དཔལ་སྤྲུལ་འཇིགས་མེད་ཆོས་ཀྱི་དབང་པོ།
་་་་་་་འདོན་ཐེངས་སྔ་མའི་འཕྲོ།
ཞེས་ཟེར་བས་བྲམ་ཟེའི་ཁྱེའུ་པདྨ་དགྱེས་པས་ཀྱང་། གསེར་གྱི་སྦྲང་ཆུང་འདབ་ཡངས་འདི་གཞུང་བཟང་ཕྱི་ཐག་རིང་ཞིང་ཚུགས་ཐུབ་པ་ཡིན་པས་ཐོ་ཅོའི་བློ་མང་བྱེད་པ་ཕལ་པ་དང་མི་འདྲ་བ་ཙམ་ཞིག་ཡོད། གང་ལྟར་ཡང་ད་ལྟའི་ཟེར་ཚུལ་ལ་དཔག་ན་གཏིང་ནས་ཆོས་ལ་དད་པ་འདྲ་མོ་ཞིག་འདུག་པས། དེ་ལྟར་ན་ཁོང་གི་བློ་ལ་འཐད་པའི་གཏམ་ཞིག་བྱེད་དགོས་སྙམ་ནས་འདི་སྐད་དུ།
ཀྱེ་ཀྱེ་ཡིད་གཅུགས་སྙིང་གི་གྲོགས།།
གསེར་གྱི་སྦྲང་ཆུང་འདབ་ཡངས་ཁྱོད།།
བློ་གཏད་དཀོན་མཆོག་གསུམ་ལ་བྱས།།
ཡིད་ཆེས་དམ་པའི་ཆོས་ལ་འབུངས།།
སྐྱོ་ཤས་ངེས་འབྱུང་བློ་སྣ་བསྟུང་།།
སྒྲུབ་ལ་མོས་པ་ཡོད་པ་དེ།།
ཚེ་སྔོན་ལེགས་སྨོན་སོང་བའི་རྟགས།།
འདུས་བྱས་མི་རྟག་སྒྱུ་མར་གོ།
འཁོར་བའི་གྲོང་ལ་སྐྱོ་བ་སྐྱེས།།
ཆོས་བརྒྱད་ཚེ་འདིའི་བློ་ངན་བཤོལ།།
དབེན་པའི་རི་ལ་དགའ་བ་དེ།།
ཆོས་ལ་ལས་འཕྲོ་ཡོད་པའི་རྟགས།།
རྣམ་དཔྱོད་ཐོས་བསམ་ཡུལ་ལ་ཤར།།
ལས་འབྲས་ཟབ་མོའི་སྤང་བླང་གོ།
རྒྱལ་སྲས་དམ་པའི་མཛད་སྤྱོད་ཤེས།།
ལམ་མཆོག་འཇུག་སྒོ་རྙེད་པ་དེ།།
དམ་པའི་མགོན་གྱིས་ཟིན་པའི་རྟགས།།
སྐལ་བ་བཟང་པོའི་སྦྲང་ཆུང་ལ།།
བླ་མ་བཟང་པོའི་སློབ་མ་ངས།།
ངེས་ཤེས་བཟང་པོའི་གསལ་ཞིག་འདེབས།།
ཐུགས་བསྐྱེད་བཟང་པོའི་སྣོན་པ་མཛོད།།
མར་ལ་འཁོར་བའི་གྲོང་ཞིག་ན།།
སྣོད་ལ་འཁྲུལ་སྣང་སྒྱུ་མ་ཟེར།།
བཅུད་ལ་ཨ་འཐས་འཁྲུལ་བ་ཟེར།།
སྣོད་བཅུད་འཛོམས་པའི་སྐབས་ཤིག་ན།།
སྡིག་ལ་ཧབ་ཐོབ་བྱས་བྱས་ནས།།
སྡུག་བསྔལ་ནགས་མེ་མཆེད་པ་འདྲ།།
