ལོ་རིམ་དྲུག་པའི་སློབ་གཉེར་བ། སངས་རྒྱས་བསྟན་འཛིན།
སྐྱེ་མེད་ཆོས་སྐུའི་ཕོ་བྲང་བརྗིད་པོར་སྣང་སྲིད་དག་པའི་རོ་བརྒྱ་ལས།།
འགག་མེད་ཡེ་ཤེས་རང་རྩལ་རྫོགས་པའི་མྱོང་བ་མཐར་ཐུག་རྙེད་ཟིན་ཀྱང་།།
རབ་འབྱམས་གདུལ་བྱའི་ལྷ་ལམ་ཡངས་པོ་རིན་ཆེན་བཻ་ཌཱུའི་མེ་ལོང་ལ།།
ཚོན་གྱིས་མ་བསྒྱུར་རྣམ་ཐར་ཟབ་མོའི་དག་པའི་གཟུགས་བརྙན་ཅིར་ཡང་སྟོན།།
ཁ་བའི་ཡུལ་ལ་དུས་ངན་ཤར་བའི་ཡོ་ལང་བུ་ཡུག་འཚུབ་གྱུར་ཚེ།།
ཟག་མེད་མཁྱེན་པའི་རྒྱང་ཤེལ་མངའ་བའི་སྐྱེས་ཆེན་དམ་པ་མང་པོ་ཡིས།།
པདྨའི་རིང་ལུགས་མི་ནུབ་རྒྱལ་མཚན་སྒྲེང་མཛད་ཤཱཀྱའི་སྲས་གཅིག་པུ།།
མགོན་པོ་གང་ཉིད་ཡིན་པར་གཟིགས་པས་དབུགས་རིང་ཕྱུང་བཞིན་འཛུམ་གྱིས་བསུས།།
བྱང་ཕྱོགས་བསིལ་བའི་ཡུལ་ལྗོངས་དེ་ནས་སངས་རྒྱས་བསྟན་པའི་ཁུར་ཆེན་དེ།།
ལྕི་ཡང་གདུང་བའི་འཁུན་སྒྲ་མེད་པར་འཕགས་ཡུལ་ལྷོ་རུ་བྱོན་པ་ཡི།།
གཏམ་བཟང་དབྱར་རྔའི་འུར་སྒྲ་དིར་དིར་གནམ་ས་གང་བར་སྒྲོག་པའི་ཚེ།།
དད་ལྡན་རྨ་བྱ་བྱེ་བ་འབུམ་གྱི་མིག་ཟུང་བརླན་པར་སོམ་ཉི་བྲལ།།
གང་སྐུ་ངལ་བའི་དབུ་སྐྲའི་རྩེ་ནས་ཟད་མེད་རྔུལ་ཆུའི་ཆར་བབས་ཀྱང་།།
མི་འགྱུར་བརྟན་པའི་རྡོ་རིང་དེ་ནས་དམ་བཅའི་རི་མོ་མི་ཡལ་བར།།
བསྟན་འགྲོར་སྨན་པའི་བསྟི་གནས་ཆེན་པོ་རྣམ་གླིང་ཆོས་ཀྱི་གྲོང་ཁྱེར་འདི།།
པདྨ་འོད་ཀྱི་ཞིང་དང་འགྲན་ཕྱིར་བསྐྲུན་པ་མིན་ནམ་གྲུབ་དབང་རྗེ།།
ངེས་འབྱུང་ཐུགས་ཀྱི་གཏེར་ཁ་བརྡོལ་བས་བསླབ་གསུམ་ནོར་གྱི་རིན་ཆེན་རྙེད།།
རིན་ཆེན་འདི་ནི་མིག་ལྟར་བསྲུངས་བས་ཚུལ་ཁྲིམས་དག་པའི་དྲི་བཟང་རྒྱས།།
དྲི་བཟང་བུ་མོའི་འཇོ་སྒེག་ངོམས་པས་ཙན་དན་སྦྲུལ་གྱི་སྙིང་པོ་ཅན།།
ང་འོ་སྙམ་པའི་ཁེངས་དྲེགས་ཐམས་ཅད་འཇོམས་པར་བྱས་སོ་གྲུབ་དབང་རྗེ།།
