སློབ་སྤྲུལ་འཆི་མེད་ཚེ་དབང་།
ཆེས་མཐོའི་སྨན་པའི་ལག་ཁྱེར་དེ།།
ཆེན་པོ་ཨུ་རུ་སུ་ནས་བཞེས།།
ཉམས་མྱོང་གསེར་ནག་ཐིགས་པ་དེ།།
ལྔ་ལྡན་བལ་པོའི་ཡུལ་དུ་བསགས།།
ཁྲི་ཕྲག་མང་པོའི་ཟླ་ཕོགས་རྣམས།།
ཁྱེད་ཀྱི་མདུན་ན་ས་རྡོ་ཙམ།།
མ་ཆགས་མ་ཞེན་ཞབས་པད་ཟུང་།།
ལྷོ་ཕྱོགས་བེ་ཏའི་ཚལ་ལ་ཕྱོགས།།
གནག་སྣུམ་དབུ་སྐྲའི་ཉག་མ་རེ།།
སྤུ་གྲི་ངར་མའི་དངོ་ལ་བསྐུས།།
སྒྲིག་ཆས་ལྭ་བ་དཀར་པོ་ལ།།
ངུར་སྨྲིག་ཚོས་ཀྱིས་ཁ་དོག་བསྒྱུར།།
འོད་མའི་ཚལ་དང་རྒྱལ་བྱེད་ཚལ།།
ལྷོ་ལ་བསྐྱས་པ་རྣམ་གྲོལ་གླིང་།།
སྨན་པ་འཚོ་བྱེད་གཞོན་ནུ་ཡང་།།
དེང་གི་དུས་སུ་ཁྱེད་ཉིད་དོ།།
ཕ་མས་བུ་ཕྲུག་གཉོར་བ་བཞིན།།
ལོ་ཆུང་བྱིས་པ་བརྩེ་བས་སྐྱོང་།།
གཡོག་བཟང་བདག་པོར་གུས་པ་ལྟར།།
བླ་རྒན་རྣམས་ལ་ལྷག་པར་བྱམས།།
ཐོས་བསམ་མཐའ་རྒྱ་གཅོད་ཞོར་དུ།།
ཉིན་ལྟོ་ཙམ་ཡང་ལྷོད་དལ་དུ།།
མཆོད་པའི་ཁོམ་ལོང་ཅིའི་ཕྱིར་མེད།།
ནད་པ་རྣམས་ལ་བརྩེ་བས་སོ།།
ཏོག་ནད་གོ་ལར་ཁྱབ་ཉེའི་སྐབས།།
ཏག་ཏག་དགོན་འདིར་ཕེབས་ལུགས་སོམས།།
ཀུན་མཁྱེན་གྲུབ་དབང་བླ་མ་རྗེས།།
འདུས་པར་གནང་བའི་དངོས་གྲུབ་ཡིན།།
ནད་ཡམས་འགོག་པའི་གོ་ཁྲབ་དང་།།
ནད་པ་གསོ་བའི་བདུད་རྩི་སྟེ།།
དུས་ཀྱི་གཉན་འཕྲང་ཆེ་བའི་སྐབས།།
སུ་ལའང་མ་སྐྱོན་ཁྱོད་ཀྱི་དྲིན།།
འདུས་པ་རྒྱ་མཚོའི་སེམས་ནང་དུ།།
ཡལ་མེད་མར་མེ་ཚེ་འབར་ཁྱེད།།
ཐོས་བསམ་སྒོམ་གསུམ་མཐར་ཕྱིན་ནས།།
ཨོ་རྒྱན་སྨན་བླ་ཉིད་གྱུར་ཅིག།
༢༠༢༢/༠༦/༠༦
