བནྡེ་སྐྱབས།
རི་ཆུ་སྟོང་ཕྲག་གིས་བར་དུ་ཆོད་པའི་གནམ་འོག་འདི་རུ།
མི་ལོ་ཉི་ཤུའི་རྒྱང་བཞུད་ལ་འཐིམ་པའི་ང་།
འཚོལ་སྙེག་གི་ལམ་སྣེ་ན་འདུར་གྱིན་པའི་དེ་རིང་།
ཆེས་ཐག་ཉེ་ས་ཉེ་ས་ཞིག་ནས།
ཤ་གསེང་རུས་རྐང་དུ་ལྷུང་བའི་སྐད་སྒྲ་མང་པོ་ཞིག
རེ་རེ་བཞིན།
རྣ་ལམ་ནས་ཐོས་ཤིང་སེམས་ཁོང་ལ་འབབ་དུས།
སླར་ཡང་། འཇིག་རྟེན་གྱི་གྲུ་ཟུར་ཞིག་ན།
དྲོད་ཁོལ་འཁྱིལ་བའི་ས་ཆེན་པོ་དེ་ངང་གིས་དྲན།
ཤ་ཁྲག་རུས་གསུམ་གྱིས་བཞེངས་པའི་དུང་བ་གསོན་པོའི་ཚོགས།
བདག་གི་ཕུ་ནུ་མིང་སྲིང་དང་། ཚ་བོ་ཚ་མོའི་ཚོགས།
དྲན་ངོགས་སུ་རྒྱུ་བཞིན།
བགྲོད་ཟིན་པའི་གཏམ་རྒྱུད་མང་པོ་མང་པོ་རེ་མོས་ཀྱིས་མིག་དབང་དུ་བསྟར་བའི་མཚམས་འདི་ནས་རང་ཉིད་ནམ་ཡང་ཁེར་རྐྱང་དུ་ལྷག་མེད་པའི་ཟུངས་ཤུགས་བླ་ལྷག་ཏུ་བརྟས།
