ཆོས་གྲགས་རྒྱ་མཚོ། (སྦིར་དཔལ་ཡུལ་ཆོས་འཁོར་གླིང་།)
གངས་དཀར་ལྷག་བསམ་གཙང་མའི་བཞུར་རྒྱུན་གྱིས།།
སྙིང་སྟོབས་གོ་ཆ་བཙན་པའི་རིགས་སུ་བཙས།།
ཐུགས་བསྐྱེད་ཁ་བའི་མདངས་ལ་སྙེམས་བྱེད་པའི།།
གཙུག་ལག་བརྒྱ་བའི་དཔལ་མཛོད་ཐུ་མིར་འདུད།།
རིན་ཆེན་བྱེ་བའི་ཆུ་གཏེར་རྒྱ་མཚོའི་ཀློང་།།
ཤེས་རིག་ཡོན་ཏན་གང་གི་དཔལ་དོ་བའི།།
དབྱིག་ནོར་མ་མཆིས་མཁས་རྒུའི་སྤྱན་ཟུང་རྒྱན།།
རྟག་པར་འཆང་ལས་རྗེས་སུ་རབ་ཏུ་དཔོག།
བློ་གསར་རིག་པའི་ཆུ་ཕྲན་སྟོང་གི་ནི།།
འཇུག་ངོགས་ཟབ་ཡངས་ཤེས་རིག་རྒྱ་མཚོ་སྟེ།།
གང་དང་འདྲེས་ན་དྭངས་གཙང་རླབས་རྒྱུན་གྱིས།།
མི་ཤེས་རྨོངས་པའི་དྲི་མ་འཁྲུད་མཛད་དོ།།
དེ་ལས་དཔེ་ཀློག་བྱ་བ་ཀུན་གྱི་མཆོག།
མཁས་པའི་ལེགས་བཤད་བདག་གིར་བྱ་བ་ལ།།
འདྲེན་པ་བླ་མེད་དཔེ་ཀློག་དཀོན་མཆོག་སྟེ།།
ཁམས་གསུམ་ཚ་གདུང་ཞི་བའི་སྦྲང་ཆར་ཡིན།།
ཁྱད་པར་སེམས་ཉིད་གསོ་བའི་ངལ་སྟེགས་ཏེ།།
བསླབ་གསུམ་རིན་ཆེན་གཙང་མའི་ས་གཞི་ལ།།
སྒོ་གསུམ་དགེ་བའི་བརླན་གྱིས་ཡོངས་ཁྱབ་ན།།
ཐེག་གསུམ་ལྗོན་པ་བཟང་པོའི་བསིལ་གྲིབ་འབྱུང་།།
སྲིད་པའི་འདིར་སྣང་ཕུན་ཚོགས་རིང་དོར་ཞིང་།།
དམ་པའི་ཚངས་སྤྱོད་དགེ་བའི་བརྟུལ་ཞུགས་ཀྱིས།།
ཉམས་དགའི་དབེན་པར་བསྟེན་པའི་མི་བོ་ཆེས།།
ལེགས་པར་བཤད་པའི་དོན་རྣམས་དེ་ཡིས་དྲངས།།
མཁྱེན་རབ་དཀྱིལ་འཁོར་རྫོགས་པའི་མཁས་རྣམས་ཀྱིས།།
ལོ་མང་རིགས་པས་བསྒྲུབས་པའི་ལེགས་བཤད་བཅུད།།
དཔེ་ཀློག་ཧུབ་གཅིག་གང་གིས་ཡུད་ཙམ་ལ།།
རིག་པའི་དཔའ་བོའི་གྲོང་དུ་སྐྱེལ་བ་མང་།།
རྟོག་གེའི་མིག་གིས་བསླད་པའི་ཚན་རྩལ་དང་།།
རྩོལ་བྱུང་དེང་རབས་གསར་པའི་ཡུལ་གྲུ་ནས།།
གལ་ཆེན་རྒྱུན་ཤེས་མང་པོ་མ་ཤེས་ན།།
གྲུ་དཔོན་མེད་པར་རྒྱ་མཚོར་འཇུག་དང་མཚུངས།།
དེས་ན་སྣ་མང་བཀྲ་བའི་འཇིག་རྟེན་འདིར།།
ཤེས་རིག་འོད་སྟོང་འབར་བའི་མིག་དཀྱུས་ཀྱིས།།
རྡོག་མཐིལ་གང་དུ་འཇོག་པ་མཐོང་དགོས་ན།།
དཔེ་ཀློག་ལུགས་གཉིས་གསལ་བའི་སྒྲོན་མེ་སྤོར།།
རབ་སྙན་ཚིག་གི་བཀོད་པ་མཛེས་ཤིང་སྡུག།
མཁས་རྣམས་མནོ་བསམ་འཁོར་བའི་གཞི་མ་སྟེ།།
དབྱངས་གསལ་རྩེད་འཇོ་དགའ་མའི་འཕང་བ་ཡི།།
ཉམས་འགྱུར་སྟོང་ལ་ལྟ་བའང་དཔེ་ཀློག་ཡིན།།
བཅུ་ཕྲག་རིག་པའི་གན་དྷོ་ལ་ཡི་གྲོང་།།
ཅི་དགར་ཉུལ་བའི་ལམ་གྱི་རྒྱགས་ཕྱེ་སྟེ།།
ཤེས་རིག་རྒྱ་མཚོའི་ཕ་མཐར་བགྲོད་པ་ལ།།
དཔེ་ཀློག་བཞོན་པ་བཟང་པོ་མེད་ཐབས་མེད།།
མེས་པོའི་རྣམ་ཤེས་འཁོར་བའི་གླེགས་བམ་གྱི།།
སྙིང་བཅུད་མ་ལུས་སྟེར་བའི་འདོད་འཇོའི་བ།།
རྡུལ་བྲལ་གནས་ལུགས་དཔྱོད་པའི་ཞིང་ས་འདིའི།།
ཕ་རྗེས་བུ་ཡིས་བཟུང་བར་དཔེ་ཀློག་མཁོ།།
འཇིག་རྟེན་མིག་གཅིག་དག་ནི་ཟུམ་གྱུར་ཞིང་།།
དམ་པ་རྣམས་ཀྱང་མི་སྨྲ་བཞུགས་གྱུར་ན།།
སྣ་ཚོགས་གཙུག་ལག་འཛིན་པའི་དཔེ་སྒྲོམ་རྩར།།
ཁེར་རྐྱང་འཚོ་བའི་གསེང་གི་བདེ་སྐྱིད་འཚོལ།།
དེང་རབས་སྐྱེས་བུ་ཕལ་ནི་གཅམ་ཚིག་དགའ།།
དོན་མེད་ངག་འཁྱལ་མང་པོས་ལས་མེད་སྐྱེལ།།
དེ་བས་རང་གི་ཁོམ་པ་དཔེ་ཀློག་ལ།།
གཏོང་དང་ཕུགས་བསམ་གངས་ལ་ཉི་མ་འཆར།།
དཔེ་ཀློག་བྱ་བ་སྤྲོ་གར་ཆས་དང་མཚུངས།།
སྙན་འགྱུར་ཚིག་གིས་སྤྱན་ཟུང་ངལ་གསོ་བྱེད།།
ངེས་དོན་གཏམ་གྱིས་རང་བློ་ལྗོངས་རྒྱུར་འཁྲིད།།
དཔེ་ཀློག་དགེ་ཕན་བརྗོད་ཀྱིས་མི་ལང་ངོ་།།
