ལོ་རིམ་བདུན་པའི་སློབ་གཉེར་བ། ཟླ་བ་རྡོ་རྗེ།
དེང་སྙིགས་མ་ལྔ་བདོ་བའི་དུས་ངན་འདིར་སེམས་ཅན་རྣམས་ཉོན་མོངས་པའི་དབང་དུ་ཤོར་ནས་ལས་འབྲས་དང་སངས་རྒྱས་ཀྱི་བཀའ་ལའང་རྩིས་མེད་སྣང་མེད་བྱས་ནས་རང་གཞན་ཕུང་ཀྲོལ་གྱི་རྒྱུར་གྱུར་པའི་བག་མེད་ཀྱི་བྱ་བ་ངན་པ་སྣ་ཚོགས་སྤྱོད་བཞིན་ཡོད་པ་ནི་མངོན་སུམ་ཡིན་པས་བདག་གིས་སྨྲ་ག་ལ་དགོས། འགྲོ་བ་འདི་དག་ཡལ་བར་མ་དོར་བར་ཐུགས་རྗེའི་ཕྱག་རྐྱོང་བ་པོ་མཉམ་མེད་ཐུབ་པའི་དབང་པོ་གང་གིས་མཛད་པ་བཅུ་གཉིས་ཀྱི་སྒོ་ནས་སེམས་ཅན་གྱི་དོན་མཛད་པའི་ཚུལ་བསྟན་པ་ལས་དེ་དག་གི་ནང་ནས་ཁྱད་པར་དུ་འཕགས་པ་ནི་དམ་པ་དག་གིས་མགྲིན་གཅིག་ཏུ་ཡང་ནས་ཡང་དུ་བསྔགས་བརྗོད་གནང་བ་ཆོས་འཁོར་བསྐོར་བའི་མཛད་པ་ཡིན་ལ། དེ་ཡང་རྨད་བྱུང་གི་སློབ་དཔོན་རྒྱལ་སྲས་ཆེན་པོ་ཞི་བ་ལྷས། ཡིད་བཞིན་ནོར་བུ་དཔག་བསམ་ཤིང་། །ཇི་ལྟར་རེ་བ་ཡོངས་སྐོང་བ། །ཞེས་གསུངས་པ་ལྟར། སྟོན་པ་རང་ཉིད་ཀྱིས་གདུལ་བྱ་ལ་ཆོས་བསྟན་པར་བྱའོ་ཞེས་རྣམ་པར་རྟོག་པ་མེད་ནའང་སྔར་སློབ་ལམ་གྱི་གནས་སྐབས་ན་སེམས་ཅན་གྱི་དོན་བྱ་བའི་ཕྱིར་ཐུགས་བསྐྱེད་ཅིང་སྨོན་ལམ་རྒྱ་ཆེར་བཏབ་པའི་མཐུ་དང་སེམས་ཅན་གྱི་བསོད་ནམས་ཀྱི་ཕུང་པོ་ཟུང་དུ་འཇུག་པའི་མཐུ་ལ་བརྟེན་ནས་སྟོན་པས་གནས་ཝཱ་རཱ་ཎ་སཱི་ལ་སོགས་པར་གདུལ་བྱ་སྐལ་བ་དང་ལྡན་པ་རྣམས་ལ་ཆོས་ཀྱི་འཁོར་ལོ་བསྐོར་ནས་རྒྱུད་སྨིན་པར་མཛད། བདག་ཅག་བསོད་ནམས་དམན་པས་སྟོན་པ་དངོས་དང་མཇལ་བའི་སྐལ་བ་མ་ཐོབ་ནའང་སྟོན་པ་ཉིད་ཀྱིས་ཕྱི་དུས་ཀྱི་སྟོན་པར་བསྔགས་པ་དམ་ཆོས་རིན་པོ་ཆེ་དང་མཇལ་བའི་སྐལ་བ་ཡོད་པ་ཡིན། ཕལ་པོ་ཆེ་ལས། ལྔ་བརྒྱའི་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་སྣང་། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་སྟོན་པ་མྱ་ངན་ལས་འདས་ནས་ཕྱི་དུས་ཀྱི་གདུལ་བྱ་རྣམས་ཀྱི་དོན་བྱ་བའི་ཕྱིར་ཡི་གེའི་གཟུགས་སུ་བྱོན་པར་འགྱུར་ཞེས་སྟོན་པ་ཉིད་ཀྱིས་ཞལ་ནས་གསུངས་པ་ཡིན་ནོ། །སྤྱིར་སྟོན་པའི་བཀའ་རྣམས་སྟོན་པ་ཉིད་ཀྱིས་གླེགས་བམ་དང་ཡི་གེའི་གཟུགས་སུ་བཀོད་ནས་བཞག་པ་མ་ཡིན་ཡང་ཕྱིས་སུ་བཀའ་སྡུད་པ་པོ་རྣམས་ཀྱིས་རྒྱལ་བའི་བཀའ་ཐམས་ཅད་ཆད་ལྷག་མེད་པར་གླེགས་བམ་སོགས་ཡི་གེའི་གཟུགས་སུ་བཀོད་ནས་བཞག་པས་དམ་པ་དེ་རྣམས་ཀྱི་བཀའ་དྲིན་ནི་བསམ་བརྗོད་ཀྱི་ཡུལ་ལས་འདས་པ་ཡིན་ནོ།།
སྐབས་འདིར་ཁོ་བོས་ཀློག་པ་པོ་ཡོངས་ལ་འབོད་སྐུལ་གྱི་ཚུལ་དུ་ཞུ་གསོལ་གདབ་པར་བྱ་བ་ནི། དེ་རིང་ཁ་སང་དགོན་སྡེ་ཁག་གི་ཕྱི་ནང་གང་དུ་སོང་ནའང་ཕྱག་དཔེའི་རིགས་རྣམས་གནས་ངེས་མེད་དུ་སྣང་མེད་ངང་གཏོར་རྐྱང་དང་གཡུག་རྐྱང་བྱས་བཞག་པའི་གནས་ཚུལ་ནི་ཚང་མའི་མངོན་གསལ་ལྟར་ཡིན། དེ་ཙམ་དུ་མ་ཟད་དཔེ་ཆ་དེ་དག་རྐང་པས་སྟེང་ནས་བགོམས་པ་དང་མནན་པ་སོགས་བྱུང་ན་ཡང་གོ་མེད་ཚོར་མེད་དུ་འགྲོ་མཁན་ཡང་མི་ཉུང་ཙམ་འདུག དེ་བཞིན་དུ་གྲོང་ཆོག་ལ་འགྲོ་སྐབས་སྦྱིན་བདག་གི་ཁྱིམ་དུའང་གནས་ཚུལ་དེ་འདྲ་མང་པོ་མཐོང་རྒྱུ་ཡོད་པ་དང་སྐབས་རེ་ནི་གད་སྙིགས་བླུག་སྣོད་དུའང་དཔེ་ཆ་ཐ་ར་ཐོ་རེ་བླུགས་བཞག་པ་མཐོང་གི་འདུག དེ་ནི་ཤིན་ཏུ་ཡིད་སྐྱོ་བའི་གནས་ཚུལ་ཞིག་ཡིན། དེ་ནི་སངས་རྒྱས་ལ་མ་གུས་པ་དང་། སངས་རྒྱས་ཀྱི་བཀའ་ལ་མི་རྩི་བ་དང་། ལས་རྒྱུ་འབྲས་ལ་མི་རྩི་བ་ཡིན། ངེད་ཅག་ནང་པ་སངས་རྒྱས་པ་རྣམས་ནི་སྐྱབས་གནས་དམ་པ་མཆོག་གསུམ་ལ་སྐྱབས་སུ་སོང་ཞིང་ལས་འབྲས་བསླུ་བ་མེད་པ་ལ་སྙིང་ནས་ཡིད་ཆེས་བྱེད་མཁན་གྱི་གང་ཟག་ཅིག་ཡིན་ན་བག་མེད་ཀྱི་བྱ་སྤྱོད་དེ་འདྲ་ག་ལ་རུང་། དེ་ཡང་སྐྱབས་འགྲོའི་བསྒྲུབ་པའི་བསླབ་བྱའི་སྐབས་སུ་སངས་རྒྱས་ལ་སྐྱབས་སུ་སོང་ནས་སངས་རྒྱས་ཀྱི་སྐུ་འདྲ་དང་སཱ་ཙྪ་ཆག་དུམ་ཡན་ཆད་ལ་སངས་རྒྱས་དངོས་ཀྱི་འདུ་ཤེས་དང་། ཆོས་ལ་སྐྱབས་སུ་སོང་ནས་ཡིག་འབྲུ་ན་གཅིག་ཡན་ཆད་ལ་དམ་པའི་ཆོས་དངོས་ཀྱི་འདུ་ཤེས་དང་། དགེ་འདུན་ལ་སྐྱབས་སུ་སོང་ནས་གོས་དམར་སེར་ལྷན་པ་ཡན་ཆད་ལ་དགེ་འདུན་དངོས་ཀྱི་འདུ་ཤེས་བཞག་ནས་དད་གུས་བྱེད་དགོས་པར་གསུངས་ན་དེ་ལ་རྐང་པས་སྟེང་ནས་བགོམས་པ་དང་མནན་པ་སོགས་ནི་ཆོས་དང་འཇིག་རྟེན་གང་གི་ཐད་ནས་བསམས་ན་ཡང་ཤིན་ཏུ་མི་རུང་བའི་བྱ་སྤྱོད་ངན་པ་ཞིག་ཡིན་པས་དེ་འདྲའི་འཁོར་བ་མཐའ་མེད་དུ་འཁྱམ་བྱེད་ཀྱི་ལས་ངན་རང་ཉིད་ཀྱིས་ཀྱང་འཕྲལ་དུ་སྤངས་ཤིང་གཞན་ལ་ཡང་སྤོང་བར་གདམ་དགོས་སོ།།
ཡང་དེང་སང་འགའ་ཞིག་གིས་ནི་བོད་ཡིག་མཐོང་བ་དང་དད་གུས་རབ་ཅིག་སྐྱེས་ནས་མགོ་ལ་འཇོག་ཙམ་བྱེད་ཀྱང་། དབྱིན་ཇི་དང་རྒྱ་གར་ཡི་གེ་སོགས་ལ་རྐང་པས་བསྣུན་པ་སོགས་བྱུང་ནའང་སྣང་མེད་དུ་འགྲོ་མཁན་ཡང་མི་ཉུང་ཙམ་འདུག ངས་བསམས་ན་དེ་ནི་ཤིན་ཏུ་མི་རུང་བ་དང་མི་འོས་པ་ཞིག་ཡིན་བསམ་གྱི། བྱིན་རླབས་ཀྱི་ངོས་ནས་བསམས་ན་བོད་ཡིག་བྱིན་རླབས་ཆེན་པོ་ལོས་ཡིན། འོན་ཀྱང་སྤྱིར་ཡི་གེ་ནི་ཇི་ཙམ་བྱིན་རླབས་ཆེ་ཡང་རང་གི་བྱེད་ལས་སྐད་ཀྱི་ཚབ་བྱེད་པ་དེ་ཙམ་ཡིན། དེ་ཙམ་ཡི་གེ་ཐམས་ཅད་ཀྱིས་བྱེད་ནུས་ཤིང་། ཁྱད་པར་དུ་ཡང་རྒྱ་གར་ལེགས་སྦྱར་གྱི་སྐད་ཡིག་ནི་དུས་གསུམ་གྱི་སངས་རྒྱས་ཐམས་ཅད་ཀྱིས་གདུལ་བྱ་རྣམས་ལ་ཆོས་གསུངས་ཤིང་གསུང་བར་འགྱུར་བའི་སྐད་ཡིག་ཡིན་པས་བྱིན་རླབས་ཧ་ཅང་ཆེ། རང་ཅག་རྣམས་ཀྱིས་རྒྱ་གར་ཡི་གེ་ཀློག་ཙམ་མི་ཤེས་ཀྱང་རྒྱུད་ལ་བྱིན་རླབས་འཇུག་པའི་