དགེ་ལ་རྒྱབ་ཀྱིས་ཕྱོགས་ཕྱོགས་ནས།།
བདེ་སྐྱིད་ནམ་ལངས་སྐར་མ་འདྲ།།
སྤྱོད་ངན་དང་དུ་བླང་བླང་ནས།།
དུས་ངན་རྒོངས་ཀའི་གྲིབ་སོ་འདྲ།།
ཞེ་སྡང་གདུག་པའི་རང་འཐག་ལ།།
འདོད་ཆགས་ཞེན་པའི་ལྟེ་ཁུང་དོད།།
མཐོ་རིས་མི་ཡི་ཡོས་ཁྲ་བླུགས།།
བཏགས་ཤིང་ངན་སོང་གཏིང་དུ་བབས།།
སྟེང་ནས་གོད་ཀྱི་ཆེ་ལུགས་ལ།།
ཞབས་ནས་འཕེལ་གྱི་མང་ལུགས་ལ།།
རྒྱུ་འབྲས་བབ་ཀྱིས་ཞིབ་ལུགས་ལ།།
གནའ་ཞིག་འཛམ་གླིང་མི་ཡུལ་ན།།
གྲོང་ལ་མུ་དང་རྒྱུད་དུ་འབྲེལ།།
ཕན་ཚུན་བྱ་གག་འཕུར་བས་སླེབ།།
ལོངས་སྤྱོད་བདེ་སྐྱིད་ལྷ་ལ་འགྲན།།
དཔོན་ལ་འཁོར་ལོས་སྒྱུར་རྒྱལ་བཞུགས།།
མངའ་ཐང་གསེར་གྱི་འཁོར་ལོས་བསྒྱུར།།
བྲན་ལ་གླིང་བཞི་གླིང་ཕྲན་བསྐོར།།
ཁྲིམས་ལ་དགེ་བ་བཅུ་པོ་དར།།
མི་འཕེལ་མཐོ་རིས་ལྷ་ཡུལ་འགྲོ།།
ལྷ་འཕེལ་མེ་ཏོག་སྐྱེད་ཚལ་གང་།།
དེང་སང་བསྐལ་པའི་སྙིགས་མ་ལ།།
གྲོང་ལ་གྱང་རལ་མུ་རུ་འབྲེལ།།
ཞིང་ལ་ཐ་བ་རྒྱུད་དུ་མཐུད།།
ལོངས་སྤྱོད་ཤ་ཁྲག་ཟས་ལ་བྱེད།།
དཔོན་ལ་དམྱལ་བའི་བང་ཆེན་བཞུགས།།
མངའ་ཐང་དམེ་ཤི་འཁྲུག་པས་བསྒྱུར།།
བྲན་ལ་ལས་ངན་སེམས་ཅན་འཁོར།།
ཁྲིམས་ལ་གཡོ་སྒྱུ་ཟ་ཐབས་དར།།
མི་ཟད་རྟིང་པ་ཁྲམ་པས་བཟུང་།།
ཁྲམ་པ་ངན་སོང་གྲོང་སྒོ་འགྲིམ།།
འཕེལ་ལ་ཚ་གྲང་དམྱལ་བ་ཆེ།།
གཡུལ་ལ་ལྷ་མིན་སྲིན་པོ་རྒྱལ།།
བཟའ་ལ་ནད་བདག་གོང་བདག་ཆེ།།
ཁྲི་ཐོག་རྒྱལ་པོས་ཁྲམ་ཞིག་བྱེད།།
ཐབས་ཀྱིས་ཉེས་མེད་ཆད་པས་གཅོད།།
རྫུན་གྱིས་བྲན་ལ་ཉེས་པ་བགྲང་།།
གཡོ་སྒྱུས་རང་གཞན་ཕུང་ལ་སྦྱོར།།
གདུགས་ཞབས་བླ་མས་ཁྲམ་ཞིག་བྱེད།།
དམ་པའི་ཆོས་ལ་ཕག་ཅིག་གཡར།།
