ལོ་རིམ་ལྔ་པའི་སློབ་གཉེར་བ། ཨོ་རྒྱན་བསྟན་འཛིན།
ཕུན༌ཚོགས༌མཛེས༌སྡུག༌ལྡན༌པའི༌དབྱར༌གྱི༌ནམ༌ཟླ༎
དུས༌ཀྱི༌མདའ་མོའི་སོ་ཁས་གཞན༌དབང༌གྱུར༌ཏེ༎
སྔོ༌ལྗང༌ནེའུ༌གསིང༌འཇམ༌པོའི༌ཁ༌དོག༌འགྱུར༌དུས༎
གཡང༌དཀར༌ལུག༌གུ༌དེ༌ཚོ༌སེམས༌པ༌སྐྱོ༌འདུག།
ཡངས༌བའི་སྤང༌ལྗོངས༌སྟེང༌དུ༌མཛེས༌སྡུག༌ངོམ༌པའི༎
དཀར༌དམར༌མེ༌ཏོག༌ཚོམ༌བུའི༌དྲི༌མདོག༌ཡལ༌ཏེ༎
རྐང༌དྲུག༌མགྲོན༌པོའི༌ཚོགས༌རྣམས༌གཞན༌དུ༌སྐྱོད༌དུས༎
ཤུལ༌ལུས༌བྱིས༌ཆུང༌དེ༌ཚོ༌སེམས༌པ༌སྐྱོ༌འདུག།
ལྷོ༌མཐའི༌རྒྱ༌མཚོར༌ལྷག་པའི་འདབ༌ཆགས༌མ༌བུ༎
རང༌བྱུང༌དུས༌ཀྱི༌འགྱུར༌བའི་ཕོ་ཉ་སླེབས་ནས༎
མི༌སྡོད༌ལྷ༌ལམ༌ངོས༌ནས༌ཕྱོགས༌སུ༌རྒྱུ༌དུས༎
ས༌མཐར་འཁྱམ་པའི་མི་ཞིག་སེམས༌པ༌སྐྱོ༌འདུག།
དཀར༌པོ༌ཁ༌བའི༌འདབ༌མ༌དགུང༌ནས༌ལྷུང༌ཞིང༌༎
གྲང༌བའི༌རེག༌པས༌ས༌གཞི༌དམ༌པོར༌བསྡམས༌ཏེ༎
མཚོ༌ནང༌ཉ༌མོའི་ཕྲེང་བ་དར༌འོག༌རྒྱུ༌དུས༎
ཉ༌པ༌རྒན༌པོ༌དེ༌ཡང༌སེམས༌པ༌སྐྱོ༌འདུག།
བཅོས༌མིན༌བརྩེ༌བའི༌འཛུམ༌གྱིས༌རྟག༌ཏུ༌སྐྱོང༌ཞིང༌༎
ཕྲུ༌གུའི༌བདེ༌དོན༌གཉེར་མཁས༌དྲིན༌ཆེན༌ཕ༌མའི༎
གཉེར༌མའི༌རླབས༌ཀྱི་རི་མོ་འབུར་དུ་དོད་ཚེ།།
ཕ༌མའི༌གཅེས༌ཕྲུག༌དེ༌ཚོ༌སེམས༌པ༌སྐྱོ༌འདུག།
ད༌ནང༌ཤར༌རིའི༌རྩེ༌ནས༌འོད༌སྟོང༌འཕྲོ༌ཞིང༌༎
འགྲོ༌ཁམས༌མུན༌པ༌སེལ༌མཛད༌རྟ༌བདུན༌དབང༌པོ༎
དོ༌ནུབ༌རྒྱང༌རིང༌ཞིག༌ཏུ༌ཕར༌ཕར༌བཞུད༌དུས༎
འཇིག༌རྟེན༌ཁྱིམ་པ༌བ་ཚོ༌སེམས༌པ༌སྐྱོ༌འདུག།
སྙིགས༌དུས༌རྒྱལ༌བསྟན༌མུ༌མེད༌འཇིག༌རྟེན༌ཁམས༌ཀྱི༎
ཕྱོགས༌ཀུན༌རབ༌ཏུ༌གསལ༌མཛད༌བསྟན༌པའི༌ཀ༌ཆེན༎
ལྷུན༌པོ༌འདྲ༌བའི༌སྐྱེས༌ཆེན༌རིམ༌བཞིན༌གཤེགས༌དུས༎
ཤུལ༌ལུས༌སློབ༌བུ༌ང༌ཚོ༌སེམས༌པ༌སྐྱོ༌སོང༌༎
