འཆལ་པོ་མདོ་མེད་གསེར་སྨྱོན།
མཚོ་མོའི་ཁ་ལ་གོམ་ཁའི་སྟངས་སྟབས་བསྒྱུར།།
ཐང་དཀར་རྒོད་པོ་འཕུར་བའི་ཤུལ་ལམ་དེར།།
ལ་གཞས་ཟ་ཟི་མགུར་ནས་སེམས་པ་དེ།།
ཉིན་ཞག་དེ་རུ་སྤུངས་ནས་དུས་ཚོད་བསྐྱལ།།
སེམས་པའི་རྦ་རླབས་རྒྱ་མཚོའི་གཏིང་ལ་ཐིམ།།
རྩ་ཁམས་གསེེང་གི་འཕར་ལྡང་གྱེན་ལ་འཕྱོ།།
རྒྱང་རིང་འདི་ནས་སྣང་བ་གནམ་ལ་བཀྱགས།།
དུས་ཀྱི་བགྲོད་ལམ་མཚམས་ན་སྤྲང་འཁྱར་སྐྱོ།།
མེ་ཏོག་འདབ་མ་རྒྱ་མཚོའི་གཏིང་ལ་བསྐུར།།
ཆུ་ངོགས་དེ་རུ་སེམས་ཀྱི་རི་མོ་ཕབ།།
རླབས་རིས་དཀར་པོ་དྲན་པའི་ཁྲོད་ན་བཀོད།།
གླུ་སྒྲ་ཐེངས་གཅིག་ཆུ་ཕྲན་གཞུང་ལ་བཀུག།
ང་ནི་ཚོར་བས་བཟི་བའི་གླུ་བ་ཡིན།།
ཕྱི་ནང་ཐམས་ཅད་ཚོར་བའི་སྒྲིབ་པ་མཐུག།
གློ་མཆིན་བར་ན་ཚོར་བའི་རི་བོ་མཐོ།།
མི་ཞིག་དྲན་པའི་ཚོར་བ་གསོན་པོ་ཡོད།།
དབུགས་ཀྱི་གོང་བུའི་ནང་ན་མི་ཞིག་ཡོད།།
མི་དེ་མིག་འདྲིས་སེམས་འདྲིས་སེམས་ན་ཡོད།།
དེ་རིང་འདི་ནས་དྲན་པའི་ཚོར་བ་སྟོང་།།
བདག་གི་སྙིང་ཁམས་གཏིང་ནས་དྲན་ཞིང་ལྕི།།
ཤིང་ལོ་ཆ་གཅིག་ཆུ་མོའི་དབྱིངས་སུ་བསྐུར།།
ཤིང་ལོ་འདི་ཡང་ཁྱོད་ལ་འཕྲོད་པར་ཤོག།
སེམས་ཀྱི་གཏིང་ན་བྲིས་པའི་ཞལ་རས་དེ།།
ནམ་ཡང་ང་ཡི་སེམས་ནས་ལྷུང་བ་མེད།།
མོས་འདུན་སྤྲིན་པའི་དར་ཐག་དེར་ཕྱོགས་བརྩེགས།།
མེ་ཏོག་གསར་པའི་འདབ་སྟོང་སྤུངས་ནས་ཡོད།།
ཟུར་མིག་མཛའ་སེམས་ཟླ་བའི་མཚོ་མོར་འཕོས།།
དུང་བའི་གངས་ཆབ་བསིལ་མ་སེམས་ན་བརྟན།།
གྲང་རེག་མེད་པའི་གཏམ་སྙན་ཞིམ་ས་དེར།།
ལ་གཞས་མཉམ་སྒྲོག་ཡོད་པ་ཤེས་པར་མཛོད།།
སྣང་བའི་ཁམས་ན་མཛེས་པའི་ཟླ་དཀར་མ།།
ཁེར་རྐྱང་སྣང་བ་མ་བསམ་ལྷོད་པོར་བཞུགས།།
སྤྲིན་པ་ལང་ལོང་གཡོ་བའི་གར་སྟབས་ངོགས།།
ཁྱེད་ཞལ་དྲན་པའི་ལུས་ཀྱི་སྤུ་ལོང་གཟེངས།།
དབྱིབས་ལེགས་བུམ་པའི་མཆུ་སྒྲོས་མཛེས་འབར་མ།།
ལུས་སེམས་བར་ནས་ཁྱེད་ཀྱི་དྲོད་ཁོལ་དྲན༎
ཆུ་མོ་སྤྲིན་དང་བསྣོལ་བའི་ཁ་མཚམས་ནས།།
སེམས་པའི་ཚོར་བ་སྤྲིན་དང་ཆུ་ལ་བཏབ།།
མཆོག་གི་དངོས་གྲུབ་དེ་རུ་བསྒུགས་ནས་ཡོད།།
སྒུག་པའི་དུས་ཚོད་ནམ་ཡང་ཕངས་པ་མེད།།
(ལྦ་རི་དྷེ་བྷ་)ནས་འཆལ་པོ་མདོ་མེད་གསེར་སྨྱོན་གྱིས་ཚོར་འདུ་ཞིག་གི་དབང་གིས་སྐུལ་མ་བྱས་ནས་མགྱོགས་བྲིས་བྱས་སོ།།