མངོན་ཤེས་རྫུན་གྱིས་འོལ་ཚོད་སྒྲོག།
དབང་ལ་ནོར་གྱི་ཉོ་བཙོང་བྱེད།།
མཐུ་ཡིས་དཔོན་ལ་ངོ་འཛིན་བྱེད།།
ཆོས་ལ་གྲོང་པའི་རྐྱེན་བཟློག་བྱེད།།
རི་ཁྲོད་སྒོམ་ཆེན་ཁྲམ་ཞིག་བྱེད།།
རི་ཁྲོད་གནས་ན་རོ་ཉལ་བྱེད།།
ཕལ་པས་མཐོང་ན་ལུས་ཚུགས་འཛིན།།
རང་ནོར་ཡོད་པས་གུད་དུ་སྦས།།
སྦྱིན་བདག་དྲུང་དུ་ཁ་གསགས་བརྗོད།།
སྐྱེ་བོ་ཕལ་གྱིས་ཁྲམ་ཞིག་བྱེད།།
སེམས་ལ་རྫ་མཁན་འཕང་ལོ་འདྲ།།
ཅི་དགོས་ལྟ་ཞིང་འཁོར་ལོ་སྐོར།།
གཏམ་ལ་མགར་བའི་ལག་ཆ་འདྲ།།
གར་འགྲོ་ལྟ་ཞིང་བདེ་ཁ་བསྒྱུར།།
བྱ་བྱེད་སོས་ཀའི་གནམ་དང་འདྲ།།
ད་ལྟ་དཀར་ཡང་ད་ལྟ་གནག།
ཕྱི་ཐག་སྦྲང་བུའི་མཆུ་དང་འདྲ།།
ཟ་ཚེ་ཡོད་དེ་ཚར་ཚེ་མེད།།
ངོ་སྲུང་ཐང་ཀའི་རི་མོ་འདྲ།།
སྔ་སོ་ཡོད་དེ་གཏིང་ལ་མེད།།
ཆོས་པ་རྣམས་ཀྱིས་ཁྲམ་ཞིག་བྱེད།།
ཐོས་བསམ་ལྕོང་མོའི་ལུས་དང་འདྲ།།
མགོ་བོ་ཆེ་སྟེ་མཇུག་མ་ཕྲ།།
དོན་གཉེར་སྦལ་པའི་ཁ་དང་འདྲ།།
ཉན་དུས་ཡོད་དེ་སྒྲུབ་དུས་མེད།།
རྫུན་གྱིས་བླ་མའི་མགོ་བོ་བསྐོར།།
གཡོ་ཡིས་ཆོས་མིན་ཆོས་སུ་བརྫུ།།
སྒྱུ་ཡིས་ཉམས་ལེན་ཁ་བཤད་བྱེད།།
ས་སྟེང་ཁྲམ་པས་བཟུང་བའི་དུས།།
བདེན་པའི་གཞུང་ལམ་གང་ནས་འཛིན།།
རྒྱལ་ཁམས་ཟོག་པོས་གང་བའི་དུས།།
མཁས་པའི་གཞུང་ལུགས་སུ་ལ་འཆད།།
རྒྱལ་པོས་རང་ཁྲིམས་བཤིག་པའི་དུས།།
འབངས་ཀྱི་སྐྱིད་སྡུག་སུ་ལ་རེ།།
བླ་མས་རང་དོན་གཉེར་བའི་དུས།།
ཉམ་ཐག་གཞན་ཕན་སུ་ཡིས་བྱེད།།
དཔོན་གྱིས་བྲན་འཁོར་བཅོམ་པའི་དུས།།
ཉམ་ཆུང་ཁ་འཛིན་སུ་ལ་རེ།།
ཀྱེ་མ་ཀྱི་ཧུད་ཀྱེ་མ་ཀློང་།།
ཁྱེའུ་ཆུང་སྐྱོ་བ་གཏིང་ནས་སྐྱེས།།
