བློ་གྲོས། འཛིན་རིམ་གསུམཔ།
ནགས་ཚལ་སེར་མདངས་ཅན་དེ་རུ།།
ལམ་ཕྱོགས་གཉིས་སུ་གྱེས་པར་མཐོང་།།
འོན་ཀྱང་མི་རྐྱང་ཡིན་ཙ་ན།།
སྟབས་གཅིག་གཉིས་ཀར་འགྲོ་མ་ཕོད།།
དེ་བས་གང་དག་ལེགས་སམ་བརྟགས།།
ལམ་མདོ་དེ་རུ་ཡུན་རིང་ལྷག།
ལམ་ཕྱོགས་དང་པོར་དཔྱད་ན་ཡང་།།
བཟང་ངན་ལམ་མཐའ་མངོན་མ་གྱུར།།
ཡིན་ནའང་དེ་ནི་ལམ་རྙིང་འདྲ།།
དེ་བས་ལམ་ཕྱོགས་གཉིས་པར་བལྟས།།
དེ་ནི་ཕལ་ཆེར་ལེགས་མཐོང་སྟེ།།
འགྲུལ་བཞུད་མེད་པའི་ལམ་གསར་འདྲ།།
འོན་ཀྱང་ལམ་དེར་བསྐྱོད་པའི་ཚེ།།
འགྲུལ་བཞུད་བྱས་པ་ལྟར་དུ་སྣང་།།
སྔ་དྲོ་སླེབས་པའི་དུས་སུ་ནི།།
གཉིས་ཀ་འདབ་མས་བཀླུབས་པ་མཐོང་།།
ལམ་ཕྱོགས་དང་པོར་མ་འོངས་སམ།།
དུས་གཞན་དུ་ན་འགྲོ་དགོས་སྙམ།།
འོན་ཀྱང་ལམ་གྱིས་ལམ་ཁྲིད་པས།།
ཕྱིར་ལོག་བསླེབས་པར་དཀའ་མོ་མཐོང་།།
དེ་ཕྱིར་ལམ་ཕྱོགས་དང་པོ་རུ།།
མ་འོངས་འགྲོ་ཟེར་དམ་བཅའ་ནི།།
ནུས་སམ་མི་ནུས་ཚོམ་པར་གྱུར།།
ཕྱིས་སུ་རང་གིས་ཡུན་རིང་དུ།།
དབུགས་རིང་བཏང་ནས་འདི་ལྟར་ཟེར།།
སྔ་མོ་ས་ཆ་ག་གེ་མོར།།
ལམ་ཕྱོགས་གཉིས་སུ་གྱེས་པ་ལས།།
ཤུལ་ལམ་དབེན་པའི་ལམ་གསར་བདམས།།
མི་ཚེ་དོན་དང་ལྡན་པར་གྱུར།།
རྩོམ་འདི་ཨ་རི་ནས་ཡིན་པའི་རོ་བྷར་ཊི་ཧྥོ་རོས་ཊི་ (Robert Frost) ཡིས་བྲིས་པ་དང་། འདི་ནི་སྤྱི་ལོ་ ༡༩༡༦ ལོར་ཁྱབ་སྤེལ་བྱས་པར་གྲགས། ཁོང་ནི་དུས་རབས་ཉི་ཤུ་པའི་ནང་ཡོངས་སུ་གྲགས་ཤིང་རྩི་མཐོང་ཅན་ཞིག་ཏུ་གྱུར་ཡོད། སྙན་རྩོམ་འདི་ཡི་བསྟན་བྱ་གཙོ་བོ་ནི་རྩོམ་པ་པོ་རོ་བྷར་ཊི་ཧྥོ་རོས་ཊི་ (Robert Frost) ཁོང་རང་གི་མི་ཚེའི་ནང་ལམ་ཕྱོགས་གཉིས་ཀྱིས་མི་ཚེ་ལ་འདམ་ཀ་གཉིས་བྱུང་ཡོད་པར་མཚོན་ཅིང་། དུས་གཅིག་ཏུ་ལམ་ཕྱོགས་གཉིས་སུ་འགྲོ་མི་ཕོད་པ་ནི་ཁོང་གི་མི་ཚེ་གཅིག་པུ་འདིར་འདམ་ཀ་གཅིག་མ་གཏོགས་གཉིས་མེད་པའི་བརྡ་ཡིན།
དེས་ན་འདམ་ཀ་ལེགས་ཤོོས་གང་ཡིན་དུས་རིང་པོའི་བར་དུ་བརྟགས་ནས་མཐར་སུས་ཀྱང་བདག་གིར་མ་བྱས་པའི་འདམ་ཀ་དང་ལེན་བྱས་ཤིང་སུས་ཀྱང་མ་བླངས་པའི་འདེམས་སྒྲུག་དེས་རྩོམ་པ་པོ་ལ་ཉེན་ཁ་ལས་བརྒལ་ཐུབ་པའི་སྙིང་སྟོབས་མངོན་པར་གསལ་བ་དང་། སུ་གང་གིས་ཀྱང་མ་སྤྱད་པའི་འདམ་ཀ་དེས། ཁྱད་དུ་འཕགས་པའི་མི་ཚེ་འཐོབ་ཐུབ་པར་བསྟན་ཡོད།
མདོར་ན་བརྩམས་ཆོས་འདིས་མི་ཚེ་དོན་དང་ལྡན་པ་ཆགས་མིན་གཙོ་བོ་ཐོག་མའི་ལམ་ཁའི་འདེམས་སྒྲུག་བྱ་རྒྱུ་ནོར་མི་ཉན་པ་དང་། ལམ་བུ་དེར་ཉེན་ཁ་རེ་འཕྲད་ཀྱང་བཟོད་སྒོམ་བྱ་དགོས་པའི་བསླབ་བྱ་གདམས་འདུག
བསྒྱུར་གཞི། https.//
www.poetryfoundation.org
[1] བསྒྱུར་རྩོམ་འདི་ནི་མ་ཕྱི་དང་བརྩམས་ཆོས་དེའི་འགྲེལ་པ་དག་ལ་བརྟེན་ནས་རང་ཉིད་ཀྱིས་གང་རྟོགས་པ་དེ་ཚིགས་བཅད་ཐོག་བཀོད་ཡོད།
