ཀུན་མཁྱེན་རིག་འཛིན་འཇིགས་མེད་གླིང་པ།
འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ།།
ཁྱེད་མཚན་ཨུཏྤ་ལ་ཡི་ཀེ་ས་ར།།
རྣ་ལུང་དཔྱངས་པའི་མོད་ལ་སྙིང་དབུས་སུ།།
ཤེས་དང་ཤེས་བྱའི་རི་དྭགས་བཀྲག་བརྟས་པ།།
གཞོན་ནུ་སྨྲ་བའི་ཉི་མ་གང་ལ་འདུད།།
ལེགས་སྨོན་ཁྲིམས་སུ་རློམ་པས་མ་བཅིངས་ཤིང་།།
ཐོས་དང་བསམ་པའི་དྲེགས་པས་རྒྱགས་མིན་པར།།
རྣམ་གྲོལ་དོན་དུ་གཉེར་བའི་སྐྱེས་བུ་ལ།།
དྲང་སྲོང་ངག་གི་བདེན་གཏམ་སྨྲ་བར་རིགས།།
ཁོམ་ལྡན་ཙམ་གྱི་ལུས་རྟེན་མང་ལགས་ཏེ།།
རང་གཞན་འབྱོར་བའི་ཐ་མ་གཉིས་གཉིས་ཀྱི།།
མིག་འཕྲུལ་ལྟ་བུར་འདུ་འབྲལ་བགྱིད་བརྟགས་ན།།
སྲིད་ན་དཀོན་པ་མི་ལུས་རིན་ཆེན་ཡིན།།
དེ་ཡང་སྐྱེ་རྒ་ན་འཆིའི་འཁྲུལ་འཁོར་གྱིས།།
འདུས་པ་འབྲལ་བའི་ཆོས་ཅན་ལ་སྦྱོར་བ།།
འདི་ལ་སྐྲག་ནས་ཤཱཀྱའི་སྲས་པོ་ཡང་།།
རྒྱལ་པོའི་ཁབ་ནས་བྲོས་ན་འོ་སྐོལ་ལ།།
ཆགས་རིན་ཆོག་པའི་དཔལ་འབྱོར་འདུག་གམ་སོམས།།
གངས་རིའི་ཁྲོད་འདིར་འཆི་ལ་འཇིགས་ལྟའི་ཆོས།།
ཕལ་ཆེར་ཆོས་ཀྱང་མ་ཡིན་འཇིག་རྟེན་མིན།།
ཆགས་སྡང་ལྟོ་གོས་གཏམ་གྱི་འདུ་འཛིའི་ངང་།།
འཇིག་རྟེན་ཕ་རོལ་ལག་སྟོང་འགྲོ་བ་མང་།།
དགང་བར་དཀའ་བ་འདོད་པའི་ཉེས་དམིགས་ནི།།
ཇི་ཙམ་འབྱོར་ཀྱང་ཆོག་ཤེས་མི་སྐྱེ་ལ།།
གསོག་དང་སྲུང་དང་སྤེལ་བས་སྡུག་བསྔལ་བའི།།
རྒྱུ་དང་འབྲས་བུའི་གནས་ལ་སྐྱོ་བར་མཛོད།།
འཁོར་བར་དགའ་ཞིང་བདག་གཞན་ཕྱོགས་རིས་ཆེ།།
བྱས་པ་མི་གཟོ་ཕན་གནོད་བརྟག་མི་ཐུབ།།
འདུ་འཛི་ལ་དགའ་བྱིས་དང་སྡིག་གྲོགས་ལས།།
རི་དྭགས་རྒྱ་ནས་ཤོར་བ་ལྟ་བུར་བྱོལ།།
ཚེ་འདི་ཡིད་ལ་བགྱིད་པའི་ཐོས་བསམ་དང་།།
སྐྱོ་ཤས་བྲལ་བའི་ཁྲིམས་ཀྱི་གཟུགས་བརྙན་གྱིས།།
ཐར་པའི་ལམ་དུ་ཕྱིན་པ་མ་མཆིས་པས།།
དབེན་པའི་གནས་སུ་དེ་རིང་ཉིད་ནས་དེངས།།
ཐོས་པའི་མཐའ་ལ་འདི་ཞེས་ཐུག་པ་མེད།།
ཇི་ཙམ་བསམས་བཞིན་འཁོར་བར་མི་སྐྱོ་ན།།
དེ་ལས་བྱུང་བའི་དྲེགས་དང་འདུ་འཛི་ཡིས།།
ངན་འགྲོའི་ས་མཁན་བྱེད་པ་གཟིགས་ལགས་སམ།།