འདོད་ཡོན་སྣ་ལྔའི་སྒྱུ་མ་མཁན་པོས་ཕུལ་བྱུང་བསླུ་བྲིད་ནུས་རྩལ་གྱིས།།
ལུས་ཅན་མ་ལུས་འཁོར་བའི་གྲོང་དུ་ཟིམ་ཟིམ་ཆར་བཞིན་བསྙིལ་བྱས་ཀྱང་།།
གང་ཞིག་ཤེས་བྱའི་བུད་ཤིང་མ་ལུས་སྲེག་པའི་ཡེ་ཤེས་སྤྱན་ཟུང་གིས།།
ཅེར་རེར་གཟིགས་པས་སྒྱུ་མ་མཁན་པོ་འཇིགས་པར་བྱས་སོ་གྲུབ་དབང་རྗེ།།
ཉོན་མོངས་སྤྲིན་བྲལ་ཐུགས་གཤིས་སྒམ་པོའི་སྔོ་བསངས་བུ་མོའི་ལྟོ་བ་ལ།།
དུག་ལྔའི་མདའ་མོས་གཡོ་སྒྱུ་མཁས་པའི་འཁྱོག་པོའི་གཞུ་ཤིང་བཀང་བྱས་ནས།།
ཡང་ཡང་འབིགས་པར་རྩོམ་པའི་ངལ་བས་ཨ་ཐང་ཆད་པའི་དགྲ་བོའི་དཔུང་།།
བརྩེ་བའི་ཕྱག་གིས་འཇིལ་བར་མཛད་པའི་སྙིང་རྗེའི་བདག་པོ་གྲུབ་དབང་རྗེ།།
སྲིད་གསུམ་བདེ་བའི་སྲོག་རྩ་གཅོད་པའི་མ་རུང་བསྟན་པའི་དགྲ་བོ་དང་།།
འདྲེ་དང་འབྱུང་པོའི་དམག་དཔུང་ཡན་ལག་བཞི་ཡིས་བསྐོར་བའི་དོ་ར་རུ།།
མི་འཇིགས་སེངྒེའི་གར་སྟབས་གཅིག་གིས་ཕས་རྒོལ་གནོན་པའི་ནུས་པ་ལ།།
བསྔགས་པའི་ཚངས་དབྱངས་སྟོང་གསུམ་འཇིག་རྟེན་ཀུན་ན་ཁྱབ་བོ་གྲུབ་དབང་རྗེ།།
མཁྱེན་བརྩེ་ནུས་པའི་གདེངས་ཀས་བརྒྱན་ཅིང་མཁས་བཙུན་བཟང་པོའི་གསེར་ཁྲི་ལ།།
གཞན་ཕན་བདུད་རྩིས་རྫིང་བུར་བསྐྱིལ་ཅིང་སྤྱན་རས་ཟུམ་པ་མེད་པ་ཡི།།
མཛད་ཕྲིན་རྒྱ་མཚོའི་རླབས་ཕྲེང་རེ་རེ་ཡི་གེའི་གཟུགས་སུ་འགོད་གྱུར་ན།།
ཁམས་གསུམ་གནས་ཀྱི་སྨྱུ་གུ་ཟད་ཀྱང་རྫོགས་པའི་དུས་ཤིག་ཡོད་དམ་ཅི།།
དྲི་མས་མ་གོས་མཛད་ཕྲིན་རླབས་ཆེན་གངས་སེང་དཀར་མོའི་འོ་ཕུད་འདི།།
ཇི་བཞིན་བརྗོད་པའི་ཚིག་འབྲུ་བཟང་པོ་རིན་ཆེན་གསེར་གྱི་སྣོད་དགོས་ཀྱང་།།
སྐྱེས་སྟོབས་རིག་པའི་རལ་གྲིའི་སོ་ལ་སྦྱོང་པའི་རྣོ་ལེན་མ་བྱས་པས།།
ཤིན་ཏུ་དམན་ཡང་ཚོར་བའི་རླབས་ཕྲེང་སྙིང་གར་འཕྱོ་ཚེ་བྱེད་ཐབས་བྲལ།།
