སྤྲུལ་སྐུ་འཆི་མེད་ཚེ་དབང་། འཛིན་རིམ་བདུན་པ།
མདུན་མཁར་ཆུ་སྐྱེས་བཞད་པའི་གེ་སར་སྟེང་།།
འཇའ་ཟེར་འོད་ལྔ་འཁྲིགས་པའི་གུར་ཁྱིམ་ནང་།།
ཏཱྃ་ཡིག་ཡོངས་གྱུར་འཕགས་མ་སྒྲོལ་མའི་སྐུ།།
ཞལ་གཅིག་ཕྱག་གཉིས་ལྟར་མི་ངོམས་པར་མཛེས།།
རྒྱལ་ཀུན་ཕྲིན་ལས་གཅིག་བསྡུས་གཟུགས་ཀྱི་སྐུ།།
ལྗང་གསལ་དམར་མདངས་ཆགས་པ་མཛེས་པའི་ཞལ།།
འཛུམ་པའི་ཚེམས་ཕྲེང་མུ་ཏིག་སྟར་ཕྲེང་ཅན།།
སྲིད་གསུམ་བརྟན་པ་འཕྲོག་པའི་མཚན་དཔེས་བརྒྱན།།
རི་དྭགས་མིག་ཅན་དབྱིབས་ལེགས་སྤྱན་གྱི་འོད།།
མྱུར་བའི་ཟུར་མིག་ཐོ་རེངས་སྐར་ཆེན་མདངས།།
གཟེངས་མཐོ་དྲི་འཛིན་ཤངས་ཀྱི་བུ་གའི་འོག།
ཕྱེད་འཛུམ་བིམ་པ་ལྟ་བུའི་མཆུ་སྒྲོས་དམར།།
གནག་སྣུམ་དབུ་སྐྲ་སིལ་མའི་ལན་བུ་རྣམས།།
འཇམ་མཉེན་ལྷ་རྫས་སྤོས་ཆུའི་དྲི་བཟང་ཅན།།
ཤིག་ཤིག་རླུང་གིས་བསྐྱོད་པའི་བར་མཚམས་ནས།།
སྐལ་ལྡན་སྙིང་ལ་མི་བཟད་བདེ་ཆེན་སྩོལ།།
བྲང་གཞུང་མཁའ་ལྟར་ཡངས་པའི་དཀྱིལ་འཁོར་ན།།
སྐར་ཚོགས་ཁྲ་ཚོམ་སྤྲས་འདྲའི་ནོར་བུས་བརྒྱན།།
ཕྱག་ཞབས་གདུ་བུ་བརྡབས་པའི་སིལ་སྒྲ་ཡིས།།
མ་ཉལ་གཏི་མུག་མལ་ལས་ལོངས་ཞེས་སྐུལ།།
མཁྲང་ཟླུམ་འོ་མ་འཛིན་པའི་ནོར་བུ་ཟུང་།།
སྟོད་གོས་དུ་ཀཱུ་ལ་ཡིས་མ་ཁེབས་པར།།
ཇོ་བོས་སེན་རྗེས་ཕབ་པའི་རི་མོ་འགས།།
ཟུང་འཇུག་དགའ་བཞིའི་ལས་ལ་སྐུལ་དང་མཚུངས།།
འཇིགས་པ་བརྒྱད་དང་བཅུ་དྲུག་ལ་སོགས་པར།།
མ་འཇིགས་ང་ཡིས་དུས་ཀུན་སྐྱོབ་བོ་ཞེས།།
སྐྱབས་སྦྱིན་ཕྱག་རྒྱས་བཅིངས་པའི་ཨུཏྤ་ལ།།
ཉམ་ཐག་འགྲོ་བའི་མགོ་ལ་བྱིལ་བྱིལ་མཛད།།
སྐེད་སྟབས་ལྕུག་ཕྲན་རླུང་གིས་བསྐྱོད་པ་བཞིན།།
སྟ་ཟུར་གཡས་གཡོན་ཀུན་ཏུ་ལྡེམ་ལྡེམ་གཡོ།།
པཉྩ་ལི་ཀས་བཏུམས་པའི་སྐུ་སྨད་ཀུན།།
ཕྱི་ནང་རྒྱ་ལ་རྒྱ་འབུར་རྣམ་པ་དོད།།
བདེ་སྐྱོང་པདྨ་བཞད་པའི་ཀེ་ས་ར།།
སྲ་མཁྲེགས་རྡོ་རྗེས་རྙེད་པར་དོགས་སམ་ཅི།།
ག་བུར་ངད་ལ་འཁུ་བའི་གསང་བའི་ཆུས།།
ཡང་ཡང་གཏོར་བའི་ཟིལ་འོད་ཁྲོམ་མེར་གནས།།
བདག་ཀྱང་འདི་ནས་བྱང་ཆུབ་ཆེན་པོའི་བར།།
གཞན་དོན་སྒྲུབ་ལ་སྐྱོ་བའི་སེམས་སྤངས་ནས།།
ཇི་སྲིད་འགྲོ་བའི་གནས་རིས་མ་སྟོངས་བར།།
དེ་སྲིད་མ་གཅིག་ཁྱེད་ཀྱིས་རྗེས་འཛིན་ཤོག།