ཕྱིར་དང་སྐད་ལ་བག་ཆགས་འཇོག་པའི་ཕྱིར་དུ་བཀའ་བསྟན་རྣམས་ཀྱི་མཚན་ཙམ་རྒྱ་གར་སྐད་དུ་སྨོས་ནས་ཡོད་པའི་རྒྱུ་མཚན་ཡང་དེ་ཡིན། སྐད་ཡིག་གང་དང་གང་ཡིན་ན་ཡང་དེའི་ནང་ལ་བརྗོད་བྱ་སངས་རྒྱས་ཀྱི་བཀའ་དང་དེའི་དགོངས་འགྲེལ་རྗེས་འཇུག་མཁས་པའི་བསྟན་བཅོས་ཀྱི་དོན་རྣམས་བཞུགས་ཡོད་ན་སྐྱབས་འགྲོའི་སྒྲུབ་པའི་བསླབ་བྱའི་ནང་དུ་གསུངས་པ་ལྟར་ཡིག་འབྲུ་ན་གཅིག་ཡན་ཆད་ལ་དད་པ་དང་གུས་པ་བྱས་ནས་གཙུག་ཏུ་བཀུར་དགོས་པ་ཡིན། དེ་མིན་དགོས་མེད་འཇིག་རྟེན་གྱི་འཆལ་གཏམ་སོགས་བརྗོད་བྱར་བྱས་པའི་ཡི་གེ་ཙམ་ནི་བོད་དབྱིན་སོགས་ཡི་གེ་གང་ཡིན་ཡང་གཙུག་ཏུ་བཀུར་བའི་གནས་སུ་གྱུར་པ་མ་ཡིན་ནོ།།
ཕྱོགས་གཅིག་ནས་བསམས་ན་གོང་དུ་ཞུས་པའི་གནས་ཚུལ་དེ་ཐམས་ཅད་སྟོན་པའི་མཛད་ཕྲིན་ངོ་མི་ཤེས་པ་དང་བཀའ་དྲིན་དྲན་མ་ཤེས་པ་ལས་བྱུང་བ་ཡིན། ད་ནི་མ་རུང་བའི་བྱ་བ་ངན་པ་དེ་དག་རིང་དུ་བསྐྱུར་ནས་གོང་སྨྲས་བཞིན་སངས་རྒྱས་ཉིད་ཕྱི་དུས་ཀྱི་གདུལ་བྱ་སྐལ་བ་ཅན་རྣམས་ཀྱི་དོན་བྱ་བའི་ཕྱིར་ཡི་གེའི་གཟུགས་སུ་སྤྲུལ་ནས་བྱོན་པ་ཡིན་པས་དེ་ཐམས་ཅད་སངས་རྒྱས་ཀྱི་མཛད་པ་ཕྲིན་ལས་ཡིན་པར་ཤེས་ནས་བཀའ་དྲིན་རྗེས་སུ་དྲན་དགོས་སོ།།
གཞན་ཡང་བཀའ་སྡུད་པ་པོ་རྣམས་དང་། གླེགས་བམ་དང་དཔེ་དེབ་ཏུ་བཞུགས་ཡོད་པའི་སངས་རྒྱས་ཀྱི་བཀའ་རྣམས་ནི་འུ་ཅག་རྣམས་ལ་སངས་རྒྱས་ལས་བཀའ་དྲིན་མི་དམན་པ་ཞིག་ཡིན། རྒྱུ་མཚན་དེ་ལ་བརྟེན་ནས་གླེགས་བམ་དང་དཔེ་དེབ་རྣམས་ནི་མཆོད་ཁང་སོགས་སུ་བཞག་ནས་ཕྱག་མཆོད་འབུལ་བ་སོགས་བྱེད་རྒྱུ་དང་དེ་ལྟར་མ་བྱུང་ནའང་གང་སར་གཏོར་རྐྱང་དང་གཡུག་རྐྱང་མི་བྱེད་པར་གཙང་གནས་སོགས་སུ་བཞག་ནས་བདག་གཉེར་ཡག་པོ་བྱེད་དགོས་པ་ནི་གོང་དུ་ཞུས་མ་ཐག་པ་བཞིན་ཡིན། མདོར་ན་བཀའ་བསྟན་སོགས་བརྗོད་བྱར་བྱས་པའི་ཡི་གེ་གང་ཡིན་ནའང་གཙང་གནས་དང་མཆོད་གནས་སུ་བཞག་ནས་དེ་ལ་དད་གུས་དང་བཅས་ཏེ་ཕྱག་མཆོད་སོགས་བྱེད་དགོས་པ་ཡིན་ནོ། །ཅི་ནས་ཀྱང་འཇོག་ས་མེད་པ་དང་དགོས་མེད་ཀྱི་དཔེ་རྙིང་དེ་འདྲ་ཡོད་པ་ཡིན་ན་གང་བྱུང་བྱུང་གཏོར་གཡུག་མི་བྱེད་པར་མེ་ལྷ་ལ་མཆོད་ན་ལེགས། དེའི་ལས་འགན་ཡང་རང་ཅག་བནྡེ་རྒན་པ་ཚོ་ལ་ཡོད་པ་ཡིན། རྒྱུ་མཚན་གང་ཡིན་སྙམ་ན་དད་ལྡན་མི་མང་རྣམས་དང་དེ་བཞིན་དུ་གྲྭ་ཆུང་རྣམས་ལ་ལམ་སྟོན་བྱེད་མཁན་དང་། ཁོ་ཚོའི་མིག་དཔེ་ལྟ་ས་ང་ཚོ་རྒན་པ་རྣམས་ཆགས་ཀྱི་ཡོད། ཁོང་ཚོ་ནི་ང་ཚོའི་གང་བྱེད་པ་དེའི་ལད་མོ་བྱས་ནས་འོང་བ་ཡིན་པས་དེའི་འགན་དམིགས་བསལ་བ་ང་རང་ཚོ་ལ་ཡོད་པ་ཡིན། གཞན་ཡང་ན་ཆུང་བྱིས་པ་རྣམས་ཀྱིས་མ་བསླབས་ཀྱང་ཤེས་པའི་སློབ་སྦྱོང་ནི་རྒན་པ་རྣམས་ཀྱིས་གང་བྱེད་པ་དེ་ལ་ལད་མོ་བྱ་རྒྱུ་དེ་ཡིན་པ་རེད། ང་ཚོ་རྒན་པ་རྣམས་ཀྱིས་མིག་དཔེ་བཟང་པོ་བསྟན་ན་ན་ཆུང་བྱིས་པ་རྣམས་རང་བཞིན་གྱིས་མི་གཤིས་བཟང་པོ་ཚུལ་དང་ལྡན་པ་ཆགས་ཡོང་གི་རེད། འདི་ནི་ཤིན་ཏུ་དོན་འགངས་ཆེ་བས་བནྡེ་རྒན་པ་རྣམས་སུ་དང་སུ་ཡིན་ཡང་ཐུགས་ཁུར་ཆེར་བཞེས་ནས་འགན་འཁུར་དགོས་པ་ཡིན།
སྙིང་པོ་དྲིལ་ན་གོང་དུ་ཇི་སྐད་ཞུས་པའི་དོན་དེ་ཕར་མི་ལ་བཤད་པ་ཙམ་མིན་པར་རང་ཉིད་ཀྱིས་ཀྱང་དེ་དང་མཐུན་པར་ཚུལ་བཞིན་ལག་བསྟར་བྱས་ནས་གཞན་དག་ལ་ཡང་དེ་ལྟར་ལམ་སྟོན་བྱེད་དགོས་པ་ཡིན། རང་ཉིད་ཀྱིས་ལག་བསྟར་མི་བྱེད་པར་ཁ་ཕར་བསྐོར་ནས་མི་ལ་བཤད་བསྡད་པ་ཡིན་ན་དེས་ཅི་ཡང་མི་ཕན། དཔེར་ན་ཀླུ་ནད་ཅན་གྱི་གང་ཟག་གིས་གཞན་ལ་ཁྱུང་གི་སྒྲུབ་ཐབས་བསྟན་པ་ལྟར་གཞན་ཡིད་ཆེས་པར་དཀའ་བས་དེ་ལ་ཕན་ནུས་གང་ཡང་ཡོད་པ་མ་ཡིན་ནོ།།
༣༠/༠༩/༢༠༢༠
