་ཚོགས་གཞན་པ་ཞིག་ཏུ་སླེབས་ན། ཨ་མ་དང་ཁ་བྲལ་བའི་ཕྲུ་གུ་ཆུང་ཆུང་ཞིག་དང་འདྲ་བར་ཅི་ཡང་སྨྲ་མི་ཤེས་ལ་གང་ཡང་མི་འཇོན་པའི་གྲས་སུ་ལུས་མི་ཡོང་ངམ་སྙམ་པ་ལ་སོགས་པའི་དྲན་སྣང་དང་འཆར་སྒོ་མི་འདྲ་བ་མང་པོས་བདག་སེམས་ཧྲིལ་པོ་ལྟེམ་མེར་གང་སྟེ། དབུགས་ཀྱི་རྒྱུ་བ་ཡང་མི་ཚོར་བའི་ཚོད་དུ་བསྐྱལ། དེ་བས་རྣ་བ་རུ་ཅི་ཐོས་དང་། མིག་ལམ་དུ་གང་མངོན་སོགས་ལ་སྣང་བ་གཏོད་ལོང་ཁྱོན་ནས་མེད་པར་ལུས་ཡོད། “ཡ་…. ཉིན་ཐོ་འབྲི་མཚམས་འདི་ནས་འཇོག་དགོས་པ་འདྲ། གྲོགས་པོས་སྐད་བཏང་སོང་། ཕལ་ཆེར་ཞོགས་ལྟོ་ཟ་ཆེད་ཡིན་རྒྱུ་རེད།” གནམ་ཐང་ནས་ཞོགས་ལྟོ་ཟ་བ་ཐེངས་དང་པོ་ཡིན་ལ། ཞོགས་པ་སྔ་བོ་ཉིན་ཐོ་བྲིས་པ་ཡང་ཚར་དང་པོ་ཡིན། “ཧུན་ཧུན།” བདེ་བར་སྨོན།།
༧༽
༢༠༡༩/༡༠/༣/ རེས་གཟའ་སྤེན་པ།
སྙིང་ཤ་གཤོག་ལ་ཁད་པའི་སྐད་ཆ་ཁ་ཤས་བཤད་འདོད་ཀྱང་། བོད་ཡིག་མ་བྲིས་ནས་ཡུན་རིང་ཕྱིན་སྟབས། ཡིག་གཟུགས་དང་དག་ཆ་མང་དག་ཅིག་གཏིང་བརྗེད་དུ་སོང་ཚར་འདུག དེར་བརྟེན་ལུང་པ་རུ་སླེབས་མ་ཐག་པའི་ཚོར་སྣང་དང་ད་ལྟའི་གནས་སྟངས་སོགས་ཞིབ་ཕྲ་ཁྱེད་ཀློག་པ་པོ་རྣམས་ལ་ཞུ་ཐུབ་པ་མི་འདུག དགོངས་དག་ཞུ། དོན་དག་བསྡུས་ན། “དགའ་འོས་པ་ཞིག་ལ་ཨ་ཕ་དྲག་སྐྱེད་བྱུང་ཡོད་ཅིང་། སྐྱོ་དགོས་པ་ཞིག་ལ་ང་ཡི་མི་ཚེ་ད་དུང་ཡང་བར་མ་དོ་རུ་ལུས་ཡོད།” ད་ནི་མང་པོ་མི་བཤད།
ཟླ་ཤས་སྔོན་དུ་གྲོགས་པོ་སྐལ་ལྡན་ལགས་ཀྱིས་རྩོམ་བསྡུ་གསལ་བརྡ་ཞིག་སྐད་འཕྲིན་བརྒྱུད་ནས་བསྐུར་གནང་བ་དེས་རྐྱེན་བྱས་ཏེ་ཞུ་དག་སོགས་གང་ཡང་བྱེད་ཁོམ་མི་འདུག་ནའང་། ང་ཡི་མི་ཚེའི་ཀྱོག་མཚམས་སུ་བྲིས་པའི་ཉིན་ཐོ་ཚན་པ་ཁ་ཤས་སྔོན་མ་གང་འདྲ་བྲིས་ཡོད་པ་ཇི་མ་ཇི་བཞིན་བཤུས་རྗེས། “སྔ་འགྱུར་རིག་མཛོད་རྩོམ་སྒྲིག་ལྷན་ཁང་”གི་ཁ་བྱང་ཐོག་སྐུར་འདོད་བྱུང། སྟབས་ཡག་ནས་དེང་སང་འདིར་དྲ་ལམ་ཡག་པོ་འདུག་གཤིས་ལམ་སང་འགྲོ་ཁོ་ཐག་རེད། མ་ཟད་ཀློག་པ་པོ་གང་མང་ཞིག་གིས་སྤྱན་གཡོ་གནང་ཐུབ་རྒྱུའི་རེ་བ་ཡོད། གལ་ཏེ་དེ་ལྟར་མ་ནུས་ན་ཡང་འགྱོད་དགོས་པ་གང་ཡང་མེད། རྒྱུ་མཚན་ནི་ང་ཡི་མི་ཚེའི་བརྒྱུད་རིམ་བཀླགས་ནས་ཁྱེད་རྣམ་པ་ལ་ཁེ་ཕན་གང་ཡང་ཡོད་མི་སྲིད་པས་ཡིན།
ཞེས་པའང་སྟོན་འབྲས་བསྡུས་ཚར་མ་ཐག་ཡིན་ཙང་ནང་ལས་དེ་ཙམ་མེད་ན་ཡང་། ཉིན་མཚན་གྲོང་ཆོག་ལ་བྲེལ་བའི་སྒང་ཡིན་པའི་ཁོ་བོ་ནས། སྤྱི་ལོ་ ༢༠༡༩/༡༠/༣ ཉིན། གཡའ་དག་པའི་གནམ་སྔོན་འོག་ནས་ཤིན་ཏུ་གཙང་བའི་མཁའ་རླུང་རྔུབ་ཀྱིན་རང་ཁྱིམ་གྱི་ཁང་ཐོག་ཏུ་འབད་པ་བརྒྱ་ཡིས་བྲིས། ཕངས་པ་ལ་ད་ནི་བོད་ཡིག་བྲི་རྒྱུ་ཧ་ཅང་བུལ་དུ་ཕྱིན་འདུག
