«སྤྱི་ལོ་ ༢༠༢༡ ལོའི་པདྨའི་རང་མདངས་འདོན་ཐེངས་སྔ་མའི་གབ་ལན།»
ལོ་རིམ་བཞི་པའི་སློབ་གཉེར་བ། བློ་བཟང་བསྟན་འཛིན།
བཟོ་དབྱིབས་སྲབ་མཐུག་གཅིག་ཏུ་མ་ངེས་པ།།
འདི་དང་ཕྱི་མར་ལེགས་ཚོགས་འབྱུང་བའི་གནས།།
ཇི་ཙམ་འབྲེལ་འདྲིས་མང་ན་བློ་སྐྱེད་སྟེར།།
རྩ་ཆེའི་དངོས་དེར་དཔེ་དེབ་ཅེས་སུ་གྲགས།།
ནག་པོ་རྒྱ་ནས་རྒྱལ་ཁམས་གང་སར་ཤོར།།
གོ་ལའི་ཁྱོན་འདིར་གྱོང་གུད་སྣ་མང་བསྐྲུན།།
མཐོ་དམན་རྒན་གཞོན་སྐྱ་སེར་ཕོ་མོ་ཀུན།།
ཁྱོད་ལ་མི་སྐྲག་མི་འདུག་ཏོག་དབྱིབས་ནད།།
ལེགས་ལམ་བཀོལ་ན་ཡོན་ཏན་འབྱུང་བའི་གནས།།
ཉེས་ལམ་སྤྱད་ན་ཐུར་དུ་འདྲུད་པ་སྟེ།།
དབང་པོ་དྭངས་མའི་འདྲེན་བྱེད་ཟུང་གི་གཤེད།།
ལག་ཐོག་ཁ་པར་ཀུན་ཀྱི་མིག་ལམ་མཛེས།།
ཐོབ་ཤོར་རྒྱལ་ཁམས་འགྲན་རྩོད་གཏེ་དཔོན་ནི།།
དྲྭ་བར་འཛུལ་ཚེ་དགའ་སྐྱོའི་ཚོར་འདུ་འདྲེན།།
རྐང་པའི་སྒྱུ་རྩལ་ཅན་ཚོའི་མདུན་ལམ་མཆོག།
རྐང་རྩེད་སྤོ་ལོའི་བསྟན་པ་ཇེ་དར་རེད།།
གནའ་བོའི་ཡབ་ཆེན་ཕྱག་སོར་ནས་བརྒྱུད་ཅིང་།།
ཁུ་བྱུག་སྔོན་མོའི་གྲེ་འགྱུར་ལས་སྙན་པའི།།
སྡེབ་ལེགས་དབྱངས་དང་ལྷན་ཅིག་འཁྲོལ་པའི་མོད།།
སེམས་སུ་དགའ་སྤྲོ་སྤེལ་འདི་རྒྱུད་མངས་ལགས།།
