ལོ་རིམ་བརྒྱད་པའི་སློབ་གཉེར་བ། པདྨ་དོན་གྲུབ།
སྔོན་བསགས་རྣམ་དཀར་བཟང་པོའི་རྟེན་འབྲེལ་ལས།།
རླུང་བུས་ཁྱེར་བའི་རྣམ་ཤེས་མངལ་དུ་ཞུགས།།
འཐོབ་དཀའ་རིན་ཐང་བྲལ་བ་མི་ཡི་རྟེན།།
ཆོས་ལམ་སྙེག་པའི་བག་ཆགས་སྲབ་མོ་ཞིག །
ཕ་མའི་སྐུལ་མ་བཟང་པོའི་སྤྱན་རས་འོག །
འཁོར་བའི་གྲོང་ནས་ཚངས་པར་སྤྱོད་ལ་ཞུགས།།
མཚན་ལྡན་བཤེས་གཉེན་མང་པོའི་ཞབས་ལ་བཏུད།།
ཤེས་རབ་མིག་འབྱེད་གཞུང་ལུགས་སྦྱོང་བ་བྱས།།
ལོ་དང་ཟླ་བར་ཤེས་བྱ་གང་སྦྱངས་ཀྱང་།།
མ་ངེས་རྟོག་པའི་སྣང་བརྙན་རེ་རེ་ནས།།
ཉི་མ་རེ་བཞིན་སེམས་ནས་ཡལ་བའི་དུས།།
ཡང་ཡང་གོམས་འདྲིས་མེད་པ་གསལ་འདེབས་བྱུང་།།
ཐོག་མེད་གོམས་པའི་སྣང་བ་མག་མོག་ཁྲོད།།
ཐོས་བསམ་སྒོམ་པའི་ཕ་མཐར་སོན་དཀའ་ཡང་།།
སྙིང་ལ་བཀོད་པའི་རི་མོ་མ་ཡལ་བས།།
གོམ་པའི་འདེགས་འཇོག་མདུན་ནས་མདུན་དུ་སྤོས།།
ཡོད་ཚད་སེམས་ཀྱིས་བྱས་པའི་འཇིག་རྟེན་འདིར།།
ཆགས་སྡང་ལས་སུ་གྱུར་པ་བྱ་བའི་བབས།།
ཉིན་མཚན་བར་མེད་མྱོང་བའི་དཀའ་སྡུག་ཁྲོད།།
རང་ཉིད་བསྙེགས་པའི་ལམ་དེར་སྤྲོ་བའང་བརྟས།།
༢༠༢༠/༠༦/༠༦
