ལོ་རིམ་ལྔ་པའི་སློབ་གཉེར་བ། ཨོ་རྒྱན་བསྟན་འཛིན།
བརྗིད༌ཆགས༌གངས༌རིས༌བསྐོར༌བའི༌ཕ༌ས༌ནས༎
རྒྱང༌རིང༌ས༌མཐའ༌ཉུལ༌བའི༌གངས༌ཕྲུག༌ངའི༎
ཚེ༌དང༌སྲོག༌ལ༌བར༌ཆད༌མ༌བྱུང༌ན༎
བསིལ༌ལྡན༌ཕ༌ཡུལ༌མཇལ༌དུ༌ལོས༌འགྲོ༌རེད༎
གྲུ༌འཛིན༌པོ༌ཏ༌ལ༌ཡི༌མདུན༌ཐང༌ནས༎
ལས༌ཀྱི༌རླུང༌བུས༌གཞན༌དུ༌ཁྱེར༌སོང༌བའི༎
གངས༌ཕྲུག༌ཚེ༌ལ༌བར༌ཆད༌མ༌བྱུང༌ན༎
ལྷ༌ལྡན༌ཇོ༌བོ༌མཇལ༌དུ༌ལོས༌འགྲོ༌རེད༎
མཐོན༌པོ༌ཧི༌མ༌ལ༌ཡི༌རི༌སྟེང༌ནས༎
རྐང༌རྗེས༌གངས༌ལ༌བཞག༌ནས་བསྐྱོད་མྱོང་བའི༎
གངས༌ཕྲུག༌ཚེ༌ལ༌བར༌ཆད༌མ༌བྱུང༌ན༎
སླར༌ཡང༌གངས༌རི༌བརྒལ༌ཏེ༌ལོས༌འགྲོ༌རེད༎
འཇིགས༌རུང༌གོ༌ཆ༌བཙན༌པོའི༌ཁ༌འགྲམ༌ནས༎
ལས༌ཀྱི༌གྲོགས༌དང༌ལྷན༌དུ༌ཤོར༌སོང༌བའི༎
གངས༌ཕྲུག༌ཚེ༌ལ༌བར༌ཆད༌མ༌བྱུང༌ན༎
ཕ༌ཡུལ༌ཕུ༌ནུ༌མཇལ༌དུ༌ལོས༌འགྲོ༌རེད༎
ཐོག༌མའི༌ལྟེ༌ཁྲག༌གངས༌ནས༌འཕོས༌པ༌ཡི༎
གངས༌ཕྲུག༌ཚེ༌ལ༌བར༌ཆད༌མ༌བྱུང༌ན༎
མཐའ༌མ༌འཆི༌བའི་རྟེན་ཡང་གངས༌ལྗོངས་སུ།།
འཇོག་པའི་སྐལ་བཟང་ལེན་དུ་ལོས་འགྲོ་རེད།།
