བཀྲ་ཤིས་ཚེ་རིང་། (བལ་ཡུལ་ཞེ་ཆེན་དགོན།)
ཨ་དོན་སྤྲོས་བྲལ་ཀློང་ལས་མ་གཡོས་བཞིན།།
ཧ་ཅང་མཛེས་པའི་ཡུལ་ལྗོངས་འདན་ཁོག་ཏུ།།
ཨ་མ་འགྲོ་ཁམས་རྒྱ་མཚོ་སྒྲོལ་བའི་སླད།།
ཧ་ལས་བླ་མའི་རྣམ་པར་སྤྲུལ་ལ་འདུད།།
ས་བཅུ་མཐར་སོན་རྗེ་བཙུན་འཇམ་པའི་དབྱངས།།
ཤ་ཚུགས་དངོས་བྱོན་མཁྱེན་བརྩེའི་ཐུགས་སྤྲུལ་དུ།།
ལ་ལ་ཙམ་མིན་དུ་མས་བསྔགས་པའི་མགོན།།
རབ་གསལ་ཟླ་བ་དད་གསུམ་པདྨོས་མཆོད།།
ཡ་མཚན་མཆོག་ཐུན་སིདྡྷི་རྣམ་གཉིས་བརྙེས།།
འ་ཅག་རྣམས་ཀྱི་ཚེ་རབས་འབྲེལ་བའི་ལྷ།།
ཟ་བྱེད་བྲན་བཀོལ་ཨོ་རྒྱན་པད་འབྱུང་དངོས།།
ཞྭ་ལྟར་སྤྱི་བོར་བྱང་ཆུབ་ཐོབ་ཀྱང་བསྙེན།།
ཝ་སྐྱེས་ཕས་རྒོལ་བསྐྲད་ནུས་མི་ཕམ་དང་།།
ཛ་ཡའི་མཚན་ཅན་བཤེས་གཉེན་མཆོག་རྣམས་ལས།།
ཚ་གྲང་སྐུ་ངལ་ཁྱད་བསད་ཆོས་ཀུན་མནོས།།
ཙ་ཀུ་ར་སྐྱེས་མདངས་འཛིན་སྐུ་ལ་བསྟོད།།
མ་ལུས་རྩ་གསུམ་སྒྲུབ་ཐབས་ཟབ་གཏེར་ཆོས།།
བ་མཆོག་ཇི་བཞིན་དངོས་གྲུབ་འབྱུང་བའི་གནས།།
ཕ་མཐའ་ཡས་པའི་དགོངས་པའི་གསང་མཛོད་ལས།།
པ་གོར་རྣམ་རོལ་སོགས་ལ་བསྩལ་འདི་རྨད།།
ན་རྒ་ཟུག་རྔུ་ཀུན་བྲལ་ཐུགས་རྡོ་རྗེས།།
ད་ལྟ་རིག་འཛིན་རྣམ་བཞིའི་གསེང་ལམ་ནས།།
ཐ་མལ་སྣང་ཞེན་ལྷ་སྐུར་ཡོངས་སྦྱངས་ལ།།
ཏམྦུ་ར་བཞིན་སྙན་པའི་དབྱངས་ཀྱིས་བསྟོད།།
ཉ་རྒྱས་ཟླ་བཞིན་སྤངས་རྟོགས་རྫོགས་པའི་རྗེར།།
ཇ་དངུལ་རྙེད་བཀུར་མཆོད་རྫས་རྒྱ་མཚོ་ཡིས།།
ཆ་སྙོམས་སེམས་ཀྱིས་རྟག་ཏུ་གུས་མཆོད་ན།།
ཅ་ནོར་རྫས་ལ་ཞེན་ཆགས་མེད་པར་མཛོད།།
ང་བདག་འཛིན་བྲལ་དཔལ་ལྡན་བླ་མ་མཆོག །
ག་ནས་བསམས་ཀྱང་སངས་རྒྱས་དངོས་སྣང་ལ།།
ཁ་ཞེ་གཉིས་མེད་སྒོ་ནས་བསྟོད་པའི་རྒྱུས།།
ཀ་ལྷུན་ཟུང་འཇུག་རིག་པ་མངོན་གྱུར་ཤོག །