མི་རྟག་སྲིན་པོའི་སོ་བར་ན།།
ཁམས་གསུམ་སེམས་ཅན་འཁོར་ཞིང་རྒྱུག།
ད་དུང་རྟག་འཛིན་ཞེན་པས་བཅིངས།།
ཚེ་འདིར་རང་དོན་བསྒྲུབས་བསྒྲུབས་ནས།།
འཆི་ཁར་འགྱོད་པས་བྲང་ལག་འཐབ།།
སང་གི་ཚེས་ལ་བློ་ཐག་གཅོད།།
ཕྱི་མའི་ཆོས་ལ་ཕྱི་བཤོལ་བྱེད།།
ད་ནངས་གསོན་པའི་ལུས་པོ་ལ།།
དོ་དགོང་རོ་ཞེས་འབོད་ལ་ལྟོས།།
སང་དང་འཇིག་རྟེན་ཕྱི་མ་གཉིས།།
སྔོན་ལ་གང་ཡོང་ཤེས་ལགས་སམ།།
ཁྱེའུ་ཆུང་པདྨ་དགྱེས་པ་ང་།།
བླ་མ་སངས་རྒྱས་དངོས་དང་མཇལ།།
ཐུགས་བརྩེ་ཐུགས་རྗེས་རྗེས་སུ་བཟུང་།།
དད་འདུན་ཡིད་ཆེས་རྩེ་གཅིག་ཡིན།།
མོས་གུས་ལྟེམ་རྐྱང་བྱེད་མ་མྱོང་།།
ཞུ་དོན་བློ་ལ་གང་ཤར་ཡིན།།
ཚིག་སྒྲོས་གདམ་ག་བྱེད་མ་མྱོང་།།
བྱེད་སྤྱོད་རང་གཤིས་ལྷུག་པ་ཡིན།།
གཡོ་སྒྱུ་ངོས་ལྐོག་བྱེད་མ་མྱོང་།།
བློ་གཏད་མི་གཅིག་ལྷ་གཅིག་ཡིན།།
སྐྱབས་གནས་གཞན་ནས་འཚོལ་མ་མྱོང་།།
དམ་པའི་དྲུང་དུ་འདུག་ཡུན་རིང་།།
མཁས་པའི་བླ་མ་བསྟེན་གྲངས་མང་།།
ཕྱོགས་མེད་གཞུང་ལུགས་མཐོང་རྒྱ་ཆེ།།
དེ་ཕྱིར་ཆོས་དང་ཆོས་འདྲ་ཤེས།།
གསེར་གྱི་སྦྲང་ཆུང་འདབ་ཡངས་ཁྱེད།།
སྙིང་ནས་ཆོས་ཤིག་མཛད་དགོངས་ན།།
སྐྱོ་ཤས་གཏིང་ནས་སྐྱེས་པ་ན།།
འདྲ་མིན་སྤངས་པའི་ཆོས་ཤིག་དགོས།།
དང་པོ་ཆོས་ལམ་གཉེར་བའི་དུས།།
སྐྱོ་ཤས་འདི་ལ་འདྲ་ཞིག་ཡོད།།
སྡུག་བསྔལ་ཅན་གྱི་གདུང་ཡུས་གཅིག།
གློ་བུར་རྐྱེན་གྱིས་ཡིད་ཆད་གཉིས།།
སྙིང་སྡུག་གྲོགས་ཀྱི་རེ་འཁོད་གསུམ།།
ངལ་དུབ་དཀའ་བའི་ཚེགས་ཡུས་བཞི།།
གནས་སྐབས་འགྱུར་བའི་ཁམས་འདུས་ལྔ།།
སྐྱོ་ཤས་འདྲ་སྟེ་སྐྱོ་ཤས་མིན།།
ངེས་འབྱུང་འདི་ལ་འདྲ་ཞིག་ཡོད།།
