མཁན་པོ་ཚེ་རིང་འགྱུར་མེད།
ཐུན་མོང་འཇིག་རྟེན་མི་ཡི་སྣང་ངོ་ལ།།
གདོས་བཅས་ཤ་ཁྲག་ལུས་ཀྱི་ཚུལ་བཟུང་སྟེ།།
ཉིན་མཚན་བར་མེད་སྐྱེ་འགྲོ་སེམས་ཅན་རྣམས།།
ཐུགས་བརྩེས་སྐྱོང་མཛད་ཆོས་རྗེ་བླ་མར་འདུད།།
གྲུབ་དབང་བླ་མའི་གསང་གསུམ་ཡོན་ཏན་ནི།།
ཇི་བཞིན་བརྗོད་པའི་སྤོབས་པ་མ་མཆིས་ཀྱང་།།
བདག་དང་སྐལ་བ་མཉམ་པའི་སྐྱེ་འགྲོ་ལ།།
ཇི་ལྟར་མཇལ་བའི་ཆ་ཤས་འབྲི་ལ་བརྩོན།།
སྔོན་གྱི་ཐུགས་བསྐྱེད་དམ་བཅའ་མི་འདོར་བར།།
བསམ་བཞིན་སྤྲུལ་པའི་སྐུ་ཡི་ཚུལ་བཟུང་ཞིང་།།
འཁོར་བའི་བཙོན་རར་ལྷུང་བའི་ཉམ་ཐག་འགྲོར།།
དམ་ཆོས་བདུད་རྩི་མངར་མོས་ཡང་ཡང་བསྐྱངས།།
རྒྱ་དམར་ཀླ་ཀློའི་དམག་གིས་གངས་རིའི་ཡུལ།།
མི་བཟད་དྲག་པོའི་དཔུང་གིས་མཐའ་བསྐོར་ནས།།
བསགས་པའི་ནོར་དང་བསྲུངས་པའི་རིག་གཞུང་དག །
མིང་མེད་ཐལ་རྡུལ་བཞིན་དུ་གཏོར་བའི་སྐབས།།
ཁྱེད་ཀྱིས་རྒྱལ་བསྟན་སྙིང་པོའི་འགན་འཁྲི་ཆེ།།
ཁུར་དུ་བཞེས་ནས་བསྟན་དོན་སླར་གསོའི་ཆེད།།
བགྲོད་པར་དཀའ་བའི་རྐང་ལམ་ཀྱག་ཀྱོག་སྟེང་།།
ཕྲག་ཏུ་བླ་གོས་བསྣམས་ནས་ས་མཐར་ཉུལ།།
གཅན་གཟན་གཏུམ་རྔམ་ཆེ་བའི་ནགས་ཚལ་ནང་།།
གནམ་ས་མ་གཏོགས་ངོ་ཤེས་མེད་ན་ཡང་།།
ཟླ་མེད་སྙིང་སྟོབས་ཅན་གྱི་ཐུགས་བསྐྱེད་དང་།།
ཧིན་སྒོར་ལྔ་བརྒྱས་དགོན་པའི་བསྟན་གཞི་བཙུགས།།
དེ་ལྟར་མི་རྒྱུ་གཉིས་ཀྱི་རོགས་ཞན་ཡང་།།
ཁྱེད་ཀྱི་བསྟན་དོན་ཞུམ་མེད་བརྩོན་འགྲུས་དེ།།
ནམ་ཡང་མི་གཏོང་དམ་བཅའི་སྙིང་སྟོབས་ཀྱིས།།
རྣམ་གླིང་ཆོས་ཀྱི་གྲོང་ཁྱེར་གསར་དུ་བསྐྲུན།།
རྒྱལ་བསྟན་སྙིང་པོ་བཤད་དང་སྒྲུབ་པ་ཟུང་།།
དུས་ཀྱི་དབང་གིས་རླུང་ཁའི་མར་མེ་བཞིན།།
ཟད་པར་གྱུར་ཀྱང་ཁྱེད་ཀྱི་འབད་བརྩོན་གྱིས།།
སླར་ཡང་བྱང་ནས་ལྷོ་མཐའི་ཡུལ་དུ་དྲངས།།
སྐབས་རེར་ཕྲག་དོག་ཅན་གྱི་མི་བུ་འགས།།
ཁྱེད་ཀྱི་བསྟན་ལ་དགྲ་རུ་བཟུང་མྱོང་ཡང་།།
གང་གིས་བཟོད་པའི་གོ་ཆ་བརྟན་པོ་ཡིས།།
ཡོད་ཚད་རིས་མེད་གཉེན་ཉེའི་ཚུལ་དུ་བསྐྱངས།།
སྙིགས་ལྔའི་མུན་པ་བདོ་བའི་དུས་ཀྱི་གཤམ།།
ཐེག་པའི་ཡང་རྩེ་འོད་གསལ་རྫོགས་པ་ཆེ།།
མི་ནུབ་འཛམ་གླིང་འཛིན་མའི་ཁྱོན་ཡངས་པོར།།
བཤད་དང་སྒྲུབ་པའི་རྒྱལ་མཚན་ཁྱེད་ཀྱིས་བཙུགས།།
ཀྱེ་ཀྱེ་གྲུབ་དབང་ཡིད་བཞིན་ནོར་བུ་ལགས།།
ཁྱེད་ཀྱིས་མི་མངོན་དབྱིངས་ནས་སློབ་ཚོགས་ལ།།
འབྲལ་མེད་ཐུགས་རྗེ་ཆེན་པོའི་སྤྱན་རས་ཀྱིས།།
དུས་རྣམ་ཀུན་ཏུ་སྐྱོང་བར་མཛད་དུ་གསོལ།།
