སྔོན་འགྲོ་འཛིན་གྲྭའི་སློབ་གཉེར་བ། ཚེ་བརྟན།
ཆུ་འཛིན་བན་བུན་འཁྲིགས་པའི་དགའ་ལྡན་ཞིང་ནས།།
མཛེས་སྡུག་དར་གྱི་སྣེ་མོ་རྒྱང་ནས་བསྐྱངས་ཤིང་།།
སྣ་ཚོགས་འཇའ་གུར༌ཀློང་གི་མཁའ་འགྲོ་སྡེ་ལྔས།།
གསེར་གྱི་མི་མཆོག་དམ་པར་ཕེབས་བསུ་སྔ་སོང་།།
ལྷགས་རླུང་ལྷོད་ཀྱིས་རྒྱུ་བའི་སྲོད་དུས་ཤིག་ལ།།
ཟླ་འོད་མཚོ་རུ་ལྷུང་བའི་མཚན་ལྗོངས་དེ་ནས།།
ཐོངས་ཀྱི་སྐར་ཚོགས་བྱེ་བའི་རྣམ་ཤེས་འཁྱམ་པོས།།
ཁྱེད་ཀྱི་རྣམ་ཐར་ཚོར་བཞིན་གྲང་འདར་བསླངས་སོང་།།
དཀར་ངོགས་འཇིག་རྟེན་ཞིང་གི་ལོ་ཟླ་ནག་པོ།།
ས་གསུམ་སྨག་གིས་བསྡམས་པའི་ཁ་སང་ད་ཞག།
འཁོར་ཚོགས་སྨྲེ་ངག་འཐིབས་པའི་འོ་འདོད་འབོད་སྒྲ།།
རྒྱང་ནས་གསན་པ་ཨེ་བྱུང་དྲིན་ཆེན་བླ་མ།།
གཞན་ཕན་ལྷག་བསམ་དཀར་པོ་ཁུར་དུ་བཞེས་ཤིང་།།
རྔུལ་ཆུའི་ཟུངས་ཁྲག་ཐིགས་པ་རྒྱང་དུ་བསྐྱུར་ནས།།
མདུན་སྐྱོད་སྤོབས་པའི་རྡོ་རྗེ་བྲག་གི་རང་གཤིས།།
ཡོད་ཚད་ཐག་སེ་བཅད་པར་ཅི་འདྲའི་སྐྱོ་ཨང་།།
ལོ་ཟླའི་གོམ་ཁ་ལྕི་མོའི་དུས་ཀྱི་ཀློང་ནས།།
ཉིན་མཚན་དལ་བ་དལ་བུར་རླུང་གིས་དེད་དུས།།
ལས་དབང་སྐྱུར་མོ་ཡིན་པའི་འཚོ་བའི་ཁ་སྟབས།།
ཡ་ཆུང་སེམས་པའི་སྦུག་ནས་ན་ཟུག་འཁྱིལ་སོང་།།
དགོང་ཁའི་ཉི་མ་སེར་པོ་ནུབ་ཏུ་ཆས་ཀྱང་།།
བརྩེ་བའི་ཟླ་འོད་དཀར་པོ་ཤར་ལ་འཛུམ་ཕྱིར།།
རེ་སྒུག་མེ་ཏོག་དཀར་པོ་སྙིང་ལ་འཚང་ཞིང་།།
ཡིད་ཆེས་སྟོང་གིས་སྨྲེ་ངག་གླུ་རུ་གྱེར་ཡོད།།
