ལོ་རིམ་བདུན་པའི་སློབ་གཉེར་བ། བསོད་ནམས་འོད་ཟེར།
དྭངས་བསིལ་མཚོ་མོར་བཏབ་པའི་མེ་ཏོག་དེ།།
སྤྲིན་གྱི་ཡོ་ལང་འདུས་པའི་བར་ནས་འཛོམས།།
རྒྱང་རིང་མཆེད་པའི་ནམ་མཁའ་སྦོ་ལུག་ཀྱང་།།
གནམ་འོག་པདྨའི་དྲི་བསུང་ཐུལ་ནས་ཡོད།།
སྐྱ་རེངས་འོད་ཟེར་མདུན་སར་འཁྱུད་དུས་སུ།།
རྨི་ལམ་དེ་ཡང་ཡལ་རྒྱུ་མེད་ན་བསམ།།
ཁྲ་ཆུང་མིག་ཟུང་བཙུམ་པའི་སྲུབས་ཀ་ནས།།
གཞན་གྱི་གསང་བ་ཡོད་ཚད་མཐོང་དོགས་འདུག།
སྦྲང་ཆར་ཟེགས་མ་འཐོར་བ་གཡུ་ལོའི་སྟེང་།།
བསླུ་མེད་བརྩེ་བའི་རང་མདངས་མངོན་ཞིང་འཁྱིལ།།
བྱ་རྒྱལ་རྒོད་པོའི་མིག་འབྲས་འགུལ་མེད་ངང་།།
ཁྱོད་ཀྱི་བརྩེ་བ་བང་སོ་ཞིག་ལ་གཏད།།
གཙང་ཆབ་སྔོན་མོ་བཞུར་བའི་ཕ་རོལ་ན།།
སྙིང་སྡུག་སྙིང་གི་སེམས་པ་འཚོལ་བཞིན་དུ།།
སྐྱེད་ཚལ་འགྲིམ་པའི་གཡུ་སྦྲང་གཞོན་ནུ་དེས།།
ཡིད་འཕྲོག་མེ་ཏོག་བཅུད་ལ་དགའ་བདེས་རོལ།།
དགུན་གྱི་གྲང་ངར་ཆེ་བའི་མཚན་མོ་དེར།།
ང་ཡིས་ཁྱེད་ཀྱི་རྐང་རྗེས་འཚོལ་བཞིན་བརྒྱུགས།།
དམིགས་འབེན་མེད་པའི་འགྲོ་ལམ་ཀྱག་ཀྱོག་ནང་།།
ཁྱེད་ཀྱི་ལང་ཚོ་འཇའ་ཚོན་བཞིན་དུ་ཡལ།།
ཁ་བ་སྔར་ལྟར་འབབ་པའི་ཁང་ཆུང་ནས།།
ནམ་རྒྱུན་འདྲ་བའི་ཁྱེད་ཀྱི་གོམ་ཁ་ཚོར།།
རང་གི་རྐང་རྗེས་ཕྱིར་མིག་ལྟ་དུས་སུ།།
མདུན་གྱི་སྒེའུ་ཁུང་འགྲམ་ན་ཁྱེད་ཉིད་མཐོང་།།
ང་ནི་ཁྱེད་ཀྱི་གསང་བའི་རྗེས་འབྲངས་ནས།།
ཤུལ་ལམ་རིང་མོ་ཞིག་ཀྱང་ཟད་ལ་ཉེ།།
མཚོ་སྐྱེས་སྲོག་ཆགས་འགྱུར་ལྡོག་ཆེ་ན་ཡང་།།
རྒས་ཤིང་རྒུད་པའི་བར་དུ་ཁྱེད་ཉིད་འཚོལ།།
ཡོད་ཚད་ཅི་འདྲའི་འཇིག་པར་སླ་ན་ཡང་།།
ང་ནི་ཁྱེད་ཀྱི་འཇིག་རྟེན་དཀྱིལ་ན་ཡོད།།
འཇའ་དང་འོད་ཀྱི་ཁ་དོག་མི་འདུག་ན།།
གནས་ལུགས་གནམ་གྱི་རྒྱལ་མོར་སྒུག་གིན་མཆིས།།
