ལོ་རིམ་གཉིས་པའི་སློབ་གཉེར་བ། པདྨ་བཀྲ་ཤིས།
སྤྱི་གཙུག་པད་ཟླའི་སྟེང་དུ་བཞུགས་པ་ཡི།།
ཐུགས་བསྐྱེད་ནམ་མཁའི་ངོས་ལས་ཆེས་ཡངས་པའི།།
དུས་གསུམ་གཅིག་ཏུ་མཁྱེན་པའི་བླ་མ་ཡིས།།
ནམ་ཡང་མི་རྟག་དྲན་པའི་འདུ་ཤེས་སྩོལ།།
ཡུན་ཐུང་མི་ཚེའི་འགྲོ་ལུགས་གཙིགས་ཆེན་གྱིས།།
ནུས་སྤོབས་ཡོད་ཚད་སྤུངས་ནས་སྲིད་པ་རུ།།
བརྗིད་པའི་ཕོ་བྲང་བརྩིགས་པའི་ཡོ་ལང་དང་།།
མི་རྟག་འཆི་བའི་གྲིབ་གཟུགས་འབྲལ་མེད་འགྲོགས།།
དབྱར་ཁའི་འཇའ་ཚོན་འདྲ་བའི་འཇིག་རྟེན་དེ།།
ཁྲ་ཆུང་མིག་ལ་མཛེས་པའི་གཞོན་ནུ་མ།།
བདེ་སྡུག་ཚོར་བ་སྟེར་ལ་ཐབས་མཁས་པས།།
རང་སེམས་ཁ་ཕྱོགས་མེད་ན་བསླུ་ཐེངས་རེ།།
སྐྱོ་བའི་ལས་སྣང་བཙན་པོའི་ལུང་ཚན་ལ།།
ཆས་འདོད་ཡིད་ལ་མེད་ཀྱང་དབང་མེད་དུ།།
ཇག་ཚོགས་རྟོག་འགྱུའི་གོམ་འགྲོས་དེ་ག་ལ།།
མ་ཕྱོགས་རང་གར་ཐལ་བས་ཡིད་ཐང་ཆད།།
འདོད་པའི་རྒྱ་མཚོ་མ་ཁེངས་བྱེ་དོང་དུ།།
མི་འདོད་ཆུ་སྣེ་འདྲེན་པའི་ངང་ཚུལ་དེས།།
ང་དང་འཁོར་བའི་མགྲོན་པོ་ཐུན་མོང་གི།
ཚུགས་ཀ་འདར་སྐྱོམ་བྱེད་པའི་རྐྱེན་དུ་བྱས།།
ཆགས་སྡང་ཕ་རི་ཚུ་རིའི་དབུ་འཕང་དེ།།
མཐོན་པོ་གནམ་ལ་བཀྱག་པའི་ལས་འབྲས་སུ།།
གཡོ་ཟོལ་ཉེས་ཅན་གྲལ་འགོར་གདན་དྲངས་ཏེ།།
དམྱལ་བའི་མཐིལ་དུ་འཕངས་ནས་དྲན་མེད་བརྒྱལ།།
སྟོན་སྤྲིན་ལང་ལོང་འཕྱུར་བའི་མཁའ་དབུགས་ཁྲོད།།
ཞག་གསུམ་ཡིད་འོང་མེ་ཏོག་དྲི་བསུང་ལ།།
ཆགས་པའི་སྦྲང་ཆུང་ལྡིང་མྱུར་གར་སྟབས་དེར།།
ངོ་མཚར་ཤིན་ཏུ་སྐྱེས་ཏེ་ལོ་ཟླ་ཟད།།
སྒྱུ་མའི་འཇིག་རྟེན་སྐྱེ་འགག་རྣམ་འགྱུར་དེ།།
མདང་དང་དེ་རིང་བར་གྱི་མཚན་ཐུན་ལ།།
ཡུད་ཙམ་གཉིད་པའི་འཁྲུལ་བའི་རྨི་ལམ་ནང་།།
བདེ་སྡུག་ཟློས་གར་སྣ་ཚོགས་སྣང་བ་བཞིན།།
ཐོག་མེད་སྲིད་པའི་ཁོར་ཡུག་ཉུལ་ཉུལ་ནས།།
ལྗིད་ཅན་ངལ་བའི་ཁུར་པོས་གནོན་ཤུགས་ཆེ།།
ད་དུང་ངལ་སྟེགས་ཕྲད་པའི་སྐབས་མ་རྙེད།།
འཆི་བ་མི་རྟག་དྲན་ན་ཐར་པར་གསུངས།།
༠༤/༠༦/༢༠༢༢