ཁྱད་པར་འཕགས་པའི་ཡུལ་གྱི་དགེ་སྦྱོང་ནི།།
སྦྱངས་པའི་ཡོན་ཏན་བཅུ་གཉིས་ལྷུར་བྱེད་ཀྱང་།།
གངས་རིའི་ཁྲོད་པས་སྤངས་པ་ལྟར་གྱུར་པས།།
ཁྱིམ་ཆུང་སྤངས་པའི་ཁྱིམ་ཆེན་བྱ་བ་མང་།།
རྒྱལ་བས་བསྔགས་པའི་ནགས་ཁྲོད་བས་མཐའ་ན།།
འདུ་འཛི་ལས་སྐྱེས་ལོ་ཀའི་ཆོས་བརྒྱད་དང་།།
ཚོང་དང་སོ་ནམ་བྱིས་དང་སྡིག་གྲོགས་མེད།།
བྱ་དང་རི་དྭགས་འགྲོགས་ན་བདེ་བས་གང་།།
བྲག་རིའི་ཕུག་དང་ལོ་མའི་ཁང་བཟང་དང་།།
འདུལ་བ་དང་མཐུན་བྲང་ཁང་ཆུང་ངུ་ནི།།
བསྒྲུབ་པར་སླ་ཞིང་ཐིག་ཚགས་རྣམ་གཡེང་ཉུང་།།
དེ་ལ་ཆགས་ཞེན་མེད་པས་འགྲོ་སྡོད་བདེ།།
ལྗོན་ཤིང་རླུང་གིས་བསྐྱོད་པའི་གཡོ་བ་དང་།།
འབབ་ཆུ་ལྷུང་ལྷུང་འགྲོ་བའི་སྒྲ་སྐད་ལ།།
ལུས་ངག་ལས་སྐྱེས་མི་དགེའི་ས་བོན་མེད།།
དེ་ལ་བརྟེན་ནས་སྐྱོ་ཤས་ངེས་འབྱུང་འཕེལ།།
ཚེ་རབས་ཀུན་ཏུ་ཕུང་ཀྲོལ་བསྐྱེད་པ་ཡི།།
ཡུལ་གྱི་ཉེས་དམིགས་དུག་ལས་ཐུ་བ་ཡང་།།
དབེན་པའི་གནས་ན་ཆེས་ཆེར་ཉུང་བས་ན།།
ཡིད་ལ་བརྟེན་པའི་ལས་ལམ་དག་ཀྱང་དཀོན།།
ཁྱད་དང་སྡེ་དང་སྟོབས་དང་དབང་ཕྱུག་དང་།།
ཕན་ཚུན་འགྲན་དང་གཟི་བྱིན་རྔོམ་པ་དང་།།
འཁྲུགས་དང་བསྲེ་བ་ལས་གྱུར་འདུ་འཛིའི་སྒོ།།
བརྒྱ་ཕྲག་འབྱེད་པའི་གནས་ལས་རིང་གྱུར་པས།།
དབུ་བ་རབ་བརྩེགས་ཕུང་པོའི་ཟག་པ་འདི།།
རི་མཆོག་ལྟ་བུར་འཁྲུལ་པར་མི་འགྱུར་ལ།།
གནོད་པ་མང་ཞིང་རླུང་གི་དབུས་གནས་པའི།།
མར་མེ་ལྟ་བུའི་ཚེ་ལའང་སྐྱོ་བར་འགྱུར།།
དེ་ལྟར་སྐྱོ་ན་སྡེ་སྣོད་ཤེས་པ་རྣམས།།
ཕྱི་མའི་གནས་རིགས་རང་དབང་ཅན་མིན་པའི།།
གནས་ལ་སྐྲག་ནས་བླང་དོར་མི་འཛོལ་ཞིང་།།
ཚེ་འདི་བསྒྲུབ་པའི་བསམ་སྦྱོར་རིང་དུ་སྲིངས།།
དེ་ཚེ་ཁྱོད་ཀྱིས་བདེན་པ་རྣམ་བཞི་དང་།།
གྲུབ་མཐའ་སྨྲ་བ་བཞི་ཡི་ལུང་རིགས་དང་།།
ཐོས་དང་བསམ་པས་གོམས་པར་བྱས་པ་ཡི།།
རྣམ་གྲངས་པ་ཡི་དོན་དམ་ངེས་དོན་འགྱུར།།
འཁོར་བའི་ས་བོན་དྲུངས་ནས་འབྱིན་པ་ནི།།
སྟོང་པ་ཉིད་དེ་དེ་ཡི་བཞུགས་ཚུལ་ལ།།
རྟོག་གེས་རྣམ་པར་བརྟག་ཏུ་མི་བཟོད་པས།།
གཤིས་ཀྱི་གནས་ལུགས་སེམས་ཀྱི་ཐོག་ཏུ་དཔྱད།།
དེ་ལྟར་དཔྱད་ན་ཐུན་མོང་མ་ཡིན་པའི།།
བསམ་བྱུང་ཤེས་རབ་ཁྱད་པར་འཕགས་པ་ཡི།།
ཁ་ཕྱིར་ཕྱོགས་པའི་ཐོས་བསམ་དང་འགལ་བའི།།
སྒོམ་བྱུང་ཤེས་རབ་རྣམ་པར་དག་པ་སྐྱེ།།
འདི་ལྟར་རྟེན་ཅིང་འབྲེལ་འབྱུང་དམ་པའི་དོན།།
སྐྱེ་བ་མེད་པས་རྟག་པའི་མཐའ་བསལ་ལ།།
འགག་པ་མེད་པས་ཆད་པའི་མཐའ་བསལ་བའི།།
སྤྲོས་བྲལ་ལྟ་བ་དབུ་མ་ཆེན་པོ་ཡིན།།
དེ་ལྟའི་ལྟ་བ་སྒོམ་པས་ཉམས་བླང་ཕྱིར།།
འགྲོ་འོང་སྨོན་འཇུག་ལས་འདས་བྱང་ཆུབ་སེམས།།
གཅིག་དང་དུ་མར་འགལ་བའི་བློ་འདས་དོན།།
དྲན་པ་ཉེ་བར་གཞག་པས་རྟག་ཏུ་སྐྱོངས།།
གང་ཚེ་བློ་ཡི་སྤྱོད་ཡུལ་མ་ཡིན་པའི།།
དོན་དམ་ཞི་བ་འདུས་མ་བྱས་པ་ལ།།
རྟོག་དཔྱོད་ཚེར་མ་རྣོན་པོས་གཞལ་བྱས་ན།།
རྟག་ཆད་མཐར་ལྟའི་གཡང་དུ་ལྷུང་ཉེན་ཆེ།།
ཅི་ཕྱིར་ཞེ་ན་དོན་དམ་བདེན་པ་ནི།།
བསམ་མི་ཁྱབ་ཅིང་འདུས་མ་བྱས་པ་ཡིན།།
རྟོག་དཔྱོད་ཡུལ་ནི་སེམས་དང་བཅས་པའི་ཕྱིར།།
དབྱིངས་ལ་དགག་གཞག་ནམ་མཁའི་མེ་ཏོག་འདྲ།།
དོན་འདི་རྒྱལ་བའི་གསུང་རབ་མཐའ་དག་དང་།།
ཁྱད་པར་སྡུད་པ་ཚིགས་སུ་བཅད་ལ་བྲིས།།
ངའི་འདི་ཡིན་གྱིས་གཞན་དག་ནོར་རོ་ཞེས།།
འཆད་པ་གངས་རིའི་ཁྲོད་ན་མང་མོད་ཀྱང་།།
ཡིན་པ་དེ་གས་རང་ལྟ་མཆོག་འཛིན་དང་།།
ནོར་སྙམ་དེ་ཀ་རྟག་ཆད་མཐར་ལྟའི་གཡང་།།
ཉིད་དེ་མཉམ་གཞག་དང་ནི་དེ་ཡོད་མིན།།
དེ་སྐད་བརྗོད་པ་ཀུན་སློང་མ་རུངས་པའི།།
ལྟ་བ་ཡིད་ལ་བཞག་པས་མ་ཡིན་ཏེ།།
དོན་དམ་དང་ནི་ཀུན་རྫོབ་བྱང་ཆུབ་སེམས།།
རྟག་པར་ཡིད་ལ་འདྲིས་པའི་ཆ་རྒྱུས་ཡིན།།
མདོར་ན་དེ་ལས་མང་དུ་སྨོས་ཅི་དགོས།།
སྤྱོད་པ་བྱང་ཆུབ་སེམས་དཔའི་ཕྱོགས་ལ་བརྟེན།།
ལྟ་བ་མངོན་པ་སྒོམ་པ་གསང་སྔགས་ཀྱི།།
ལམ་ལ་མཆོག་གི་དངོས་གྲུབ་བརྙེས་པར་མཛོད།།
འདི་ནི་རྟ་མཆོག་རོལ་པ་ཡང་གསང་དང་།།
འཕྲོག་བྱེད་བཏུལ་བའི་ཕུར་པ་བཞུགས་པའི་གནས།།
སེར་སྨད་སྐུ་སྐྱེ་སྨོན་ལམ་རབ་འབྱམས་པའི།།
གསུང་ངོར་དུས་མཐའི་རང་བྱུང་རྡོ་རྗེས་སོ།།
