ལོ་རིམ་དང་པོའི་སློབ་གཉེར་བ། ཕུར་བུ་ཟིལ་གནོན།
སྒྱུ་ལུས་གཡར་པོ་བོར་བའི་བར་དོ་ཡི་རྣམ་ཤེས།།
ཕྱི་མའི་བགྲོད་ལམ་མ་རྙེད་སྡུག་བསྔལ་གྱིས་གནོན་ཅིང་།།
གར་འགྲོ་རང་དབང་བྲལ་བའི་ངེས་མེད་དུ་གྱར་དུས།།
སྐྱེ་སྲིད་དང་པོ་བསུ་མཁན་དྲིན་ཆེན་གྱི་ཨ་མ།།
ཟླ་དགུ་ལུས་ཀྱི་མངལ་ཁྱིམ་དྲོན་མོ་རུ་བསྙལ་ཏེ།།
མ་ངེས་སྐྱིད་སྡུག་ཅི་འཕྲད་གཅེས་ཕྲུག་ལ་སེམས་པའི།།
ལྟེ་ཁྲག་དམར་པོ་དཀར་ངོགས་འཇིག་རྟེན་དུ་བོར་ཚེ།།
ལུས་ཀྱི་ནུ་ཞོས་སྐྱོང་བའི་དྲིན་ཆེན་གྱི་ཨ་མ།།
ཐོགས་དང་ཐུག་པར་དོགས་ནས་རུམ་ཁོང་དུ་འཆང་ཞིང་།།
འགྱེལ་དང་ལྷུང་བར་བསམས་ནས་ཕྱག་ཟུང་གིས་བསྐྱོར་ཏེ།།
རྟག་ཏུ་བརྩེ་བས་མི་བཤོལ་སྙིང་ཁ་རུ་བཟུང་བའི།།
འབྲལ་མེད་གསོ་སྐྱོང་གནང་མཁན་དྲིན་ཆེན་གྱི་ཨ་མ།།
སྐྱག་གཅིན་གཙང་བཙོག་སྣང་བ་རྒྱང་རིང་ལ་བསྐྱུར་ཅིང་།།
ཚ་གྲང་རྔུལ་ཆུའི་ཐིགས་པ་ཡ་ཐོད་ལ་བསུས་ཏེ།།
ཕྱག་ཟུང་སེར་ཀ་གས་ཀྱང་གྲང་ངར་དང་འཐབ་མཁན།།
བཟོད་སྒོམ་དང་ལེན་ནུས་པའི་དྲིན་ཆེན་གྱི་ཨ་མ།།
ཞིམ་པོ་ཟས་ཀྱི་ཕུད་དེ་ཕྲུ་གུ་ལ་སྦྱིན་ཞིང་།།
འཇམ་པོའི་གོས་ཀྱི་རྩེ་མོ་ཕྲུ་གུ་ལ་གཡོགས་ཏེ།།
ཡོད་ཚད་སོ་སོའི་བྱམས་པའི་ཕྲུ་གུ་ལ་འབུལ་བའི།།
རང་ལ་ལྷག་པར་གཅེས་པའི་དྲིན་ཆེན་གྱི་ཨ་མ།།
རྒྱང་རིང་ས་མཐར་ཉུལ་ཡང་རེ་བ་དེ་ཁྱོད་ཡིན།།
སྐྱིད་པའི་དགོད་སྒྲ་སྒྲོག་པའི་འཛུམ་ཆུང་ཡང་ཁྱེད་ཡིན།།
སྡུག་གི་སྨྲེ་ངག་འདོན་དུས་སེམས་གསོ་དེའང་ཁྱེད་ཡིན།།
ཐུགས་བརྩེ་རྒྱང་ནས་གཟིགས་ཤིག་དྲིན་ཆེན་གྱི་ཨ་མ།།
