ལོ་རིམ་ལྔ་པའི་སློབ་གཉེར་བ། འཇིགས་མེད་བསམ་གྲུབ།
ལེ་བར་སྟོང་གིས་བཅད་པའི་རྒྱང་རིང་གི་ཡུལ་གྲུར།།
བཞུགས་པའི་སྙིང་རྗེས་སྐྱོང་བའི་ཕྱག་ན་ཡི་པད་མོ།།
བྱམས་པའི་བཞིན་རས་མཇལ་བའི་བགོ་སྐབས་དང་བྲལ་ཡང་།།
མ་བརྗེད་སྙིང་ཁོང་གཏིང་ནས་དུས་རྒྱུན་དུ་དྲན་ཡོད།།
ཉིན་ཞག་སུམ་སྟོང་ལྷག་ཙམ་ཁྱོད་ལུས་དང་མ་བྲལ།།
ཞིམ་པོ་ཟ་བཏུང་བཅུད་སྙིང་རང་དབང་དུ་སྤྱོད་པ།།
ཐེགས་དཀའི་ཁལ་ཆེན་བཀལ་ནས་བྲན་མོ་བཞིན་སྤྱོད་པ།།
མ་བརྗེད་སྙིང་ཁོང་གཏིང་ནས་དུས་རྒྱུན་དུ་དྲན་ཡོད།།
ལོ་གསུམ་ཁྱེད་ཀྱི་པང་དུ་ཅི་འདོད་དུ་སྤྱད་ནས།།
ཉིན་མཚན་ཀུན་ཏུ་རླན་གཤེར་བཙོག་དྲི་དང་མ་བྲལ།།
ངུ་སྐད་དྲག་པོས་རྣ་བར་ཨི་ཁུང་ཡང་བརྟོལ་བ།།
མ་བརྗེད་སྙིང་ཁོང་གཏིང་ནས་དུས་རྒྱུན་དུ་དྲན་ཡོད།།
ཚེ་གང་མཚམས་མེད་སེམས་ཁྲལ་ཆེན་པོ་ཡི་ངང་ནས།།
རྟག་ཏུ་རང་སྲོག་ལས་ལྷག་གཅེས་ནོར་དུ་འཛིན་ཞིང་།།
གཡང་དཀར་བལ་ལས་འཇམ་པའི་བརྩེ་གདུང་གིས་བསྐྱངས་པ།།
མ་བརྗེད་སྙིང་གི་དཀྱིལ་ནས་དུས་རྒྱུན་དུ་དྲན་ཡོད།།
བཅོས་མིན་འཛུམ་དཀར་ཞལ་ངོ་མ་ངོམས་པར་མཇལ་ཡང་།།
བགོ་སྐལ་རི་དང་ནགས་ཀླུང་མང་པོ་ཞིག་བཅད་ཀྱང་།།
རང་སེམས་དྭངས་མའི་ཤེལ་མིན་མེ་ལོང་གི་ནང་དུ།།
ཁྱོད་ཞལ་རྒྱུན་དུ་མ་ཆད་དུས་རྒྱུན་དུ་བལྟས་ཡོད།།
འགྲོ་བའི་སྐྱབས་མགོན་དམ་པ་རིན་ཐང་དང་བྲལ་བ།།
རིན་ཆེན་རྣམ་གསུམ་བརྩེ་བའི་ཐུགས་རྗེ་རེ་མ་ཆུང་།།
དྲིན་ཆེན་མ་ལོ་དྲན་པའི་སྙིང་ནང་གི་ཟུག་གཟེར།།
མྱུར་དུ་སྐྱོབ་པར་མཛོད་ཅིག་ཁྱེད་རྣམ་གསུམ་མཁྱེན་ནོ།།
འཆི་མེད་སྐྱབས་མཆོག་མཐའ་མེད་ཕྱོགས་ཀུན་ལས་རྣམ་རྒྱལ།།
འཇིགས་པ་ཆེན་པོ་བརྒྱད་དང་བཅུ་དྲུག་སོགས་སྐྱོབ་མ།།
མགོན་པོ་ཚེ་དཔག་ཡབ་ཡུམ་ཚེ་ལྷ་རྣམ་གསུམ་པོས།།
དཀོན་མཆོག་གཉིས་པ་ཨ་མའི་ཚེ་རིང་བར་མཛོད་ཅིག།
དྲིན་ཆེན་མ་ལོ་དྲན་པའི་སེམས་ནང་གི་ཚོར་བ།
སྙན་ཚིག་སྡེབ་སྦྱོར་དབེན་པའི་སྙིང་ནང་གི་ཚིག་གསུམ།།
འཕགས་ཡུལ་ལྷོ་ཕྱོགས་བེ་ཏའི་ནགས་ཀླུང་གི་གྲོང་ནས།།
ཤོག་ངོར་ཕབ་ནས་ཨ་མའི་མདུན་ས་རུ་སྤྲིངས་སོ།།
