རྨུགས་སངས་ཚུལ་ཁྲིམས། (བོད་དཔལ་ཡུལ།)
བྱང་ཕྱོགས་གངས་ཅན་ས་ལའི་སྨན་ལྗོངས་སུ།།
ལས་ཀྱིས་མེ་ཏོག་ཕོག་པའི་དུས་རྟགས་ཤར།།
སྟེང་ཕྱོགས་འོད་གསལ་ལྷ་ཡི་རིགས་རྒྱུད་འཛིན།།
ཨེ་མ་སྐྱེས་བུ་ཁྱེད་ཉིད་གཙུག་ཏུ་བཀུར།།
ཟླ་བྲལ་རོང་ཀློང་རིག་པའི་དཔའ་བོ་ཞེས།།
མཚན་སྙན་སྲིད་པའི་ཁྱོན་དུ་གྲགས་ནའང་།།
ཁྱེད་ཀྱི་ཤེས་རབ་རལ་གྲིའི་གཟི་འོད་ཀྱིས།།
ས་ཆེན་ཡོམ་གྱིས་སྒུལ་བ་ངོ་མཚར་ཆེ།།
ལྷོ་ཕྱོགས་འཕགས་ཡུལ་ཞེས་པའི་གདན་ས་ན།།
དྲང་ངེས་རྣམ་གཞག་འབྱེད་པའི་ཤིང་རྟ་ཆེ།།
ལུང་རྟོགས་རྒྱལ་རྔ་རྡུང་བའི་ཀླུ་སྒྲུབ་སོགས།།
རྣམ་དཔྱོད་མཁྱེན་རྒྱ་ཆེ་ཆུང་སུ་ཡིས་གཞལ།།
ལྷོ་གླིང་འཛིན་མའི་ཁྱོན་གྱི་ཡུལ་གྲུ་འདིར།།
རིགས་ལམ་རྣམ་པར་དཔྱོད་མཁས་མང་ན་ཡང་།།
ལོག་རྟོག་བྲག་རི་བརྟོལ་བའི་ལེགས་བཤད་འདི།།
བདེན་པའི་དར་ཆ་སྒྲེང་མཁན་ཁྱེད་ཉིད་ཙམ།།
རྙིང་བསྟན་ཉི་མ་རི་རྩེར་ནུབ་ལ་ཉེ།།
དུས་ཀྱི་ཁུགས་པ་གསོ་བའི་མི་དབང་ལགས།།
གཞུང་བཟང་ཡིད་བཞིན་ནོར་བུའི་འགྲོ་དོན་འདི།།
ས་སྟེང་གསེར་གྱིས་བཀང་ཡང་དྲིན་མི་ཁུགས།།
སྔ་འགྱུར་བསྟན་ལ་ལྷགས་རླུང་བདོ་བའི་དུས།།
དྲིང་ལ་མི་འཇོག་ལྟ་གྲུབ་གཙང་མ་འཛིན།།
དྲང་དུ་མི་བཏུབ་ངེས་ཤེས་ཟབ་མོ་རྙེད།།
ཤེས་རབ་སྤྱན་འབྱེད་བྱེད་མཁན་ཁྱེད་ཉིད་ཙམ།།
གཞན་ཟེར་འགྲམ་ཆུ་ལྡང་ནས་མཁས་པར་རློམ།།
གཞན་མཐོང་ཡིད་སྨོན་ཤོར་བའི་བླུན་པོའི་ཁྱུ།།
བསྟན་པའི་ཕ་ཆོས་ཤོར་བའི་འགག་མདོ་དེར།།
མི་ནུབ་རྒྱལ་མཚན་སྒྲེང་མཁན་ཁྱེད་ཉིད་ཙམ།།
གྲུབ་ཐོབ་འགའ་རེས་གཏེར་མ་གལ་ཆེན་མཐོང་།།
མཁས་པ་ལ་ལ་བཀའ་མར་ཐུགས་རྩིས་ཆེ།།
བཀའ་གཏེར་ཟུང་འཇུག་སྨྲ་བའི་ཤེས་རབ་ཅན།།
སྨག་ལ་སྒྲོན་མེ་སྦར་མཁན་ཁྱེད་ཉིད་ཙམ།།
ཡོངས་རྫོགས་གསང་ཆེན་བསྟན་པའི་མཚན་སྙན་རྔ།།
མི་ནུབ་ཕྱོགས་སུ་བརྡུང་བའི་མཛད་འཕྲིན་འདི།།
ཡང་ཡང་དྲན་ན་ཁྱེད་ཞལ་མཇལ་སྙིང་འདོད།།
བསམ་ཞིང་བསམ་ན་བླ་མ་ཁྱེད་རང་དྲན།།
༢༠༢༢/༠༦/༢༧