ཆ་ལུགས་འཆོས་པའི་འཕྱོར་འདོད་གཅིག།
རི་ཁྲོད་བདེ་བའི་དལ་འདོད་གཉིས།།
ནུས་མཐུ་རེ་བའི་བཟླས་བརྗོད་གསུམ།།
རྒྱལ་ཁམས་ལྟད་མོའི་གནས་སྐོར་བཞི།།
རེ་དོགས་སྒྲུབ་པའི་ཆོས་བརྒྱད་ལྔ།།
ངེས་འབྱུང་འདྲ་སྟེ་ངེས་འབྱུང་མིན།།
རི་ཁྲོད་འཛིན་ལ་འདྲ་ཞིག་ཡོད།།
ཕྱི་དམ་ནང་ལྷོད་དེ་དང་གཅིག།
ཁྲིམས་མེད་བག་ཡངས་དེ་དང་གཉིས།།
ལག་ཤེས་རིག་གནས་སྐྱོང་དང་གསུམ།།
འཕྲལ་སྤྱོད་བྱ་བླག་མང་དང་བཞི།།
གཉིད་ཉལ་མི་ཚེ་འཕུལ་དང་ལྔ།།
རི་ཁྲོད་བསྡད་ཀྱང་སྙིང་པོ་མེད།།
ཞེན་ལོག་འདི་ལ་འདྲ་ཞིག་ཡོད།།
མི་ཆོས་མ་ཕེར་བྲོས་ཁུང་གཅིག།
སྨྱོ་རྒོད་རྒྱུག་པའི་ཐོ་ཅོ་གཉིས།།
བསམ་བློ་མ་བཏང་ཁ་ཕོ་གསུམ།།
མདོ་མེད་ནོར་ལ་རྩིས་ཆུང་བཞི།།
གློ་མེད་འཕྲལ་གྱི་ཐབས་རྡུགས་ལྔ།།
ཞེན་ལོག་འདྲ་སྟེ་ཞེན་ལོག་མིན།།
རྒྱལ་ཁམས་འགྲིམ་ལ་འདྲ་ཞིག་ཡོད།།
ལྟད་མོ་བལྟ་བའི་མཚར་འདོད་གཅིག།
དད་པ་མ་སྐྱེས་གནས་མཇལ་གཉིས།།
ཕན་ཡོན་མི་ཤེས་བསྐོར་བ་གསུམ།།
ཟ་འདོད་རྙེད་འཚོལ་ཁྲམ་པ་བཞི།།
བསམ་བློ་མ་བཏང་སྐོར་རྒྱུག་ལྔ།།
གནས་སྐོར་འདྲ་སྟེ་གནས་སྐོར་མིན།།
མཚམས་སྒྲུབ་བྱེད་ལ་འདྲ་ཞིག་ཡོད།།
ལྷར་སྣང་མེད་པའི་བཟླས་བརྗོད་གཅིག།
དྲན་ཤེས་མེད་པའི་བསྐྱེད་རྫོགས་གཉིས།།
ནུས་མཐུ་རེ་བའི་དྲག་སྒྲུབ་གསུམ།།
རྣམ་གྲངས་བརྩི་བའི་དུས་སོན་བཞི།།
འདི་སྣང་རེ་བའི་ཕྲིན་སྒྲུབ་ལྔ།།
མཚམས་སྒྲུབ་འདྲ་སྟེ་སྙིང་པོ་མེད།།
མུ་འགོད།
རྩོམ་སྒྲིག་པའི་གསལ་བཤད།
སྡེ་དགེ་པར་ཁང་ཆེན་མོའི་ཤིང་པར་ལ་ཁུངས་གཏུགས་ནས་སྔ་འགྱུར་རིག་མཛོད་རྩོམ་སྒྲིག་པས་བཏུས།
