ལོ་རིམ་གསུམ་པའི་སློབ་གཉེར་བ། ཀུན་བཟང་ཉི་མ།
གང་བྱུང་ལབ་རྡོལ་ཅི་ཡང་འབྱིན་ན།།
རིག་གསར་རེད་ཅེས་མཁའ་རུ་སྤུར་གྱི།།
གྲྭ་པས་འདོད་རྩོམ་མང་ཞིག་སྤེལ་ན།།
གྲགས་པ་ཐོབ་པའི་ཡུན་ཚད་མྱུར་གྱི།།
ལག་ལེན་མེད་པའི་ཧམ་བཤད་སྦོམ་ན།།
མཁས་པ་ཞེས་པའི་ཆོ་ལོ་སྩོལ་གྱི།།
མཁས་དང་གྲགས་པའི་མིང་ལ་སྨད་ན།།
རྟོག་སད་རེད་ཅེས་འུར་མགོ་མཐོ་ཡི།།
ཞེན་པ་དཀར་པོའི་མི་ཞིག་འཁྲུངས་ན།།
ནག་ཉེས་ཞྭ་མོ་སྐོན་ལ་མཁས་ཀྱི།།
རིགས་ལ་ཕན་པའི་ལས་ཤིག་བསྒྲུབས་ན།།
ཕྲག་དོག་མདུང་སྣེའི་མདའ་ཁ་རྣོ་ཡི།།
གཡོ་དང་རྫུན་གྱི་འཕྲུལ་རྩལ་རྫོགས་ན།།
བསྟོད་པའི་མཐེ་བོང་བསྒྲེངས་པ་མཐོ་ཡི།།
ཚུལ་མིན་སྤྱོད་པ་ཡོད་དགུ་ཤེས་ན།།
མི་སྐྱིད་རེད་ཅེས་མགོ་བོ་འདེགས་ཀྱི།།
སྐྲ་དང་གདོང་གི་ཁ་མདོག་བསྒྱུར་ན།།
དེང་རབས་པ་ཞེས་བརྡ་ཆད་སྙན་གྱི།།
གཞན་སྐད་གཞན་ཡིག་ཏོག་ཙམ་ཤེས་ན།།
མཐོང་ཆེན་བྱེད་པའི་མི་ཚོགས་མང་གི །
སྒོར་གྱི་གྲངས་ཀ་མཐུག་ཙམ་ཡོད་ན།།
སྤྲུལ་པའི་སྐུ་ཡི་མཚན་བྱང་སླ་ཡི།།
ཆང་དང་ཨ་རག་འདོད་ཀྱིས་བཏུངས་ན།།
སྙན་ངག་པ་ཞེས་མིང་ཡིག་རྫིག་གི །
ནང་སྙིང་དབེན་པའི་ཁ་བྱང་རྒྱས་ན།།
ཀློག་པའི་གྲངས་ཀ་ཚད་ལས་བརྒལ་གྱི།།
ཚིག་རྐང་གཅིག་གི་ལྷུ་ལག་འགྲིགས་ན།།
རྩོམ་པ་པོ་ཞེས་རབ་ཏུ་བསྒྲགས་ཀྱི།།
འགྲེལ་བཤད་མེད་པའི་ཡིག་ཉོག་སྤེལ་ན།།
ཡིད་བརྙན་བཞེངས་ཞེས་གླེང་རྒྱུ་བདོག་གི །
བཙན་གྱིས་བསྒྲིགས་པའི་ཐ་སྙད་སྤུངས་ན།།
ཚོར་བ་ཞེས་པའི་བརྗོད་པ་བདེ་ཡི།།
དུས་ཚོད་མདེ་འུ་སྔ་ཕྱི་འདི་དག །
སྐོར་ལོག་ཅིག་གི་ཉིན་སྲིབ་མིན་འགྲོ།།
