ལོ་རིམ་དྲུག་པའི་སློབ་གཉེར་བ། ཤེས་རབ་བསྟན་འཛིན།
ཚོགས་གཉིས་རབ་རྫོགས་མཚན་དཔེའི་རྒྱན་གྱིས་སྤྲས།།
ཐུགས་རྗེ་པདྨའི་གེ་སར་ཚར་དུ་དངར།།
བག་བཟང་སྤྱོད་པའི་དྲི་བསུང་ཕྱོགས་མཐར་འཐུལ།།
རིག་ཀུན་ཁྱབ་བདག་གྲུབ་དབང་བླ་མར་འདུད།།
རིག་སྟོང་ཡེ་ཤེས་གཉུག་མའི་དཀྱིལ་འཁོར་ནས།།
མ་བཅོས་ལྷུན་གྱིས་གྲུབ་པའི་རོལ་གར་ཤར།།
སྣ་ཚོགས་ཅིར་ཡང་བསྐྲུན་པའི་མཛད་འཕྲིན་གྱིས།།
སྐར་ཚོགས་འབུམ་གྱི་འཁོར་རྣམས་ངང་གིས་འདུས།།
མི་རྟོག་ཡེ་ཤེས་དྭངས་མའི་མཁའ་དབྱིངས་ནས།།
འཁྲུལ་མེད་ནོར་བུའི་འོད་ཀྱིས་རབ་ཏུ་བཏེག།
བསྟན་པའི་སྲོག་ཤིང་འགྱེལ་ལ་ཉེ་འགྱུར་བས།།
ཁྱེད་ཀྱི་ཐུགས་རྗེ་ལྕགས་ཀྱུས་བསླང་བར་མཛོད།།
སྐུ་ཡི་གཟི་མདངས་མཛེས་ཉམས་འཕྲོ་བའི་དཔལ།།
གསུང་མཆོག་འགག་མེད་ཚང་དབྱངས་སྒྲོག་པར་མཛད།།
ཐུགས་རྗེ་འདབ་མ་ཀུན་ཏུ་རྒྱས་གྱུར་བས།།
རྨད་བྱུང་ཆོས་སྤྲིན་ཕྱོགས་ཀུན་དར་ཞིང་རྒྱས།།
མཁའ་དབྱིངས་རྒྱུ་སྐར་ཉི་ཟླའི་འོད་ཟེར་གྱི།།
ཆུ་འཛིན་སྤྲིན་པའི་གསེབ་ཀྱི་བསིལ་གདུགས་ལྟར།།
མ་རིག་འདམ་གྱིས་བཅིངས་པའི་འགྲོ་དྲུག་རྣམས།།
བསིལ་ཟེར་འོད་མདངས་བྱིན་པའི་གྲུབ་དབང་རྗེ།།
བྱམས་བརྩེ་གཤོག་ཟུང་རིང་དུ་བརྐྱངས་བྱས་ཏེ།།
བུང་བ་ངོམ་པའི་ཆོས་སྒར་གསར་དུ་བསྐྲུན།།
ཟད་མེད་དམ་ཆོས་ནོར་རྣམས་ཆུ་གཏེར་བཞིན།།
སྐོམ་པའི་ངལ་དུབ་སེལ་བའི་གྲུབ་དབང་རྗེ།།
བསྟན་པའི་འོད་སྣང་ནུབ་རིརབཞུད་པའི་ཚེ།།
ཤ་རིའི་ཕྲག་པའི་རྩེ་ནས་ཐུགས་བསྐྱེད་བཞད།།
སྒྲོན་མེར་བཏེག་པའི་འཁོར་ལོ་རྣམ་པ་གསུམ།།
ལྷོ་ཕྱོགས་མཐའ་ནས་རབ་ཏུ་གསལ་བར་མཛད།།
སྙིགས་དུས་དུག་ལྔ་མེ་ལྕེ་འབར་བའི་ཁྲོད།།
མི་གཡོ་རྩེ་གཅིག་ངང་དུ་གཞོལ་བ་ཡིས།།
འགྲོ་བའི་རྩ་ལག་ཕན་པའི་ཐུགས་བསྐྱེད་དེ།།
བསྟན་པའི་གཞི་མ་དགེ་འདུན་སྐར་ཚོགས་བསྐྲུན།།
ཟབ་གསང་མཆོག་གི་དངོས་གྲུབ་བདུད་རྩི་ཡིས།།
སྐལ་ལྡན་གདུལ་བྱའི་སྙིང་ལ་སྦྲང་ཆར་འབེབས།།
གཟུང་འཛིན་བཅིངས་པའི་འགྲོ་བ་མཐའ་ཀླས་པ།།
དགའ་ཚལ་ཞིང་མཆོག་གླིང་དུ་ཁྱེད་ཀྱིས་ཁྲིད།།
མ་ལ་ཡ་ཡི་རྒྱ་མཚོའི་མཐའ་ངོགས་ནས།།
དམར་སེར་མདངས་ཀྱིས་དཀྲིས་པའི་བ་དན་གཡོ།།
སྙན་འཇེབས་ཆོས་དབྱངས་ཀུན་ཏུ་སྒྲོག་བྱེད་པའི།།
བསྟན་པའི་མེ་རོ་ཁྱེད་ཀྱིས་གསོ་བར་བྱས།།
གཞན་ཕན་དཔག་བསམ་སྡོང་པོའི་རྩེ་མོ་ནས།།
འདོད་དགུ་འབྱུང་བའི་དངོས་གྲུབ་ཆར་དུ་བསྙིལ།།
ཡལ་འདབ་རྒྱས་པའི་གྲིབ་བསིལ་ལོ་མའི་འོག །
བདེ་སྐྱིད་འཕེལ་བ་གྲུབ་དབང་བླ་མའི་དྲིན།།
