པདྨ་འབྲུག་གྲགས། སྔོན་འགྲོ་འཛིན་གྲྭ།
ཐོག་མར།
གཙང་ཆུ་སྔོན་མོ་རིམ་གྱིས་བྲི་ནས་ཡུལ་དང་ལུང་པའི་གྲུབ་གཟུགས་ཆགས།།
སྤྲ་དང་སྲིན་མོ་མཉམ་འཛོམས་བྱུང་ནས་གདོང་དམར་བོད་པའི་འགྲོ་བ་དར།།
ནགས་ཚལ་ཁྲོད་ནས་འཚོ་སྡོད་བྱས་ཏེ་ཁ་ཟས་རང་བྱུང་ཤིང་ཏོག་བརྟེན།།
ལུས་གོས་ཤིང་གི་ལོ་མས་བྱས་ནས་འཚེ་མེད་ཞི་བདེའི་ངང་དུ་གནས།།
དར་ཚུལ།
གཞན་ཕེབས་གཞོན་ནུ་གཉའ་ལ་ཁུར་ནས་གངས་ལྡན་ཞིང་ལ་གདན་འདྲེན་བྱས།།
དཀའ་བ་བརྒྱ་ཕྲག་དང་དུ་བླངས་ནས་ཡུམ་བུ་མཁར་གྱི་ཐོག་མ་བརྩིགས།།
གདོང་དམར་བོད་པའི་དཔོན་གནས་ཕུལ་ཏེ་ཟིལ་གནོན་ཁྲི་ཡི་སྟེང་ལ་བཞག།
འབངས་མི་ཁྲི་ཡིས་མཐའ་རུ་བསྐོར་ནས་བཙན་པོའི་དུས་རབས་ཐོག་མར་ཆགས།།
དར་སྐབས།
རི་ལ་བཞེངས་པའི་ཕོ་བྲང་དམར་པོ་ཁྲི་གདུགས་ཉི་མའི་བཞིན་ལ་འགྲན།།
རིན་ཆེན་ཚེ་སྲོག་ཡོན་དུ་ཕུལ་བའི་དབྱངས་གསལ་སོ་བཞིར་གསེར་འོད་འཕྲོ།།
ཇོ་ཤཱཀ་རྣམ་གཉིས་བོད་ལ་དྲངས་ནས་གདུལ་བྱ་ནམ་མཁའི་མཐའ་དང་མཉམ།།
འབངས་ལ་ཞེན་པའི་གདོང་དམར་དཔོན་གྱིས་ཞབས་རྗེས་གངས་དཀར་རི་ལ་བཞག།
རྒུད་ཚུལ།
མཐུན་སྒྲིལ་ལག་ཟུང་རྒྱང་དུ་གྱེས་ནས་ཕྲག་དོག་མེ་དཔུང་སྒང་ལ་འཕྱར།།
མཁས་པའི་དཔུང་ཚོགས་ཁྲིམས་ལ་སྦྱར་ནས་གོང་གི་ཁྲི་དཔོན་རྒྱང་ལ་བཞག།
རྒྱུ་དང་གོ་ས་འཕྲོག་རྩོད་བྱས་ནས་སྤུན་ཟླའི་ཚེ་སྲོག་གྲི་ལ་བྱིན།།
གནས་སྟངས་དེ་ཡི་རྒྱུད་རིམ་ཁྲོད་ནས་ཡོད་ཚད་གཞན་གྱི་དབང་དུ་ཤོར།།
ད་སྐབས།
ས་མཐའི་ཡུལ་གྱི་གདོང་དམར་དཔོན་གྱིས་སློང་མོའི་ཁྲོད་ནས་རང་རིགས་བསྐྱངས།།
རྣམ་དཔྱོད་ལྡན་པའི་གངས་ཅན་གཞོན་ནུས་རང་རིགས་བསམས་ནས་སྐུ་ལུས་བསྲེགས།།
རིན་ཆེན་ལུས་ཀྱིས་སྒྲོན་མེ་བྱས་ནས་རང་རིགས་རང་གིས་སྐྱོབ་དུས་འདིར།།
རྣམ་ཤེས་མེད་པའི་ཕོ་མོ་རེ་ཟུང་ད་དུང་སྒོར་མོའི་ཆེད་དུ་བརྩོན།།
སླར་སྨྲས་པ།
མ་བོས་མགྲོན་གྱི་བཀའ་ཁྲིམས་འོག་ནས་གདོང་དམར་ཕུ་ནུ་གཡོག་ཏུ་གྱུར།།
མ་བྱིན་བོད་པའི་ནོར་དང་གཏེར་ཁ་ལོག་སྤྱོད་ཤན་པས་བཙན་གྱིས་ཕྲོགས།།
མ་བབས་བཙན་ཁྲིམས་ཁུར་སྙིང་མ་འདོད་རིན་ཆེན་སྲོག་གི་བདེན་དཔང་ཕུལ།།
མ་ཐུབ་དགྲ་བོའི་བཙན་གནོན་འོག་ནས་གདོང་དམར་སྤུན་སྲིང་མེ་རུ་འབར།།
